Makabat a Simbawa na Sakey ya Ina

“Ana’ko, denglen mo so panangibangat na amam, tan agmo ikaindan so pamatunong nen inam.”​—Uliran 1:8.

SARAY atateng tayo​—say ama tan ina tayo​—so nayarin lapuan na mablin panamaseseg, suporta, tan simbawa. Ibabaga ed sikatayo na libroy Biblia ya Uliran so nipaakar ed kalangweran ya ari, si Lemuel, ya akaawat na “mapuersan mensahe” na “panangorehi” manlapud si ina to. Sarayan salita so nikurit ed Uliran kapitulo 31, tan nagunggunaan itayo met manlapud sayan makabat a simbawa na ina.​—Uliran 31:1, NW.

Matukoy a Simbawa Parad Ari

Inggapo na ina nen Lemuel so pigaran tepet a managyat na interes tayo: “Anto, ana’ko? Tan anto, O anak na eges ko? Tan, anto, O anak na saray sipan ko?” Say amitlon-ulit a kerew to so mangipapanengneng na pirmin kapagaan to kanian nakaukolan ya imanoen na anak to iray salita to. (Uliran 31:2) Say kapagaan to parad espiritual a pankaabigan na anak to so mangipanengneng na maabig ya ehemplo parad Kristianon atateng natan.

Nipaakar ed pankaabigan na anak to, agta say lalon pampagaan na ina et saray kaslakan a panliliket tan kaalakan na laman nipaakar ed alak, bibii, tan kanta? Impabitar a tampol na ina nen Lemuel: “Agmo iter so biskeg mo ed saray bibii.” Deneskribe to so nipaakar ed imoral a kondukta bilang ‘saray dalan a manderal ed saray ar-ari.’​—Uliran 31:3.

Say alablabas a panag-inum so agnepeg ya ibaliwala. “Agnipaakar ed saray ar-ari, O, Lemuel, agnipaakar ed saray ari-ari so paninum na alak,” so impasakbay to. Panon a nipaakseb na sakey ya ari so duga tan maptek a panaghusga tan ‘[agto] nalingwanan so tunong, tan naderal so inkatunong ed anggan siopa a napasegsegang’ no sikatoy naynay ya akainum?​—Uliran 31:4-7.

Diad pidumaan, diad pansiansian agnaimpluensiaan ed saratan a bisyo, say ari so makayarin ‘mangukom a matunotunong, tan agamilen to so inkatunong ed duka tan naukolan.’​—Uliran 31:8, 9.

Anggaman aliwan “arari” iray Kristianon tobonbalo natan, say makabat a simbawa na ina nen Lemuel so nipanpanaon met, no aliwan nipanpanaon a tuloy. Say panangabuso ed alak, panag-sigarilyo, tan seksual ya imoralidad so kasmak la ed limog na saray kalangweran natan, tan importantin manimano iray Kristianon tobonbalo no sikaray iikdan na atateng da na ‘mapuersa iran mensahe.’

Makayarin Asawan Bii

Saray kainaan so walay kanepegan a manpaga nipaakar ed asawaen na ananak dan lalaki a susto met la’d edad. Insublay ya impaimano na ina nen Lemuel iray kualidad na maong ya asawaen a bii. Andi-duaruwan nagunggunaan a tuloy so balolaki diad pangikonsidera  ed panmoria na bii nipaakar ed sayan importantin pamaakaran.

Diad Pro 31 bersikulo 10 ed New World Translation, “say makayarin asawan bii” so niyaliling ed mataltalag tan mabli iran korales, a diad panaon na Biblia et nagamoran labat diad baleg a sagpot. Diad mipadparan dalan, mankaukolan na sagpot so pananap na makayarin asawan bii. Imbes a manapuran mangasawa, maabig no malaem ya ipanaon na balolaki so pampili. Diad ontan et lalon maseguron pabpablien toy mablin naromog to.

Nipaakar ed makayarin asawan bii, nikuan ed si Lemuel: “Say puso na asawa to manmatalek ed sikato.” (Bersikulo 11) Diad arum iran salita, kaukolan ya agto ipilit ya amin a pamaakaran et ipanon ni na akulaw to ed sikato. Siempre, nepeg a mankonsultaan so sanasawa antis a manggawa na angkabaleg iran desisyon, a singa nipaakar ed mabli iran saliwen odino ed panamabaleg ed ananak da. Say komunikasyon ed sarayan pamaakaran so mamaapit ed sikaran dua.

