Saray Balon Membro na Mananguley ya Ulop

NEN Sabado, Oktubre 2, 1999, say Tinaon a Miting na Watch Tower Bible and Tract Society of Pennsylvania so nansumpal ed makapasurprisan pakabat. Malikeliket a nadngelan na 10,594 ya inmatendi odino nikonekta panamegley na telepono a walay niarum ya apatiran balon membro na Mananguley ya Ulop na Tastasi nen Jehova. Saray balon membro, ya amin da so alanaan a Kristiano et sikara di Samuel F. Herd; M. Stephen Lett; Guy H. Pierce; tan David H. Splane.

• Si Samuel Herd so ginmapon nampayunir nen 1958, tan manlapud 1965 ya anggad 1997, sikatoy nankimey parad sirkito tan distrito. Kayari na satan, sikara nen asawa ton Gloria, so nagmaliw a kabiangan na pamilyay Bethel ed Estados Unidos, a diman mankikimey ed Service Department si Brother Herd. Sikato met so katulongan ed Service Committee.

• Si Stephen Lett so ginmapon nampayunir nen Disyembre 1966, tan manlapud 1967 ya anggad 1971, sikatoy nanlingkor ed Bethel diad Estados Unidos. Nen Oktubre 1971, inasawa to si Susan, tan sikaray nan-espisyal payunir. Manlapud 1979 ya anggad 1998, sikatoy nanlingkor bilang manangasikaso na sirkito. Nanlapula’d Abril 1998, sikato tan si Susan so nagmaliw a kabiangan na pamilyay Bethel ed Estados Unidos. Sikatoy nankimey ed Service Department tan sikatoy katulongan ed Teaching Committee.

• Nampamilya si Guy Pierce insan kaiba ton nampayunir so asawa to nen Abril 1982. Sikatoy nanlingkor bilang manangasikaso na sirkito nen 1986 ya anggad 1997, insan sikara nen asawa ton Penny, so nagmaliw a kabiangan na pamilyay Bethel ed Estados Unidos. Manlilingkor si Brother Pierce bilang katulongan ed Personnel Committee.

• Si David Splane so ginmapon nampayunir nen Setyembre 1963. Sikatoy nan graduar ed koma-42 a klase na Gilead, nanlingkor bilang misionaryo ed Senegal, Aprika, insan nankimey parad sirkito diad Canada ed loob na 19 taon. Sikato tan si asawa ton Linda, so walad Bethel diad Estados Unidos nanlapula’d 1990, a diman et nankimey si Brother Splane diad Service tan Writing department. Nanlapula’d 1998, sikatoy nagmaliw a katulongan ed Writing Committee.

Nilikud ed apatiran balon membro, say Mananguley ya Ulop natan so tugyopen di C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, tan D. Sydlik. Pikasi na amin ya itultuloy a bendisionan tan pabiskegen nen Jehova so Mananguley ya Ulop, a naaruman la natan, legan a mantutultuloy itan a mangasikaso ed saray kimey na totoo na Dios ed sankamundoan tan manlingkor parad espiritual ya intereses da.