‘Mantultuloy Kayon Akabantay’

“Mantultuloy kayo sirin ya akabantay, lapud agyo amta no anton agew so isabi na Katawan yo.”​—MATEO 24:42, NW.

1. Panoy pangipapasen na abayag laran manlilingkor ed si Jehova diad loob na dakel lan taon na dedikadon serbisyo ra? Mangiter na sakey ya ehemplo.

 SAY katuaan so akabatan na dakel ed saray abayag lan manlilingkor ed si Jehova sanen kalangweran nira. Singa say managtagilako ya akalmoy mabmablin perlas insan to inlako so amin a kaykayarian to pian saliwen itan, saratan a maseet ya estudyante na Biblia so angitalirak ed inkasikaran dili tan indedika ray bilay da ed si Jehova. (Mateo 13:45, 46; Marcos 8:34) Panon kasi so pangipapasen da ed pankaukolan a manalagar niray mabaybayag nen say inilaloan da ta pian nanengneng da so kasumpalan na saray gagala na Dios diad dalin? Anggapoy pagbabawian da! Mipakna ira ed inkuan nen Brother A. H. Macmillan, kayari na ngalngali 60 taon na dedikadon serbisyo to ed Dios: “Lalon determinado ak nen say kapiganman pian mansungdo ed pananisiak. Nagmaliw a makanakana so pambibilay ko lapud satan. Siansian makatutulong ni itan ed siak pian makpel a pidenengan so walad arapen.”

2. (a) Anto so nipanpanaon a simbawa nen Jesus ed saray patumbok to? (b) Antoran tepet so konsideraen tayo ed sayan artikulo?

² Komusta kayo ey? Antokaman so edad yo, nonoten iray salita nen Jesus: “Mantultuloy kayo sirin ya akabantay, lapud agyo amta no anton agew so isabi na Katawan yo.” (Mateo 24:42, NW) Lugan na satan a simplin balikas so aralem a katuaan. Agtayo amta no anton agew so isabi na Katawan pian ipaakseb toy panangukom ed sayan marelmeng a sistema, tan agnakaukolan ya amtaen tayo itan. Balet nakaukolan a manbilay itayo ed paraan ya anggapo iray pagbabawian tayo, no sikatoy sinmabi la. Nipaakar ed saya, antoran ehemplo so nabasa tayo ed Biblia a makatulong ed sikatayo pian mansiansian akabantay? Panoy impangiyilustra nen Jesus ed sayan pankaukolan? Tan anton ebidensia so walad sikatayo natan a mamaneknek a manbibilay itayo la ed kaunoran iran agew na sayan agmaridios a mundo?

Sakey a Manamasakbay ya Alimbawa

3. Panon a miulibayan so dakel a totoo natan ed saramay nambilay ed panaon nen Noe?

³ Diad dakel ya aspekto, mipadpara iray totoo natan ed saramay lalaki tan bibii a nambilay ed panaon nen Noe. Diad saman a panaon et napno na karawalan so dalin, tan say inklinasyon na puso na too et “mauges labat a lanang.” (Genesis 6:5) Nigalet so maslak a totoo ed inagew-agew iran gagawaen da ed bilay. Balet, sakbay ya intarok nen Jehova so baleg a Delubio, inikdan to na pankanawnawa so totoo pian makapambabawi. Ingganggan toy Noe a manpulong, tan tinmulok si Noe, a nanlingkor bilang “managpulong na katunongan” diad loob  anganko na 40 odino 50 taon odino onsulok ni. (2 Pedro 2:5) Balet, imbaliwala na totoo so manamasakbay a mensahe nen Noe. Ag-ira akabantay. Kanian diad kaunoran, si Noe tan say pamilya to labat so aliktar ed inkipaakseb na panangukom nen Jehova.​—Mateo 24:37-39.

4. Diad anton pantalos a say ministeryo nen Noe et nibagan matalona, tan panon met a nibaga so ontan ed panagpulong yo?

⁴ Kasin matalona so ministeryo nen Noe? Agtayo itan nahusgaan ed daiset a bilang na saramay kinmiwas. Talagan asumpal so gagala na impanpulong nen Noe antokaman so walan kiwas. Akin? Lapud angiter itan na magenap a pankanawnawa ed totoo no kasin pilien day manlingkor ed si Jehova odino andi. Komusta met so teritoryan pampupulongan yo? Anggano dagdaiset so ondengel, walaan kayoy baleg ya itatalona. Akin? Lapud diad panagpulong, ipapaknol yoy pasakbay na Dios, tan susumpalen yo sirin so ingganggan nen Jesus ed saray patumbok to.​—Mateo 24:14; 28:19, 20.

