Amtaen so “Kanonotan nen Kristo”

“Siopa kasi akapikabat ed kanonotan na Katawan, a makapangibangat ed sikato? Sikatayo balet wala ed sikatayo so kanonotan nen Kristo.”​—1 CORINTO 2:16.

1, 2. Diad Salita to, anto so atebek nen Jehova a matukoy a niparungtal nipaakar ed si Jesus?

 ANTO kasi so itsura nen Jesus? Anto so kolor na buek to? say baog to? say mata to? Kaunongay katagey to? Kaunongay kabelat to? Diad inlabas na saray siglo, nandurumay impangilitrato na saray pintor ed si Jesus, manlapud kabkaabigan anggad gawagawa lambengat. Sikato so inlitrato na arum bilang maregkel tan mabiskeg, bangta sikato so inlitrato met na arum bilang maletey tan ampusisaw.

² Anggaman ontan, ag-ipapaimano na Biblia no anto so itsura nen Jesus. Imbes, atebek nen Jehova a matukoy so pangiparungtal ed bengatlan mas importanti: say inkatoo nen Jesus. Aglambengat irereport na saray salaysay na Ebanghelyo so imbaga tan ginawa nen Jesus noagta ipaparungtal met na saratan so kinaaralem na liknaan tan paraan na panag-isip to a walad benegan na saray salita tan kiwakiwas to. Sayan apatiran apuyanan a salaysay so ontulong ed sikatayo pian nasuri so tutukoyen nen apostol Pablo a “kanonotan nen Kristo.” (1 Corinto 2:16) Importantin nakabisado tayo iray kanonotan, liknaan, tan personalidad nen Jesus. Akin? Lapu ed duaran rason.

3. Anton aralem a pakatalos so nagamoran tayo no naamtaan tayo so kanonotan nen Kristo?

³ Unona, napasimaran tayo so kanonotan nen Jehova a Dios diad panamegley na kanonotan nen  Kristo. Kabkabat a maong nen Jesus so Ama to kanian nibaga ton: “Anggapo so mikabat no siopa so Anak, nilikud so Ama; tan no siopa so Ama, nilikud so Anak, tan say labay a pangipasingaweyan ed sikato na Anak.” (Lucas 10:22) Singano ibabaga nen Jesus a, ‘No labay yon naamtaan so itsura nen Jehova, nengneng yo ak.’ (Juan 14:9) Kanian, no aralen tayo so ipaparungtal na saray Ebanghelyo nipaakar ed paraan na impanisip tan alikna nen Jesus, naaralan tayo met no panon so pan-iisip tan panlikna nen Jehova. Satan a pikakabat so ontulong ed sikatayo pian lalo itayon onapit ed Dios tayo.​—Santiago 4:8.

4. Pian naalig tayon talaga si Kristo, anto so nepeg tayo nin aralen ya unona, tan akin?

⁴ Komadua, say pakapikabat tayo ed kanonotan nen Kristo so ontulong pian ‘maapit tayon natumbok iray bakat to.’ (1 Pedro 2:21, NW) Say panumbok ed si Jesus et aliwa lambengat a pangulit ed saray imbaga to tan pangalig ed saray ginawa to. Lapud say panagsalita tan kakikiwas et impluensiado na saray kanonotan tan liknaan, say panumbok ed si Kristo et mankaukolay pamayubo ed miparan “kalakal” a walad sikato. (Filipos 2:5) Diad arum a salita, nepeg tayo nin aralen ya unona so manisip tan manlikna a singa si Kristo, salanti, diad sankaabigan a nayarian tayo bilang ag-ayadyarin totoo, pian sikatoy naalig tayon talaga. Diad tulong na saray managsulat na Ebanghelyo, surien tayo sirin so nipaakar ed kanonotan nen Kristo. Singbaten tayon unona iray sengegan ya angimpluensia ed paraan na impanisip tan alikna nen Jesus.

