Manggayaga ed Dios na Kilalaban Tayo
Manggayaga ed Dios na Kilalaban Tayo
“Manliket ak naani ed Jehova, manliket ak naani dia ed Dios na kilalaban ko.”—HABACUC 3:18.
1. Nipaakar ed anto so anengneng nen Daniel a pasingawey sakbay na inkagbay Babilonia nen 539 K.K.P.?
MASULOK na sakey a dekada sakbay na inkagbay Babilonia nen 539 K.K.P., anengneng nen masiken lan propeta Daniel so makapalikliket a pasingawey. Impasakbay na satan iray ebento ed mundo a mansumpal ed kapantokan a bakal ed baetan na saray kabusol nen Jehova tan say tinuro ton Ari, si Jesu-Kristo. Anto so reaksion nen Daniel? Inkuanto: “Apunaw ak . . . et nankelaw ak ed pasingawey.”—Daniel 8:27.
2. Anton bakal so anengneng nen Daniel ed pasingawey, tan antoy nalilikna yo nipaakar ed panasingger la na satan?
2 Komusta itayo met? Manbibilay itayo ed kasamsampotan lay agus na panaon! Panoy ikiwas tayo sano namoria tayon asingsingger la so bakal ya anengneng nen Daniel ed pasingawey, say bakal na Armagedon? Panoy ikiwas tayo sano natebek tayon say karelmengan a niparungtal ed propesiya nen Habacuc et kasmak lan tuloy kanian agla napaliisan so kaderal na saray kabusol na Dios? Maseguron say liknaan tayo so mipara ed alikna nen Habacuc a mismo, unong ya adeskribe ed komatlon kapitulo na mapropetikon libro to.
Nampikasi si Habacuc Parad Panangasi na Dios
3. Nampikasi si Habacuc ed biang na siopa, tan panon itayon naapektaan ed saray salita to?
3 Say Habacuc kapitulo 3 et sakey a pikakasi. Unong ed bersikulo 1, nibalikas itan bilang punibri, kankanta na kaermenan odino tagleey. Say pikakasi na propeta so nisaklang a singano pikakasi ton mismo. Balet diad tua, mansasalita si Habacuc ed biang na pinili na Dios a nasyon. Natan et say pikakasi to so makabkabaliksan parad totoo na Dios, a mibibiang ed panangipulong na Panarian. Sano basaen tayo so Habacuc kapitulo 3 a sankanonot iya, singano natatakot itayo lapud saray salita na satan balet mamagayaga met itan ed sikatayo. Say pikakasi nen Habacuc, odino punibri, so mangiter ed sikatayo na mabiskeg a rason pian manliket ed si Jehova, say Dios na kilalaban tayo.
4. Akin a tinmakot si Habacuc, tan makaseguro itayo ed anton kausaran na pakayari na Dios?
4 Singa naimano tayo la ed duaran akadkaunan artikulo, mauge-uges so kipapasen na Juda ed panaon nen Habacuc. Balet ag-iyabuloy na Dios a mantultuloy so ontan a kipapasen. Onkiwas si Jehova, a singa ginawa to la nensaman. Agpankelawan a kinmelyaw so propeta: “O Jehova, nadngelan ko so balita nipaakar ed sika, et antakot ak: O Jehova, pabilay mo lamet so kimey mo”! Antoy labay ton ibaga? ‘Say balita nipaakar ed si Jehova’ et say nikurit ya awaran na saray makapanyarin gawa na Dios, a singa diad Ambalangan Dayat, diad kalawakan, tan diad Jerico. Sarayan gawa so kabkabat nen Habacuc, tan inkatalagnawan to iratan lapud amta ton usaren lamet na Dios so mabiskeg a pakayari to sumpad kakabusol to. Sano nanenengneng tayoy karelmengan ed katooan natan, amta tayo met ya onkiwas si Jehova a singa ginawa to nensaman. Kasin natalagnaw itayo lapud satan? Siempre! Anggaman kuan, manpikasi itayo a singa ginawa nen Habacuc: “Pabilay mo lamet so kimey mo ed pegley na saray taon; dia ed pegley na saray taon sikato so kabat mo; dia ed sanok nonoten mo so panangasi.” (Habacuc 3:2) Diad aturon panaon na Dios, “dia ed pegley na saray taon,” komon ta usaren to lamet so mamilagron pakayari to. Tan diad satan a panaon, komon ta nanonotan toy mangasi ed saramay mangaaro ed sikato!