Impangibaliwala ed Saray Propeta na Dios

5. (a) Antoran kipapasen so kasmak diad Juda ed panaon nen Habacuc, tan panon so inkiwas na totoo ed sayan mapropetikon mensahe? (b) Panon ya impatnag na totoo ed Juda so isusumpa ed saray propeta nen Jehova?

⁵ Pigaran siglo kayari na Delubio, nidunget so panarian na Juda ed graben kipapasen na saray bengatla. Kasmak so idolatriya, ag-inkahustisya, panaglames, tan panagpatey ni ingen. Pinatalindeg nen Jehova si Habacuc pian pasakbayan so totoo, a nadesyang ira diad panamegley na saray Caldeo, odino saray taga-Babilonia, no ag-ira mambabawi. (Habacuc 1:5-7) Balet agdinmengel iray totoo. Oniay nayarin inkatunongan da, ‘Agayla, satan a pasakbay et inyabawag la nen propeta Isaias, nilasus lan taon so apalabas, balet anggapo ni so agawa!’ (Isaias 39:6, 7) Dakel ed saray opisyal na Juda so aglambengat angingalngalep ed mensahe, noagta sinumpa ra ni ingen iray mensahero. Diad sakey ya inkagawa et sinali ran ipapatey si propeta Jeremias, tan sikatoy apatey da lawari no ag-akibali si Ahikam. Lapud sinmanok ed sananey nin mapropetikon mensahe, impapatey nen Arin Joakim si propetan Urias.​—Jeremias 26:21-24.

6. Panon so impamabiskeg nen Jehova ed si Habacuc?

⁶ Mapuersa met so mensahe nen Habacuc, tan impungitpungit itan na totoo a singa met ed mensahe nen Jeremias, a pinuyanan na Dios a mangipasakbay ed 70-taon a pankibalatar na Juda. (Jeremias 25:8-11) Kanian, natalosan tayo so inkagonigon nen Habacuc diad impangikelyaw toy: “Jehova, panon kabayag so itawag ko, et agmoak naani talinengen? Mantagleey ak ed sika lapu ed duksa, et agka mangilaban?” (Habacuc 1:2) Si Habacuc so mapangpangasin inebatan nen Jehova diad oniaran makapabiskeg-pananisian salita: “Say pasingawey sikato ni nipaakar nigeter a panaon, tan mansiglat ya onarap ed anggaan, et naani mantila: Anggan manabala, sikato so alagden mo; ta petepeteg ya onsabi, ya agmanbayag.” (Habacuc 2:3) Kanian si Jehova so walaay “nigeter a panaon” diad pangitarok toy anggaan na ag-inkahustisya tan panaglames. No wala man bilang so singa inkaabala, agnakaukolan a nadismaya si Habacuc, nisay ontayer. Imbes, kinaukolan a sikatoy ‘manalagar,’ a manbilay ed kada agew tekep na inkaganatan. Agmanbayag so agew nen Jehova!

7. Akin a nigana so sananey lamet a kadederal na Jerusalem nen inmunan siglo K.P.?

 ⁷ Manga 20 taon kayari na impisalita nen Jehova ed si Habacuc, aderal so kabiseran syudad na Juda, say Jerusalem. Diad saginonor et nipaalagey lamet itan, tan nipetek so dakerakel ya impakaluksoan ya angonigon a tuloy ed si Habacuc. Anggaman ontan, nen inmunan siglo K.P. et nigana lamet itan a syudad ed kadederal lapud inkatunganga na saray manaayam ditan. Mapangasin inyareglo nen Jehova so kiliktar na saray maptek-impanpuso. Diad saya et inusar toy matalonggaring a propetan si Jesu-Kristo pian ipasabi so mensahe. Nen 33 K.P., oniay inkuan nen Jesus ed saray patumbok to: “Sano nanengneng yo so Jerusalem a niliktob na saray ehersito, saman la amtaen yo a say kabagbag to asingger la. Saman la saray wala ed Judea ombatik ira ed saray palandey.”​—Lucas 21:20, 21.

8. (a) Anto so nayarin agawa ed pigaran Kristiano leleg na inlabas na panaon kayari impatey nen Jesus? (b) Panon ya asumpal iray mapropetikon salita nen Jesus nipaakar ed Jerusalem?