Say Inkiwala To Sakbay na Impagmaliw Ton Too

5, 6. (a) Saray kalimog tayo so walaan na anton epekto ed sikatayo? (b) Anton pililimog so nanggayagaan na panguloan ya Anak na Dios nen sikatoy walad tawen sakbay na inyakar to diad dalin, tan anto so epekto na saya ed sikato?

⁵ Naapektoan itayo na saray maapit a kalimog tayo, ya impluensiaan da so kanonotan, liknaan, tan kiwakiwas tayo parad pankaabigan odino pankaugsan. * (Uliran 13:20) Konsideraen pa so impilimog nen Jesus nen sikatoy walad tawen sakbay na inyakar to diad dalin. Ipapaimano na Ebanghelyo nen Juan so kiwawala nen Jesus sakbay na impagmaliw ton too bilang “say Salita,” odino Pinagkasangiyan, na Dios. Oniay inkuan nen Juan: “Dia ed gapo wala la so Salita, tan say Salita so kaiba na Dios, tan say Salita et sakey a dios. Saya a sakey et wala la ed gapo a kaiba na Dios.” (Juan 1:1, 2, NW) Lapud anggapo so gapoan nen Jehova, say panaon ya impakapilimog na Salita ed Dios nanlapula’d “gapo” so manutukoy ed inggapo na kimey na panamalsa na Dios. (Salmo 90:2) Si Jesus so “panguloan ed amin a pinalsa.” Kanian, sikatoy niwala la sakbay ni na inkapalsay arum iran espiritun palsa tan say pisikal ya uniberso.​—Colosas 1:15; Apocalipsis 3:14.

⁶ Unong ed arum a kalkulasyon na saray sientipiko, niwala lay pisikal ya uniberso ed loob na ngalngali 12 bilyon a taon. No bilbilang ta duga iratan a kalkulasyon, nanggayagaan sirin na panguloan ya Anak na Dios so maapit ya impakapilimog ed Ama to diad loob na binilyon a taotaon sakbay na inkapalsa nen Adan. (Ikompara so Miqueas 5:2.) Kanian abayuboan ed baetan dan dua so matamoy tan malet a siglaotan. Diad inkirepresenta to bilang kakabatan, sayan panguloan ya Anak, sakbay na impagmaliw ton too, so nilitraton angikuan: “Siak nensaman so inagew-agew a panggayagaan to [nen Jehova], a malikeliket lawas ed arap to.” (Uliran 8:30) Maseguron say maapit ya impakapilimog ed Lapuan na aro diad loob na agnabilang a panaon so walaan na baleg ya epekto ed Anak na Dios! (1 Juan 4:8) Akabatan tan nipatnag na sayan Anak iray walan kanonotan, liknaan, tan daladalan nen Ama to, nen say siopaman.​—Mateo 11:27.

Say Bilay tan Saray Impluensia Diad Dalin

7. Anto so sakey ed saray rason no akin a nakaukolan ya onla diad dalin so panguloan ya Anak na Dios?

⁷ Wala ni so kinaukolan ya aralen na Anak na Dios, lapud say gagala nen Jehova et pian kinlongan so Anak to a magmaliw a maabagey ya Atagey a Saserdote, a ‘makayarin mangasi ed saray kakapuyan tayo.’ (Hebreos 4:15) Say sakey ed saray rason no akin a linma diad dalin so Anak bilang sakey a too et pian nakapet iray kakaukolanen parad sayan betang. Bilang too a walaan na laman tan dala, diad mismon dalin so inkaeksperiensiaan nen Jesus ed saray kipapasen tan impluensia a naiimatonan to lambengat nen sikatoy walad tawen. Asali to’d saman no anto iray liknaan tan emosyon na too. No maminsan et sikatoy naksawan, napgaan,  tan narasan. (Mateo 4:2; Juan 4:6, 7) Nagkalalo ni ingen, sinungdoan to so amin a nengneng na irap tan ot-ot. ‘Naaralan to sirin ed saman so katutulok’ tan sikatoy nagmaliw a kualipikadon tuloy ed betang to bilang Atagey a Saserdote.​—Hebreos 5:8-10.

