Atenyeg Kayo Kasin Onkiwas a Singa si Jesus?

“Anengneng to so saray dakel a katooan, tan naabagey to ra, lapu ed singa ra saray karnero ya andian na managpastol; et ginapoan to so nambangat ed sikara.”​—MARCOS 6:34.

1. Akin a natalosan tayo ya ipapatnag na sinansakey so makapadinayew iran kualidad?

 DIAD inlabas na awaran, dakel lan totoo so angipatnag na makapadinayew iran kualidad. Natalosan yo no akin. Si Jehova a Dios so walaan tan mangipapatnag na aro, kamaongan, inkamabunlok, tan arum nin kualidad a papablien tayo. Apalsa so totoo unong ed indengan na Dios. Kanian natalosan tayo no akin a wala so laknab na pangipapanengneng na dakel a totoo ed aro, kamaongan, panangabagey, tan arum nin kualidad na Dios, a napatnagan ni ingen ed konsiensia na maslak a totoo. (Genesis 1:26; Roma 2:14, 15) Balet, nayarin namoria yo a walaray mas mainomay dan nipatnag ed sarayan kualidad nen say arum.

2. Anto so arum iran maabig a gawa a gagawaen na totoo, a nayarin iisipen dan aaligen da si Kristo?

² Nayarin walaray kabat yon lalaki tan bibii a mabetbet ya ombibisita odino ontutulong ed saray mansasakit, mapangpangasi ed saray agmakayari, odino mabunlok a mamapalabo ed saray mairap-bilay. Nonoten met so nipaakar ed saray totoon napapakiwas ed panangabagey a mangusar ed bilay da pian mantrabaho ed saray ayaman na saray akating odino ulila, saramay manboboluntaryo ed saray ospital odino hospisyo, odino totoon manbabanikel ya ontulong ed saray andiay-ayaman odino ed saramay refugee. Nayarin iisipen na arum ed saratan ya aaligen da si Jesus, ya angiletneg na pangaligan parad saray Kristiano. Nabasa  tayo ed saray Ebanghelyo a pinaabig nen Kristo iray mansasakit tan pinakan toray naeerasan. (Marcos 1:34; 8:1-9; Lucas 4:40) Say impanengneng nen Jesus ya aro, inkamatamoy, tan panangabagey so pakapatnagay “kanonotan nen Kristo,” a mangaalig met ed mangatatawen ya Ama to.​—1 Corinto 2:16.

3. Pian nawalaan itayoy asimbang a panmoria ed saray maabig a gawa nen Jesus, anto so nakaukolan tayon konsideraen?

³ Balet, kasin naimano yo a nibaliwala natan na dakel ed saramay asagyat ed panangaro tan panangabagey nen Jesus so manunan aspekto na kanonotan nen Kristo? Makagamor itayoy aralem a pakatalos ed saya diad maalwar a pangonsidera ed Marcos kapitulo 6. Nabasa tayo’d satan a saray mansasakit so inyakar na totoo ed si Jesus pian natambal. Diad konteksto, naaralan tayo met a diad impakanengneng to a narasan laray nilibo a dinmago’d sikato, si Jesus so mamilagron amakan ed sikara. (Marcos 6:35-44, 54-56) Say impanambal to ed saray mansasakit tan impamakan to ed saray naeerasan so matalonggaring a panangipatnag na maaron panangabagey, balet kasin saratan so manunan paraan na intulong nen Jesus ed arum? Tan panon tayon naalig, ed sankaabigan a dalan, so naspot ya alimbawa to nipaakar ed aro, kamaongan, tan panangabagey, unong na impangalig to met ed si Jehova?

Apakiwas Unong ed Espiritual Iran Pankaukolan Da

4. Anto so eksena na salaysay diad Marcos 6:30-34?

⁴ Nagkalautlan naabagey nen Jesus iramay walad kaliberliber to lapud espiritual iran pankaukolan da. Saratan a pankaukolan so importanti ni nen saray pankaukolan ed pisikal. Konsideraen so salaysay diad Marcos 6:30-34. Say inkagawan nikurit ed satan so agawa diad baybay na Dayat na Galilea, nen manasingger lay panaon na Paskua nen 32 K.P. Malikeliket iray apostol lapu ed maabig a rason. Kasumsumpal da lambengat ed malaknab ya impanbaroy da, linma’ra ed si Jesus, a maseguron magunaet a mangisalaysay ed saray eksperiensia ra. Balet, dinmagsa iray dakel a totoo. Amukot so totoo kanian agla akapangan odino akapanpainawa si Jesus tan saray apostol to. Inkuan nen Jesus ed saray apostol to: “Galidia ed arawi ed sakey a pasen a lawak, tan manpainawa kayon magano.” (Marcos 6:31) Nen linmugan ira ed baloto, a nayarin asingger ed Capernaum, linma’ra ed basil na Dayat na Galilea diad sakey a mareen a pasen. Balet nanuunaan so dakel a totoo diad baybay tan akauna iran sinmabi nen say baloto. Panon kasi so ikiwas nen Jesus? Kasin sikato so inmunganget lapud naisturbo so pampainawa ra komon? Andin balot!