Onaabanti si Jehova!
5. Panon a ‘nantultuloy a nanlapu so Dios ed Teman,’ tan anto so ipapabitar na saya nipaakar ed Armagedon?
5 Anto so nagawa sano dengelen nen Jehova so pikakasi tayo parad panangasi? Naromog tayo so ebat diad Habacuc 3:3, 4. Unona, oniay inkuan na propeta: “Say Dios onsabi a manlapu ed Teman, tan say Santo [a Sakey] a nanlapu ed Palandey na Paran.” Nen panaon nen propeta Moises, say Teman tan Paran ed kalawakan so dinalan na Israel a mamaarap ed Canaan. Legan a manbabaroy so baleg a nasyon na Israel, ompatnag a si Jehova a mismo so onaabanti, tan anggapoy makaamper ed sikato. Sakbay ni na impatey nen Moises, inkuanto: “Si Jehova nanlapu ed Sinai, tan sinmabi ed sikara angga ed Seir; malikeliket a nanlapud’man ed palandey a Paran, tan nanlapu ed saray nilaksalaksa a mamasimpit [iran anghel].” (Deuteronomio 33:2) Sano onkiwas si Jehova sumpad kakabusol to diad Armagedon, niwala so mipadparan panangipatnag na agnaresistian a pakapanyari to.
6. Likud ed gloria na Dios, anto so natalosan na makatebek iran Kristiano?
6 Imbaga met nen Habacuc: “Saray gloria [nen Jehova] sakbongan to so saray tawen; et say dalin napno ed galang to. Et say sinag to singa nensaman silew.” Agaylan makapakelkelaw a nenengnengen! Tua, agnayarin nengnengen na totoo si Jehova a Dios insan manbilay ira. (Exodo 33:20) Anggaman ontan, no nipaakar ed saray matoor a lingkor na Dios, saray mata na kapusoan da so mandindinayew sano molimolien day inkamatalonggaring to. (Efeso 1:18) Tan saray makatebek a Kristiano so makatalos na bengatla likud ed gloria nen Jehova. Sinampotan na Habacuc 3:4: “Sikatoy walaan na saray liwawa ya ompaway a manlapu ed lima to; et diman nensaman so amotan na pakayari to.” On, natalosan tayon akaparaan lan onkiwas si Jehova, ya usaren toy biskeg tan pakayari na kawanan a lima to.
7. Anto so kabaliksan na mananalon iyaabanti na Dios parad saramay manrerebeldi ed sikato?
7 Say mananalon iyaabanti na Dios so mankabaliksay kadederal na saray nanrebeldi ed sikato. Ibabaga na Habacuc 3:5: “Ed arap to pinmaway so salot, et saray mandarlang a ngalab pinmaway ed saray sali to.” Nen 1473 K.K.P., sanen asingger laray Israelita ed saray ketegan na Insipan a Dalin, dakel ed sikara so nanrebeldi, a nanggaway imoralidad tan idolatriya. Bilang resulta, masulok a 20,000 so inatey lapud salot ya indapo na Dios. (Numeros 25:1-9) Diad asingger lan arapen, sano onabanti la si Jehova a mamaarap ed “bakal na baleg ya agew na Dios a Makapanyarin amin,” mipadpara met so sagmaken na saramay manrerebeldi ed sikato lapud kaskasalanan da. Arum so nayarin ompatey diad literal a salot.—Apocalipsis 16:14, 16.
8. Unong ed Habacuc 3:6, anto so manatalaran ed kakabusol na Dios?
8 Dengelen pay malinew ya impaneskribe na propeta nipaakar ed ikiwas nen Jehova na saray ehersito. Oniay nabasa tayo ed Habacuc 3:6: “Sikato [Jehova a Dios] nanalagey, et sinukat to so dalin; sikato ninmengneng, et panggiwgiwen toray nasyon; et saray andi angga a palandey nitayak ira; saray pukdol dinmakmomo ra; saray dalan to sikara so singa sanen inmuna.” Unona, si Jehova so ‘onalagey,’ a singa sakey a heneral a mamabantag ed lawak na bakal. Onggiwgiw ed takot iray kakabusol to. Nanengneng da no siopay kalaban da tan natalagnaw ira, manlukso ira lapud kagogonigon. Impasakbay nen Jesus so nipaakar ed panaon a, “manermen naani ed satan [a panaon] so amin a polipoli na dalin.” (Mateo 24:30) Atrasado lay pakamoria ra ya anggapo manaya so makatalindeg a sumpa ed si Jehova. Saray organisasyon na too—pati saramay ompatnag a permanenti a singa “saray andi angga a palandey” tan “saray [magnayon a] pukdol”—so natebagtebag. Diad satan et magmaliw lan singa ‘saray dinalan [na Dios] nen inmuna,’ singa met ed inkiwas to nensaman iran panaon.