8. Anto so amta tayo nipaakar ed asasakbay ya impanbilay nen Jesus diad dalin?

⁸ Komusta met so nipaakar ed saray naeksperiensia nen Jesus kaleganan na asasakbay a bilay to diad dalin? Antiktikey so salaysay nipaakar ed impanugaw to. Diad tua, si Mateo tan Lucas lambengat so angidalatdat ed saray ebenton manasaglawi ed inkianak to. Amta na saray managsulat na Ebanghelyo a nambilay si Jesus diad tawen sakbay na inyakar to diad dalin. Sankaimportantian ed amin, say ontan ya inkiwala to sakbay na impagmaliw ton too so angipaliwawa no anton inkatoo so nagmaliwan to. Anggaman kuan, si Jesus et nagnap a too. Anggano ayadyari, kaukolan to ni so ombaleg manlapud kapangiyanak angga ed inkaugaw insan magmaliw a katayatdang angga ed wala la’d edad, a manaaral leleg ya onlalabas iratan a panaon. (Lucas 2:51, 52) Ipaparungtal na Biblia so pigaran bengatla nipaakar ed asasakbay ya impanbilay nen Jesus a maseguron angapekta ed sikato.

9. (a) Anto so pakapatnagan a nianak si Jesus ed sakey a pamilyan mairap-bilay? (b) Anton klase na kipapasen so nayarin binalegan nen Jesus?

⁹ Mapatnag a nianak si Jesus ed sakey a pamilyan mairap-bilay. Napatnagan iya diad apay ya intarok di Jose tan Maria diad templo manga 40 agew kayari na inkianak to. Imbes a mangawit na kilaw a kalakian a karnero bilang apay a popoolan tan sakey a sibong a malapati odino palekpek bilang apay nipaakar ed kasalanan, angawit ira na “duaran palekpek ono duara’n malapati a sibong.” (Lucas 2:24) Unong ed Mosaikon Ganggan, sayan apay so sakey a probisyon nensaman parad saray mairap-bilay. (Levitico 12:6-8) Asabi panaon, binmaleg iyan simplin pamilya. Manga anemira ni so inilalak lan mismo nen Jose tan Maria kayari na mamilagron inkianak nen Jesus. (Mateo 13:55, 56) Kanian binmaleg si Jesus ed sakey a baleg a pamilya, a nayarin diad simpli iran kipapasen.

10. Anto so mangipanengneng a matakot ed Dios si Maria tan Jose?

¹⁰ Si Jesus so pinabaleg na matakot-ed-Dios ya atateng ya angomponi ed sikato. Si Maria, ya ina to, so sakey a matalonggaring a bii. Nodnonoten pa a sanen sikatoy imbano nen anghel Gabriel, oniay kuan to’d sikato: “Daray ka la, nasnaspot ya apalangkapan, say Katawan wala ed sika.” (Lucas 1:28) Si Jose so sakey met a debosyonadon laki. Kada taon et agto sasaewen so manbaroy na 150 kilometro pian onla ed Jerusalem parad Paskua. Inmatendi met si Maria, anggaman lalaki lambengat so nakaukolan ya onatendi. (Exodo 23:17; Lucas 2:41) Diad sakey ya inkagawa, si Jesus so maseet ya inanap di Jose tan Maria, insan sikato so nalmo ra diad templo a wala ed pegley na saray managbangat. Oniay kuan nen Jesus ed saray mapagpagan atateng to: “Agyo amta a nakaukolan ko so wala ed abung nen Amak?” (Lucas 2:49) ‘Ama’​—satan a salita so walaay maapit tan positibon kabaliksan parad say malangwer nin Jesus. Sakey ni, mapatnag a nibaga la’d sikato a say peteg ya Ama to et si Jehova. Niarum ni, si Jose ya anagibi ed si Jesus so sakey a maong ya ama. Seguradon agpilien nen Jehova so sakey a maruksan too a mamabaleg ed pinabpabli Ton Anak!

