Onarawi Kayo ed Mapeligron Pasen!

TRABAHO na saray volganologist so pangobserba tan panetermina ed ebidensia insan ipasakbay so magano la iran ibetag na bolkan. (Kabetag na Mount Fugen, kaukolan a pan-ibakwiten na saray polis so totoo manlapud mapeligron pasen.) Mipadpara, naoobserbaan na saray estudyante na Biblia so tanda na “kasampotan na sistema na bengabengatla,” tan papasakbayan daray arum nipaakar ed onsasabin kapeligroan.​—Mateo 24:3, NW.

Diad parehon kapitulo na Biblia a mangipapasakbay nipaakar ed onsasabin sankagloboan a desyang, nabasa tayo iyan deskripsion na unona niran nagawa: “Ontalindeg naani nasyon sumpa ed nasyon, tan panarian sumpa ed panarian; tan wala ra naani eraeras tan yegyeg ed nambabangil a pasen. . . . Tan amayamay iray tilatilan propetas ya onalagey naani, tan ibalang da naani so saray amayamay. Tan lapud ondakel naani so kaugsan, say aro ray amayamay ombetel. . . . Tan saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.”​—Mateo 24:7-14.

Agtayo nakaukolan so magmaliw a manag-analisa na saray balita pian natebek so peles a pakakasumpal na sayan propesiya. Naeeksperiensia tayo la itan nagkalalo la nanlapula’d 1914. Asagmakan ed sayan siglo so duaran guerra mundial, dakerakel a sibil a bakal, lokal iran panlalaban, tan saray gotgotan lapud rasa tan relihyon. Nasasagmak la na katooan so kakulangay tagano bilang resulta na saratan a bakal, likud ed saray kairapan ya epekto na natural iran desyang. Dakel a bilay so tinigway la na saray yegyeg. Kinmasmak la iray kulto a walaan na saray makapainap a lider tan panatikon papatumbok. Say ‘idarakel na kaugsan’ so mangiyaarawi ed totoo ed pangipanengneng na panangaro, tan naandi met lay panangaro ed kaparan too.

Say sankamundoan a panagpulong, a sananey nin aspekto na tanda, so talagan nagagawa la. Ibukay pa labat ed apis na sayan magasin, tan naimanom iray salitan “Mangipapalapag na Panarian nen Jehova” bilang kabiangan na paulo. Say Panag-Bantayan, a nipapalapag ed 132 a lenguahe tan walaan na sirkulasyon a masulok a 22 milyon, so manunan uusaren na saramay mangiyaabawag  ed “sayan maong a balita na panarian” ed amin a panaayaman a dalin. Satan a maong a balita et laktipen toy mensahe a say Manamalsa na uniberso, si Jehova a Dios, so angiletneg la ed mangatatawen a Panarian a maneral ed marelmeng a sistema na bengabengatla tan mangitarok na paraiso ed dalin. On, naiimatonan la natan so tanda a magano lan onkiwas so Dios, a pakapatnagan a say bilay na totoo ed sayan sistema na bengabengatla et walad kapeligroan.​—Ikompara so 2 Timoteo 3:1-5; 2 Pedro 3:3, 4; Apocalipsis 6:1-8.

Say Makapataktakot ya Agew nen Jehova

Anto so nagawa sano onsabi la so panaon ya ipaakseb nen Jehova so panangukom to? Ontalineng ed mismon malinew ya impangideskribe to ed nagawa ed satan a panaon: “Ipatnag ko naani so saray pankelkelawan ed saray tawen tan ed dalin; dala, tan apoy, tan sekseklang ya asewek. Say banwa magmaliw naani ya ambilunget, tan say bulan dala, arapen na isabi na baleg tan makapataktakot ya agew nen Jehova.”​—Joel 2:30, 31.

Manasingger la itan ya agew, lalon makapataktakot tan makadesyang nen say dinanman ya imbetag na bolkan odino yegyeg. Inkuan nen propeta Sofonias: “Say baleg ya agew nen Jehova asingger, sikato so asingger tan masiglat a maomaong. . . . Say amin a dalin naakmon naani ed apoy na imon to: tan gawaen to naani so anggaan, on, makapataktakot ya anggaan, na saray amin a manaayam dia ed dalin.” Anggaman ‘ag-ira nilaban na pilak da anggan say balitok da ed agew na sanok nen Jehova,’ wala so paraan pian naliktaran itan a makapataktakot ya agew.​—Sofonias 1:14-18.