9, 10. Anto so ipapanonot ed sikatayo na Habacuc 3:7-11?
9 Say ‘sanok [nen Jehova] so pinmetang’ sumpad saray kalaban to. Balet antoray ayura nen Jehova ed bakal? Talinengen so impaneskribe na propeta ed saratan, a kuanto: “Say bekang mo agawa ya alukasan a sigpot; say samba ed saray kailalakan sikara so tua a salita. Sika pinaletak mo so dalin ed saray ilog. Saray palandey anengneng da ka, et tinmakot ira; say bagyo na saray danum linmabas: Say kalinsurong imbesngaw to so bosis to, et intagey to so saray lima to ed tagey. Say banwa tan say bulan wala ra nensaman a maligen dia ed panag-ayaman da, ed liwawa na saray panam linma ra, ed kidyam na masileng a gayang mo.”—Habacuc 3:7-11.
10 Diad panaon nen Josue, pinansiansia nen Jehova so agew tan say bulan diad makapakelkelaw a panangipatnag na pakayari. (Josue 10:12-14) Napanonotan itayo ed propesiya nen Habacuc a saya met lanlamang a pakayari so usaren nen Jehova diad Armagedon. Nen 1513 K.K.P., impatnag nen Jehova so pakayari to panamegley na danudanum na dayat a wadiad dalin sanen inusar toy Ambalangan Dayat a maneral ed saray armada nen Faraon. Apataplon taon ed saginonor, say ilog Jordan a linmepwas so ag-akaamper ed mananalon impanmartsa na Israel ya amaarap ed Insipan a Dalin. (Josue 3:15-17) Diad panaon nen Debora a propetisa, saray maksil ya uran so angitakos ed saray karwahe nen Sisera a kalaban na Israel. (Uko-ukom 5:21) Saraya met a puersa na delap, mabalasubos ya uran, tan danudanum na dayat so usaren nen Jehova diad Armagedon. Say karol tan kirmat met so sankabemben to, a singa gayang odino sakey a kargaan a napno na saray pana.
11. Anto so nagawa sano bulosan la nen Jehova so mabisbiskeg a pakayari to?
11 Tua, talagan makapakelkelaw sano bulosan la nen Jehova so mabisbiskeg a pakayari to. Saray salita nen Habacuc so mangisusuheri a say labi so magmaliw ya agew tan say agew magmaliw a masmasnag nen say banwa ed kapiganman. Balanglan literal odino simboliko iyan apuyanan a mapropetikon deskripsion na Armagedon, sakey so segsegurado—ontalona si Jehova, ya agto abuloyan a walay kalaban a makaliktar.
Maseguro so Kilalaban Parad Saray Totoo na Dios!
12. Anto so gawaen na Dios ed saray kabusol to, balet siopa so nilaban?
12 Intultuloy na propeta a deneskribe iray gawaen nen Jehova diad paneral to’d kakabusol To. Diad Habacuc 3:12, oniay nabasa tayo: “Sika inakar mo so dalin dia ed kasnokan; sika inilik moray nasyon diad ed sanok.” Anggaman ontan, aliwan turobos so paneral nen Jehova. Walaray totoo a nilaban. Ibabaga na Habacuc 3:13: “Sika linma ka nipaakar ed kilalaban na baley mo, nipaakar ed kilalaban na nilanaan mo.” On, isalba nen Jehova iray matoor ya alanaan a lingkor to. Kanian sigpot so kaderal na Babilonia a Baleg, say sankamundoan ya empiryo na palson relihyon. Balet natan, sasalien na saray nasyon a pagiten so puron panagdayew. Magano la, saray lingkor nen Jehova so atakien na saray puersa nen Gog na Magog. (Ezequiel 38:1–39:13; Apocalipsis 17:1-5, 16-18) Kasin ontalona itan a satanikon iyaataki? Andi! Sisasanok ya iwanetwanet la’d satan nen Jehova iray kakabusol to, ya igatin-gatin tora a singa ilik ed panag-ilikan. Balet isalba to iramay mandadayew ed sikato diad espiritu tan katuaan.—Juan 4:24.