11. Anton anapan so naaralan nen Jesus, tan diad panaon na Biblia, anto so lalanoren na pantrabaho ed onian anapan?

¹¹ Legan na saray taon to diad Nazaret, naaralan nen Jesus so mankarpentero, nayarin diad panamegley nen Jose ya anagibi ed sikato. Nagmaliw a marundunong si Jesus ed satan ya anapan  kanian sikatoy atawag a “karpentero.” (Marcos 6:3, NW) Diad panaon na Biblia, saray karpentero so uupaan a mangipaalagey na saray abung, manggawa na saray muebles (laktip laray lamisaan, taboriti, tan bangko), tan saray kagawaan ed panagdalus. Dia ed libro ton Dialogue With Trypho, oniay insulat nen Justin Martyr, nen komaduan siglo K.P., nipaakar ed si Jesus: “Sikato so nipasal a mankimey bilang karpentero nen wala ni’d limog na totoo, a manggagawa na saray lukoy tan pako.” Mairap itan a kimey, lapud ta agnayarian na karpentero nensaman so manaliw na labraen to. Nayarin sikatoy ompaway tan mananap na kiew, batangen to itan, tan sakbaten to itan ya isempet. Kanian amta nen Jesus iray angat ed panag-anap na pambilay, pideneng ed saray suki, tan panlegpet ed pamilya.

12. Anto so mangipapabitar ya inatey lay Jose nen wala ni’d kalangweran si Jesus, tan anto so kabaliksan na saya parad si Jesus?

¹² Bilang sankapanguloan ya anak, nayarin tinmulong si Jesus a mangasikaso ed pamilya, nagkalautla ta ompatnag ya inatey lay Jose sakbay na impatey nen Jesus. * Oniay kuan na Zion’s Watch Tower na Enero 1, 1900: “Unong ed tradisyon, inatey lay Jose legan a wala ni’d kalangweran si Jesus, tan nankarpentero si Jesus tan nagmaliw a managlegpet ed pamilya. Wala so mamapaneknek ed saya diad Kasulatan a si Jesus so atawag a mismo bilang karpentero, tan asalambit so ina to tan saray agagi to, balet ta agla abitla si Jose. (Marcos 6:3) . . . Nayadyari sirin a say andukey a panat na labinwalon taon ya impanbilay na Katawan tayo, manlapud panaon na sayan inkagawa [a nirekord ed Lucas 2:41-49] angga ed panaoy inkabautismoan to, so nausar ya impanumpal ed kaslakan iran obligasyon ed bilay.” Maseguron alikna met di Maria tan say ananak to, pati si Jesus, so ot-ot sano ompatey so sakey a pinabpablin asawan laki tan ama.

13. Sanen inggapo nen Jesus so ministeryo to, akin a satan et atekepay pikakabat, aralem a pakatalos, tan kinaaralem na liknaan ya agbalot niwala ed siopaman a too?

¹³ Mapatnag, agnianak si Jesus a walaay mainawan panagbilay. Imbes, naeksperiensia ton mismo so bilay na ordinaryon totoo. Insan, nen 29 K.P., sinmabi so panaon pian sumpalen nen Jesus so impabtang na Dios a gawaen to. Diad loglog na saman a taon, sikatoy abautismoan ed danum tan nailalak bilang espiritual ya Anak na Dios. ‘Say tawen so nilukas ed sikato,’ a mangipapabitar ya anonotan to la ed saman so impanbilay to ed tawen sakbay na impagmaliw ton too, pati saray kanonotan tan liknaan to nen wala ni’d tawen. (Lucas 3:21, 22) Kanian sanen inggapo nen Jesus so ministeryo to, atekepan la itan na pikakabat, aralem a pakatalos, tan kinaaralem na liknaan ya agbalot niwala ed siopaman a too. Lapud walaan na maabig a rason iray managsulat ed Ebanghelyo, intalaga ra so maslak a sulsulat da nipaakar ed saray agawgawa ed ministeryo nen Jesus. Anggaman ontan, agda ni ingen nirekord so amin a bengatla ya imbaga tan ginawa to. (Juan 21:25) Balet say inrekord da ed silong na panangipuyan so ontulong ed sikatayo pian nasuri so kanonotan na sayan sankatalonggaringan a too a nambilay ed kapiganman.

