1, 2. (a) Anton importantin asainmin so inter ed si Solomon? (b) Akin et mapaga si David parad si Solomon?

SI Solomon et ingganggan ya mangasikaso ed sakey ed saray sankaimportantian ya proyekton panagpaalagey​—say templo ed Jerusalem. Satan et kaukolan ya “makapadinayew a maong, pian say inkabantog tan karakpan na satan et naamtaan ed amin a dalin.” Tan mas importante, say templo so magmaliw ya “abung nen Jehova a tuan Dios.” Tinuro nen Jehova si Solomon bilang manangasikaso ed sayan proyekto.—​1 Awa. 22:1, 5, 9-11.

² Matalek si Arin David ya ontulong so Dios, balet si Solomon et “ugaw ni tan anggapo ni eksperiensya to.” Wala kasi pakpel ton awaten so kimey ya ipaalagey so templo? Kasin agto nasarag itan lapud ugaw ni tan anggapo ni eksperiensya to? Pian nagawaan to itan, kaukolan toy manpakpel tan igapo so kimey.

3. Antoy nayarin naaralan nen Solomon ed inkakpel nen ama to?

³ Nayarin naaralan nen Solomon ed ama to so manpakpel. Nen kabataan ni David, nilabanan to iray masebeg ya ayep ya aningkat ed karnero nen ama to. (1 Sam. 17:34, 35) Makmakpel met ya akilaban  ed makapataktakot ya higanten sundalo ya si Goliat. Diad tulong na Dios tan panamegley na makinis a bato, tinalo nen David itan ya higante.​—1 Sam. 17:45, 49, 50.

4. Akin et kaukolan nen Solomon so manpakpel?

⁴ Kanian walad kipapasen si David ya pasesegen si Solomon ya manpakpel tan ipaalagey so templo! (Basaen so 1 Awaran 28:20.) No agmanpakpel si Solomon, agto nagapoan so kimey lapud takot, tan say agto ikiwas et mas grabe ni nen say agto pakasumpal ed kimey.

5. Akin et kaukolan tayoy manpakpel?

⁵ Singa si Solomon, kaukolan tayoy tulong nen Jehova pian makapanpakpel tayo tan nasumpal so kimey. Makatulong no dalepdepen tayo iray alimbawa na saray nampakpel nensaman. Tan nonoten tayo no panon tayon makapanpakpel tan nagawaan so kimey tayo.

6. Antoy makapadinayew ed inkakpel nen Jose?

⁶ Imanoen so inkakpel nen Jose nen sikatoy tinukso na asawa nen Potifar ya manggawa ira na seksual ya imoralidad. Seguradon amta to ya nayarin walay mauges ya nagawad sikato no agto pagustoan. Pero imbes ya manpatukso, sikatoy nampakpel tan binmatik.​—Gen. 39:10, 12.

7. Deskribien so inkakpel nen Rahab. (Nengnengen so litratod gapo na artikulo.)

⁷ Si Rahab et sakey nin alimbawa na inkakpel. Nen linmad abung to ed Jerico iray Israelitan espiya, tinmakot la komon tan agto la ra tinulongan. Balet lapud nanmatalek ed si Jehova, makpel ton inyamot so duaran espiya tan tinulongan to ran makatakas. (Jos. 2:4, 5, 9, 12-16) Anisia si Rahab ya si Jehova so tuan Dios, tan nanmatalek ya iter na Dios ed saray Israelita so dalin. Agto inabuloyan ya anggapo lay gawaen to lapud takot ed arum, kaiba lay takot ed ari na Jerico tan saray sundalo to. Imbes, sikatoy kinmiwas kanian sikato tan say pamilya to et akaliktar.​—Jos. 6:22, 23.

8. Antoy epekto ed saray apostol na inkakpel nen Jesus?

⁸ Saray matoor ya apostol nen Jesus et maabig met ya alimbawa na inkakpel. Anengneng da so inkakpel nen Jesus. (Mat. 8:28-32; Juan 2:13-17; 18:3-5) Atan so tinmulong ed sikaran magmaliw ya makpel. Nen pinasegsegang ira na saray Saduceo, ag-ira tinmundan nambangat diad ngaran nen Jesus.​—Gawa 5:17, 18, 27-29.

