“Say Daiset” so Nagmaliw a “Sanlibo”
“Say Daiset” so Nagmaliw a “Sanlibo”
“Say daiset magmaliw naani a sanlibo, et say melag magmaliw naani a mabiskeg a nasyon.”—ISAIAS 60:22.
1, 2. (a) Akin ya asakbongan na kabilungetan so dalin natan? (b) Panon a tuloytuloy ya onsisinag so liwawa nen Jehova ed totoo to?
“SAY kabilungetan sakbongan to so dalin, tan say makapal a kabilungetan so saray balbaley; balet si Jehova onalagey naani ed tapew mo, et say gloria to nanengneng mo naani ed tapew mo.” (Isaias 60:2) Deneskriben tuloy na sarayan salita so kipapasen ed dalin nanlapula’d 1919. Impulisay na Kakristianoan so tanda na maarin kiwawala nen Jesu-Kristo, say “silew na mundo.” (Juan 8:12; Mateo 24:3) Lapu ed “baleg a sanok” nen Satanas, say manunaan ed “saray manuley ed mundo na sayan kabilungetan,” say koma-20 siglo so sankamaruksaan tan makadesyang a tuloy a panaon diad awaran na too. (Apocalipsis 12:12; Efeso 6:12) Manbibilay so karaklan a totoo diad espiritual a kabilungetan.
2 Siansian onsisinag ni natan so liwawa. ‘Liliwawaan’ nen Jehova iray lingkor to, saray alanaan a nakdaan, bilang saray mangaraldalin a manangilaman na mangatatawen a “bii” a kayarian to. (Isaias 60:1) Nagkalalo la nen akapaway ira ed Binababilonian inkakautibo manlapula’d 1919, saraya so angiwandag ed gloria na Dios tan ‘papasindagen da so silew da ed arap na saray totoo.’ (Mateo 5:16) Manlapud 1919 anggad 1931, lalon sinminag so liwawa na Panarian lapud impulisay na saraya so natitilak nin impluensia na Binababilonian panag-isip. Dinmakel so bilang da a nagmaliw iran sinamplon libo lapud susumpalen nen Jehova so sipan to: “Petepeteg [a] pandaragupen ko naani so kera, ed Israel; ‘yan kora naani a sankatipon a singa saray karnero na Bosra, singa sakey a pulok ed pegley na pankabkaban da; sikara manggawa ra naani na baleg a tanol lapu ed karaklan na totoo.” (Miqueas 2:12) Nen 1931, lalo ni ingen a linmiwawa so gloria nen Jehova ed totoo to sanen inawat da so ngaran a Tastasi nen Jehova.—Isaias 43:10, 12.
3. Panon a pinmatnag a say liwawa nen Jehova et onsinag ed arum nilikud ni ed saray alanaan?
3 Kasin saramay nakekeraan labat na “melag a pulok” so liwawaan nen Jehova? (Lucas 12:32, NW) Andi. Tinukoy na Setyembre 1, 1931, a paway na The Watch Tower so sakey nin grupo. Diad maabig a salaysay ed Ezequiel 9:1-11, impabitar na satan a say lakin walaay tinteroay managsulat ya asalambit ed saratan a bersikulo so mangirerepresenta ed saray alanaan a nakdaan. Siopa iramay minarkaan na satan a “laki” diad kamolingan da? Say “arum a karnero,” a walaan na ilalon manbilay a magnayon diad paraison dalin. (Juan 10:16; Salmo 37:29) Nen 1935 sayan grupo na “arum a karnero” so atebek bilang say “baleg ya ulop . . . a nanlapu ed balang nasyon” ya anengneng nen apostol Juan diad pasingawey. (Apocalipsis 7:9-14) Nanlapula’d 1935 ya anggad natan, niyaapasakey a maong so imano ed panagtipon ed baleg ya ulop.
