Napapano na “Makaparoyroyo Iran Bengatla” so Abung nen Jehova

“Mayegmegen ko [Jehova] so amin a nasyones, tan onloob so makaparoyroyo iran bengatla na amin a nasyones; tan sayan abung so panoen ko na gloria.”​—AGGEO 2:7, NW.

1. Diad panaon na emerhensia, akin a say pilimeron nanonotan tayo et saray inadaro tayo ed bilay?

 ANTORAN mararakep a bengatla so karga na abung yo? Walara kasi so ankablin muebles, modernon kompyuter, tan balon kotsi ed garahe yo? Anggano walaray ontan a kayarian yo, agta onabobon kayo a say sankamablian a bengatla diad loob na abung yo et say totoo​—saray kapamilyaan yo? Isipen pan diad sakey a labi et aliing kayo lapud walay asingob yon maasyot. Napopoolan lay abung yo, tan wala labat lay pigaran minuto pian makabatik kayo! Anto so pilimeron pampagaan yo? Saray muebles yo? Say kompyuter yo? Say kotsi yo? Imbes, agyo ni kasi nonoten iray inad-aro yo’d bilay? Siempre, sikara so nonoten yo lapud mas mabli iray totoo nen saratan a bengatla.

2. Panon kalaknab so impamalsa nen Jehova, tan dinan ed saray pinalsa so panlikliketan nen Jesus?

² Nonoten pa natan so nipaakar ed si Jehova a Dios tan say Anak to, si Jesu-Kristo. Si Jehova so “amalsa na tawen tan dalin, tan say dayat, tan saray amin a wala ed sikara.” (Gawa 4:24) Say Anak to, say “uloen a komikimey,” so inusar nen Jehova diad impamalsa to ed amin na saray arum nin bengatla. (Uliran 8:30, 31; 1 Juan 1:3; Colosas 1:15-17) Maseguron papablien nen Jehova tan si Jesus so amin a pinalsa. (Ikompara so Genesis 1:31.) Balet dinan ed saray pinalsa so isipen yon importantin tuloy ed sikara​—bengabengatla odino totoo? Diad inkilitrato to bilang kakabatan, oniay inkuan nen Jesus: “Say panggayagaan ko wala nensaman ed saray anak na totoo,” odino unong ed impangipatalos ed satan nen William F. Beck, si Jesus so “nanliket ed saray totoo.”

3. Anton propesiya so imbalikas nen Jehova panamegley nen Aggeo?

³ Seguradon papablien a tuloy nen Jehova so totoo. Sakey lan pakapatnagan ed saya et say mapropetiko iran salita ya imbalikas to nen taon 520 K.K.P. diad panamegley na propeta ton si Aggeo. Inyabawag nen Jehova: “Mayegmegen ko so amin a nasyones, tan onloob so makaparoyroyo iran bengatla na amin a nasyones; tan sayan  abung so panoen ko na gloria. . . . Babaleg so gloria na sayan unor ya abung nen samay inmuna.”​—Aggeo 2:7, 9, NW.

4, 5. (a) Akin ya agmakatunongan ya ibagan say balikas a “makaparoyroyo iran bengatla” so ontukoy ed inkasanting na materyales? (b) Panon yon ukeran so “makaparoyroyo iran bengatla,” tan akin?

⁴ Anton “makaparoyroyo iran bengatla” so mamano ed abung nen Jehova tan mangitarok na malaklaknab a gloria ed satan? Mabmabli iran muebles tan malabor iran dekorasyon? Balitok, pilak, tan ankablin batobato? Singa agmakatunongan itan. Nodnonoten a say datin templo, ya inaguraan manga limaran siglo lay apalabas, so sakey a paalagey a binilbilyon a dolyares so kantidad to! * Seguradon ag-ilaloan nen Jehova a say templon impalaagey na sayan melag a grupo na akapawil iran Judio et palumbasan toy templo nen Solomon diad inkasanting na materyales!

