Say Mapropetikon Salita na Dios so Mangiiter na Ilalo  ed Arapen

DIAD tulong na Salita na Dios, say Masanton Biblia, momoriaen na saray tuan Kristiano so arapen tekep na pananisia, ilalo, tan inkamaseguro. Lapud maligen so siglaotan da ed si Jehova a Dios, sikaray maniilalo ed arapen. Singa nisalaysay ed manangilukas a paliwawa ed “Mapropetikon Salita na Dios” a Distrito iran Kombension, saray Tastasi nen Jehova so masimoon ya estudyante na propesiyay Biblia ed loob na dakel lan taon. Kanian, antoy intarya nen Jehova parad totoo to ed sarayan kombension? Amin ya inmatendi so magunaet a makaamta tan akaparaan so Biblia ra. Say tema parad balang agew na kombension so nidatak bilang biig a sub-titulo.

PILIMERON AGEW: Manakar ed Liwawa na Salitay Dios

Insalaysay na paliwawan “Itotonton Itayo na Salitay Dios” a saray totoo nen Jehova et aliling day sakey a toon binmuat a manbiahe ed kabilungetay labi. Legan ya ombubutay so agew, medyo ambilunget ni so pakanengneng to, balet sano ontayagtag lay agew et malinlinew lay pakanengneng to. Singa nipasakbay diad Uliran 4:18, saray totoo nen Jehova so makakanengneng lan malinew ed dalan da diad silong na maliwliwawan sinag na katuaan manlapud mapropetikon salita na Dios. Sikaray agnapapaulyanan a natiror ed espiritual a kabilungetan.

Say pinagkateman paliwawan, “Imanoen so Mapropetikon Salita na Dios,” so angipanonot ed saray dumerengel a saramay maniilalo ed si Jehova so nipapaliis ed pakadismayaan tan pakagonigonan a sasagmaken na totoon manutumbok ed palso iran mesias tan palso iran propeta. Diad pidumaan a tuloy, dakerakel so pakabidbiran ed tuan Mesias, si Jesu-Kristo! Alimbawa, say mamilagron transpigurasyon nen Jesus so angitarya na pagpauna ed arapen nipaakar ed sikato bilang nitronon Ari na Panarian na Dios. Nanlapulad insabi to ed pakayari na Panarian nen 1914, si Jesus met so “kabontatala’d-agew” ya asalambit diad 2 Pedro 1:19 unong ed New World Translation. “Bilang Mesianikon Kabontatala’d-agew, iyaabawag toy balon agew, odino panaon, ya ompepelnak ed amin a matulok a katooan,” inkuan na espiker.

Bilang pangigapo na programa ed ngarem, say paliwawan “Mansinag a Singa Silesilew” so amalaknab ed Efeso 5:8, a ditan et sisimbawaen itayo nen apostol Pablo a ‘manakar a singa anak na liwawa.’ Saray Kristiano so silesilew, aliwan diad panginabang labat ed Salita na Dios ed arum noagta diad pangiyaplika met ed Biblia ed kabibilay da bilang panangalig ed si Jesus.

Pian magmaliw met ya onian klase na silew, nepeg tayon “Panliketay Pambasa ed Salitay Dios.” Sayan tema so tinibukel ed taloran-parti na simposium. Kayarin inaon si Abraham Lincoln, ya anawag ed Biblia a “say sankaabigan a langkap ya inter na Dios ed too ed kapiganman,” intepet na pilimeron espiker ed saray dumerengel no antoy niparungtal na niugalin panagbasa ra nipaakar ed kinaaralem na pakatalos da ed Salita nen Jehova. Apaseseg iray dumerengel a maalwar a manbasa ed Biblia, a mangipanaon pian ilitrato ed kanonotan iray Makasulatan a salaysay tan pian isiglaot iray balon punto ed saray bengatlan naaralan la.

