Karakpan ya Ag-onpaso

“SAY ganggana onkopas; say ganggana onlabas,” insulat itan nen manag-anlong a si Walter De la Mare. Onia so peteg a kipapasen na makapakelkelaw iran rosas na kaktus a niretrato dia. Say gloria na saratan so maples ya onpaso.

Insulat nen Kristianon babangatan a Santiago: “Bangbalet say mayaman, dia ed kiabeba to; ta singa say bolaklak na dika ya napaso, ta kabutay na sankapetangan ya banwa pamagaen to so dika, tan say bolaklak napelag, tan saray dakep tan limgas to naandi’ra: ontan met na mayaman a nalenes ed awawey to.”​—Santiago 1:10, 11.

Diad sayan agnapanmatalkan a mundo, say kayamanan so peteg a naandi ed sanlabi. Niarum ni, say mayaman​—singa ed karaklan et ‘daiset so saray agew to a singa bulaklak.’ (Job 14:1, 2) Imbaga nen Jesus so parabolo na lakin okupadon tuloy ed panpapayaman ta pian sikato so manrelaks tan mangayaga ed bilay. Balet sanen abaloan ton sikato so walaan na amin a nakakaukolan to ed bilay na ligliwa, sikato so inatey. Kanian, impasakbay nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.”​—Lucas 12:16-21.

“Mayaman dia ed Dios.” Anto so labay ya ibaga nen Jesus ed satan? Say toon mayaman ed ontan a paraan so walaan na “kaykayamanan ed tawen”​—maabig a ngaran ed Dios. Agkaukolan a napaso so ontan a kayamanan. (Mateo 6:20; Hebreos 6:10) Imbes a singa sakey a rosas a namaga, satan a too so nipareng diad Biblia a singa kiew, a say bulong to so agnalenes. Tan napapaseguroan tayo, ya “antokaman so gawaen to onbona.”​—Salmo 1:1-3, 6.