⁵ Anto sirin so “makaparoyroyo iran bengatla” a mamano ed abung nen Jehova? Mapatnag a saratan et totoo. Diad katuaan to, say makapanpaliket ed puso nen Jehova et aliwan say pilak tan balitok noagta saray totoo a manlilingkor ed sikato lapud aro. (Uliran 27:11; 1 Corinto 10:26) On, papablien nen Jehova so amin a lalaki, bibii, tan ugugaw a mandadayew ed sikato a walay panangabobon to. (Juan 4:23, 24) Saraya so “makaparoyroyo iran bengatla,” tan mas mabli ira ed si Jehova nen say amin ya inyarkos a mamaparakep ed templo nen Solomon.

6. Anton gagala so inkausaran na kadaanan a templo na Dios?

⁶ Anggaman ed tuloytuloy ya isusumpa, asumpal so templo nen 515 K.K.P. Angga ed panaon na impangibagat la nen Jesus, say templo ed Jerusalem so nansiansian sentro na puron panagdayew parad dakel a “makaparoyroyo iran bengatla,” a tugyopen na saray sipor lan Judio tan Gentil a proselitas. Balet ta inrepresenta na templo so bengatlan mas matalonggaring, unong a naimano tayo.

Say Kasumpalan nen Inmunan-siglo

7. (a) Anto so inlitrato na kadaanan a templo na Dios diad Jerusalem? (b) Deskribien pa iray gagawaen na atagey a saserdote no Agew na Pananakbong.

⁷ Inlitrato na templo na Jerusalem so babaleg ya uksoyan ed panagdayew. Satan so espiritual a templo na Dios, ya inletneg nen Jehova nen 29 K.P. panamegley nen Jesus bilang Atagey a Saserdote. (Hebreos 5:4-10; 9:11, 12) Konsideraen pay panpadparaan na saray obligasyon na atagey a saserdote na Israel tan saray ginawa nen Jesus. Kada taon no Agew na Pananakbong, onasingger so atagey a saserdote ed altar na saban na templo insan iyapay to so kalakian a baka pian sakbongan iray kasalanan na saray saserdote. Saginonor, sikatoy onloob ed templo a tarok toy dala na kalakian a baka, ya ondalan ed saray puertan mangeketeg ed saban tan Masanto insan sikatoy ondalan ed kurtina a mangeketeg ed Masanto tan Sankasantosan. No sikatoy wadman la’d loob na Sankasantosan, iwalsik na atagey a saserdote so dala ed arap na kaban na sipan. Insan kayari na satan, iyapay toy sakey a kanding pian sakbongan so 12 aliwan makasaserdoten tribu na Israel. (Levitico 16:5-15) Panon a misiglaotan iyan panagngilin ed espiritual a templo na Dios?

8. (a) Diad anton pantalos a say inkiyapay nen Jesus et ginmapo nen 29 K.P.? (b) Anton nikabkabiig a relasyon ed si Jehova so nanggayagaan nen Jesus diad intiron kurang na ministeryo to diad dalin?

⁸ Bilang resulta, niyapay si Jesus ed altar na linaway Dios sanen sikatoy abautismoan tan alanaan na masanton espiritu na Dios nen 29 K.P. (Lucas 3:21, 22) On, sayan ebento so akapatnagan lay inggapo na masakripisyon bilay nen Jesus a nambayag na talora tan kapalduay taon. (Hebreos 10:5-10) Legan na satan a peryodo, nanggayagaan nen Jesus so relasyon to ed Dios bilang nailalak ed espiritu. Sayan nikadkaduman talindeg nen Jesus ed mangatatawen ya Ama to so agsigpot a narandan na arum a totoo. Singano itan sakey a sanib ed saray mata na pakatebek da, a mipadpara ed samay manasanib ed Masanto manlapud pakanengneng na saramay walad saban na tabernakulo.​—Exodo 40:28.