Say tinmumbok a parti na simposium so angidanet ed pankaukolan na panagaral, aliwan basta labat pambasa, no labay tayon natalosan so ‘anawet a tagano.’ (Hebreos 5:13, 14) Say panagaral so nagkalalo lan makapabiskeg, so inkuan na espiker, no ‘iparaan tayo lay kapusoan’ tayo antis to, a singa ed ginawa na Israelitan saserdote a si Esdras. (Esdras 7:10, NW) Balet akin ya importantin tuloy so panagaral? Lapud walaan itan na direktan pisiglaotan ed relasyon tayo ed si Jehova. Kanian, say panagbasa ed Biblia so nepeg a walay kablian, makapalikliket, tan makapaligsa, anggaman kakaukolanen toy panagdisiplina ed nonot tan pansagpot. Panon tayon nawalaan na panaon parad makabaliksan a panagaral? Diad “panaliw ed pankanawnawan panaon” manlapud agtanto importanti iran aktibidad, so inkuan na unor ya espiker ed simposium. (Efeso 5:16, NW) On, say tombok ed pakawalaan na panaon et say sankaabigan a pangusar ed panaon tayo.

Say paliwawan “Papabiskegen na Dios so Naksawan” so amidbir a dakel a totoo so nakekesawan ed sarayan agew. Ta pian nawalaan itayo na “pakayari ed labas na gendat” parad Kristianon ministeryo, nakaukolan tayo so manmatalek ed si Jehova, a “sikato so mangiter na pakayari ed makapuy.” (2 Corinto 4:7, NW; Isaias 40:29) Saray makapabiskeg a tulong et laktipen toy Salita na Dios, pikakasi, say Kristianon kongregasyon, regular a pibibiang ed ministeryo, saray Kristianon manangasikaso, tan matoor ya ehemplo na arum. Say teman “Managbangat Kayo La Komon Lapud Kabayag Lay Panaon” so angipabitar ed pankaukolan a saray Kristiano et magmaliw a managbangat tan managpulong, tan panggunaetan da a bayuboan so “dunong ed panagbangat.”​—2 Timoteo 4:2, NW.

Say unor a paliwawan “Agbalot Manalo Iray Milalaban ed Dios,” so analambit ed agano nin lingon impanawag ed Tastasi nen Jehova bilang mapeligron kulto diad pigaran daldalin. Balet kaukolan ya ag-itayo ontakot, ta ibabaga na Isaias 54:17: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak, kuan nen Jehova.”

KOMADUAN AGEW: Nipaamta Iray Bengatla Diad Panamegley na Mapropetikon Kasulatan

Kayari impaningbat ed teksto na Biblia parad komaduan agew, saramay nantitipon so nanggayaga ed komaduan simposium na kombension, ya atemaan na “Bilang Manangakbibit na Liwawa  Igloria si Jehova.” Say pilimeron paliwawa so angipanengneng a say kalat na sakey a Kristiano et say pangigloria ed si Jehova diad panamegley na pampulong ed amin a pasen. Say tinmumbok a parti so analambit ed pankaukolan pian iwanwan iray interesado diad organisasyon na Dios. Panon? Diad pangusar tayo na limara odino samploran minuto antis odino kayari na kada panangiyaral na Biblia pian ipanengneng no panon ya onkukurang so organisasyon na Dios. Say komatlon paliwawa ed sayan simposium so angidanet ed pankaukolan pian igloria so Dios panamegley na maabig iran gawa.

Say paliwawan “Aroen a Mapalalo Iray Panonot nen Jehova” so angobri ed pinili iran bersikulo ed Salmo 119. Talagan kaukolan tayo so panonot, ta amin tayo so mililingwan. Agaylan importanti, sirin, a bayuboan tayo so panangaro ed saray panonot nen Jehova, a singa ginawa na salmista!

