Kasin Walaan Kayoy “Kanonotan nen Kristo”?

“Say Dios na anos tan ligliwa ’yabuloy to komon ed sakey tan sakey ed sikayo so apasakey a kalakal unong ed Kristo Jesus.”​—ROMA 15:5.

1. Diad anton paraan so inkilitrato nen Jesus ed dakel a lamina na Kakristianoan, tan akin ya aliwan makatunongan so ontan a panangilitrato ed si Jesus?

 “SIKATO so agnin balot anengneng ya inmelek.” Ontan so inkadeskribe nen Jesus ed sakey a dokumento a palson mankuan ya insulat itan na sakey ya opisyal na Romano nensaman. Sayan dokumento, a kabkabat lapud agni anguman a nengneng to nanlapula’d nen ngalngali koma-11 siglo, so ibabagan angimpluensia ed dakel iran pintor. * Diad pigaran lamina (paintings), say itsura nen Jesus et maer-ermen a mataltalag ya onimis, no bilang ta oniimis. Balet aliwa itan a makatunongan a panangilitrato ed si Jesus, lapud sikatoy inlitrato na saray Ebanghelyo a masayaksak tan maong-impanpuson too a walaan na aralem iran liknaan.

2. Panon tayon nabayuboan so “apasakey a kalakal unong ed Kristo Jesus,” tan anto so pakakinlongan tayo no gawaen tayo itan?

² Mabitar, a pian nakabat tayo so tudtuan Jesus, nepeg tayon panoen so kanonotan tan kapusoan tayo na suston pakatalos ed petepeteg ya inkatoo nen Jesus nen sikatoy wadiad dalin. Usisaen tayo sirin so pigaran salaysay ed Ebanghelyo a mangiter ed sikatayo na aralem a pakatalos nipaakar ed “kanonotan nen Kristo”​—salanti, saray liknaan, pakarandan, kanonotan, tan panagkatunongan to. (1 Corinto 2:16) Leleg a gagawaen tayo itan, konsideraen tayo no panon tayon nabayuboan so “apasakey a kalakal unong ed Kristo Jesus.” (Roma 15:5) Magmaong sirin so pakakinlong na bilay tayo tan diad pidedeneng tayo ed arum no tumboken tayo so pangaligan ya inletneg to parad sikatayo.​—Juan 13:15.

Mainomay ya Asinggeran

3, 4. (a) Anto so eksena na salaysay a nirekord ed Marcos 10:13-16? (b) Panoy inkiwas nen Jesus sanen binano na saray babangatan to so ugugaw ya onaasingger ed sikato?

³ Asagyat so totoo ed si Jesus. Diad nanduruman inkagawa, sikatoy labalabay ya asinggeran na saray totoo a nanduruma so edad tan abenegan da. Konsideraen so agawan nirekord ed Marcos 10:13-16. Agawa itan diad pansamposampot lay ministeryo to diad sankaunoran lan iyakar to’d Jerusalem  pian arapen so makapaot-ot ya ipapatey.​—Marcos 10:32-34.

⁴ Ilitrato pa’d kaisipan so eksena. Intarok na totoo iray ugugaw, pati saray kapangiyanak, pian pabendisionan da iraya ed si Jesus. * Balet, binano na saray babangatan so ugugaw ya onaasingger ed si Jesus. Nayarin ninonot na saray babangatan a seguradon aglabay nen Jesus so paabala ed ugugaw legan na sarayan importantin simba. Balet alingo ra. Sanen amoria nen Jesus so gagawaen na saray babangatan to, agto itan nanliketan. Pinaasingger nen Jesus iray ugugaw, a kuanto: “Paulyan yo so saray angkekelag ya ugugaw ya ondago ed siak; agyo ra sebelan.” (Marcos 10:14) Insan walay ginawa to ya angiparungtal ed talagan matamoy tan maaron walna. Oniay kuan na salaysay: “Inala to ra ed saray taklay to, tan benendisionan to ra.” (Marcos 10:16) Mapatnag ya aliwan iri-iri iray ugugaw legan a sankalakap tora.

