Panakar a Walaan na Kakabatan Diad Pidedeneng ed Saray Walad Mundo
Panakar a Walaan na Kakabatan Diad Pidedeneng ed Saray Walad Mundo
“Mankurang kayo’d karunungan ed saray wala ed paway.”—COLOSAS 4:5.
1. Diad anto a nipaarap iray akaunan Kristianos, tan anto so insimbawa nen Pablo ed kongregasyon na Colosas?
SARAY akaunan Kristiano a nambilay ed saray syudad na mundo na Romano so nantultuloy a nipaarap ed panagtalintao, imoral a pananap-na-likeliket, tan pagano iran ritual tan kustombre. Saramay nanayam ed Colosas, syudad ed pegley-sagur na Asya Minor, so andi duaruwan nipaarap ed panagdayew ed inan-diosa tan espiritismo na lokal iran taga Phrygia, say paganon pilosopiya na saray mibabaley a Griego, tan say Judaismo na kolonyan Judio. Sinimbawa nen apostol Pablo so Kristianon kongregasyon a ‘mankurang ed karunungan’ ed saray “wala ed paway.”—Colosas 4:5.
2. Akin a kaukolan a saray Tasi nen Jehova natan so manakar a walaan na kakabatan diad pideneng ed saramay walad paway?
2 Natan, saray Tasi nen Jehova so nipapaarap met ed mipadparan mauges ya ag-agamil, tan nagkalalo ni. Kanian, sikara met so kaukolan a mangagamil na kakabatan ed siglaotan da ed saramay walad paway na tuan Kristianon kongregasyon. Dakel ed saray relihyoso tan mapulitikan organisasyon pati saray walad mediya so sumpa’d sikara. Arum ed saraya, balanglan diad direktan panangataki odino, mabetbet, diad panagpasiki, so manitilol ed maong a pakatongtongan na saray Tasi nen Jehova tan mamapalesa na panaglabi sumpa’d sikara. Unong a saray akaunan Kristiano so agmakatunongan ya impasen a panatiko tan mapeligro ni ingen a “secta,” saray Tasi nen Jehova natan so mabetbet a puntirya na panaglabi tan agsuston pikakabat.—Gawa 24:14; 1 Pedro 4:4.
Pananalona ed Panaglabi
3, 4. (a) Akin a saray tuan Kristiano so agbalot aroen na mundo, balet anto so nepeg tayon panggunaetan a gawaen? (b) Anto so insulat na sakey ya autor nipaakar ed saray Tasi nen Jehova a nipisok ed panangipangawan a kampo na Nazi?
3 Ag-ilaloan na saray tuan Kristiano a sikaray aroen na mundo, ya unong ed si apostol Juan, et “mandokdokol ed kaugsan.” (1 Juan 5:19) Anggaman kuan, papasesegen na Biblia iray Kristiano a panbanikelan ya itarok iray sinansakey ed dapag nen Jehova tan ed puron panagdayew to. Gagawaen tayo ’ya diad direktan panagtasi tan ontan met ed maabig a walna tayo. Si apostol Pedro so nansulat: “Masimpit komon so tongtongan yo ed utel na saray bugkalot, pian dia ed panalabutob da ed sikayo a singa managawa na mauges nitandoro ra so Dios ed agew na idalaw to, lapu ed saray maong a ginawgawa yo a naimatonan da.”—1 Pedro 2:12.
4 Diad libro ton Forgive—But Do Not Forget, say autor a si Sylvia Salvesen so angibaga nipaakar ed bibiin Tastasi a kaiba to ed sakey a panangipangawan a kampo na Nazi: “Saraman a dua, di Käthe tan Margarethe, tan dakel ni, so tinmulong na baleg ed siak, aliwa labat a diad panamegley na pananisia ra noag diad praktikal iran pamaakaran. Inyalaan da kami na ununan malinis iran trapo para’d saray sugat mi . . . Diad antikey et wala kami ed utel na totoon walaan na maong a getma para’d sikami, tan angipanengneng na makaaro iran liknaan diad saray kiwas da.” Agaylan maabig a pantasi ed “saray wala ed paway”!
5, 6. (a) Anton kimey so susumpalen nen Kristo ed kaplesan, tan anto so agtayo komon lilingwanan? (b) Anto so nepeg ya awawey tayo ed saray totoo na mundo, tan akin?
