Panoy Pangipapasen Mo ed Inkasika?

SIKATOY mapaatagey a laki. Lapud inkiatagey to’d posisyon ed pananguley, inlastog toy panangigalang tan panangidaydayew ed sikato. Balet pirmi syodot to ed sananey ya opisyal ya aliwan ontan so impangigalang ed sikato. Bilang bales, nanggaway pakana iyan mapaatagey ya opisyal a pateyen so amin a totoo ed nasasakopan na empiryo a karasa na samay akaopendi ed sikato. Agaylan pikewet a pakaliknay alablabas a dilin-panangipasen!

Say nanggaway pakana et si Haman, sakey ya atagey ya opisyal ed korte na Persianon Arin Asuero. Tan say puntirya na pamubusol to? Sakey a Judion manngaran na Mardokeo. Anggaman pirmi so pampipilalek nen Haman a napalanit ira, iyiilustra na satan so kapeligroan tan grabe iran pansumpalan na inkamapaatagey. Aglambengat amalesa na problema ed arum so inkatangsit to noagta nansumpal met itan ed mapublikon inkipaabeba to tan diad kaunoran et say impatey to.​—Ester 3:1-9; 5:8-14; 6:4-10; 7:1-10.

Agnipuera Iray Tuan Managdayew ed Inkamapaatagey

Kakaukolanen nen Jehova a ‘manakar itayo a mauy-uyamo a kaibay Dios.’ (Miqueas 6:8) Lugan na Biblia so nanduruman salaysay nipaakar ed saray indibidual a sinmaew a manmantini ed mauyamon panangipasen da ed inkasikaran dili. Angitarok iya ed sikara na saray problema tan kaermenan. Say pangonsidera’d pigara ed sarayan alimbawa so makatulong ed sikatayo a natalosan so inkamakulangkulang tan kapeligroan na agbalansin kaisipan.

Say kaisipan nen Jonas a propeta na Dios so nagmaliw ya agbalansin tuloy a sinali ton ibatikan so ingganggan ed sikato na Dios a pasakbayan iray marelmeng a totoo ed Ninive nipaakar ed pangukom nen Jehova ed sikara. (Jonas 1:1-3) Diad saginonor, sanen tinmalona so impanpulong to a sengeg na impanpataoli na saray taga-Ninive, manaalburoto si Jonas. Lapud sinononot a tuloy nipaakar ed dilin reputasyon to bilang propeta, agtanto odino agto la ninonot so bilay na nilibon taga-Ninive. (Jonas 4:1-3) No ag-atekepan na kauyamoan so pangipasen tayo’d inkasikatayo, nairapan itayon manmantini ed andiay panangidumaduma tan suston panmoria ed totoo tan saray nagagawa ed kaliberliber tayo.

Konsideraen met si Uzias, a datin maong ya ari na Juda. Sanen agla balansi so kaisipan to, sitatangsit ton sinalin samsamen so pigaran obligasyon a parad saserdote. Lapud saray kiwas ton ag-atekepan na kauyamoan tan pirmin inkamapaatagey, sikatoy nansakit tan naandi so panangabobon na Dios ed sikato.​—2 Awaran 26:3, 16-21.

Say agbalansin kaisipan so dawit-dawit ya akapatitan na saray apostol nen Jesus. Nagmaliw iran sinononot a tuloy ed personal a kagalangan tan pakayari. Sanen sinmabi so panaon na pirmin subok, inkaindan day Jesus tan inmarawi ra. (Mateo 18:1; 20:20-28; 26:56; Marcos 9:33, 34; Lucas 22:24) Say agda inkauyamo tan alablabas a panangipasen da’d inkasikaran dili so sengegan lawari na inkabalang day ilalo ra ed gagala nen Jehova tan say betang da nipaakar ed linawa to.

Makaderal Iran Epekto na Alablabas a Dilin-Panangipasen

Say agbalansin panangipasen ed inkasikatayon dili so panlapuan na ot-ot tan makaderal na relasyon tayo ed arum. Alimbawa, nayarin manyudyurong itayo ed sakey a silir tan naimano tayo so sanasawan maneesaesan tan maneelekan. No say sankanonot tayo labat et say inkasikatayo, nayarin lingoy pangipasen tayon paneelekan da itayo lapud maneesaesan ira. Nayarin agtayo la ikonsidera so antokaman ya arum a posiblin rason ed walna ra. Likud ni, siopa kasi so nayarin pantongtongan da? Nayarin onsyodot itayo tan desidien ya aglan balot mitongtong ed satan a sanasawa. Diad ontan a paraan, say agbalansin panangipasen ed inkasikatayo so nayarin manresulta ed agpantatalosan tan maneral ed relasyon tayo ed saray kakaaro, kapamilyaan, tan ed arum.