5. Anto so ibabaga ed sikatayo na salaysay na Marcos 10:13-16 nipaakar ed inkatoo nen Jesus?

⁵ Dakel lay naamtaan tayo ed satan ya antikey a salaysay nipaakar ed inkatoo nen Jesus. Imanoen a sikato so mainomay ya asinggeran. Anggaman sikato so walaan na atagey a betang ed katawenan, saray ag-ayadyarin totoo so agnatatakot odino nababaingan ya onasingger ed sikato. (Juan 17:5) Agta makabaliksan met ya anggan saray ugugaw et maasingger ed sikato? Seguradon ag-iratan onapit ed sakey a mabinbinta tan agmasayaksak a too ya agbalot onim-imis tan oneelek! Si Jesus so inasinggeran na totoon nanduruma so edad da lapud nalikas da a sikato et maligsa, manangiyansakit a too, tan matalek ira ya agto ra ablogen.

6. Panon a napagmaliw na saray mamatatken so inkasikara a mas mainomay ya asinggeran?

⁶ No molimolien iyan salaysay, tepetan tayoy inkasikatayo, ‘Walaan ak kasi na kanonotan nen Kristo? Mainomay ak kasin asinggeran? Diad sayan maatap iran panaon, nakaukolan na saray karneroy Dios so papastol a mainomay ya asinggeran, lalakin singara “sakey a saniban manlapud dagem.” (Isaias 32:1, 2, NW; 2 Timoteo 3:1) Sikayoran mamatatken, no bayuboan yoy masimoon, impapuson interes ed agagi yo tan mabulos yon italaga so inkasikayo ed biang da, nalikas da so panangiyansakit yo. Nabidbir da itan ed kalupaan yo, narengel da ed tono na bosis yo, tan naimano da ed maong a walna yo. Say ontan a puron inkaligsa tan panangiyansakit so mamawala na kaliberliber a walaay panagmatalek, a magmaliw a mainomay ed arum, pati ugugaw, so onasingger ed sikayo. Insalaysay na sakey a Kristianon bii no akin ya ayarian toy angibesngaw ed sakey a matatken: “Sikatoy akitongtong ed siak ed matamoy tan maabagey a paraan. No andi, agko anganko mansalita. Maligen so liknaan ko.”

 Makonsidera ed Arum

7. (a) Panon ya impanengneng nen Jesus so inkamakonsidera to ed arum? (b) Akin a kalkalnan impawil nen Jesus so pakanengneng na sakey a bulag a laki?

⁷ Si Jesus so makonsidera. Sikato so malikas ed saray liknaan na arum. Diad impakanengneng to lambengat ed saray apadpairap et sikatoy atenyeg a maong kanian sikatoy apakiwas a mamakepa ed paniirap da. (Mateo 14:14) Sikato met so makonsidera ed saray limitasyon tan pankaukolan na arum. (Juan 16:12) Aminsan, inyasingger na totoo ed si Jesus so sakey a bulag a laki tan akikasi ira pian paabigen to. Impawil nen Jesus so pakanengneng na laki, balet kalkalna ton ginawa itan. Diad pilimero, agni tanton malinew so impakanengneng na laki ed saray totoo​—“singa saray kiew, a manaakar.” Insan, sigpot a pinaabig nen Jesus so pakanengneng to. Akin a kalkalna so impanambal to ed laki? Ta pian agnasileng iyan laki ed pakanengneng toy liwawa tan dumaruman kaliberliber, lapud ambilbilunget so datin pakanengneng to.​—Marcos 8:22-26.

8, 9. (a) Anto so agawa kayarin tuloy na inloob nen Jesus tan saray babangatan to diad rehyon na Decapolis? (b) Deskribien so impanambal nen Jesus ed tuleng a laki.

⁸ Konsideraen met so sakey ya agawa kayari na Paskua nen 32 K.P. Akaloob la si Jesus tan saray babangatan to diad rehyon na Decapolis, diad bukig na Dayat na Galilea. Diman et sikara so asagapolan a tampol na dakerakel a totoo tan inyasingger da’d si Jesus so amin a mansasakit tan agmakayari, tan tinambal toran amin. (Mateo 15:29, 30) Makapainteres, imbiig nen Jesus so sakey a laki lapud mankakaukolan iya na nikaduman konsiderasyon. Say managsulat na Ebanghelyo a si Marcos, say alenleneg ya angikurit ed saya, so angireport ed walan agawa.​—Marcos 7:31-35.