9. Akin ya agmakaloob ed tawen si Jesus bilang too, tan panon so inkasolbar na sayan kipapasen?

⁹ Anggaman ed impagmaliw ton alanaay-espiritu ya Anak na Dios, say toon Jesus so agmakarapat  ed bilay diad tawen. Akin ya andi? Lapud say laman tan dala so agmakatawir ed mangatatawen a Panarian na Dios. (1 Corinto 15:44, 50) Lapud say laman nen Jesus bilang too et sakey a babeng, insimbolon tuloy itan na kurtina ya angeteg ed Masanto tan Sankasantosan diad kadaanan a templo na Dios. (Hebreos 10:20) Balet taloy agew kayari na impatey to, si Jesus so pinaoli na Dios bilang sakey ya espiritu. (1 Pedro 3:18) Diad ontan et sikato lay makaloob ed lugar na Sankasantosan na espiritual a templo na Dios​—diad mismon tawen. Tan ontan so eksakton agawa. Insulat nen Pablo: “Aglinmoob si Kristo ed masanton pasen [mapatnag a manutukoy ed Sankasantosan] a ginawa na lima, ya alimbawa na matua; noag ingen diman ed tawen a dili, pian ompatnag natan ed arap na Dios lapu ed sikatayo.”​—Hebreos 9:24.

10. Anto so ginawa nen Jesus diad impawil to ed tawen?

¹⁰ Diad tawen, ‘inwalsik [nen Jesus] so dala’ na bagat to diad impangipresenta toy mananondon a balor na dala to ed si Jehova. Ingen, wala ni so ginawa nen Jesus. Sakbay na impatey to, oniay inkuan to ed papatumbok to: “Onla ak tan mangiparaan ak na pasen ya onkana’d sikayo, onla ak dia lamet, tan awaten ta kayo ed inkasiak, pian no iner so kawalaan ko, diman makapanayam kayo met.” (Juan 14:2, 3) Kanian diad impakaloob nen Jesus ed Sankasantosan, odino tawen, nilukasan to so dalan parad arum nin ontumbok. (Hebreos 6:19, 20) Sarayan indibidual, a manbilang na 144,000, so manlingkor bilang katangbayan a saserdote diad uksoyan na espiritual a templo na Dios. (Apocalipsis 7:4; 14:1; 20:6) No panon ya intarok nin unona na atagey a saserdote na Israel so dala na kalakian a baka diad Sankasantosan pian sakbongan iray kasalanan na saray saserdote, say balor na nipaagus a dala nen Jesus so inmunan inmaplika ed sarayan 144,000 a katangbayan a saserdote. *

Say “Makaparoyroyo Iran Bengatla” Natan

11. Inyapay na atagey a saserdote na Israel so kanding ed biang na siopa, tan anto so inlitrato na saya?

¹¹ Ompatnag a nen kasabi taon 1935, akompleto lay inkalapagan a panagtipon ed saray alanaan. * Balet agni asumpal nen Jehova so pamaparakep to ed abung to. Andi ni lapud onloloob ni iray “makaparoyroyo iran bengatla” ed satan. Nodnonoten a duaran ayep so inyapay na atagey a saserdote ed Israel​—sakey a kalakian a baka parad kaskasalanan na saray saserdote tan sakey a kanding parad kaskasalanan na saray tribun aliwan saserdote. Lapud inlitrato na saray saserdote iray alanaan a nakaiba nen Jesus diad mangatatawen a Panarian, sioparay inrepresenta na saray tribun aliwan makasaserdote? Say ebat et naromog  ed saray salita nen Jesus a nikurit diad Juan 10:16: “Wala niray arum a karnerok, ya ag-ira taga dia ed saya a panangipukokan; kaukolan ya awiten ko ra met, et dengelen da so bosis ko; et magmaliw iran saksakey a pulok, saksakey a pastol.” Kanian, say nipaagus a dala nen Jesus so mangungguna ed duaran grupo na totoo​—unona, saramay Kristianon walaan na ilalo a miuley ed si Jesus diad tawen tan komadua, saramay maniilalon manbilay na andi-anggaan diad paraison dalin. Mapatpatnag, sayan komaduan grupo so inlitrato na “makaparoyroyo iran bengatla” ed propesiya nen Aggeo.​—Miqueas 4:1, 2; 1 Juan 2:1, 2.