9. Panon ya makatulong so 2 Timoteo 1:7 pian naamtaan tayo no siopan talaga so panlalapuan na pakpel?

⁹ Si Jose, Rahab, Jesus, tan saray apostol et maksil so loob da kanian maabig so agawaan da. Say inkakpel da et aliwan sobran panagmatalek ed sarili. Akapampakpel ira lapud nanmatalek ira ed si Jehova. Nipapaarap tayo met ed saray situasyon ya kaukolan so pakpel. Imbes ya manmatalek tayod sarili tayo, kaukolan tayoy manmatalek ed si Jehova. (Basaen so 2 Timoteo 1:7.) Nengnengen tayoy duaran aspekto ed bilay ya kaukolan tayoy pakpel: diad pamilya tan diad kongregasyon.

10. Akin ya kaukolan na saray Kristianon kabataan so manpakpel?

¹⁰ Dakel so situasyon ya kaukolan na saray Kristianon kabataan so manpakpel pian makapanlingkor irad si Jehova. Makaaral ira ed alimbawa nen Solomon tan sarag dan aligen so inkakpel to diad impanggawa to na makabat iran desisyon pian nipaalagey so templo. Anggaman nayari tan nepeg ya paigiya iray Kristianon kabataan ed saray Kristianon atateng da, sikaran mismo so manggawa na importante iran desisyon. (Pro. 27:11) Pian saray kabataan et makapanggawa na makabat ya desisyon nipaakar ed maong ya kaulop, maabig a panagligliwaan, pansiansian malinis ed moral, tan pampabautismo, kaukolan day manpakpel. On, lapud aglabay  iratan nen Satanas, samay mangakantiaw ed Dios.

11, 12. (a) Panon ya impanengneng nen Moises so maabig ya alimbawa na inkakpel? (b) Panon ya naalig na saray kabataan so alimbawa nen Moises?

¹¹ Say sakey ya importantin nepeg ya desisyonan na saray kabataan et no antoy gawaen dad bilay da. Diad pigaran bansa, saray kabataan et nadedesdes ya mangala na atagey ya edukasyon tan nawalaan na trabahon baleg so sueldo. Diad saray bansa ya mairap so panagbilay, nononoten na saray kabataan ya kaukolan dan tulongan ed materyal so pamilya ra. No ontan so situasyon mo, nonoten so alimbawa nen Moises. Si Moises et pinabaleg na biin anak na Faraon, kanian sarag to komon so magmaliw ya sikat odino mayaman. Seguradon dinesdes ya maong na kapamilya ton Ehipsio, managbangat to, tan saray managsimbawa to! Imbes ya manpadaeg, makpel ya pinili nen Moises so mandayew ed si Jehova. Nen tinaynan to iray kayamanan ed Ehipto, sikatoy makpel ya nanmatalek ed si Jehova. (Heb. 11:24-26) Lapud satan et sikatoy benendisyonan nen Jehova tan seguradon dakel nin bendisyon so awaten to diad arapen.

¹² Ontan met natan, bendisyonan nen Jehova iray kabataan ya makpel ya manggagawa na saray kalat o goal ya akapokus ed espiritual tan iyuuna rad bilay da so kimey parad Panarian. Tulongan to ra pian nitarya iray pankaukolan na pamilya da. Nen inmunan siglo, say kabataan ya si Timoteo et nampokus ed espiritual iran kalat to, tan nagawaan mo met itan. *​—Basaen so Filipos 2:19-22.

13. Panon ya akatulong ed kabataan ya sister so inkakpel pian naabot to ray kalat to?

¹³ Kaukolan na sakey ya sister ed Alabama, U.S.A., so manpakpel pian makapanggawa na espiritual iran kalat. Insulat to: “Mabapbaing ak nen ugaw ak. Ngalngali agak mitongtong ed saray walad Kingdom Hall, tan ambaing ak ya ontoktok ed puerta na saray agko kabat.” Diad tulong na saray ateng to tan saray agagi ed kongregasyon, agawaan na sayan sister so kalat ton magmaliw ya regular payunir. Imbaga to: “Diad mundo nen Satanas et ipapasen a marakep ya goal so atagey ya edukasyon, pagmaliw a sikat tan mayaman, tan pakawalaay dakel ya materyal a kaykayarian. Balet mabetbet ya mairap iratan ya aboten tan panlapuan labat na stress tan ermen. Pero say panaglingkor ed si Jehova so angiter ed siak na baleg a liket tan inkapnek.”