⁹ Say laki et tuleng tan baer. Alikas nen Jesus so inka-nerbiyoso odino kababaingan na sayan too. Insan walay nikaduman ginawa nen Jesus. Imbiig to so laki manlapud totoo, diad lugar a siksikaran dua labat. Insan walaray inyandawes nen Jesus ed laki no anto so gawaen to. “Inyan toray tamuro to ed saray layag to, tan linmutda, et diniwi’to so dila to.” (Marcos 7:33) Insan, tinmangay si Jesus ed tawen tan nampikasi. Sarayan impangimari so mangibaga ed laki a, ‘Say gawaen ko ed sika et makasengeg ed pakayari na Dios.’ Diad kaunoran, oniay inkuan nen Jesus: “Nalukasan.” (Marcos 7:34) Diad saman et akadngel lamet so too, tan mabalbalikas lay panagsalita to.

10, 11. Panon tayon nipanengneng so konsiderasyon ed saray liknaan na arum diad kongregasyon? diad pamilya?

¹⁰ Agaylan panangonsidera so impanengneng nen Jesus ed arum! Sikato so malikas ed liknaan da, tan bilang resulta, sayan masimpatyan panangipasen so amakiwas ed sikato a mangikonsidera ed saray liknaan da diad dakel a paraan. Bilang Kristianos, maabig so pamayubo tan pangipatnag ed kanonotan nen Kristo ed onian pamaakaran. Sisimbawaen itayo na Biblia: “Mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.” (1 Pedro 3:8) Maseguron kakaukolanen na saya ed biang tayo so mansalita tan onkiwas ed saray paraan ya ikokonsidera iray liknaan na arum.

 ¹¹ Diad kongregasyon, nipanengneng tayo so panangonsidera ed liknaan na arum diad pangiter tayoy dignidad ed sikara, a tratoen ira unong ed labay tayon pantrato ed sikatayo. (Mateo 7:12) Laktipen na satan so pagmaliw a maalwar no anto so ibaga tayo tan no panon tayon ibaga itan. (Colosas 4:6) Tandaan a say ‘mansalita a botaktak singa kisaksak na kampilan.’ (Uliran 12:18) Komusta met ed pamilya? Say sanasawa a talagan manaaroan so malikas ed liknaan na balang sakey. (Efeso 5:33) Paliisan daray maramsak a panagsalita, agmanundan panagbalaw, tan ansakit iran lurey. Amin na saratan so pakasakitay liknaan ya agmainomay a natambal. Saray ananak so walaan met na liknaan, tan ikonsidera iratan na maaron atateng. No nakaukolan so panametek, gawaen itan na atateng diad paraan a manrespeto ed dignidad na ananak da tan mangipaliis ed sikara manlapud agnakaukolan a panamabaing. * (Colosas 3:21) No ipatnag tayo sirin so konsiderasyon ed arum, ipapanengneng tayo a walaan itayo na kanonotan nen Kristo.

Mabulos a Manmatalek ed Arum

12. Si Jesus so walaan na anton asimbang tan realistikon panmoria ed babangatan to?

¹² Si Jesus so walaan na asimbang tan realistikon panmoria ed saray babangatan to. Amta to ya aliwa iran ayadyari. Anggaman ontan, nabasa to so kapusoan na totoo. (Juan 2:24, 25) Anggano ni, agto nenengnengen so kakabosan da noagta saray maong a kualidad da. Ninengneng to met so posiblin pagmaliwan na sarayan lalaki ya inyasingger nen Jehova. (Juan 6:44) Say positibon panmoria nen Jesus ed saray babangatan to so mapatnag diad paraan na impideneng tan impantrato to ed sikara. Sakey lan bengatla et impanengneng to so inkamabulos a manmatalek ed sikara.

13. Panon ya impanengneng nen Jesus a nanmatalekan toray babangatan to?

¹³ Panon so impangipanengneng nen Jesus ed ontan a panagmatalek? Sanen tinaynan to so dalin, impabtang to ed saray alanaan a babangatan to so ambelat a responsabilidad. Impalima to so responsabilidad a mangasikaso ed sankamundoan ya intereses na Panarian to. (Mateo 25:14, 15; Lucas 12:42-44) Leleg na ministeryo to, impanengneng to ni ingen diad simpli tan agmaparungtal a paraan a nanmatalekan tora. Sanen mamilagro ton pinarakel so tagano pian napakan so dakel a totoo, pinabtangan toray babangatan to na responsabilidad a mangiyutob na tagano.​—Mateo 14:15-21; 15:32-37.