12. Panon a niyaasingger so dakel a “makaparoyroyo iran bengatla” diad abung na Dios natan?

¹² Sayan “makaparoyroyo iran bengatla” so siansian mamapano ed abung nen Jehova. Diad apalabas iran taon, nakal laray panameget diad Mamabukig a Europa, saray parti na Aprika, tan arum nin daldalin, ya angiyabuloy ed kikayat na maong a balita na Panariay Dios diad saray teritoryan agni apulongan anggad natan. Diad iloloob na saray makaparoyroyon bengatla ed uksoyan na templo na Dios, panggugunaetan da met so manggawa na saray babangatan, bilang katutulok ed ganggan nen Jesus. (Mateo 28:19, 20) Legan dan gagawaen itan, naroromog da so dakel a totoo, namparan kalangweran tan matakken la, a posiblin magmaliw a “makaparoyroyo iran bengatla” a mamarakep ed abung nen Jehova. Konsideraen pa labat so pigaran alimbawa no panon iyan nagagawa.

13. Panon ya impatnag na ugaw a bii ed Bolivia so seseg to diad panangikayat ed mensahe na Panarian?

¹³ Diad Bolivia, sakey a limay taon ya ugaw a bii a pinabaleg na Tasin atateng so kinmerew na permiso ed maestra to pian ag-onloob ed klase legan na simbay bisita na manangasikaso na sirkito. Akin? Labay toy mibiang ed ministeryo legan na sayan espisyal a kimey ed loob na sakey simba. Anurprisa iya ed atateng to, balet malikeliket ira lapud maabig ya awawey to. Say ugaw a bii so mangikokondukta la natan na limaran iyaaralan  ed Biblia, tan pigara ed sarayan estudyante so onaatendi la ed saray Kristianon miting. Nitagar to ni ingen so maestra to diad Kingdom Hall. Nayarin diad panakar na panaon et ipatnag met la na arum ed saray iyaaralan to na Biblia so pagmaliw a “makaparoyroyo iran bengatla” a mamarakep ed abung nen Jehova.

14. Diad Korea, panon ya atumangan so impananos na sakey ya agin bii ed sakey a toon ompatnag ya ag-interesado?

¹⁴ Leleg a manaalagar ed istasyon na tren, inasinggeran na sakey a Kristianon bii ed Korea so sakey ya estudyanten manderengel na musika panamegley na headphones to. “Wala lay relihyon mo?” so intepet na agin bii. “Agak interesado ed antokaman a relihyon,” so ebat na estudyante. Ag-adismaya so agin bii. Oniay intuloy ton inkuan, “Diad ilabas na panaon, nayarin kaliktanen na sakey a too so manpili na sakey a relihyon. Balet no anggapoy amta to nipaakar ed relihyon, nayarin aliwa so napili to.” Anguman so awawey na estudyante, tan sikatoy interesadon dinmengel ed agi tayo. Sikatoy inopresian na libron Is There a Creator Who Cares About You? tan inkuan ed sikato na agin bii a baleg so nitulong na sayan publikasyon sano nasabi lay panaon na pampili toy sakey a relihyon. Inawat ton tampol so libro. Diad tinmumbok a simba, sikatoy impaiyaralan na Biblia ed Tastasi nen Jehova, tan natan et sikatoy onaatendi la ed amin a miting ed kongregasyon.

15. Panon ya akapangigapo so sakey a malangwer nin bii ed Hapon na saray panangiyaral na Biblia, tan panon ya atumangan iray sagpot to?