⁸ Diad inlabas na saray taon, nayarin nanumamengan na arum a Kristiano a walad Jerusalem no kapigan so kasumpal na propesiya nen Jesus. Nonoten pa iray impansakripisyo na arum ed sikara. Nayarin agda inawat iray makaingganyon napan-anapan makasengeg ed determinasyon dan mansiansian akabantay. Diad inlabas na panaon, kasin kinmapuy ira? Inisip da kasin dadaraken da labat so panaon da, ya ikakatunongan dan onaplika iray salita nen Jesus ed arapen nin kailalakan, ya aliwan ed panaon da? Nen 66 K.P., ginmapon asumpal so propesiya nen Jesus sanen niliktob na Romanon armada so Jerusalem. Saramay nansiansian akabantay so akatebek ed tanda, tinmaynan ed syudad, tan asigpay ira manlapud impankibalatar na Jerusalem.

Panangiyilustra ed Pankaukolan a Magmaliw ya Akabantay

9, 10. (a) Panon yon sumaryoen so ilustrasyon nen Jesus nipaakar ed saray aripen a nanalagar ed ipawil na katawan da manlapud bansal to? (b) Akin a nayarin nairapan iray aripen ed panaalagar da ed katawan da? (c) Akin a makagungguna ed saray aripen so pagmaliw a maanos?

⁹ Diad pangidadanet ed pankaukolan a magmaliw ya akabantay, inyaliling nen Jesus iray babangatan to ed saray aripen a manatalaran ed ipawil na katawan da manlapud bansal to. Amta ran sikatoy ompawil ed sakey a labi​—balet diad anton oras? Leleg na unonan panagbantay ed labi? Komadua? Komatlo? Agda amta. Inkuan nen Jesus: “Sano onsabi [so katawan] ed komaduan panagbantay, tan no dia ed komatlo, et naromog tora ya [akabantay], mapalar so saratan ya ariripen.” (Lucas 12:35-38) Isipen pa labat so panaalagar na sarayan aripen. Kada walay onkalasakas, kada napasikmatan ya anino so maseguron mamapalalo ed pantatalaran da: ‘Saya la seguro so katawan tayo?’

¹⁰ Panon balet ey no sinmabi so katawan kaleganan na komaduan panagbantay ed labi, ya onnatnat manlapud ngalngali alas nuebe anggad pegley-labi? Kasin akaparaan ya onabet so amin ya ariripen, pati saramay amasyan nankimey manlapula’d kabkabuasan, odino kasin akateglep lay arum? Panon to no pinmawil so katawan leleg na komatlon panagbantay ed labi​—say oras a manlapud pegley-labi anggad ngalngali alas tres ed kabuasan? Adismaya la kasi so arum ed saray aripen, ya inmingongot lara ed singa naabala lan isabi na katawan? * Saraman lambengat so nasabian a manbabantay so niyabawag a maliket sano onsabi so katawan. Seguradon onaplika ed sikara iray salitan walad Uliran 13:12: “Say ilalo a nitantan pabeblayen to so puso; balet sano say pilalek onsabi, sikato so kiew na bilay.”

11. Panon itayon natulongan na pikakasi pian mansiansian akabantay?

¹¹ Kaleganan na panaon a singano walay impakaabalaan to, anto so makatulong ed saray patumbok nen Jesus pian mansiansia iran akabantay? Leleg a wala ira’d hardin na Getsemani sakbay na inkaerel to, oniay kuan nen Jesus ed taloran apostol to: “Manpuyat tan manpikasi kayo, pian agkayo onloob ed katutukso.” (Mateo 26:41) Lapud presenti ed satan ya inkagawa,  ontan met so insimbawa nen Pedro ed kapara toran Kristiano kayari na pigaran taon. Insulat to: “Say anggaan na ganaganay bengatla manasingger: mandangka kayo sirin, tan pampelengan yo so pikakasi.” (1 Pedro 4:7) Malinlinew a say masimoon a pikakasi so kaukolan a kabiangan na Kristianon rotina tayo. On, mantultuloy itayon mikasi ed si Jehova a tulongan to itayon mansiansian akabantay.​—Roma 12:12; 1 Tesalonica 5:17.