13. Panon a nasumpal so Habacuc 3:13?
13 Say sigpot a kaderal na marelmeng so nipasakbay ed onia iran salita: “Sika [Jehova] sinugatan mo so ulo na abung na marelmeng a too, pian nalukasan so angiletnegan angga ni ed tenger.” (Habacuc 3:13) Sayan “abung” et say marelmeng a sistema ya atibukel ed panangimpluensia nen Satanas a Diablo. Natemek itan naani. Say “ulo,” odino sumpa ed Dios iran lider, so namekmek. Say intiramintin inkasangal na satan so namugay, ya anggad pundasyon to. Aglan balot itan niwala. Agaylan abig a pakainawaan itan!
14-16. Unong ed Habacuc 3:14, 15, anto so nagawa ed totoo nen Jehova tan ed saray kakabusol da?
14 Diad Armagedon, nawetwet iramay manasalin maneral ed ‘alanaan a sakey’ nen Jehova. Unong ed Habacuc 3:14, 15, oniay imbaga na propeta ed Dios: “Sika tinalos mo ed tayukor to lanlamang so ulo na saray mibabakal to; sikara sinmabi ra a singa alimbusabos a mangitayaktayak ed siak; say panagliket da sikato so singa pangakmon ed duka a maamoamot. Sika ginmatin ka ed dayat pati saray kabayom, say lusbo na saray makapanyari a danum.”
15 Sanen inkuan nen Habacuc a saray “mibabakal . . . sinmabi ra a singa alimbusabos a mangitayaktayak ed siak,” mansasalita so propeta parad saray alanaan a lingkor nen Jehova. Singa saray managtambang ya akakebkeb, saray nasyon so onduklos ed saray managdayew ed si Jehova pian deralen da ira. Sarayan kakabusol na Dios tan ed totoo to so ‘manliket,’ matalek ya ontalona. Ompatnag a makapuy iray matoor a Kristiano, singa ‘pakaskasi.’ Balet sano onataki laray onsusumpa ed Dios, ipaarap nen Jehova iray ayura ra sumpad sikaran dili. Usaren daray armas da, odino saray “tayukor” da, sumpad saray mibabakal dan mismo.
16 Dakel ni nagawa. Usaren la’d satan nen Jehova so mabiskeg nen say too ya espiritu iran puersa pian ilaos lay kadederal na saray kalaban to. Diad panamegley na ‘saray kabayo’ na mangatatawen iran armada to diad panangidaulo nen Jesu-Kristo, sikatoy onabantin manbiktorya diad “say dayat” tan “bunton na maawang a kadanuman,” salanti, say madaldaluyon a kabusol a katooan. (Apocalipsis 19:11-21) Insan naekal la’d dalin iray marelmeng. Agaylan mapuersan panangipatnag na Dios ed pakayari tan inkahustisya to!
Onsasabi la so Agew nen Jehova!
17. (a) Akin a makapanmatalek itayo a nasumpal iray salita nen Habacuc? (b) Panon tayon naalig si Habacuc leleg tayon aalagaren so baleg ya agew nen Jehova?
17 Makapanseguro itayo a magano lan nasumpal iray salita nen Habacuc. Ag-iratan nabaya. Panoy ikiwas yo ed sayan pakapikabat lan unona? Nodnonoten ya apuyanan si Habacuc ya angisulat ed saratan. Onkiwas si Jehova, tan niwala so pankibalatar ed dalin sano nagawa itan. Agpankelawan ya oniay insulat na propeta: “Nadngel ko, et say laman ko ginmiwgiw, saray bibil ko ginmiwgiw ira ed bosis; [say] kabulok onloob ed saray pukel ko, tan onmayegmeg ak dia ed pasen ko; lapu ed kaukolan ya alagden ko a mareereen so agew na gonigon, lapu ed isasabi na baley ya onloob a sumpa ed sikatayo.” (Habacuc 3:16) Natalosan ya ontanlay inkaaburidon maong nen Habacuc. Balet kasin kinmapuy so pananisia to? Andin balot! Sikatoy mabulos a nanalagar a marendeen ed baleg ya agew nen Jehova. Agta ontan met so awawey tayo? Seguradon ontan! Walaan itayo na sigpot a pananisia a nasumpal so propesiya nen Habacuc. Balet angga ed kagawa na satan, mananos itayon manalagar.