 Saramay alablabas so pangipapasen da’d inkasikara so nayarin magmaliw a mapasirayew, a lanang lan ilalastog day ipapasen dan pirmi iran abilidad, agawaan, odino kaykayarian da. Odino nayarin kontrolado ray tongtongan, ya ibibida ran naynay so inkasikara. Saratan a panagsalita so pakapatnagan na kaandiay puron aro tan makapasyodot a tuloy. Kanian, saramay alablabas so pangipapasen da’d inkasikara et mabetbet a mangiyaarawi ed inkasikara ed arum.​—1 Corinto 13:4.

Bilang Tastasi nen Jehova, makaabet itayo na panagludlurey tan kipulisay diad mapublikon ministeryo tayo. Kaukolan tayon nonoten a diad katuaan to et nipapaarap itan ya isusumpa, aliwan ed sikatayon mismo, noagta ed si Jehova, say Lapuan na mensahe tayo. Balet, say pikewet a pangipasen tayo’d inkasikatayon dili so manresulta ed seryoso iran pansumpalan. Pigaran taon lay apalabas, nilikna na sakey ya agin laki sanen nanlabiran na onabung tan binmales met. (Efeso 4:29) Kayari na saman, say agin laki so aglan balot akibiang ed panagkabkaabungan a ministeryo. On, say inkamapaatagey so nayarin sengegan na agtayo pakapankontrol sano manpupulong. Komon ta panggunaetan tayon agbalot abuloyan a nagawa itan. Imbes, komon ta sipapaabeba itayon onkerew na tulong nen Jehova pian namantini tayoy dugan panamabli ed pribilihyon pibibiang ed Kristianon ministeryo.​—2 Corinto 4:1, 7; 10:4, 5.

Say alablabas a panangipasen ed inkasikatayon dili so mangamper met ed sikatayo ed pangawat na nakakaukolan a tuloy a simbawa. Pigaran taon lay apalabas diad bansa na Central America, sakey a tin-edyer a laki so awalaay betang diad Teokratikon Eskuelaan Parad Panagministro ed Kristianon kongregasyon. Sanen sikatoy inikdan na manangasikaso na eskuelaan na pigaran diretsaan a konseho, impasaspak na sinmyodot a kalangweran so Biblia to ed datal tan pinmaway ed Kingdom Hall tekep na getman aglan balot ompawil. Balet kayari pigaran agew, inakmon toy inkamapaatagey to, akipulangan ed manangasikaso na eskuelaan, tan sipapaabeban inawat toy konseho. Sinmabi panaon, sayan kalangweran a laki so binmulaslas ed Kristianon inkatatken.

Say pagmaliw ya agmauyamo tan alablabas a panangipasen tayo’d inkasikatayon dili so pakaderalay relasyon tayo ed Dios. Ipapasakbay na Uliran 16:5: “Balang sakey a mapangta ed puso sikato so makapadimla ed Jehova.”

Balansin Panangipasen ed Inkasikatayon Dili

Malinew, agtayo nepeg ya ipasen so inkasikatayo ya alablabas. Siempre, agto labay ya ibagan agtayo la magmaliw a seryoso ed gawaen tan ibaga tayo. Ipapanengneng na Biblia a saray manangasikaso, ministeryal a lingkor​—diad tua et amin ed kongregasyon​—so nepeg a magmaliw a seryoso. (1 Timoteo 3:4, 8, 11; Tito 2:2) Kanian panon a nabayuboan tan namantini na saray Kristiano so inkauyamo, inkabalansi, tan seryoson panangipasen ed inkasikaran dili?

Itatarya na Biblia so dakel a makapaseseg ya ehemplo na saray indibidual a nanmantini ed balansin panangipasen da ed inkasikaran dili. Say matalonggaring et say ehemplo nen Jesu-Kristo nipaakar ed inkamapaabeba. Pian gawaen so linawa nen Ama to tan pian nitarok so kilalaban parad katooan, mabulbulos a tinaynan na Anak na Dios so maglorian mangatatawen a posisyon to tan nagmaliw ya abebbeban too ed dalin. Anggaman ed saray insulto, panangabuso, tan mabanday ya impatey, minantini toy dangka tan dignidad. (Mateo 20:28; Filipos 2:5-8; 1 Pedro 2:23, 24) Panon ya agawaan nen Jesus iya? Sikatoy sigpot a nanmatalek ed si Jehova tan determinadon ginawa to so linawa na Dios. Magunaet ya inaral nen Jesus so Salita na Dios, masimoon a nampikasi, tan insekar toy inkasikato ed ministeryo. (Mateo 4:1-10; 26:36-44; Lucas 8:1; Juan 4:34; 8:28; Hebreos 5:7) Say panumbok ed ehemplo nen Jesus so ontulong ed sikatayon nabayuboan tan namantini so balansin panangipasen ed inkasikatayon dili.​—1 Pedro 2:21.