No Anto so Impanwalna nen Jesus Bilang Too

14. Panon so impangilitrato na saray Ebanghelyo ed si Jesus bilang too a maligligsa tan walaay aralem iran liknaan?

¹⁴ Say personalidad nen Jesus ya ipaparungtal na saray Ebanghelyo et sakey a lakin maligligsa tan walaay aralem iran liknaan. Impatnag to so nanduruman klase na liknaan: impangabagey ed sakey ya akating (Marcos 1:40, 41); inyermen lapud matewet a totoo (Lucas 19:41, 42); matunong ya insanok ed saray maagum a managsalat na kuarta (Juan 2:13-17). Bilang toon walaay empatya, si Jesus  so akanangis, tan agto pinokpokan iray emosyon to. Sanen inatey so kakkaaro ton si Lazaro, atenyeg a maong si Jesus nen anengneng toy panug-ugaog nen Maria, ya agi nen Lazaro, kanian sikatoy akalua tan nannangis a sankanengneng na arum.​—Juan 11:32-36.

15. Panon ya apatnagan so matamoy iran liknaan nen Jesus diad paraan na impanmoria tan impantrato to ed arum?

¹⁵ Say matamoy iran liknaan nen Jesus so lalon apatnagan diad paraan na impanmoria tan impantrato to ed arum. Inanap toray duka tan apadpairap, a tinulongan to iran ‘makaromog na inawa nipaakar ed saray kamarerwa ra.’ (Mateo 11:4, 5, 28-30) Inasikaso to iray pankaukolan na saray naiirapan, sakey man itan a manpapadalan bii ya agnaam-amtaan ya aniwit ed kawes to odino sakey a bulag a mipapayabol ya agnapatundan onkekelyaw. (Mateo 9:20-22; Marcos 10:46-52) Inimano nen Jesus so kamaongan na arum tan kinomendaan to ira; ingen, sikato so mabulos met ya amaat sano nakaukolan. (Mateo 16:23; Juan 1:47; 8:44) Nen panaon a dagdaiset so kanepegan na bibii, sikara so nampaparan intrato nen Jesus tekep na dignidad tan respeto. (Juan 4:9, 27) Kanian sikatoy mabulbulos a nanlingkoran na sakey a grupo na bibii panamegley na saray kayamanan da.​—Lucas 8:3.

16. Anto so mangipanengneng a si Jesus so walaan na asimbang a panmoria ed bilay tan materyal a bengabengatla?

¹⁶ Si Jesus so walaay asimbang a panmoria ed bilay. Aliwan manunaan ed sikato iray materyal a bengabengatla. Ompatnag a dagdaiset so materyal a kayarian to. Inkuanto ya “anggapoy pangisaralan to na ulo to.” (Mateo 8:20) Ontan met, si Jesus so akiliket met ed arum. Sanen sikatoy inmatendi ed sakey a bansal​—sakey ya ebenton gendat ya atekepan na musika, kansionan, tan panliliket​—mapatnag a sikatoy wadman pian agpagmaliwen ya anggapoy likeliket so okasyon. On, diman ginawa nen Jesus so pilimeron milagro to. Sanen naupot lay alak, say danum so pinagmaliw ton maong ya alak, sakey ya iinumen a “pagmaliwen ton maliket so puso na too.” (Salmo 104:15, NW; Juan 2:1-11) Kanian nantultuloy so ponsia, tan maseguron agnababaingan so nobya tan nobyo. Lalon apatnagan so inkasimbang to lapud mas dakel ni so asalambit iran inkagawa nipaakar ed imbunek tan impasyan pankikimey nen Jesus diad ministeryo to.​—Juan 4:34.