5 Baleg so nagawaan tayo ta pian naekal so panaglabi diad makabat a paraan na pidedeneng tayo’d saray taga paway. Tua a manbibilay tayo la’d panaon a say manuuley ya Ari tayo, si Kristo Jesus, so mangibibiig ed totoo na nasyones, “a singa say pastol ibiig to so [saray karnero ed] saray kanding.” (Mateo 25:32) Balet agbalot lilingwanan a si Kristo so say Ukom; sikato so mandedesidi no siopa so “saray karnero” tan no siopa so “saray kanding.”—Juan 5:22.
6 Saya so nepeg a mangimpluensya’d awawey tayo ed saramay agkabiangan na organisasyon nen Jehova. Ompan isipen tayon sikaray minumundon totoo, balet ta sikaray kabiangan na mundo na katooan ya “ontan la’y inpangaro na Dios . . . ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan.” (Juan 3:16) Mas maabig a kunsideraen so totoo a prospektibon magmaliw a karnero nen say bengatbengat ya ukomen iran kanding. Arum ed saray datin maruksan onsusumpa’d katuaan so dedikado lan Tastasi natan. Tan dakel ed saraya so atangguyor diad panamegley na saray gawan panangasi, sakbay a sikaray kinmiwas ed antokaman a direktan panagtasi. Nengnengen, alimbawa, so retrato ed pahina 18.
Maseseg, Balet Ag-agresibo
7. Anto a panamalaw so imbalikas na papa, balet anton tepet so nayarin itepet tayo?
7 Binalaw nen Papa Juan Pablo II iray sekta ed interamenti, tan nagkalautla ed saray Tasi nen Jehova, sanen imbaga ton: “Say ngalngali agresibon seseg a wala ed arum diad pananap na saray balon membro, diad pan-kabkaabungan, odino pamatunda ed saray ondadalan ed saray kanto, so sektaryanon inkatilan apostoliko tan misioneron inkaseseg.” Nayarin itepet, No “inkatilan apostoliko tan misioneron inkaseseg” so walad sikatayo, iner sirin so pakaromogan na tuan seseg ed panag-ebanghelyo? Maseguron aliwan diad limog na saray Katoliko, tano ontan ira, di ontan met ed limog na saray Protestanti odino saray membro na saray iglesian Ortudoks.
8. Panon tayon nagawaan so pankabkaabungan a kimey tayo, a siiilalo ed anton resulta?
8 Anggaman kuan, ta pian napaneknekan a palso so antokaman ya akusasyon ya inka-agresibo ed panagtasi tayo, sikatayo so lawas mapangasi, marespeto, tan magalang ed iyaasingger ed totoo. Insulat nen babangatan a Santiago: “Siopa so makabat tan makatalos ed sikayo? Ipatnag to komon ed maong a panagbilay to so saray gawa to ed kaoyamoan na kakabatan.” (Santiago 3:13) Sisimbawaen itayo nen apostol Pablo ya “ag . . . mikokolkol.” (Tito 3:2) Singa bilang, imbes a direktan kondenaen iray sisisiaen na pupulongan tayo, akin ya agmangipanengneng na masimoon ya interes ed saray opinyon to? Insan ibaga ed sikato so maong a balitan wala’d Biblia. Diad panamegley na positibon iyaasingger tan pangipanengneng na nakakaukolan a respeto para’d totoon walaan na duma iran sisiaen, natulongan tayo ra a nawalaan na magmaong a mental ya awawey ya ontalineng, tan nayarin natebek da so kablian na mensahe na Biblia. Nayarin say magmaliw a resulta et ‘nitandoro [na arum] so Dios.’—1 Pedro 2:12.
9. Panon tayon niyaplika so simbawan inter nen Pablo (a) diad Colosas 4:5? (b) diad Colosas 4:6?
9 Si apostol Pablo so nansimbawa: “Mankurang kayo’d karunungan ed saray wala ed paway, a dondonen yo so panaon.” (Colosas 4:5) Diad pangisalaysay ed kaunoran a balikas, insulat nen J. B. Lightfoot: “Agsasaewen so pankanawnawa, ed pansalita tan panggawa na antokaman a mangipalaknab ed kaabigan na Dios.” (Kien mi so italiko.) On, sikatayo’y nepeg ya akaparaan ed pansalita tan panggawa ed manepeg a panaon. Lalanoren met na ontan a kakabatan so pamili na matukoy ya oras ed idalaw. No ipulisay da’y mensahe tayo, kasin lapud ag-aapresyaen na totoo, odino kasin lapud sikatayo so dinmalaw ed panaon ya agmatukoy? Insulat met nen Pablo: “Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Colosas 4:6) Saya so mankakaukolan na akaunan panagnonot tan tuan panangaro ed kaabay. Lawas tayon ipresenta’y mensahe na Panarian tekep na inkaligsa.