12. Anto so pandumaan na panagpalbeng tan inkamabantay?

¹² Imanoen met so inkuan nen Pedro: “Say anggaan na ganaganay bengatla manasingger.” Panon lan kaasingger? Agnayarian ya amtaen na totoo so eksakton agew tan oras. (Mateo 24:36) Balet walay pandumaan na kigalet la’d panagpalbeng, ya ag-ipapaseseg na Biblia, tan say pantultuloy a panalagar ed anggaan, ya ipapaseseg na Biblia. (Ikompara so 2 Timoteo 4:3, 4; Tito 3:9.) Anto so sakey a paraan pian makapantultuloy itayon makapanalagar ed anggaan? Diad mapetepet a panimano ed ebidensia ya asingger lay anggaan. Repasoen tayo sirin so anemiran alutor na ebidensia a mamaneknek a manbibilay itayo la ed kaunoran iran agew na sayan agmaridios a mundo.

Anemiran Makakombinsen Alutor na Ebidensia

13. Panon kayon nakombinse ed propesiya nen Pablo a nikurit diad 2 Timoteo kapitulo 3 a manbibilay itayo la ed “saray kaunoran ya agew”?

¹³ Unona, mabitabitar tayo lan nanenengneng so kasumpalan na propesiya nen apostol Pablo nipaakar ed “saray kaunoran ya agew.” Insulat nen Pablo: “Dia ed saray kaunoran ya agew onsabi so saray panaon a maatap [“a mairap a pidenengan,” NW]. Ta saray totoo sikara naani so mangaro ed saray lamalaman da, maaro ra na pilak, managpasirayew, atagey a linawa, maayew, matulay ed saray kaatengan da malamang aliwa ran masimpit. Anggapo so aro ra a nianakan, anggapo so panangasi’ra, managpauges, aliwa ra’n maadia, maruksa ra, maingongot ed saray maabig. Managliput, mayu-uges, mapasang, maaro ed saray likeliket, a lalo nen say dia ed Dios. A wala so nengneng da ya inkasanto, et ingen itapat da so pakayari na saya’n inkasanto: onarawi ka met ed saray ontan. Balet saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” (2 Timoteo 3:1-5, 13) Agta nanenengneng tayo lan nasusumpal iyan propesiya ed panaon tayo? Saraman lambengat so mangibabaliwala ed saratan a katuaan so makapangiburi ed satan! *

14. Panon a nasusumpal natan iray salita a walad Apocalipsis 12:9 nipaakar ed Diablo, tan anto so magano lan nagawa ed sikato?

¹⁴ Komadua, nalilikas tayo laray epekto na inkapagit nen Satanas tan saray demonyo to manlapud tawen, bilang kasumpalan na Apocalipsis 12:9. Oniay nabasa tayo ditan: “Nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato.” Nansumpal iya ed pirmin abagey diad dalin. Tua, pirmi lay abagey ed katooan, nagkalautla nen manlapula’d 1914. Balet niyarum ed propesiya na Apocalipsis a sano nibasileng la’d dalin so Diablo, amta ton “daiset la so panaon to.” (Apocalipsis 12:12) Legan na sayan peryodo, mibabakal si Satanas ed saray alanaan a patumbok nen Kristo. (Apocalipsis 12:17) Seguradon anengneng tayo laray epekto na pangaataki to legan na panaon tayo. * Balet, agmanbayag et nikalinsurong lay Satanas ta pian “agto la tilaan so saray nasyones.”​—Apocalipsis 20:1-3.

15. Panon ya itarya na Apocalipsis 17:9-11 so ebidensia a manbibilay itayo la ed panaon na anggaan?

¹⁵ Komatlo, manbibilay itayo la ed panaon na komawalo tan unor lan “ari” ya asalambit ed propesiyan nirekord ed Apocalipsis 17:9-11. Binitla dia nen apostol Juan so pitoran arari, a mangirerepresenta ed pitoran pakayari ed mundo​—Ehipto, Asirya, Babilonia, Medo-Persia, Gresya, Roma, tan say nanmuyong ya Anglo-Amerikanon pakayari  ed mundo. Anengneng to met so ‘komawalo ya ari’ a ‘nanlapu ed saray pitora.’ Sayan komawalon ari​—say sampot ya ari ya anengneng nen Juan ed pasingawey​—so mangirerepresenta natan ed Nasyones Unidas. Inkuan nen Juan a sayan komawalon ari so “onla ed kabalangan,” insan kayari na satan et anggapo lay asalambit ya arari ed dalin. *

16. Panon ya impabitar na saray katuaan na kasumpalay kugip nen Nabucodonosor nipaakar ed imahen a manbibilay tayo la ed kaunoran iran agew?