4. Siopa iray “arari” tan “saray nasyon” ya atukoy ed Isaias 60:3?
4 Sayan panagtipon a kimey so asalambit ed propesiya nen Isaias ya oniay kuanto: “Saray nasyon ondago ra naani ed liwawam, tan saray arari ed sinag na kapepelnak mo.” (Isaias 60:3) Siopa irayan “arari” a tinukoy dia? Saray nakekeraan na 144,000, a kaiba nen Jesu-Kristo, so kaiban mananawir ed mangatatawen a Panarian tan mangidadaulo ed panagpulong a kimey. (Roma 8:17; Apocalipsis 12:17; 14:1) Natan, say pigpigara lan libo a nakekeraan na saray alanaan a nakdaan so apalumbasan la’d bilang na “saray nasyon,” a walaan na mangaraldalin ya ilalo a papaibangat ed si Jehova tan mangiimbita ed arum pian paibangat met.—Isaias 2:3.
Saray Maseseg a Lingkor nen Jehova
5. (a) Antoran katuaan so mangipanengneng a say seseg na totoo nen Jehova so agtinmayer? (b) Dinan iran bansa so walaan na matalonggaring ya indaak nen 1999? (Nengnengen so tsart diad pahina 17-20.)
5 Agaylan seseg so impanengneng na modernon-agew a Tastasi nen Jehova diad loob na intiron koma-20 siglo! Tan anggaman ed ompapalalo iran pakadesdesan, agtinmayer so seseg da diad panasingger lay taon 2000. Siansian nampelengan dan gawaen so ganggan nen Jesus: “Manggawa kayo na saray babangatan ed amin a nasyones.” (Mateo 28:19, 20) Say bilang na aktibon manangipalapag na maong a balita nen imbeneg a serbisyon taon ed koma-20 siglo et asabi toy balon pantok na 5,912,492. Angusar iray makatantandan dagup na 1,144,566,849 ya oras diad impangitongtong ed arum nipaakar ed Dios tan ed saray gagala to. Nanggawa iray 420,047,796 a panagpawil ed saray interesado tan angikondukta ira na 4,433,884 a libren panangiyaral na Biblia. Agaylan abig a rekord na maseseg a serbisyo!
6. Anton balon uksoyan so ginawa parad saray payunir, tan anto so walan inkiwas ed satan?
6 Nen imbeneg ya Enero, inyanunsio na Mananguley ya Ulop so pananguman ed kakaukolanen ya oras parad saray payunir. Dakel so anganamot ed saya pian onloob ed ranggo na regular odino auxiliary payunir. Alimbawa, legan na pilimeron apatiran bulan nen 1999, naawat na sangan opisina ed Netherlands so amipat ed karakel ya aplikasyon parad regular payunir no ikompara ed pareho iran bulan ed akadkaunan taon. Oniay inreport na Ghana: “Nanlapula’d inyepekto na balon kalat ed oras na payunir, tuloytuloy a dinmakel so walad ranggo na regular payunir mi.” Nen 1999 a serbisyon taon, say bilang na payunir ed sankamundoan so inmabot ed 738,343—sakey a makapakelaw a pakapatnagan na ‘seseg parad maabig iran gawa.’—Tito 2:14, NW.
7. Panon a bebendisionan nen Jehova so maseseg a pankikimey na saray lingkor to?
7 Kasin bebendisionan nen Jehova iyan maseseg a pankikimey? On. Diad panamegley nen Isaias et oniay inkuanto: “Itangay mo so saray matam ed liberliber et onnengneng ka: sikara ya amin mantitipon ira, onla ra ed sika; saray anak mo a lalaki onsabi ra naani a manlapu ed arawi, et saray anak mo a bibii niyakar ira naani ed saray taklay.” (Isaias 60:4) Saray alanaan ya “anak a lalaki” tan “anak a bibii” ya atiptipon la so siansia nin maseseg a manlilingkor ed Dios. Tan natan et natitipon so arum a karnero nen Jesus diad dapag na saray alanaan ya “anak a lalaki” tan “anak a bibii” nen Jehova a walad 234 iran daldalin tan isla na dayat.