Magalang tan ‘Maralato ed Amin a Gawa a Maabig’
10. (a) Anton simbawa so inter nen apostol Pablo ed Kristianos a manaayam ed Creta? (b) Panon a saray Tasi nen Jehova so nagmaliw ya ehemplo diad katutulok ed simbawa nen Pablo?
10 Agtayo nayarian ya ikompromiso iray prinsipyo ed Biblia. Diad biek a dapag, agmet kaukolan a misuppiatan tayo nipaakar ed saray tepet ya agmanasaglawi’d Kristianon katooran. Insulat nen apostol Pablo: “Ipanonot mo ed sikara [Kristianos ed Creta] a pauleyan ira komon ed saray manuley, tan pakauley ya ontolok ira, tan maralato ra ed amin a gawa a maabig, ya ag ira mansalita’y mauges nipaakar ed angan siopaman, ag ira mikokolkol, maong komon so linawa’ ra, ya ipanengneng da so amin a kaoyamoan ed saray amin a totoo.” (Tito 3:1, 2) Say eskolar na Biblia a si E. F. Scott so nansulat nipaakar ed sarayan bersikulo: “Saray Kristiano so aglabat ontulok ed pakauley, noagta sikara so nepeg a maralato ed antokaman a gawa a maabig. Saya . . . so mankabaliksan a, sano kakaukolanen na kipapasen, saray Kristiano so nepeg a kabiangan na saray manunan mangipanengneng na publikon piaambegya. Mantultuloy a niwala so pool, salot, nambabangil a kalamidad, anggaman amin a maong a mibabaley so manpilalek ya ontulong ed kakaabay da.” Diad interon mundo walaray dakel ya onsasabin desyang tan saray Tasi nen Jehova so kabiangan na saray unaan ed pananulong a kimey. Aliwa labat lan saray agagi ra so tutulongan da noag ontan met ed saray taga paway.
11, 12. (a) Panon so nepeg ya ikiwas na Kristianos ed saray pakauley? (b) Anto so lalaktipen na panagpauley ed saray pakauley no nipaakar ed panagpaalagey na saray Kingdom Hall?
11 Sarayan parehon bersikulon nanlapud sulat nen Pablo ed si Tito so mangidadanet ed kaimportantian na pakawalaan na marespeton awawey ed pidedeneng ed saray pakauley. Saray kalangweran a Kristianos a lapud talindeg da bilang neutral et onaarap ed saray ukom so nagkalautlan sinononot a manakar a walaan na kakabatan ed saramay walad paway. Baleg so nagawaan da ta pian napaaligwas odino napasakitan so maong a pakatongtongan na ariripen nen Jehova lapud itsura, kiwas, tan diad paraan na pitotongtong da ed saratan a pakauley. Nepeg dan “bayaran so . . . say galang dia ed akan-galang,” tan gawaen da so panangidepensa tekep na aralem a panagrespeto.—Roma 13:1-7; 1 Pedro 2:17; 3:15.
12 Lalaktipen na saray “pakauley” so lokal ya opisyales na gobierno. Natan ta lalon ondarakel iray ipapaalagey a Kingdom Hall, agnapaliisan so piarap ed saray lokal a pakauley. Mabetbet a saray mamatatken so nipapaarap ed panaglabi. Balet nalmoan a no ditan a saray mangilalaman na kongregasyon so akapangiletneg na maong a siglaotan ed saray pakauley tan mikokoopera ed komisyon na panagplano’y baley, say panaglabi so nayarin naekal. Mabetbet a niiter so maabig a pantasi ed totoon datin samet odino anggapo so amta ra nipaakar ed saray Tasi nen Jehova tan say mensahe ra.
‘No Nayari, Mikareenan ed Amin’
13, 14. Anton simbawa so inter nen Pablo ed Kristianos diad Roma, tan panon tayon niyaplika itan ed saray pisiglaotan tayo ed saray taga paway?
13 Inter nen Pablo ed saray Kristianon manbibilay ed paganon Roma iyan onggendan a simbawa: “Aleg ya itumang yo ed angan siopa so mauges ed mauges. Pansesegan yo so saray bengatla a makapagalang ed arap na ganagana a too. No nayari, dia ed angangaan na nayarian yo, manayam kayo ed kareenen [kareenan] ed ganaganay totoo. Aleg a sikayo a dili so onbales, inararo, no ag ingen itdan na pasen so sanok na Dios: ta nisulat; Siak so akankien na panamales; siak so ontumang naani, kuan na Katawan [Jehova, NW]. Kanian, no say kabusol mo et narasan pakan mo; no napgaan, painum mo: ta dia ed pangawam na saya, ngalab na apuy so ibonton mo ed olo to. Ag ka pararaeg ed mauges; no ag ingen say maong so panaeg mo ed mauges.”—Roma 12:17-21.