5. Panon so impakalikna nen Jesus nen dinmago’d sikato so dakel a totoo, tan anto so walan inkiwas to?

⁵ Atenyeg so puso nen Jesus nen anengneng to so nilibon totoo, pati saray mansasakit, a manaalagar kalamor ed sikato. (Mateo 14:14; Marcos 6:44) Diad impangipabitar nen Marcos ed no anto so akaabageyan nen Jesus tan panon so inkiwas To, oniay insulat to: “Anengneng to so saray dakel a katooan, tan naabagey to ra, lapu ed singa ra saray karnero ya andian na managpastol; et ginapoan to so nambangat ed sikara na amayamay a bengabengatla.” (Marcos 6:34) Agto lambengat naimano so karakel na totoo. Naimano toray sinansakey a mankaukolan na espiritual a bengatla. Singara karneron manteteyengteyeng, ya anggapo so pastol a mangiwanwan ed sikara diad marikan pankabkaban odino manalimbeng ed sikara. Amta nen Jesus a saray kabanyakan a totoo so kabkabusol na saray asagapet a lider na relihyon, ya iilaloan a magmaliw komon a papastol a mangiyansakit ed sikara, tan pinaulyan da ni ingen so espiritual iran pankaukolan da. (Ezequiel 34:2-4; Juan 7:47-49) Dumay impantrato nen Jesus ed sikara, a ginawa to so sankaabigan a posibli parad sikara. Imbangat tora nipaakar ed Panarian na Dios.

6, 7. (a) Anto so manunan papabitaren na Ebanghelyo diad impangasikaso nen Jesus ed saray pankaukolan na totoo? (b) Anto so amakiwas ed si Jesus a manpulong tan manbangat?

⁶ Imanoen so inkaalutor tan say manunan papabitaren na mipadparan salaysay. Insulat iya nen Lucas, sakey a doktor tan interesadon tuloy ed pisikal a pankaabigan na arum. “Saray dakel a totoo tinmumbok ira ed [si Jesus] et inawa’tora, tan akisalitaan tora nipaakar ed panaria’y Dios, et saray nankaukolan na pananambal tinambal tora.” (Lucas 9:11; Colosas 4:14) Anggano aliwan ontan a naynay so nipapabitar ed kada salaysay nipaakar ed sakey a milagro, diad sayan kaso et anto so pilimeron nipaimano ed apuyanan a salaysay nen Lucas? Say katuaan ya imbangat nen Jesus so totoo.

⁷ Talagan mitunosan iya ed walan nidanet ed Marcos 6:34. Malinew ya ipapanengneng na satan a bersikulo ya ontanlay inkatenyeg nen Jesus  kanian impatnag to so panangabagey to. Imbangat to so totoo, a kinmiwas unong ed espiritual iran pankaukolan da. Nen kasaksakbayan ni na ministeryo to, inkuan la nen Jesus: “Kaukolan ko met ya ipulong ko so ebanghelyo na panaria’y Dios ed saray arum a syudad; ta sikatoya so nibakian ko.” (Lucas 4:43) Anggaman ontan, nalilingo itayo no isipen tayon inyabawag nen Jesus so mensahe na Panarian lapud obligasyon to itan, a singano nantultuloy labat ed apasakey a kurang na panagpulong a kaukolan ton gawaen. Andi, say maaron panangabagey to ed totoo so manunan amakiwas ed sikato pian inabang so maong a balita ed sikara. Say sankaabigan a kamaongan a nagawaan nen Jesus​—anggan ed saray mansasakit, saray pinadpairap na demonyo, saray mairap-bilay, odino naeerasan​—et say panulong ed sikara a makaaral, mangawat, tan mangaro ed katuaan nipaakar ed Panarian na Dios. Satan a katuaan so importantin tuloy lapu ed betang na Panarian a mangiyalangon ed inkasoberano nen Jehova tan mangitaryay magnayon iran bendision parad totoo.