Insan tinmumbok so nikabiig a paliwawa​—say paliwawa ed bautismo ya atemaan na “Talinengen so Mapropetikon Salita a Mangitonton ed Bautismo.” Saray kandidato ed bautismo so apanonotan ya aligen day Kristo aliwan diad pagmaliw a bautismado labat noagta ontan met ed maapit a panumbok ed saray kundang to. (1 Pedro 2:21) Agaylan pribilihyo na sarayan balo ni so pibiang ed kasumpalan na Juan 10:16, a no iner et impasakbay nen Jesus a tiponen toy “arum a karnero” pian manlingkor a kaiba na alanaan na espiritun babangatan to!

Ginmapo so programa ed ngarem ed paliwawan “Dengelen so Ibabaga na Espiritu” ya angisalaysay a mansasalita so espiritu nen Jehova ed sikatayo panamegley na say Biblia, “[say] matoor tan makabat ya aripen,” tan say nipasal ed Biblian konsiensia tayo. (Mateo 24:45) Kanian, agla kaukolan a narengel na saray Kristiano so literal a bosis manlapud tawen ta pian amtaen no panon a paliketen so Dios. Say ontumbok a diskusyon a, “Mapekder ya Itandoro so Bangat a Mitunosan ed Maridios a Debosyon,” so animbawa ed saray Kristiano ya agmanguusisa ed makaderal ed moral iran ideya ya ipropropaganda na sayan mundo. On, say agnakontrol ya inkamausisa so mangipaarap ed sikatayo ed makaimpluensian impormasyon ya itatapang na saray apostata tan arum ya ahente nen Satanas. Agaylan magmaong so regular a panagbasa ed Biblia ontan met ed saray artikulo na Say Panag-Bantayan tan Awake!

Say sinmublay a paliwawa so atemaan na “Mansiansian Bembenan so Alasir na Makapabunigas Iran Salita,” ya angidanet ed kaimportantian na pagmaliw a mikabisadon tuloy ed Makasulatan ya “alasir,” odino inkasangal, na katuaan. (2 Timoteo 1:13, NW) Say pakatebek ed sayan alasir so tombok aliwan dia lambengat ed maridios a debosyon noagta diad pamidbir met ed agmitunosan ed katuaan.

Isipen pay pagmaliw ya ipapasen nen Jehova bilang makaroyroyo. Agaylan kagalangan! Base ed propesiya nen Aggeo, say paliwawan “Napapano na ‘Makaparoyroyo Iran Bengatla’ so Abung nen Jehova” so makapaseseg a tuloy lapud satan so amaseguro ed saray dumerengel a balang membro na say “baleg ya ulop” so talagan makaparoyroyo ed si Jehova. (Apocalipsis 7:9) Kanian, sikaray ipuera nen Jehova diad unor a “panmayegmeg” to ed saray nasyon legan na onsabin “baleg ya irap.” (Aggeo 2:7, 21, 22; Mateo 24:21) Balet diad kaleganan, saray totoo nen Jehova so nepeg a lawas akabantay ed espiritual a paraan, singa nisalaysay ed partin “Saray Mapropetikon Kasulatan et Pagmaliwen to Itayon Lawas Akabantay.” Inaon na espiker iray salita nen Jesus: “Manpuyat kayo sirin; ta agyo amta no anton agew so isabi Katawan yo.” (Mateo 24:42) Panon tayon mantinien so espiritual a panagbantay? Diad pansiansian okupado ed serbisyo ed si Jehova, pantultuloy a pampikasi, tan pansiansian pantalaran ed baleg ya agew nen Jehova.

Say unor a paliwawa ed komaduan agew so atemaan na “Say Mapropetikon Salita ed Panaon na Anggaan.” Satan so agnalingwanan ed ilabas na saray taon. Akin? Lapud inyabawag na espiker so kipaway na balon libro​—Pay Attention to Daniel’s Prophecy! “Sayan walaay marakdakep iran ilustrasyon a 320-pahinan palapagan so mangokobri ed amin a kabiangan na libroy Daniel,” so inkuan na espiker. Agaylan makapabiskeg-pananisian paneknek ya isisindag nen Jehova so liwawa ed mapropetikon Salita to!