14 Diad pisiglaotan tayo ed saray taga paway, sikatayo bilang tuan Kristianos so agmakapaliis a miarap ed saray sumusumpa. Diad saray bersikulo ed tagey, ipapanengneng nen Pablo a say basbas na kakabatan et say panbanikel a talonaan so isusumpa diad ikiwas tekep na panangasi. Singa saray ngalab na apuy, sarayan gawa na panangasi so nayarin mamatunda’d sanok tan manangguyor ed sumusumpa a miarap tekep na mas mapangasin awawey ed ariripen nen Jehova, nayari ni ingen a managyat na interes to ed maong a balita. Sano onia so nagawa, say mauges so natalo na say maong.
15. Nagkalautlan kapigan a saray Kristiano so manakar a walaan na kakabatan ed saramay walad paway?
15 Say panakar a walaan na kakabatan ed saramay walad paway so nagkalautlan importante ed saray ayaman a ditan et say sakey ed saray kapareha so agni angawat ed katuaan. Say katutulok ed saray prinsipyo na Biblia so mamalesa na magmaong a kaasawaan a lalaki, magmaong a kaasawaan a bibii, magmaong a kaamaan, magmaong a kainaan, tan ananak a lalon matulok tan makulin manaral ed eskuelaan. Kaukolan a naimano na agmananisia so mabunigas ya epekto na saray prinsipyo na Biblia ed sakey a mananisia. Sirin, arum so “napatolok . . . ya andi salita” na dedikado iran membro na pamilya.—1 Pedro 3:1, 2.
‘Panggawa na Maabig ed Amin’
16, 17. (a) Diad antoran bagat a napaliket a tuloy so Dios? (b) Panon so ‘panggawa [tayo] na maabig’ ed saray agagi tayo tan ontan met ed saramay walad paway?
16 Say sankabalgan a kamaongan a nagawaan tayo ed kaabay tayo et say pangitarok na mensahe na bilay tan say panbangat ed sikato nipaakar ed pipulangan ed si Jehova diad panamegley nen Jesu-Kristo. (Roma 5:8-11) Kanian ibabaga ed sikatayo nen apostol Pablo: “Lapu ed sikato [si Kristo] sirin mangisaklang itayo ed Dios a naynay na bagat a panangidayew, salanti, say bunga na saray bibil a manngiwakawak na ngaran to.” (Hebreos 13:15) Inyarum nen Pablo: “Balet ag yo lingoanan so panaggawa na maabig tan say pannanabang: ta say Dios napaliket a maong ed sarayan bagat.” (Hebreos 13:16) Niarum ni ed publikon panagtasi tayo, agtayo lilingwanan so “panaggawa na maabig.” Titibukelen to so manunan kabiangan na saray bagat a panliketan a tuloy na Dios.
17 Gendagendat a gagawaen tayo so maabig ed saray agagi tayo ed espiritual, a nayarin walad emosyonal, espiritual, pisikal, odino materyal a pankaukolan. Impanengneng iya nen Pablo sanen insulat to: “Ontan sirin, onong a wala so kiambegia mangawa itayo na maabig ed saray amin, nagkalalo ed saray kaamong na pananisia.” (Galacia 6:10; Santiago 2:15, 16) Anggaman ontan, agtayo komon lingwanan iray salita, “Mangawa itayo na maabig ed saray amin.” Say gawan panangasi ed kanayon, kaabay, odino katrabahoan so walaan na baleg a nagawaan ta pian naekal so panaglabi sumpa’d sikatayo tan mangilukas ed puso na saman a too ta pian awaten to’y katuaan.
18. (a) Antoran kapeligroan so nepeg a paliisan tayo? (b) Panon tayon nausar so Kristianon kamaongan tayo bilang pananuporta ed mapublikon panagtasin kimey tayo?
18 Ta pian nagawaan iya, agtayo la kaukolan so magmaliw a maapit a kakaaro na saramay walad paway. Saratan a pililimog so mapeligro. (1 Corinto 15:33) Tan anggapo met so pilalek a mikaaro ed mundo. (Santiago 4:4) Balet say Kristianon kamaongan tayo so nayarin manuporta’d panagpulong tayo. Diad arum a daldalin et lalon oniirap so pakapitongtong ed totoo ed saray ayaman da. Arum iran apartment so protektado na saray kagawaan a manasamben ed pakapitongtong tayo ed saray manaayam. Diad maaligwas iran bansa, say telepono so nauusar a paraan diad panagpulong. Diad maslak a bansa et nayarin nagawa so panagtasi ed lansangan. Ingen, ed amin a bansa, say pagmaliw a masayaksak, magalang, mapangasi, tan matulong so mangilulukas na pankanawnawa ta pian naekal so panaglabi tan mangiter na maabig a panagtasi.