14. Panon yon sumaryoen so salaysay a nikurit ed Marcos 4:35-41?

¹⁴ Konsideraen met so salaysay a nikurit diad Marcos 4:35-41, unong ed New World Translation. Diad sayan inkagawa et linmugan si Jesus tan saray babangatan to ed sakey a baloto tan nampabukig ira, a bineltang day Dayat na Galilea. Kabuat da ni labat, dinmukol si Jesus ed banda’d beneg na baloto tan akaugip. Balet, agnambayag et “sinmabi so makmaksil a bagyo.” Kaslakan la so ontan iran bagyo ed Dayat na Galilea. Lapud abeba itan (manga 200 metros ya abeba nen say dantal na dayat), mas ampetang so dagem diman nen say walad kaliberliber, tan pansesengegan itan na manguman-uman a tiempo. Nilikud ni ed satan, say maksil iran dagem so manpaleksab diad Patar na Jordan manlapud Palandey Hermon, a walad amianen. Say temporaryon inkalinak so nayarin bigbiglan manguman tan magmaliw a manasibengbeng a bagyo. Nonoten pa iya: Maseguron amta nen Jesus iray bagyon kaslakan ya ondadalan, lapud sikatoy binmaleg ed Galilea. Ingen, sikatoy maitlek a naugip, a nanmatalekan toy inkadunong na saray babangatan to, a pigara ed sikara et somisigay.​—Mateo 4:18, 19.

15. Panon tayon naalig so inkamabulos nen Jesus a manmatalek ed saray babangatan to?

¹⁵ Sarag tayo kasin aligen so inkamabulos nen Jesus a manmatalek ed saray babangatan to? Aliwan mabulos so arum a mangipabtang na saray responsabilidad ed arum. Nepeg a sikaran lanang  so manmando, a singa panangibaga. Nayarin isipen da, ‘No labay ko a susto so kagawa na sakey a bengatla, gawaen ko itan a mismo!’ Balet no sikatayon mismo so manggawa ed amin lan bengatla, ompano nabanabanalan itayo tan nayarin makapangusar itayo ni na agnakakaukolan a panaon a sengegay pakaarawi tayo ed pamilya tayo. Nilikud ni, no agtayo ipabtang so matukoy iran kimey tan responsabilidad ed arum, nayarin ikikibot tayo ed sikara so nakaukolan ya eksperiensia tan panangipasal. Makabat ya aralen so panmatalek ed arum, a pabtangan ira na kimkimey. Maabig no tepetan tayon matua so inkasikatayo, ‘Walaan ak kasi na kanonotan nen Kristo ed sayan pamaakaran? Mabulos ak kasin mangipabtang na pigaran kimey ed arum, a manmamatalek ed sikara a gawaen day sankaabigan da?’

Nanpiyaan Toy Babangatan To

16, 17. Diad unor lan labi na mangaraldalin a bilay to, anto so panamaseguro nen Jesus ed saray babangatan to, anggaman amta ton sikatoy ikaindan da?

¹⁶ Impanengneng nen Jesus so positibon panmoria ed saray babangatan to diad arum nin importantin paraan. Impaamta to’d sikara a pankokompiyansaan to ira. Malinlinew iya diad panamaseguro to ed saray apostol to nen unor lan labi na mangaraldalin a bilay to. Imanoen so agawa.

¹⁷ Diad saman et okupadon maong so sanlabi nen Jesus. Sikatoy angiter na pakaaralan na saray apostol nipaakar ed inkamapaabeba diad impanguras to ed kasalian da. Kayari na satan, inggapo to so pangdem a pakanodnonotan ed impatey to. Insan pirmi so impansasangsangan lamet na saray apostol to no siopa so ompatnag a sankatalonggaringan ed sikara. Lapud maan-anos si Jesus, agto ra nantamian balet ta akikatunongan ed sikara. Imbaga to’d sikara no anto so nagawa ed arapen da: “Amin yo nagulo kayo naani nisengeg ed siak ed saya a labi; ta walan nisulat, Sugatan ko so pastol naani, ed saray obehas a nanuulop nabuybuyak ira.” (Mateo 26:31; Zacarias 13:7) Amta ton sikatoy ikaindan na maapit a kakaiba to diad panaon na pankakkaukolan to. Siansia, agto ra kinondena. Midumaan a tuloy, oniay inkuanto’d sikara: “Kayarik ya onoli ed bilay, onla ak naani ed unaan yo ed Galilea.” (Mateo 26:32) On, pinaseguroan to ira ya anggaman sikatoy ikaindan da, agto ra kaindanan. Kayari na sayan makapasinagem a panirap, laen to lamet ira.