18. Anggaman inilaloan nen Habacuc iray kairapan, anto so awawey to?
18 Say bakal so naynay a sengegay kairapan, anggan ed saray manbiktorya. Nayarin onkulang so tagano. Naperdi iray kayarian. Onabebay kipapasen ed panagbilay. No nagawa itan ed sikatayo, panoy ikiwas tayo? Si Habacuc so walaay napanuliranan ya awawey, lapud oniay kuanto: “Anggan say kiew ya igos agnaani onlambot, anggan say bunga anggapo naani ed saray ubas; say kimey na olibo onkulang naani. Et saray uma ag-ira naani mamapaway na tagano; say pulok na karkarnero napegpeg naani a manlapu ed panangipukokan, et anggapo naani so pulok na ayep dia ed saray panag-iwian: Anggan ontan manliket ak naani ed Jehova, manliket ak naani dia ed Dios na kilalaban ko.” (Habacuc 3:17, 18) Realistikon inilaloan nen Habacuc iray kairapan, a nayarin pati say eras. Anggaman ontan, agbalot naandi so gayaga to ed si Jehova, ya angilaban ed sikato.
19. Antoran kairapan so nasasagmak na dakel a Kristiano, balet anto so pakapanseguroan tayo no iyuna tayoy Jehova ed bilay tayo?
19 Natan, sakbay ni ingen na pamakal nen Jehova ed saray marelmeng, dakel so manasagmak na pirmin gonigon. Impasakbay nen Jesus a saray bakal, eras, yegyeg, tan salot so magmaliw a kabiangan na ‘tanda na kiwawala to’ ed maarin pakayari. (Mateo 24:3-14, NW; Lucas 21:10, 11) Dakel ed saray kapananisiaan tayo a manaayam ed nagsikasikmat a daldalin so pirmin nagogonigon lapud kasusumpal na saray salita nen Jesus, tan bilang resulta et sikaray manasagmak na pirmin kairapan. Ontan met so nayarin mangapekta ed arum a Kristiano diad arapen. Parad dakel ni ed sikatayo, posiblin tuloy a say ‘kiew ya igos agnaani onlambot’ sakbay ya onsabi anggaan. Balet amta tayo no akin a nagagawa irayan bengatla, tan satan so mamapabiskeg ed sikatayo. Sakey ni, walaan itayo na tulong. Insipan nen Jesus: “Ingen anapen yo nin unona so panarian, tan say inkatunong to [na Dios]; et amin iraya a bengatla niarum ira ed sikayo.” (Mateo 6:33) Ag-itan mangigagarantiya na mainawan bilay, balet ipapaseguro na satan ed sikatayo a no iyuna tayoy Jehova ed bilay tayo, sikatayoy bantayan to.—Salmo 37:25.
20. Anggaman ed temporaryo iran kairapan, anto so determinado tayon gawaen?
20 Antokaman so arapen tayoran temporaryon kairapan, ag-itayo naandiay pananisia ed manangiliktar a pakayari nen Jehova. Dakel ed saray agagi tayo ed Aprika, Mamabukig a Europa, tan arum nin paspasen so nidunget ed pirmi iran kairapan, balet nantultuloy iran ‘nanliket ed si Jehova.’ Singa sikara, komon ta ontan met so lawas gawaen tayo. Tandaan a say Soberanon Katawan a Jehova so Lapuan na “biskeg.” (Habacuc 3:19) Agto itayo dismayaen. Seguradon onsabi so Armagedon, tan peteg ya ontumbok so insipan na Dios a balon mundo. (2 Pedro 3:13) Insan, “say dalin napano naani na pikakabat ed gayaga nen Jehova, singa saray danum sakbongan da so dayat.” (Habacuc 2:14) Angga la’d isabi na satan ya alay abig a panaon, aligen tayo komon so maabig ya ehemplo nen Habacuc. Lawas itayo komon a ‘manliket ed si Jehova tan manggayaga ed Dios na kilalaban tayo.’
Kasin Natandaan Yo?
• Panon itayon naapektaan ed pikakasi nen Habacuc?
• Akin a tuloytuloy ya onaabanti si Jehova?
• Anto so ibabaga na propesiya nen Habacuc nipaakar ed kilalaban?
• Anto so nepeg ya awawey tayo diad panaalagar ed baleg ya agew nen Jehova?
[Tepetepet Parad Panagaral]
[Litrato ed pahina 23]
Amta yo kasi no antoran puersa so usaren na Dios diad Armagedon sumpad saray marelmeng?