Pamadeen ed Saray Sumusumpa
19. (a) Lapud say gagala tayo et aliwan say pamaliket ed totoo, anto so nailaloan tayo? (b) Panon tayon napanbanikelan a tumboken so alimbawa nen Daniel tan iyaplika so simbawa nen Pedro?
19 Saray Tasi nen Jehova so agmanagpaliket ed totoo nisay natatakot ed totoo. (Uliran 29:25; Efeso 6:6) Sigpot a namomoria ra ya anggaman ed amin a sagpot da a magmaliw ya uliran ed panagbayar na buis tan maong a mibabaley, saray sumusumpa so mangikakayat na malisyoso iran tila tan mansasalita na anggapoy katuaan nipaakar ed sikara (1 Pedro 3:16) Diad pakaamta’d saya, panggugunaetan dan aligen si Daniel, a no nipaakar ed sikato et imbaga na saray kabusol: “Ag itayo makaromog na bengatla a kibana a sumpa ed Daniel, nilikod a naromog tayo a sumpa ed sikato so nipaakar ed tumang na Dios to.” (Daniel 6:5) Agtayon balot ikompromiso iray prinsipyo na Biblia pian paliketen iray totoo. Diad biek a dapag, agtayo gegemtanen so pagmaliw a martir. Panbabanikelan tayo so panbilay a walaan na deen tan susumpalen tayo’y apostolikon simbawa: “Ta saya so linawa’y Dios, a dia ed pangawa yo na kaabigan padeenen yo so ag pikakabat na saray totoon makulangkulang.”—1 Pedro 2:15.
20. (a) Sikatayo’y kumbinsido ed anto, tan anton panamaseseg so inter nen Jesus ed sikatayo? (b) Panon tayon makapantultuloy ed panakar a walaan na kakabatan ed saramay walad paway?
20 Sikatayo so kumbinsido a say talindeg tayo ed pagmaliw a biig ed mundo so sigpot a mitunosan ed Biblia. Saya so pepekderan na awaran na saray inmunan-siglon Kristianos. Papasesegen itayo na saray salita nen Jesus: “Diad mundo walaan kayo na kairapan: balet manilalo kayo’d siak tinalok so mundo.” (Juan 16:33) Agtayo natatakot. “Tan siopa a too so makaderal ed sikayo no tomboken yo so maong? Bangmas no wala so bengatla’n liknaen yo nisengeg ed katunongan, mapalar kayo: tan ag kayo mapaga lapu ed takot yo ed sikara, tan aleg a nagonigon kayo; no ag ingen dayewen yo so Katawan a Dios [si Kristo bilang Katawan, NW] ed kapusoan yo; tan maparaan kayo lawas ya onebat ed siopakaman a mankaokolan ya ipaliwawa yo so gapo na satan ya ilalo ya wala ed sikayo, balet sio-oyamo tan sitatakot.” (1 Pedro 3:13-15) Legan ya onkikiwas diad sayan paraan, sikatayoy mantultuloy a manakar a walaan na kakabatan ed saramay walad paway.
Bilang Repaso
◻ Akin a saray Tasi nen Jehova so kaukolan a manakar a walaan na kakabatan ed saramay walad paway?
◻ Akin a saray tuan Kristianos so agbalot manilalon sikaray aroen na mundo, balet anto so nepeg dan panggunaetan a gawaen?
◻ Anto so nepeg ya awawey tayo ed totoon taga mundo, tan akin?
◻ Akin a ‘manggawa [tayo] na maabig’ aliwa labat la’d saray agagi tayo noag ontan met ed saramay walad paway?
◻ Panon a say panakar tayon walaan na kakabatan ed saramay walad paway so ontulong ed sikatayo diad publikon panagtasin kimey tayo?
[Tepetepet Parad Panagaral]
[Litrato ed pahina 18]
Diad kawigi: Saray tuan Kristianos ed Pransya so ontutulong ed saray kaabay da kayari na delap
[Litrato ed pahina 20]
Baleg so nagawaan na saray gawan panangasi na Kristiano ta pian ekalen so panaglabi
[Litrato ed pahina 23]
Saray Kristiano so nepeg a “maralato ed amin a maabig a gawa”