14. Anto ray situasyon ya kaukolan na saray Kristianon atateng so manpakpel?

¹⁴ Kaukolan met na saray Kristianon atateng so manpakpel. Singa bilang, nayarin mabetbet ya kerewen na amom ya man-overtime ka ed trabahom no labi tan weekend, ya panaon parad panagdayew na pamilya yo, pampulong, tan piaral. Kaukolan so pakpel pian agmo gawaen itan no mabetbet to lan kekerewen tan nipanengneng moy maong ya alimbawa ed ananak mo. Odino ompan wala ray atateng diad kongregasyon ya papayagan da ray anak dan mibiang ed saray aktibidad ya agmo labay ya pibiangan na anak mo. Nayarin tepeten na saratan ya atateng no akin ya agmo payagan so anak mo. Kasin sarag moy manpakpel tan mataktikan ipaliwawa no akin ya ontan so desisyon mo?

15. Panon ya makatulong ed atateng so Salmo 37:25 tan Hebreo 13:5?

¹⁵ Ipapanengneng tayon makpel tayo no tutulongan tayo ray ananak tayon manggawa na espiritual iran kalat tan naabot iratan. Singa bilang, nayarin manaalangan iray arum ya ateng ya pasesegen so anak da ya manpayunir, manlingkor ed lugar ya mas baleg so pankaukolan, manlingkor ed Bethel, odino manboluntaryo ed konstruksion. Ompan napapagaan  iray atateng ya ag-ira naasikaso na anak da no matatken la ra. Balet makabat iray atateng ya makpel tan manmamatalek ed saray promisa nen Jehova. (Basaen so Salmo 37:25; Hebreo 13:5.) Tan say sakey nin paraan ya nipanengneng yoy inkakpel tan panagmatalek ed si Jehova et no tulongan yoy anak yon ontan met so gawaen to.​—1 Sam. 1:27, 28; 2 Tim. 3:14, 15.

16. Panon ya tinulongan na arum ya atateng so ananak da ya nawalaan na espiritual iran kalat, tan panon ya agunggonaan so ananak da?

¹⁶ Walay sanasawa diad United States ya tinulongan day ananak da ya manggaway espiritual iran kalat. Imbaga na asawan laki: “Antis nin makaakar tan makatongtong iray ananak mi, ibabaga mi lad sikara ya makapaliket so manpayunir tan manlingkor ed kongregasyon. Atan so goal da natan. No wala ray espiritual a kalat na ananak tayo tan naabot da iratan, makatulong itan pian nasarag da iray pressure ed sayan mundo nen Satanas tan manpokus ira ed samay talagan tua​—si Jehova.” Oniay insulat na sakey ya brother ya duaray anak to: “Dakel ya ateng so mansasagpot tan manggagastos na baleg pian tulongan so ananak da ya naabot iray goal da diad sports, panagligliwaan, tan edukasyon. Mas maong ni ya mansagpot tan manggastos kami pian naabot na ananak mi iray goal da ya ontulong ed sikaran nawalaan na maabig a relasyon ed si Jehova. Panliliketan min maong ya nanengneng iray ananak mi ya nanaabot da ray goal da tan nakaiba mi ra ed panaglingkor.” Seguradon bendisyonan na Dios iray atateng ya tutulongan da ray ananak dan manggawa tan naabot iray espiritual ya kalat da.