Diad pangipapanengneng no panon, onia so imbaga nen Sofonias: “Et arapen a say masebeg a sanok nen Jehova onsabi ed sikayo, et arapen a say agew na sanok nen Jehova onsabi ed sikayo. Anapen yo si Jehova, sikayo ya amin a mauyamo ed dalin . . . Anapen yo so inkatunong, anapen yo so kauyamoan: Nayari a sikato naani niyamot dia ed agew na sanok nen Jehova.” (Sofonias 2:2, 3) Nayarian tayoy pasalimbengan diad panamegley na ‘pananap ed si Jehova, pananap ed inkatunong, tan pananap ed kauyamoan.’ Siopara natan so manaanap ed si Jehova?

Andi-duaruwan isiglaot mo so salita a “Jehova” ed saray Tastasi nen Jehova lapud panagpulong a kimey da. Nayarin akaawat ka la na onian magasin manlapud sakey ed sikara. Sikaray kabkabat bilang walaay moralidad a mibabaley a manbibilay a maptek. Panggugunaetan dan isulong so ‘balon inkatoo,’ a laktipen toy pamayubo’d kauyamoan. (Colosas 3:8-10) Bidbiren dan resulta iya na pakababangatan da ed nanengneng ya organisasyon nen Jehova, a nirerepresenta ed lokal na saray kongregasyon na Tastasi nen Jehova ed sankadalinan. On, nayarian moy pasalimbengan a kaiba so ‘intiron panlilimog na agagi’ ed limog na Tastasi nen Jehova ed sankamundoan.​—1 Pedro 5:9, NW.

Pasalimbengan la Natan

Pian nasalimbengan itayo diad panamegley na pananap ed si Jehova, kaukolan a magmaliw itayon kakaaro to. Antoy sasaglawien na saya? Onia so ebat na Biblia: “Agyo ta amta a say pikakaaro ed mundo et sikato so pibubusol ed Dios? Kanian siopaman a magmaliw naani a kaaro na mundo sikato so kabusol na Dios.” (Santiago 4:4) Pian magmaliw a kakaaro na Dios, nepeg tayon iwaklit ed inkasikatayo so antokaman a panpilalek ed peles a marelmeng a mundo, a napatnagan diad rebelyoson awawey ed Dios.

Bibilinen itayo na Biblia: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo. Et say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:15-17) Maslak a totoo natan so sasagyaten na pilpilalek na laman​—agnakontrol a kagletan ed sekso, maagum a pangegemtan ed kuarta, tan panangabuso ed pakayari. Balet pian walad dapag nen Jehova, nepeg a talonaan na sakey iratan a pilpilalek.​—Colosas 3:5-8.

Nayarin abasam la iyan palapagan a panapanaon, tan onabobon ka ed saray pangiyaaplika to ed saray propesiya ed Biblia. Ingen, nayarin  masuyat kan manggawa na kaaruman a kundang pian milimog ed saray Tastasi nen Jehova. Balet, no nipaarap itayo ed sakey a desyang, kasin magenap la so idengel labat ed pasakbay? Singa naimano tayo la ed imbetag na Mount Fugen, kaukolan tayoy onkiwas unong ed pasakbay. Tandaan, angurat so manga 15 a reporter tan litratista a manpipilalek a nawalaay bengatlan ibalita. Diad tua, sakey a litratista so inatey a say tamuro to et walad kablitay camera. Sakey a volcanologist​—ya angikuan, “No bilang ta ompatey ak, labay ko diad asingger ed bolkan”​—so inatey unong ed pinirawat to. Amin da so dedikado ed trabaho tan ed saray gegemtan da. Balet, inatey ira lapud impangibaliwala ra ed pasakbay.

Dakel natan so makakarengel ed mensahe nipaakar ed desisyon na Dios a deralen iyan marelmeng a sistema na bengabengatla tan natetebek da, ed sakey a laknab, so kakanaan na pasakbay. ‘Nayarin onsabi met itan,’ so irason da, ‘balet aliwan natan.’ Ibabayanbayan da so agew nen Jehova ta pian ag-ira onkasipa ed ompatnag a mas importanti ed imaton da natan.