8. Panoy impangipasen nen Jesus ed panagpulong tan panagbangat to?

⁸ Say aktibon pangipupulong nen Jesus ed Panarian so kabiangan ed manunan rason no akin a sikato so linma diad dalin. Diad pansamposampot lay ministeryo to ed dalin, oniay inkuan nen Jesus ed si Pilato: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan. Balang sakey a kayarian na katuaan dengelen to so bosis ko.” (Juan 18:37) Naimano tayo ed duaran akadkaunan artikulo a si Jesus so toon walaay matamoy iran liknaan​—manangiyansakit, mainomay ya asinggeran, makonsidera, manangipiya, tan say sankaimportantian ed amin, maaro. Nakaukolan tayon pablien irayan aspekto na personalidad to no labay tayon talaga a narandan so kanonotan nen Kristo. Importanti met so pakamoria a say kanonotan nen Kristo et mangilalaktip ed impangiyuna to ed panagpulong tan panagbangat a kimey.

Pinaseseg To so Arum a Manpulong

9. Sioparay nepeg a mangiyuna ed panagpulong tan panagbangat?

⁹ Say pangiyuna ed panagpulong tan panagbangat​—a balikas na panangaro tan panangabagey​—et aliwan para ed si Jesus lambengat. Pinaseseg toray patumbok to ya aligen day motibo to, no antoray inyuna to, tan kakikiwas to. Singa bilang, kayari nen Jesus a pinili so 12 apostol to, anto so nakaukolan a gawaen da? Oniay ibabaga ed sikatayo na Marcos 3:14, 15: ‘Sikato so anuro na labindua, pian sikara so miulop ed sikato, a tinawag toran apostoles, tan pian ibaki to ra a manpulong, tan nawalaan iray pakauley a mamaekal ed saray demonyo.’ Naimano yo kasi no dinan so iyuna na saray apostol?

10, 11. (a) Sanen imbaki toray apostol, anto so impagawa nen Jesus ed sikara? (b) Nipaakar ed impangibaki ed saray apostol, anto so nipaimanon maong?

¹⁰ ISinmabi so panaon, say 12 so inikdan nen Jesus na pakauley pian mantambal ed arum tan mamapaway na saray demonyo. (Mateo 10:1; Lucas 9:1) Insan to ira imbakin manbaroy para ed “saray abalang a karnero na abung na Israel.” Pian gawaen so anto? Oniay ingganggan nen Jesus ed sikara: “No onla kayo, manpulong kayo, a kuan yo, Say panarian na tawen asingger la. Tambal yoray agmakayari, paoli yo ed bilay so saray inaatey, linisan yoray akating, papawayen yoray demonyo.” (Mateo 10:5-8; Lucas 9:2) Anto so mabitabitar a ginawa ra? “Et linma ra, tan [1] impulong da, a saray katooan mansibkel ira komon. Et [2] pinapaway da so saray amayamay a demonyo, tan amayamay ya agmakayari ya inilotan da ray larak, tan atambal da ra.”​—Marcos 6:12, 13.

¹¹ Lapud agmet asalambit so nipaakar ed panagbangat diad amin a teksto, kasin alablabas so pangipapabitar ed saray nepeg ya iyuna odino motibon nalalanor lapud nantutumbokan ya abasa ed tagey? (Lucas 10:1-8) Bueno, agtayo nepeg ya ibaliwala so aminpigan inkasalambit na panagbangat sakbay na panagtambal. Konsideraen so konteksto ed sayan kipapasen. Sakbay to nin ibaki so 12 apostol, naabagey la nen Jesus so kipapasen na dakerakel a totoo. Oniay nabasa tayo: “Si Jesus niliberliber toray amin a syudad tan balbaley, a nambabangat ed saray sinagogas da, tan impupulong toy ebanghelyo na panarian, tan nantatambal na amin a nengneng na sakit tan amin a nengneng na beblay. Et sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da. Saman la inkuan to ed saray babangatan to, Dakel a tua so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.”​—Mateo 9:35-38.

12. Anto ni so kaaruman a gagala na mamilagro iran kimey nen Jesus tan saray apostol to?

 ¹² Diad impakapiulop da’d sikato, anggan panon et saray apostol so awalaan na kanonotan nen Kristo. Nalikas da a say pagmaliw dan peteg a maaro tan maabagey ed saray totoo et laktipen toy pangipulong tan pangibangat nipaakar ed Panarian​—a manunaan ya aspekto na maabig iran gawa ra. Mitunosan ed satan, saray maabig a gawa diad pisikal a paraan, a singa say pantambal ed saray mansasakit, so aglambengat akatulong ed saray mankaukolan. Unong a naisip yo, nayarin pakasagyatan na arum a totoo so panagtambal tan say taganon mamilagron nitarya. (Mateo 4:24, 25; 8:16; 9:32, 33; 14:35, 36; Juan 6:26) Anggaman ontan, likud ni ed pakakatulong ed pisikal a paraan, saratan a gawa so peteg ya amakiwas ed saray makakaimaton a mamidbir ed si Jesus bilang Anak na Dios tan say “propeta” ya impasakbay nen Moises.​—Juan 6:14; Deuteronomio 18:15.