‘Amin a Maabig a Gawa’
8. Diad antoran ‘maabig a gawa’ ya aktibo iray Tastasi nen Jehova?
8 Saray Kristiano so walaan na responsabilidad a mangipulong ed maong a balita na Panarian tan tulongan iray interesado a magmaliw a babangatan. Balet sikara so ‘abangatan a maong ed amin a gawa a maabig.’ (2 Timoteo 3:17) Kanian, maaro ran aasikasoen iray pamilya ra, manpaparawes ira, tan bibisitaen daray mansasakit. (1 Timoteo 5:8; Hebreos 13:16) Tan walaray boluntaryo ed saray proyekton singa say panagpaalagey ed saray Kingdom Hall—sakey a kimey a mangiiter met na pantasi. Diad Togo, kayarin nipaalagey so sakey a hall et labay a naamtaan na saray mangaasikaso ed sakey a karismatikon relihyon diman no akin a nayayarian na saray Tastasi nen Jehova so mangipaalagey ed mismon bilding da bangta say simbaan et kaukolan nin mangupay totoo parad sayan gagala! Inreport na Togo a say panagpaalagey ed saray Kingdom Hall a maong so inkagawa ra et walaan na positibon epekto ed saray kabandaan da kanian sasalien na arum a totoo so manabang odino manpaalagey na kaabungan diad lugar a pangipaalageyan ed saray hall.
9. Panon so inkiwas na Tastasi nen Jehova sanen sinmabi iray kalamidad?
9 No maminsan, nakaukolan so sakey nin klase na maabig a gawa. Dakel a daldalin legan na imbeneg a serbisyon taon so adalan na saray kalamidad, tan say mabetbet a makaunan mangiter na tulong et saray Tastasi nen Jehova. Alimbawa, dineral na Hurricane Mitch so dakel a pasen diad Honduras. Tinugyop a tampol na sanga iray emergency committee pian iyorganisa so panulong. Saray Tastasi diad Honduras tan ed dakel nin daldalin so angidonasyon na saray kawes, tagano, tambal, tan arum nin manunan pankaukolan. Inusar na saray Regional Building Committee so dunong da diad pangipaalagey lamet ed kaabungan. Agnambayag et atulongan iray agagi tayon abiktima na kalamidad a makapangituloy lamet ed regular ya aktibidades da. Diad Ecuador, tinmulong iray Tastasi nen Jehova ed saray agagi ra sanen dineral na graben delap so pigaran kaabungan. Kayari ton naimatonan so alay abig a paraan ya impangasikaso ra ed walan agawa, oniay inkuan na sakey ya opisyal na gobierno: “No nausar ko iyan grupo, makapakelkelaw iray nagawaan ko! Saray totoon singa sikayo so nepeg a walad amin a parti na mundo.” Say ontan iran maabig a gawa so makapangidayew ed si Jehova a Dios tan pakabidbiran na “maridios a debosyon [a] makagungguna ed amin a bengatla.”—1 Timoteo 4:8, NW.
Sikara so “Ontekkiab a Singa Lurem”
10. Anggaman ondaraiset lay bilang na saray alanaan, akin a nagkalalon niyaabawag so ngaran nen Jehova nen say nensaman?
10 Intepet natan nen Jehova: “Siopa ta so saraya ya ontekkiab a singa lurem, tan singara malapati ed saray dorongawen da? Tua a saray pulo manalagar ira naani ed siak, tan saray sakayan na Tarsis unona, a mangyakar ed saray anak mo a lalaki a manlapu ed arawi, . . . Saray sankaili ipaalagey da naani so saray bakor mo, et saray ari ra manlingkor ira naani ed sika.” (Isaias 60:8-10) Say pilimeron kinmiwas ed ‘isisindag’ nen Jehova et saray “anak [ton] lalaki,” saray alanaan a Kristiano. Insan sinmabi iray “sankaili,” say baleg ya ulop, a matoor ya onsusuporta ed saray alanaan ya agagi ra, ya ontutumbok ed pangidadaulo ra ed panagpulong na maong a balita. Kanian, anggano ondaraiset so bilang na saray alanaan, nagkalalon niyaabawag so ngaran nen Jehova ed intiron dalin nen say nensaman.