¹⁵ Diad Hapon, impasen nen Megumi a mantaon na 12 so pan-eeskuelaan to bilang mabungan lawak a panpulongan tan pambangatan. Dakel lay nigapo to ingen a panangiyaral ed Biblia. Panon itan a ginawa nen Megumi? Lapud sikatoy manbabasa na Biblia odino manpaparaan parad saray miting leleg na panangugto, naynay a sikatoy tepetan na saray kaklase to no antoy gagawaen to. Arum so nantepet ed si Megumi no akin ya agto mibibiang ed pigaran aktibidades na eskuelaan. Eebatan nen Megumi iray tepet da insan ikuan to ed sikara a walay ngaran na Dios. Naynay a nasagyat so interes na saray ondedengel ed sikato lapud satan. Insan to ira opresian na panagaral na Biblia. Natan, si Megumi so mangikokondukta la na 20 a panangiyaral​—18 ed saratan so kaklase to.

16. Panon a nigapo na sakey ya agin laki diad Cameroon so panangiyaral na Biblia ed pigara’d saray lalakin manluludlurey ed sikato?

¹⁶ Diad Cameroon, tinawag na sakey a grupo na waloran lalaki a walad lugar na pantratrabahoan da so sakey ya agin laki a manoopresi na literatura na Biblia ed saray ondadalan. Lapud labay dan ludlureyen so agi, sikatoy tinepetan da no akin ya agto panisiaan so Trinidad, impiernon apoy odino ag-ipapatey na kamarerwa. Inusar na agi tayo so Biblia pian ebatan iray tepet da. Bilang resulta, impaiyaralan na Biblia so talora ed saraman a lalaki. Sakey ed sikara, si Daniel, so ginmapon inmatendi ed saray miting tan dineral to ni ingen so amin a kaykayarian ton misiglaotan ed espiritismo. (Apocalipsis 21:8) Sikatoy abautismoan kayari na kulang a sakey taon.

17. Panon ya inusar na pigaran agagi ed El Salvador so inkadunong pian pulongan so sakey a too ya agni ondengel nen pilimero ed mensahe na Panarian?

¹⁷ Diad El Salvador, isisinger na sakey a laki so masebeg ya aso to diad arap na puerta to kapagno nanengneng ton nitan laray Tastasi nen Jehova. Alagaren na too so iyalis na Tastasi, insan to iloob so aso diad abung. Satan a laki so agbalot napitongtongan na agagi. Kanian sakey ya agew et sinali ra so duman paraan. Lapud amta ran narengel na laki so ibabaga ra, pinulongan da so aso. Linma ira ed abung, imbano ra so aso, tan inkuandan panliketan day pakapitongtong ed satan.  Intongtong da so nipaakar ed panaon sano magmaliw lan paraiso so dalin, ya anggapo laray manpasnok​—on, sano anggan saray ayayep et marendeen met la. Insan ira mapagalang a nampatanir ed aso tan binmuat lara. Asurprisa ira sanen pinmaway ed abung to so laki tan akidispensaan ed agto pitongtong ed Tastasi. Sikatoy angawat na saray magasin, tan nigapo so panagaral na Biblia. Sayan too et sakey lan agi tayo natan​—sakey ed “makaparoyroyo iran bengatla”!

“Agkayo Ontatakot”

18. Antoran problema so aarapen na dakel a Kristiano, balet panon a momoriaen nen Jehova iray mandadayew ed sikato?

¹⁸ Mibibiang kayo kasi ed importantin kimey na panangipulong ed Panarian tan panaggaway-babangatan? Petepeteg ya apribilihyoan kayo no ontan so gagawaen yo. On, niyaasingger so “makaparoyroyo iran bengatla” diad abung nen Jehova panamegley na sayan kimey. (Juan 6:44) Tua, nayarin sagpaminsan kayon nakesawan odino nadismaya. No maminsan, say arum​—anggan ed limog na saray matoor a lingkor nen Jehova​—so mibabarangkaan ed saray liknaan na inkaandian lay kakanaan. Balet ag-onsusuko! Momoriaen nen Jehova so kada sakey ed saray mandadayew ed sikato bilang makaparoyroyo, tan sikatoy interesadon maong ed kilalaban da.​—2 Pedro 3:9.