13. Say propesiya ed Deuteronomio 18:18 so angidanet ed anton betang na “propeta” ya onsabi?

¹³ Akin a makabaliksan so impagmaliw nen Jesus a “propeta”? Bueno, anto so manunan betang a nipasakbay nipaakar ed sikato? Kasin ombantog so “propeta” lapud panaggaway mamilagro iran panagtambal odino maabagey a pamawalay tagano parad saray naeerasan? Onia so impasakbay la na Deuteronomio 18:18: “Mangipasen ak naani ed sikara na propeta a demeten ed saray lalaki ya agi ra, a singa sika [Moises]; et ‘yan ko naani so saray salitak ed sangi to, et salitaen to naani ed sikara so amin ya ibilin ko ed sikato.” Kanian anggano naaralan na saray apostol so pakawalaan tan pangipatnag na matamoy iran liknaan, naibaga ran say kanonotan nen Kristo so nakaukolan met a nipatnag diad panagpulong tan panagbangat a kimey da. Satan so sankaabigan a nagawaan da parad totoo. Diad ontan a paraan, nagamoran na saray mansasakit tan mairap-bilay so magnayon iran gungguna, ya aliwan limitado lambengat diad antikey a panat na bilay na too odino maminsan o mamidua a panangan.​—Juan 6:26-30.

Bayuboan so Kanonotan nen Kristo Natan

14. Panon a nalalanor so kanonotan nen Kristo ed panagpulong tayo?

¹⁴ Anggapo ed sikatayo so manmoria a say kanonotan nen Kristo et parad inmunan-siglo labat​—parad si Jesus tan saray asasakbay a babangatan ya oniay insulat nen apostol Pablo nipaakar ed sikara: “Wala ed sikatayo so kanonotan nen Kristo.” (1 Corinto 2:16) Mabulos tayon bidbiren ya obligado itayon mangipulong na maong a balita tan manggaway babangatan. (Mateo 24:14; 28:19, 20) Ingen, makagungguna so panmolimoli ed saray mismon motibo tayo diad panggawa’d satan a kimey. Nepeg ya agtayo itan moriaen ya obligasyon lambengat. Say aro ed Dios so manunan rason no akin a mibibiang itayo ed ministeryo, tan talagan say pagmaliw a singa si Jesus et mangilaktip ed pagmaliw ya apakiwas ed panangabagey pian manpulong tan manbangat.​—Mateo 22:37-39.

15. Akin a say panangabagey et matukoy a kabiangan na mapublikon ministeryo tayo?

¹⁵ Tua, aliwan mainomay so pangabagey ed saramay agtayo kapananisiaan, nagkalalo la no ag-ira manginennenen, agmangawat, odino onsumpa ira. Ingen, no naandian itayoy aro tan panangabagey ed totoo, nabalang tayo so manunan motibasyon diad pibibiang tayo ed Kristianon ministeryo. Panon tayo sirin a nabayuboan so panangabagey? Moriaen tayo so totoo a singa impanmoria nen Jesus, a ‘maermen tan abuybuyak ira, a singa saray karnero ya anggapoy pastol da.’ (Mateo 9:36) Agta ontan so kipapasen na dakerakel natan? Diad espiritual  a paraan et sikara so kinaindan tan binulag na saray palson papastol na relihyon. Bilang resulta et agda amta so suston panangigiya a naromog ed Biblia nisay nipaakar ed saray kipapasen ed Paraiso a magano lan itarok na Panarian na Dios diad dalin. Nipapaarap ira ed saray problema a nipaakar ed inagew-agew a panagbilay​—kalaktip lay kairapan ed panagbilay, inkabuybuyak na pamilya, sakisakit, tan ipapatey​—ya andian iray ilalo ed Panarian. Wala la’d sikatayo so nakaukolan da: say manangiliktar-bilay a maong a balita na Panarian na Dios a niletneg la ed tawen!