11. (a) Anto so mantutultuloy ni tan tekep na anton resulta nen 1999? (b) Dinan iran bansa so walaay matalonggaring a bilang na abautismoan nen 1999? (Nengnengen so tsart ed pahina 17-20.)
11 Bilang resulta, minilyon so ondaragsan “singara malapati ed saray dorongawen da,” a manaanap na salimbengan diad loob na Kristianon kongregasyon. Nilasus nilibo so tinaon ya onaarum, tan lukas ni so dalan parad dakel ni. Inkuan nen Isaias: “Saray pintom met akalukas ira naani a naynay; ag-ira naani nikapot ed agew odino labi; pian . . . yakar [da] ed sika so kayamanan na saray nasyon.” (Isaias 60:11) Nen katantaon et walay 323,439 ya abautismoan bilang simbolo na dedikasyon da ed si Jehova, tan agto ni inkapot iray pinto. “Saray makaparoyroyon bengatla na amin a nasyon,” saray membro na baleg ya ulop, so siansia nin ondaragsa ya ondadalan ira ed saratan. (Aggeo 2:7, NW) Papalooben so malabay ya ontaynan manlapud kabilungetan. (Juan 12:46) Komon ta agbalot naandi so panamabli na amin na saratan ed liwawa!
Makmakpel ed Arap na Isusumpa
12. Panon so panasali na saramay mangaaro ed kabilungetan ya erepen so liwawa?
12 Kabusol na saramay mangaaro ed kabilungetan so liwawa nen Jehova. (Juan 3:19) Sinali ni ingen na arum ya erepen itan a liwawa. Talagan ilaloan iyan nagawa. Anggan si Jesus, say ‘tuan silew, a manisilew ed balang sakey a too,’ so niludlurey, sinumpa, tan diad kaunoran et pinatey na saray kanasyonan to. (Juan 1:9) Diad intiron koma-20 siglo, saray Tastasi nen Jehova so namumudmora, nipapangaw, nasesebelan met, tan apapatey ni ingen, lapud matoor a pangisisindag day liwawa nen Jehova. Nen imbeneg iran taon, inusar na saray onsusumpa so media pian nikayat iray katilaan nipaakar ed saramay mangisisindag ed liwaway Dios. Labay a panisiaen na arum so totoo a mapeligro iray Tastasi nen Jehova kanian nepeg iran pegetan tan sebelan. Tinmalona kasi iratan ya onsusumpa?
13. Anto so nansumpalan na maalwar ya impangipresenta ed media nipaakar ed kimey tayo?
13 Andi. No matukoy, omprepresenta iray Tastasi nen Jehova diad media pian ipaliwawa da iray katuaan. Bilang resulta, malaklaknab a nipapalapag so ngaran nen Jehova diad saray peryodiko tan magasin ontan met ed radyo tan telebisyon. Walaan iya na maong iran resulta diad panagpulong a kimey. Alimbawa, diad Denmark, sinaglawi na sakey a programa na TV ed satan a bansa so nipaakar ed teman “No akin ya onkakapuy lay pananisia na saray taga-Denmark.” Nainterbio iray Tastasi nen Jehova, pati saray manangilaman na arum a relihyon. Kayari na satan, oniay inkomento na sakey ya akabantay ed programa: “Mapatpatnag no sioparay walaan na espirituy Dios.” Sikato so impaiyaralan.