19. Anton panamaseseg so intarya nen Jehova panamegley nen Aggeo, tan panon itayon napabiskeg ed sarayan salita?

¹⁹ Sano nadidismaya itayo, balanglan makasengeg ed isusumpa odino arum nin agmarakep a sirkumstansia, makapabiskeg iray salita nen Jehova ed saray akapawil a Judio. Oniay nabasa tayo diad Aggeo 2:4-6: “Natan ombiskeg ka, O Zorobabel, kuan nen Jehova; et manpabiskeg ka, O Josue, ya anak a laki nen Josedec ya atagey a saserdote; et manpabiskeg kayo, sikayo ya amin ya ombaley ed dalin, kuan nen Jehova, et mankimey kayo: ta wala ak ed sikayo, kuan nen Jehova na saray ehersito. Unong ed salita ya impisipan ko ed sikayo sanen pinmaway kayo ed Ehipto, et say espirituk nanayam ed pegley yo: agkayo antakot. Ta onia so kuan nen Jehova na saray ehersito: Maminsan ni, ed maganggano, et panmayegmegen ko naani so saray tawen, tan say dalin, tan say dayat, tan say amagaan a dalin.” Imanoen ya ag-itayo lambengat papasesegen nen Jehova a manpabiskeg noagta itatarya to met ed sikatayo so paraan pian makagamor na biskeg. Panon? Imanoen iray panamaseguro to: “Wala ak ed sikayo.” Agaylan makapabiskeg-pananisia so pakaamta ya antokaman iray babeng ya arapen tayo, si Jehova so walad sikatayo!​—Roma 8:31.

20. Diad anton paraan a napapano na agnapalumbasan a gloria so abung nen Jehova?

²⁰ Talagan pinaneknekan la nen Jehova a sikato so wala ed totoo to. On, singa ed inkuan to panamegley nen propeta Aggeo: “Babaleg so gloria na sayan unor ya abung nen samay inmuna . . . Tan diad sayan pasen et iter ko so kareenan.” (Aggeo 2:9, NW) On, say sankabalgan a gloria natan et naromog diad espiritual a templo nen Jehova. Agayla, nilasus nilibo so onkakamang ed tuan panagdayew kada taon. Saraya so natataganon maong ed espiritual, tan anggan ed sayan magulon mundo, panggagayagaan day kareenan a napalumbasan lambengat na samay walan naeksperiensia ed balon mundo na Dios.​—Isaias 9:6, 7; Lucas 12:42.

21. Anto so determinasyon tayo?

²¹ Asingsingger lan mayegmegen nen Jehova iray nasyon diad Armagedon. (Apocalipsis 16:14, 16) Usaren tayo komon so nakekeraan nin panaon tayo pian isalba so dakel nin bilay. Komon ta manpabiskeg itayo tan sigpot a manmatalek ed si Jehova. Determinado itayo komon a mantultuloy ed panagdayew diad baleg ya espiritual a templo to, a panoen itan na dakerakel nin “makaparoyroyo iran bengatla” angga ed pangibaga la nen Jehova ya asumpal la so kimey.

[Saray paimano ed leksab]

Kasin Natandaan Yo?

• Anto so mas mabli ed si Jehova nen say materyal iran bengatla?

• Anton duaran grupo na totoo so nagugunggunaan ed nipaagus a dala nen Jesus?

• Siopa iray ‘makaparoyroyon bengatla’ a mamapano na gloria ed abung nen Jehova?

• Anton ebidensia so walad sikatayo a nasusumpal la natan so propesiya nen Aggeo?

[Tepetepet Parad Panagaral]

[Diagram ed pahina 16]

(Parad aktual a format, nengnengen so publikasyon)

Kasin amta yo so simbolikon kabaliksan na kadaanan a templo nen Jehova?

Sankasantosan

Kurtina

Masanto

Balkon

Altar

Saban

[Litrato ed pahina 17]

Say atagey a saserdote so angiyapay na sakey a kalakian a baka parad kaskasalanan na saray saserdote tan sakey a kanding parad kaskasalanan na saray aliwan makasaserdoten tribu na Israel

[Litrato ed pahina 18]

Say sankamundoan a kimey na panangipulong ed Panarian so manatangguyor ed dakerakel a totoo diad abung nen Jehova