17. Mangiter na alimbawa na saray mankaukolan na pakpel diad kongregasyon.

¹⁷ Kaukolan met so pakpel diad kongregasyon. Singa bilang, saray elder et kaukolan day pakpel no wala ray aasikasoen dan hudisyal a kaso odino no ontutulong ira ed saray agagin napepeligroy bilay da no emergency. Say arum ya elder et ombibisita ed saray prisoan pian naasikasoy espiritual a pankaukolan na saray priso. Saray single ya sister balet ey? Dakel natan so pankanawnawa dan palaknaben so ministeryo da diad pampayunir, iyalis ed  lugar ya mas baleg so pankaukolan, pamboluntaryo ed Local Design/Construction, tan pan-aplay ed School for Kingdom Evangelizers. Say arum ni ingen et naimbitaan ya manaral ed Gilead School.

18. Panon ya nipanengneng na saray matatken lan sister ya makpel ira?

¹⁸ Saray matatken lan sister et bendisyon ed kongregasyon. Inar-aro tayo irayan agagi! Saray arum et nayarin agda la nagawaan iray datin gagawaen da ed panaglingkor ed Dios, balet sarag da nin siansia ya ipanengneng a makpel ira tan wala ni nagawaan da. (Basaen so Tito 2:3-5.) Singa bilang, kaukolan na saray matatken lan sister so pakpel no kerewen ed sikara ya mitongtong ed mas ugaw nin sister nipaakar ed masimpit a panangawes. Agda pantamian imay sister lapud panangawes to, balet sarag dan pasesegen ya nonoten to no panon ya makaapekto ed arum so panangawes to. (1 Tim. 2:9, 10) Say ontan ya maaron panangiyansakit da et nayarin walaan na positibon epekto.

19. (a) Panon ya makapanpakpel iray bautismadon brother? (b) Panon ya makatulong ed saray brother so Filipos 2:13 tan 4:13 pian makapanpakpel ira?

¹⁹ Saray bautismadon brother et kaukolan met ya manpakpel tan mankimey. Bendisyon ed kongregasyon iray makpel ya brother ya mabulos ya mangawat na kaaruman ya responsabilidad. (1 Tim. 3:1) Balet saray arum et manaalangan ya mangawat na responsabilidad. Nayarin say sakey ya brother et akagawa na kasalanan nensaman, tan natan say pakalikna to et agmakanepegan ya magmaliw ya ministeryal a lingkor odino elder. Nayarin say pakalikna na sakey nin brother et agkualipikado ed sakey ya asainmin. No ontan so naliliknam, natulongan ka nen Jehova ya manpakpel. (Basaen so Filipos 2:13; 4:13.) Tandaan ya walay panaon ya alikna nen Moises ya sikatoy agkualipikado ed sakey ya asainmin. (Exo. 3:11) Balet tinulongan nen Jehova si Moises, tan sinmabi panaon et awalaan na pakpel ya sumpalen so kimey to. Nawalaan met na ontan ya pakpel so sakey ya brother no onkerew na tulong ed Dios panamegley na masimoon a pikakasi tan inagew-agew a pambasa na Biblia. Makatulong met so pandalepdep ed saray nisalaysay ditan ya alimbawa na inkakpel. Sarag to met ya mapaabeban kerewen ed saray elder ya sikatoy ipasal da, tan akaparaan ya ontulong no kaukolan. Papasesegen mi so amin ya bautismadon brother ya manpakpel tan mansagpot parad kongregasyon!

20, 21. (a) Antoy impaseguro nen David ed si Solomon? (b) Anto so napanmatalkan tayo?

²⁰ Impaseguro nen Arin David ed si Solomon ya walad sikato si Jehova anggad nasumpal to so pangipaalagey na templo. (1 Awa. 28:20) Tinandaan tan impapuso nen Solomon iray imbaga nen ama to, kanian anggano ugaw ni tan anggapo ni eksperiensya to, inawat to nin siansia so kimey. Sikatoy nampakpel, nankimey, tan diad tulong nen Jehova et asumpal to so makapadinayew ya templo ed loob na pitora tan kapalduan taon.

²¹ No tinulongan nen Jehova si Solomon, tulongan to tayo met ya manpakpel tan nagawaan so kimey tayo, diad pamilya tan diad kongregasyon. (Isa. 41:10, 13) No ipanengneng tayon makpel tayo diad panagdayew tayo ed si Jehova, makapanmatalek tayo ya bendisyonan to tayo natan tan diad arapen. Kanian ‘manpakpel ka tan igapom lay kimey.’