16. Akin a nepeg tayon kaliktanen so panginabang na maong a balita ed arum?

¹⁶ Kanian no morekdeken yo iray espiritual a pankaukolan na saramay walad kaliberliber yo, agta pakiwasen kayo na kapusoan yo a manggawa ed anggaay nayarian yo pian ibaga ed sikara so nipaakar ed maaron gagala na Dios? On, say kimey tayo et atekepay panangabagey. No walaan itayoy empatya ed totoo a singa si Jesus, ompatnag itan ed tono na bosis tayo, ed itsuray lupa tayo, tan ed paraan na panagbangat tayo. Lapud saratan ya amin, mas makapasagyat so mensahe tayo ed saramay “suston nikiling ed andi-anggaan a bilay.”​—Gawa 13:48, NW.

17. (a) Antoray pigaran dalan a nipatnag tayo so aro tan panangabagey ed arum? (b) Akin ya agpipilien so panggawa na balanglan maabig iran gawa odino pibibiang ed mapublikon ministeryo?

¹⁷ Siempre, say aro tan panangabagey tayo so kaukolan a napatnagan ed intiron kurang na bilay tayo. Laktipen na satan so pagmaliw tayon mapangasi ed saramay mankaukolan, mansasakit, tan mairap-bilay​—a gawaen tayon amin so makatunongan a nagawaan tayo pian nainawaan ira ed paniirap da. Lalanoren met na satan so amin a pansagpot tayo diad salita tan gawa pian naekal so paneermen na saramay inateyan na inad-aro’d bilay. (Lucas 7:11-15; Juan 11:33-35) Ingen, agnepeg komon a magmaliw a manunaan so ontan iran paraan na panangipatnag na aro, kamaongan, tan panangabagey diad saray maabig a gawa tayo, lapud ontan met so gagawaen na arum a matulong ed totoo. Saray sagpot a nagkalalon walaay magnayon a kabaliksan et saray sagpot ya apakiwas unong ed saray madibinon kualidad ya asalambit la, a nipatnag balet diad pibibiang ed kimey na Kristianon panagpulong tan panagbangat. Nonoten pa so inkuan nen Jesus ed saray relihyoson lider na Judio: “Manbayar kayo na kakaplo na yerbabuena tan anis tan cumino, balet pinaulyan yo ya agsinumpal so saray ambelbelat a pamaakaray katunongan salanti, kaalasan, tan panangasi tan pananisia; balet saraya komon so nepeg yon gawaen, tan agyo paulyan iray arum ya aggawaen.” (Mateo 23:23) Parad si Jesus et aliwa itan a pamaakaran na pampili no dinan​—balanglan panulong ed totoo diad saray pankaukolan da’d pisikal odino pambangat ed sikara tekep na manangiter-bilay iran espiritual a bengatla. Pareho itan a ginawa nen Jesus. Siansia, mabitabitar a say panagbangat a kimey to so manunaan lapud ta say pankaabigan a nagawaan to et nayarin magmaliw a magnayon a tulong.​—Juan 20:16.

18. Diad anto so pakakiwasan tayo no konsideraen tayo so “kanonotan nen Kristo”?

¹⁸ Agaylay pisalamat tayo ta imparungtal la ed sikatayo nen Jehova so kanonotan nen Kristo! Diad panamegley na Ebanghelyo, naamtaan tayon magmaong iray kanonotan, liknaan, kualidades, aktibidades, tan saray inyuna na sankatalonggaringan a too a nambilay ed kapiganman. Akauley tayo lan mamasa, mandalepdep, tan mangiyaplika ed ipaparungtal na Biblia nipaakar ed si Jesus. Nodnonoten, ta pian naalig tayo si Jesus et nepeg tayo nin aralen ya unona so manisip, manlikna, tan mandesidi ed saray bengatla unong a ginawa to, diad sankaabigan a nagawaan tayo bilang ag-ayadyarin totoo. Komon ta determinado itayon mamayubo tan mangipanengneng ed kanonotan nen Kristo. Anggapo lay magmaong iran paraan pian makapambilay, natrato so totoo, tan onapit itayo tan saray arum ed samay sakey a naspot ya angipatnag ed maaron Dios tayo, si Jehova.​—2 Corinto 1:3; Hebreos 1:3.

Panon Yon Ebatan?

• Anton aralem a pakatalos so itatarya na Biblia no panon so mabetbet ya inkiwas nen Jesus ed saray totoon mankaukolan?

• Anto so impurpurek nen Jesus diad impangiganggan to’d saray patumbok to?

• Panon tayon nipatnag so “kanonotan nen Kristo” diad saray kimey tayo?

[Tepetepet Parad Panagaral]

 [Interon-pahina a litrato ed pahina 23]

[Litrato ed pahina 24]

Anto so sankaabigan a nagawaan na saray Kristiano parad arum?