KOMATLON AGEW: Agbalot Onsaew so Mapropetikon Salita na Dios

Say unor ya agew na kombension so ginmapo ed simposium a “Say Mapropetikon Salita Parad Aturon Panaon.” Say taloran parti so angusisa ed taloran panangiyabawag nen propeta Habacuc  nipaakar ed panangipaakseb nen Jehova ed saray panangukom to. Say pilimero et sumpad matunganga a Juda tan say komadua et sumpad malames a Babilonia. Say unor, a nagawa ni labat, so manutukoy ed manasingger a kadederal na amin a marelmeng a totoo. Nipaakar ed Armagedon, impanonot na say unor ya agin laki a walaay betang ed simposium so pirmin maridios a takot ed saray dumerengel sanen inkuanto: “Tua, talagan makapakelkelaw sano bulosan la nen Jehova so sigpot a puersa na baleg a pakayari to.”

Say tema na inyakto a drama ed Biblia et “Panamabli’d Espiritual a Tawir Tayo.” Sayan manangusisay-kamarerwan drama so angiduma ed saray ugali nen Jacob tan si Esau nipaakar ed saray espiritual a bengatla. Imbaliwala nen Esau so espiritual a tawir to, kanian niiter itan ed si Jacob, ya amabli ed satan. “Anton [espiritual a tawir] so inter la nen Jehova ed sikatayo?” so nitepet ed saray inmatendi ed kombension. “Say katuaan na Salita to, say Biblia; say ilalon andi-anggaan a bilay; tan say kagalangan a pangirepresenta ed sikato bilang manangiyabawag na maong a balita,” so inyebat na espiker.

Say tinmumbok a parti so atemaan na “Anto so Kabaliksan ed Sika na Mablin Tawir Tayo?” Nipanengneng tayo so dugan awawey nipaakar ed espiritual a tawir tayo diad pangiyuna ed panaglingkor ed si Jehova tan ed espiritual iran pribilihyo nen saray personal odino materyal iran pankaabigan. Diad onian paraan et nisentro tayo so bilay tayo ed siglaotan tayo ed si Jehova, a duman tuloy ed kinen Adan, Esau, tan saray agmatoor ya Israelita.

Say publikon paliwawa a, “Gawaen a Balo so Amin a Bengatla​—Unong a Nipasakbay,” so anibukel ed apatiran manunan propesiya nipaakar ed say “balon katawenan” tan say “balon dalin.” (Isaias 65:17-25, NW; 66:22-24, NW; 2 Pedro 3:13, NW; Apocalipsis 21:1, 3-5, NW) Malinew, walad kanonotan nen Jehova so babaleg a kasumpalan na sarayan propesiya nen samay nipawil a totoo to nen 537 K.K.P. On, walad kanonotan to so gobiernon Panarian to (say “balon katawenan”) tan saray mangaraldalin ya uleyan na satan (say “balon dalin”), a manayam ed maglorian sankagloboan a paraiso.

Sinampotan na makapaligsa tan makapakiwas a manangisaran paliwawa so kombension ed teman “Saray Iilaloan Tayo Leleg Itayon Igigiya na Salitay Dios.” Satan so angipanonot ed amin a ‘say panaon so apatikeyan la’ parad pakasumpal ed kimey a panangiyabawag ed Panarian. (1 Corinto 7:29) On, manalalagey itayo la ed sankatambiban na kasumpalan na saray panangipaakseb nen Jehova sumpad si Satanas tan ed say intiron marelmeng a sistema to. Komon ta saray liknaan tayo so singa ed salmista ya angikanta: “Say kamarerwa tayo siaalagar ed Jehova: sikato so tulong tayo tan kinlong tayo.” (Salmo 33:20) Agaylan maglorian ilalo so walad arapen parad saramay say iilaloan da et nibase ed mapropetikon salita na Dios!

[Litrato ed pahina 7]

Say makapainteres a drama so amaaralem ed panamabli na saray lingkor nen Jehova ed espiritual a tawir

[Litrato ed pahina 7]

Abautismoan so dakel a tinmalineng ed mapropetikon salita na Dios