Report na Saray Manangiyabawag na Panarian

Pananulong ed Amin a Nengneng na Totoo diad Netherlands

SI Abraham so toon walaay nikabiig a pananisia. “Sanen atawag,” kuan nen apostol Pablo, tinulok nen Abraham so bosis na Dios tan “pinmaway, ya agto amta no iner so laen to.” Kayari ton inyalis so intiron pamilya to, si Abraham so “nanayam a singa sankaili ed dalin ya insipan” ed nakekeraan a sanlasus a taon na bilay to.​—Hebreos 11:8, 9.

◻ Ontan met natan, dakel a Tastasi nen Jehova so angawat la ed angat ya onalis ed sananey a bansa ta pian manlingkor ed lugar a babaleg so pankaukolan. Arum so nanaral na duman lenguahe ta pian makapanpulong ira ed saray dayo a manaayam ed bansa ra. Singa ipanengneng na onggendan iran eksperiensia, sayan maabig ya awawey so angilukas na “baleg a puerta ya ompugta ed kimey” ed Netherlands, a no iner et say sakey milyon ed 15 milyon a manaayam so nanlalapud arum a daldalin.​—1 Corinto 16:9, NW.

◻ Si Bahram, datin instruktor na Kung Fu, so nanlapud sakey a bansa ed Pegley Bukig. Sikatoy awalaan na sakey a kopya na Biblia tan pigaran publikasyon na Watch Tower. Diad loob na sakey bulan, amoria nen Bahram ya aromog to lay katuaan. Nigapo so panangiyaral ed sikato tan ed akulaw to, balet ta walay problema​—say mangiyaaral ed sikara na Biblia et agmakapansalitay lenguahe ra. Nanonotan da ni a sikaray mantatalosan diad panamegley na panangimari, a mantotongtong ira “panamegley na saray lima tan sali.” Sinmabi panaon, si Bahram tan say akulaw to so akaromog na sakey a kongregasyon a ditan et nauusar so lenguahe ra, tan kayari na saman et maples lay inyaligwas da. Sakey la natan a bautismadon Tasi si Bahram.

◻ Sakey a sanasawan payunir ya Ulandes so inmasingger ed sakey a laki a taga-Indonesia ya akaalagey ed arap na sakey a supermarket. Sikatoy asurprisan tuloy sanen akitongtong so sanasawa ed sikato diad mismon lenguahe to. Niyuksoy so idalaw ed sikato diad ayaman to. Naamtaan a sikatoy nanayam ed Russia diad loob na masulok a 20 taon, a legan na satan a panaon et sikatoy nagmaliw a sakey a gynecologist. Imbaga ton sikatoy sakey ya atiesta, balet inaksobi ton kada makapampaanak, agto napokpokay pankelkelaw to, “Agaylan nagnap so laman na too! Agaylan milagro!” Sikatoy impaiyaralan na Biblia tan ag-abayag et sikatoy anisian walay Manamalsa a mangiyaansakit ed katooan. (1 Pedro 5:6, 7) Natan sikatoy sakey lan bautismadon agi tan manlilingkor ed kongregasyon diad Amsterdam a mansasalitay Indonesian.

◻ Diad Rotterdam, sakey ed saray sankabalegan a daongay barko ed mundo, sakey a grupo na saray payunir so nagmaliw a larino ed panagpulong ed saray grupon walaay nanduruman lenguahe ya inagew-agew ya onsasakda. Bilang resulta na kimey na sayan maseet a grupo na saray managpulong, pigaran marino, pati say kapitan, sakey ya opisyal na marine, tan datin bodyguard, so angawat ed katuaan. Natan sikara met lay ontutulong ed pangiwakawak ed maong a balita na Panariay Dios ed sankamundoan.​—Mateo 24:14.

◻ Singa ed arum a parti na mundo, saray Tastasi nen Jehova ed Netherlands so determinadon manggawa ed nabebetangan da pian iyabawag so andi-anggaan a maong a balita ed amin a nasyon, tribu, pansasalita, tan totoo.​—Apocalipsis 14:6.