18. Diad Galilea, anton ambelat a ganggan so inmatalek nen Jesus ed saray babangatan to, tan panon itan ya inunor na apostoles to?

¹⁸ Tinoor nen Jesus so imbaga to. Saginonor, diad Galilea et pinmayawar so apaolin Jesus ed 11 a matoor ya apostoles, a mapatnag ya akidagup ed dakerakel ni. (Mateo 28:16, 17; 1 Corinto 15:6) Inter diman nen Jesus so ambelat a ganggan ed sikara: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Malinew ya ipapabitar ed sikatayo na libro na Gawa a satan a ganggan so inunor na saray apostol. Matoor dan indaulo so kimey na panangipulong na maong a balita nen inmunan siglo.​—Gawa 2:41, 42; 4:33; 5:27-32.

19. Anto so ibangat ed sikatayo na saray ginawa nen Jesus kayari na inkioli to nipaakar ed kanonotan nen Kristo?

¹⁹ Anto so ibangat ed sikatayo na sayan manangiparungtal a salaysay nipaakar ed kanonotan nen Kristo? Naimatonan nen Jesus iray apostol to diad pirmin kakapuyan da, ingen “inaro to ra angga ed kasampotan.” (Juan 13:1) Anggaman ed saray kakulangan da, impaamta to’d sikara a napanpiyaan to ra. Imanoen a sustoy impankompiyansaan nen Jesus. Say kompiyansa tan inkasimoon ya imbalikas to’d sikara so maseguron amabiskeg ed sikara pian magmaliw a determinado  ed kapusoan da a manumpal ed kimey a pagagawa to’d sikara.

20, 21. Panon tayon nipanengneng so positibon panmoria ed saray kapanisiaan tayo?

²⁰ Panon tayon nipanengneng so kanonotan nen Kristo ed sayan pamaakaran? Agkayo magmamaliw a mainap ed saray kapananisiaan yo. No nodnonoten yo iray pirmin kakapuyan da, nayarin ompatnag itan ed panagsalita tan kakikiwas yo. (Lucas 6:45) Balet, ibabaga ed sikatayo na Biblia a say aro et “amin sisiaen to.” (1 Corinto 13:7) Say aro et positibo, aliwan negatibo. Makapabiskeg itan imbes a makapakapuy. Mas mabulos ya onkiwas so totoo ed aro tan panamaseseg nen say diad panamagyaw. Napabiskeg tan napaseseg tayo so arum diad pangibalikas tayoy kompiyansa ed sikara. (1 Tesalonica 5:11) No walaan itayo na positibon panmoria ed agagi tayo, a singa si Kristo, tratoen tayo ira ed paraan a makapabiskeg ed sikara tan mamapaway ed sankaabigan da.

²¹ Mas ni so sasaglawien na pamayubo tan pangipanengneng ed kanonotan nen Kristo nen say basta pangalig ed pigaran ginawa nen Jesus. Singa asalambit la ed akadkaunan artikulo, nepeg tayo nin aralen ya unona so panmoria ed saray bengatla unong ed impanmoria to pian peteg a makapanugali itayon singa si Kristo. Ontulong ed sikatayo iray Ebanghelyo pian natalosan so sananey nin aspekto na personalidad to, saray kanonotan tan liknaan to nipaakar ed nipabtang a kimey to, unong a singbaten ed ontumbok ya artikulo.

[Saray paimano ed leksab]

Kasin Nipaliwawa Yo?

• Panoy inkiwas nen Jesus sanen binano na saray babangatan to so iyaasingger na ugugaw ed sikato?

• Diad antoran paraan ya impanengneng nen Jesus so konsiderasyon ed arum?

• Panon tayon naalig so inkamabulos nen Jesus a manmatalek ed saray babangatan to?

• Panon tayon naalig so impankompiyansa nen Jesus ed saray apostol to?

[Tepetepet Parad Panagaral]

[Litrato ed pahina 16]

Aliwan iri-iri iray ugugaw ed si Jesus

[Litrato ed pahina 17]

Maabagey so impantrato nen Jesus ed arum

[Litrato ed pahina 18]

Sakey a bendision iray mamatatken a mainomay ya asinggeran