Siempre, dakel iray kimey na makayarin asawan bii. Nilista diad Pro 31 bersikulo 13 anggad 27 so simbawa tan saray prinsipyo a nausar na asawan bibii ed dinanman a panaon parad kagunggunaan na saray pamilya ra. Alimbawa, lapud ibibili na kawesen tan kagawaan ed abung, aaralen na makayarin asawan bii so pagmaliw a magimper tan maigot ta pian say pamilya to so magenap a nakawesan pian presentabli. (Pro 31 Bersikulo 13, 19, 21, 22) Pian nabawasan so gastos na pamilya parad tagano, sikatoy mantanaman na nayarian to tan maalwar a mansaliw.​—Pro 31 Bersikulo 14, 16.

Mapatnag, sayan bii so ‘agmamangan na tinapay na inkangiras.’ Sikatoy impasyan mankikimey tan epektibon mangipapakurang ed saray kimey na sankaabungan to. (Pro 31 Bersikulo 27) Balbakesan toy “banel to ed biskeg,” a labay ton ibaga et sikatoy manpaparaan parad impasyan kimey. (Pro 31 Bersikulo 17) Sikatoy masakbay ya ombabangon pian igapo lay kimey to ed sanagew, tan sikatoy makulin mankikimey ed labi. Singano mandarlang a naynay so lamparaan a manisilew ed kimey to.​—Pro 31 Bersikulo 15, 18.

Nagkalalo ed amin, say makayarin asawan bii et maespiritual a too. Sikatoy ontatakot ed Dios tan mandadayew ed sikato tekep na aralem a respeto tan mapagalang a takot. (Pro 31 Bersikulo 30) Tutulongan to met so masiken to diad pangipapasal ed ananak dan mangalig met ed satan. Onia so ibabaga na Bersikulo 26: “Ed kakabatan,” babangatan toy ananak to, tan “say tunong na kaabigan na linawa wala ed dila to.”

Makayarin Asawan Laki

Ta pian nasagyat so makayarin asawan bii, kaukolan nen Lemuel a sumpalen iray responsabilidad na makayarin asawan laki. Pigara ed saraya so impanonot na ina nen Lemuel ed sikato.

Say makayarin asawan laki so makaawat na maong a pakatongtongan manlapud “saray mamasiken ed dalin.” (Uliran 31:23) Kabaliksan na satan a sikatoy magmaliw a sakey a makasarag, matua, napanmatalkan, tan matakot ed Dios. (Exodo 18:21; Deuteronomio 16:18-20) Bilang ontan, sikatoy magmaliw a “kabkabat ed saray wangalan,” no iner et saray prominentin lalaki so nantitipon pian idaulo iray pakurang ed syudad. Pian magmaliw a “kabkabat” bilang matakot ed Dios a laki, sikatoy nakaukolan a magmaliw a makatunongan tan mankimey a mitunosan ed saray mamasiken na say “dalin,” a nayarin kabaliksan toy distrito odino rehyon.

Andi-duaruwan mansasalita unong ed personal ya eksperiensia to, papanonotan na ina nen Lemuel so anak to nipaakar ed kaimportantian na pangipanengneng na apresasyon ed prospektibon asawa to. Anggapo la ed dalin so mas pablien to. Kanian isipen pa so pirmin emosyon ed bosis to sanen ipapatua to ed arap na amin: “Dakel ya anak a bibii so nanggawa a sankakanaan, balet sika talonaan mo ra ya amin.”​—Uliran 31:29.

Mapatnag ya inapresia nen Lemuel so makabat a simbawa nen ina to. Singa bilang, naimano tayo diad Pro 31 bersikulo 1 a tinukoy toray salita nen ina to a singa salita ton dili. Kanian, impapuso toy “panangipetek” nen ina to tan agunggunaan ed simbawa to. Komon ta nagunggunaan itayo met ed sayan “mapuersan mensahe” diad pangiyaplika ed saray prinsipyo na satan ed bilay tayo.

[Saray litrato ed pahina 31]

Say makayarin asawan bii so ‘agmamangan na tinapay na inkangiras’