17. Akin ya agmakapasurprisa a si Jesus et sakey a Matalonggaring a Managbangat, tan anto so impatnag na bangabangat to?

¹⁷ Si Jesus so Matalonggaring a Managbangat. Pinmatnag ed dakel a bangabangat to so peteg a nagagawa ed inagew-agew a panagbilay, a kabkabisado to. (Mateo 13:33; Lucas 15:8) Say paraan na panagbangat to so agnaparaan​—lawas malinew, simpli, tan praktikal. Say lalo ni ingen a makabaliksan et no antoy imbangat to. Pinmatnag ed bangabangat to so impapuson pilalek to ya ibangat iray dumerengel to nipaakar ed kanonotan, liknaan, tan daladalan nen Jehova.​—Juan 17:6-8.

18, 19. (a) Diad antoran malinew a panangilitrato so impaneskribe nen Jesus ed Ama to? (b) Anto so singbaten ed ontumbok ya artikulo?

¹⁸ Diad mabetbet a panguusar nen Jesus ed saray ilustrasyon, imparungtal to so Ama to diad panamegley na malinew a panangilitrato a mainomay a tandaan. Sakey a paraan so pangitongtong nipaakar ed panangasi na Dios diad kaslakan a termino. Duma met so pangiyaliling ed si Jehova bilang manamerdonan ama ya atenyeg a maong ed impakanengneng to’d ompapawil lan anak to a ‘binatik to, tan linmakap ed beklew na anak to, tan sikatoy inangoban to.’ (Lucas 15:11-24) Diad impangipulisay to ed mapeget a kultura na saray relihyoson lider a manmemelmelag ed kabanyakan a totoo, impaliwawa nen Jesus a say Ama to et sakey a Dios a mainomay ya asinggeran, a dengelen to ni so ey-ey na sakey a mapaabeban managsingil na buis nen  say mapangtan pikakasi na sakey a malastog a Fariseo. (Lucas 18:9-14) Si Jehova so inlitrato nen Jesus bilang manangiyansakit a Dios a makaamta no walay melag ya anuyaw ya apaktak ed dalin. Oniay impaseguro nen Jesus ed saray babangatan to, “Agkayo antakot, . . . mamabli kayo nen saray amayamay ya anuyaw.” (Mateo 10:29, 31) Kanian say “katooan so nankelkelaw ed panagbanga’to” tan apaapit ira ed sikato. (Mateo 7:28, 29) Agayla, diad sakey ya inkagawa et akiiba ed sikato so “dakel a katooan” diad loob na taloran agew, anggano naandian laray taganoen!​—Marcos 8:1, 2.

¹⁹ Misalsalamat itayo ta imparungtal nen Jehova ed Salita to so nipaakar ed kanonotan nen Kristo! Balet, panon tayon nabayuboan tan nipanengneng so kanonotan nen Kristo diad pidedeneng tayo ed arum? Singbaten iya diad ontumbok ya artikulo.

[Saray paimano ed leksab]

Kasin Natandaan Yo?

• Akin ya importantin naamtaan tayo so “kanonotan nen Kristo”?

• Anton pililimog so nanggayagaan nen Jesus diad inkiwala to sakbay na impagmaliw ton too?

• Legan na mangaraldalin a bilay to, antoran sirkumstansia tan impluensia so naeksperiensian mismo nen Jesus?

• Anto so ipaparungtal na saray Ebanghelyo nipaakar ed personalidad nen Jesus?

[Tepetepet Parad Panagaral]

[Litrato ed pahina 10]

Binmaleg si Jesus ed sakey a baleg a pamilya, nayarin diad simpli iran kipapasen

[Saray litrato ed pahina 12]

Mankelkelaw iray managbangat ed pakatalos tan ebaebat na 12 años a Jesus