14. Diad kagogonigon da la, anto so namoria lanlamang na saray onsusumpa?
14 Amta na Tastasi nen Jehova a dakel a totoo ed sayan mundo so onsumpa ed sikara. (Juan 17:14) Siansia, napapabiskeg ira ed impropesiya nen Isaias: “Saray anak a lalaki na saray mamairap ed sika onla ra naani a mapaabeba ed sika; et amin iray mamabalaw ed sika ondakmomo ra naani ed saray dapan na saray salim: et tawagen da ka naani a say syudad nen Jehova, say Sion na Santo na Israel.” (Isaias 60:14) Lapud kagogonigon da la, agmanbayag et namoria lanlamang na saray onsusumpa a sikara manaya so mibabakal la ed mismon Dios. Siopa so makayarin manalo ed satan a bakal?
15. Panon a ‘sosopsopen [na saray Tastasi nen Jehova] so gatas na nasyones,’ tan panon iyan nipapabitar ed bangat da tan diad panag-ebanghelyon kimey da?
15 Oniay insipan ni nen Jehova: “Gawaen ta ka naani a sakey a sankablian lawas . . . Sika met sopsopen mo naani so gatas na saray nasyon, et sopsopen mo naani so saray arari; et sika naamtaan mo naani a siak, si Jehova, say Manangilaban ed sika.” (Isaias 60:15, 16) On, si Jehova so Manangilaban ed totoo to. No sikaray manmatalek ed sikato, sikara so mansiansia “lawas.” Tan ‘sopsopen da naani so gatas na saray nasyon,’ ya usaren da so walan pigaran kaykayarian parad kiyabanti na tuan panagdayew. Alimbawa, say makabat ya usar na computer tan teknolohiya ed komunikasyon so mamapainomay ed bansag a kipalapag na Say Panag-Bantayan diad 121 lenguahe tan Awake! diad 62. Walay espisipikon software program na computer a denesinyo pian makatulong ed pangipatalos na New World Translation diad balo iran lenguahe, tan sayan patalos so mangitatarok na pirmin liket. Sanen nipaway so Croatian a bersion na Kristianon Griegon Kasulatan nen 1999, nilibo so akalua lapud liket. Oniay inkuan na sakey a matakken lan agin laki: “Abayag ko lan aalagaren iyan Biblia. Natan et nayari ak lan ompatey a walaay kareenan!” Intiraminti man odino kabiangan na satan, say sirkulasyon na New World Translation so linmampas la ed 100 a milyon diad 34 a lenguahe.
Atagey Iran Estandarte ed Moral
16, 17. (a) Anggaman mairap, akin a makana so panmantini ed atagey iran estandarte nen Jehova? (b) Anton eksperiensia so mangiyilustra a napaliisan na saray kalangweran so karutakan na mundo?
16 Inkuan nen Jesus: “Balang sakey a manggawa na mauges gulaen to so silew.” (Juan 3:20) Diad biek a dapag, saramay mansiasiansia ed liwawa so mangaaro ed atagey iran estandarte nen Jehova. Oniay inkuan nen Jehova diad panamegley nen Isaias: “Saray ombaley mo met matunong ira ya amin naani.” (Isaias 60:21a) Sakey ya angat so panmantini ed matunong iran estandarte diad sakey a mundon kasmak a tuloy so seksual ya imoralidad, panagtila, agum, tan kinon. Alimbawa, diad arum a daldalin et onaaligwas iray ekonomya tan mainomay so kisuawi ed gegemtan a say sankanonot a lanang et say panpayaman. Anggaman ontan, oniay impasakbay nen Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.” (1 Timoteo 6:9) Agaylan makapasinagem sano nigalet so sakey ed panagnegosyo ya isakripisyo to laray mas importantin bengatla, a singa say Kristianon panlilimog, sagradon serbisyo, moral iran prinsipyo, tan saray responsabilidad ed pamilya!
