Nayarian Mon Amtaen so Arapen!

Seryoson iisipen na maslak a totoo so nipaakar ed arapen. Kaliktan day manplano, mangipoonan a sikakabat, tan inkamaligen. Balet wala tay antokaman a paraan pian naseguro no antoy itatarya na arapen?

DIAD panggugunaet na totoo a naamtaan no antoy itatarya na arapen, nambabangil lay ineksperimento ra. Aanalisaen na saray sientista nipaakar ed sosyedad a tatawagen a futurologist so peles iran nagagawa tan ibabase da iray prediksion da ed saraya. Ontan met so gagawaen na saray ekonomista ed dilin lawak na aktibidad da. Saray astrologo tan managpalar so onnenengneng ed saray horoscope, bolan kristal, tan say okulto, tan dakel iray patumbok da. Alimbawa, si Nostradamus ya astrologon Pranses so siansia nin popular, anggaman pigaran siglo lan inatey.

Amin na sarayan mankuan a propeta so apaneknekan lan agnapanmatalkan tan makapadismayan tuloy. Akin? Lapud ibabaliwala ra si Jehova a Dios tan say Salita to, say Biblia. Lapud sayan rason et agda naebatan iray manunan tepet a singa saraya: ‘Akin a makaseguro ak a nagawa iray bengatlan nipasakbay ed Biblia? Panoy pitukoyan na saratan ed gagala na Dios parad totoo? Panon kamin nagunggunaan a sankapamilyaan manlapud sarayan propesiya?’ Ebatan na Biblia irayan tepet.

Say propesiya na Biblia so superyor met ed dakel niran paraan. Aliwan singa saray prediksion na astrologo, iyaabuloy na satan so personal a kawayangan ed panagdesisyon. Kanian, anggapoy biktima na kapalaran. (Deuteronomio 30:19) Saray sulsulat a singa ed saramay insulat nen Nostradamus so andiay kakanaan ed moral, tan satan ya inkapabes so sinakbongan na misteryo tan pirmin pakasagyatan ed liknaan. Balet say propesiya na Biblia so walaan na malet a basiyan ed moral. Ipapaliwawa na satan no akin a gawaen na Dios so unong na ginagala to. (2 Awaran 36:15) Tan saray propesiya nen Jehova so agbalot onsaew, ta say “Dios . . . so agmantila.” (Tito 1:2, NW) Kanian, saray indibidual ya igigiya na Salitay Dios so manbibilay ya aliwawaan, walay gagala, tan maliket ya agda dadaraken so mablin panaon tan kaykayarian da ed saray maapan gegemtan.​—Salmo 25:12, 13.

Saraya tan dakel niran punto so asingbat la ed 1999/2000 a “Mapropetikon Salita na Dios” a Distrito iran Kombension na Tastasi nen Jehova ya agawa ed sankamundoan. Saray paliwawa, interbio, demostrasyon, tan sakey a draman base ed Biblia so anagyat ed imano na saray dumerengel ed makapakelkelaw ya espiritual a tawir a nanggayagaan na saraman so manaaral tan mangiyaaplika ed mapropetikon salita na Dios. Irepaso na onggendan ya artikulo so pigaran makapalikliket iran pabitar na kombension.