¹⁶ Komapat, manbibilay itayo ed panaon ya insimboloy sali na imahen ed kugip nen Nabucodonosor. Impatalos nen propeta Daniel iyan misteryoson kugip nipaakar ed abalbaleg ya imahen a say itsura to et sakey a too. (Daniel 2:36-43) Say apatiran balatyang a kabiangan na imahen so mangirerepresenta ed nanduruman pakayari ed mundo, a manlapula’d ulo (say Empiryo na Babilonia) a manpaleksab ed sali tan gamegamet na sali (saray gobierno a manuuley natan). Pinmatnag la so amin na saray pakayari ed mundo ya inrepresenta na satan ya imahen. Manbibilay itayo la ed panaon ya insimboloy sali na imahen. Anggapo la so asalambit ya arum nin pakayari ya onsabi. *

17. Panon a say panagpulong tayo nipaakar ed Panarian so mangitarya na nagkalalon ebidensia a manbibilay itayo la ed panaon na anggaan?

¹⁷ Komalima, nanenengneng tayo so kagagaway sankagloboan a panagpulong, ya imbaga nen Jesus a nagawa sakbay na anggaan na sayan sistema. Inkuan nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14) Natan, peles a nasusumpal itan a propesiya diad malaklaknab a paraan. On, wala niray ag-akimeyan a teritorya, tan nayarin diad dugan panangipanaon nen Jehova et nalukasan so baleg a pankanawnawa parad babaleg a kimey. (1 Corinto 16:9) Anggaman kuan, ag-ibabaga na Biblia ya alagaren ni nen Jehova a personal a napulongan so kada too ed dalin. Imbes, say maong a balita so nepeg a nipulong anggad kapenek nen Jehova. Insan onsabi so anggaan.​—Ikompara so Mateo 10:23.

18. Mapatnag, anto so peteg nipaakar ed arum iran alanaan sano onggapo lay baleg a kairapan, tan panon iyan naseguro?

¹⁸ Komanem, ondaraiset lay bilang na puron alanaan a babangatan nen Kristo, anggaman ompatnag a wala niray pigaran wadiad dalin sano onggapo so baleg a kairapan. Matakken lan maong so dakel ed saray nakdaan, tan diad inlabas na saray taon et lalon dinmaiset so bilang na saramay peteg ya alanaan. Ingen, oniay inkuan nen Jesus, diad impanukoy to’d baleg a kairapan: “No ag-apatikeyan iratan ya agew, anggapo komon naani laman a nilaban; balet nisengeg ed saray pinili napatikeyan so saratan ya agew.” (Mateo 24:21, 22) Mabitar sirin a walay pigaran “pinili” nen Kristo a wadia nin dalin sano onggapo so baleg a kairapan. *

Anto so Walad Arapen?

19, 20. Akin a mas inkaganatan ed sikatayo natan nen say kapiganman so pansiansian aliing tan mantultuloy ya akabantay?

¹⁹ Anto so manatalaran ed sikatayo diad arapen? Onsabi ni iray makapalikliket a panaon.  Impasakbay nen Pablo a “say agew na Katawan onsabin singa matakew ed labi.” Oniay inkuanto diad panutukoy to’d totoon ompapatnag a makabat ed mundo: “Sano ibabaga ray, Kareenan tan andi paga, insan biglan kaderal so onsabi ed sikara.” Kanian, oniay ipapaseseg nen Pablo ed saray manbabasa ed sulat to: “Ag-itayo onugip, a singa gawa na saray arum, et manpuyat itayo tan mandangka itayo.” (1 Tesalonica 5:2, 3, 6) Tua, saramay maniilalo ed niletneg iran organisasyon na totoo a mangitarok na kareenan tan kaligenan so mangibabaliwala ed tuan nagawa. Akateglep laratan a totoo!

²⁰ Bigbiglan onsabi so kaderal na sayan sistema na bengabengatla. Mantalaran itayo sirin ed agew nen Jehova. Inkuan a mismo na Dios ed si Habacuc: “Agmanbayag”! On, mas inkaganatan ed sikatayo so pansiansian akabantay.

[Saray paimano ed leksab]

Kasin Nanonotan Yo?

• Antoran alimbawa ed Kasulatan so makatulong ed sikatayo pian mantultuloy ya akabantay?

• Panon so impangiyilustra nen Jesus ed pankaukolan ya inkamabantay?

• Anton anemiran alutor na ebidensia so mamaneknek a manbibilay itayo la ed kaunoran iran agew?

[Tepetepet Parad Panagaral]

[Saray litrato ed pahina 9]

Matoor a nanlingkor si A. H. Macmillan ed loob na ngalngali anemiran dekada

[Litrato ed pahina 10]

Inyaliling nen Jesus iray babangatan to ed saray aripen a nantultuloy ya akabantay