Konsideraen met so maabig ya ehemplo nen Jonatan ya ilalak nen Arin Saul. Lapud intunganga nen ama to, abalang nen Jonatan so pankanawnawan onsublay ed si Saul bilang ari. (1 Samuel 15:10-29) Kasin sinmanok si Jonatan ed agto impagmaliw ya ari? Kasin nanimonan toy David, say kalangweran a manuley bilang isandi ed sikato? Anggaman panguloan na amayamay si Jonatan tan anganko et mas eksperiensiado nen say si David, sikatoy mauyamo tan sipapaabeban tinmulok ed uksoyan nen Jehova tan sitotoor a sinuportaan toy David. (1 Samuel 23:16-18) Say pakawalaan na malinew a panmoria ed linawa na Dios tan inkamabulos a pampasakop ed satan so ontulong ed sikatayon ‘agmannonot a maong ed inkasikatayon dili nen say kanepegan a nonoten.’​—Roma 12:3.

 Imbangat nen Jesus so kablian na pangipanengneng na inkauyamo tan inkamapaabeba. Inyilustra to iya diad impangibaga to a sano saray babangatan to et walad ponsia na kasal, kaukolan ya agda pilien so “manunaan a yurongan” lapud ompan walay mas galgalangen ya onsabi et nayarin nabaingan ira diad pamayurong ed sikara ed sankaabebaan a pasen. Bilang panangipurek to ed leksion, inyarum nen Jesus: “Ta amin a mamaatagey ed sikato a dili napaabeba naani; et say manpaabeba ed sikaton dili napaatagey naani.” (Lucas 14:7-11) Makabat itayo no talinengen tayoy simbawa nen Jesus tan ‘palesan tayoy inkasikatayo na kaabebaan na nonot.’​—Colosas 3:12; 1 Corinto 1:31.

Saray Bendision ed Balansin Panangipasen

Say pakawalaan na mauyamo tan mapaabeban awawey so ontulong ed saray lingkor nen Jehova pian naeksperiensia ra so tuan gayaga ed ministeryo ra. Lalon mainomay ya asinggeran iray mamatakken no sikaray sipapaabeban “mantrato ed pulok tekep na inkatamoy.” (Gawa 20:28, 29, NW) Diad ontan et amin ed loob na kongregasyon so agnasisikig a mitongtong ed sikara tan onkerew na tulong da. Kanian say kongregasyon so lalon onapit ed sakey tan sakey diad espiritu na aro, inkaligsa, tan talek.

Ontulong ed sikatayon nawalaan na maong a kakaaro so agpangipasen ed inkasikatayo ya alablabas. Say inkauyamo tan inkamapaabeba so mangamper ed sikatayo manlapud pakabayuboy awawey a walaay pilalaslasan tan salien a palumbasan iray arum diad nagawaan odino ed materyal iran bengatla. Sarayan maridios a kualidad so ontulong ed sikatayon lalon makonsidera, tan diad ontan et mas makaligliwa tan makatulong itayo ed saramay walad pankaukolan. (Filipos 2:3, 4) Sano natenyeg iray totoo lapud panangaro tan panangasi, kaslakan a sikaray onkiwas. Tan agta satan ya andi-siblet a siglaotan so kiletnegan na malet a pankakaaro? Agaylan bendision so asimbang a pangipasen tayo’d inkasikatayo!​—Roma 12:10.

Say balansin pangipasen tayo’d inkasikatayon dili so mamainomay met ed pangaksobi ed lingo tayo no walay naopendi tayo. (Mateo 5:23, 24) Saya so manresulta ed magmaong a siglaotan, panpupulangan tan pan-rerespetoan. No sikaray mapaabeba tan mauyamo, saramay walad posisyon na panangasikaso, singa saray Kristianon mamatatken, so walaan na pankanawnawan manggaway dakel a kamaongan parad arum. (Uliran 3:27; Mateo 11:29) Nainomayan met so mapaabeban too a mamerdona ed arum a nankasalanan ed sikato. (Mateo 6:12-15) Sikatoy ag-onsyodot ed mabitar ya impanleglemew, tan sikatoy manmatalek ed si Jehova a mangipetek ed saray pamaakaran ya agnipetek ed dinanman ya arum a paraan.​—Salmo 37:5; Uliran 3:5, 6.

Say sankabalegan a bendision a nagamoran ed pakawalaan na mauyamo tan mapaabeban panangipasen ed inkasikatayon dili et say pakawalaan na pabor tan panangabobon nen Jehova. “Say Dios kaingli’to so saray atatagey a linawa, et ikdan to na grasya so saray mapaabeba.” (1 Pedro 5:5) Komon ta agtayon balot napelag ed kalot a pangipasen ed inkasikatayo a magmaong nen say tuan kipapasen tayo. Imbes, komon ta sipapaabeba tayon bidbiren so posisyon tayo ed uksoyan nen Jehova ed saray bengatla. Engrande iran bendision so akatarya parad amin na saramay makakapet ed kakaukolanen to a ‘manakar a mauy-uyamo a kaibay Dios.’

[Litrato ed pahina 22]

Sipapaabeban sinuportaan nen Jonatan si David