17 Lalon mairap parad saray kalangweran so panmantini ed matunong iran estandarte, sano aagamilen na dakerakel ed saray kalimog da so lingon panangusar ed druga tan imoralidad. Diad Suriname, sakey a 14 años a bii so inasinggeran na sakey a matarakin laki diad eskuelaan tan sikatoy sasagyaten na laki a misekso. Sikatoy ag-inmabuloy, ya impaliwawa ton isesebel na Biblia iratan ya agamil ed paway na panamaley. Sikatoy kinantiawan na arum a bibii ed eskuelaan tan sikatoy dinesdes dan manguman ed desisyon to, ya ibabaga ran amayamay so mankaliktan a miakdol ed saman a laki. Siansia, tinmalindeg a malet so marikit. Pigaran simba ed saginonor, naamtaan a say laki et naalisay virus na AIDS tan sikatoy graben nansakit. Makakaliket so bii lapud inunor toy ganggan nen Jehova ya ‘onarawi ed pilalawanan.’ (Gawa 15:28, 29) Ikikinon na Tastasi nen Jehova iray kalangweran a walad limog da ya ontatalindeg a malet ed no anto so duga. Say pananisia ra, tan pananisia na atateng da, so ‘mamapasanting,’ a mangitatarok na kagalangan ed ngaran nen Jehova a Dios.—Isaias 60:21b, NW.
Si Jehova so Amadaak
18. (a) Anton baleg a bengatla so ginawa la nen Jehova parad totoo to? (b) Anto so walan ebidensia a mantultuloy ni so idaak, tan antoran maglorian ilalo so manatalaran ed saramay mansiasiansia ed liwawa?
18 On, isisinag nen Jehova so liwawa ed totoo to, bebendisionan, iwawanwan, tan papabiskegen tora. Kaleganay koma-20 siglo, anengneng da so kasumpalan na saray salita nen Isaias: “Say daiset magmaliw naani a sanlibo, et say melag magmaliw naani a mabiskeg a nasyon: Siak, si Jehova, sikato naani gawaen ko a magano ed panaon to.” (Isaias 60:22) Manlapud daiset a bilang da nen 1919, “say daiset” so nagmaliw lan masulok a “sanlibo.” Tan agni angangga itan ya idaraak! Katantaon et walay 14,088,751 ya inmatendi ed selebrasyon na Memoryal na impatey nen Jesus. Dakel ed saraya so aliwa nin aktibon Tastasi. Maliket itayo ta inatendian da itan ya importantin panagngilin, tan pasesegen tayoran mantultuloy ya onasingger ed liwawa. Siansian masmasnag a liliwawaan nen Jehova so totoo to. Akalukas ni so puerta na organisasyon to. Sirin, komon ta determinado so amin a mansiansia ed liwawa nen Jehova. Agaylan panamendision so nagagamoran tayo la natan! Tan agaylan liket so itarok na satan ed arapen sano si Jehova so idayew na amin a pinalsa tan panliketan da so karlangan na gloria to!—Apocalipsis 5:13, 14.
Kasin Nipaliwawa Yo?
• Siopa so mangisisindag ed gloria nen Jehova diad sarayan kaunoran ya agew?
• Anto so mangipatnag ya agtinmayer so seseg na totoo nen Jehova?
• Anto so arum iran maabig a gawa a pakakaukopadoan na saray Tastasi nen Jehova?
• Anggaman ed maruksan isusumpa, anto so panmatalkan tayo?
[Tepetepet Parad Panagaral]
[Tsart ed pahina 17-20]
1999 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Saray litrato ed pahina 15]
Ondaragsa nin siansia so totoo ed organisasyon nen Jehova
[Litrato ed pahina 16]
Naliliketan itayo lapud ta pansiasiansiaen nen Jehova ya akalukas so puerta parad saramay mangaro ed liwawa