Ontan so problema nen Baruk. Bilang sekretaryo na kadaanan a propetan si Jeremias, sipapakpel a pinasakbayan nen Baruk iray Israelita nipaakar ed manasingger a kaderal na Jerusalem. Ingen, diad sakey ya inkagawa et sikatoy kinmesaw ed niganggan ed sikato. Lapud satan, sikatoy kinorehi nen Jehova: “Anapen mo so saray baleg a bengatla a nipaakar ed sika lanlamang? Agmo ra anapen.” Balanglan kayamanan, inkaprominenti, odino materyal a seguridad itan, si Baruk et agto komon ‘inanap iray baleg a bengatla parad inkasikato.’ Sikatoy nepeg komon ya interesado ed sakey a bengatla, say panggawa ed linawa na Dios pian tulongan so totoon ondapag ed Sikato. Bilang resulta, gamoran toy ‘tekmel ed bilay to.’ (Jeremias 45:1-5) Mipadpara, imbes ya ‘anapen iray baleg a bengatla parad inkasikatayo,’ nepeg tayon anapen si Jehova, a makapangitonton ed kisalba na bilay tayon mismo.

Diad Mount Fugen, masulok a labinduan polis tan boluntaryo iran bombero so aka-duty sanen sikaray naabotan na ampetapetang a buga na bolkan. Panggugunaetan da kalamor a tulongan tan protektaan iray walad kapeligroan a totoo. Walaan ira na maong ya intension a nigalet ed pamaaligwas ed sayan mundo. Anggaman alay abig na saray motibo ra, ‘agla nayari a peteken so pikewet.’ (Eclesiastes 1:15) Say pikewet a sistema na bengabengatla so agla nipetek. Kasin makatunongan so ‘pikaaro [na sakey] ed mundo’ diad panggunaet ya isalbay sankamundoan a sistema a denisisyonan la na Dios a deralen?

Bektan Akabatik Ka la, Agla Onaasingger

Importanti so itaynan ed mapeligro lan sistema, balet importantin tuloy met so pansiansia ed mananalimbeng a panangasikaso na “say intiron panlilimog na agagi.” (1 Pedro 2:17) Agtayo lilingwanan iray dumaralos a, kayarin nan-ibakwit et pinmawil pian nengnengen iray uma ra ed asingger na Mount Fugen. Anganko et pitamitam da lay “normal” a kabibilay a nipasalan da. Balet namoriam ya aliwan makabat so desisyon dan ompawil. Anganko et aliwan saman so pilimeron impanali ran inyakar ed mapeligron pasen. Nayarin akaonla la ra ya agano ed mapeligron pasen tan anggapoy agawa. Diad tinmumbok ya inyakar da et nayarin binmayag ira na daiset, balet ta siansian anggapoy agawa. Maseguro, ag-abayag et apasal laran onlampas ed maligen a lugar tan makpel lan mansiansia ed mapeligro lan pasen.

Tinukoy nen Jesu-Kristo so mipadparan kipapasen a nagawa legan na “kasampotan na sistema na bengabengatla.” Inkuanto: “Singa ed saraman ya agew sakbay na delap, nankakakan tan naniinum ira, angaasawa so lalaki tan akiasawa so bibii, angga ed agew ya inloob nen Noe ed biong; tan ag-ira angim-imano angga ed sinmabi so delap tan inyanor tora ya amin, ontan naani so kiwawala na Anak na too.”​—Mateo 24:3, 38, 39, NW.

Imanoen a sinalambit nen Jesus so panangan, panag-inum, tan panangasawa. Anggapo ed saratan a bengatla so mauges ed imaton nen Jehova. Anto sirin so mauges ey? Saray totoo ed agew nen Noe so ‘ag-angim-imano,’ a say angiyapasakeyan day bilay da et diad regular a rotina. Diad panaon na emerhensia, say sakey so agmakapambilay a “normal.” Bektan akataynan ka la  odino insian mo lay inkasika manlapud peles a mundo a naukom la, nepeg mon labanan so dinanman a pananagyat ya ompawil pian anamoten so antokaman a naala manlapud satan. (1 Corinto 7:31) Nayarin makatawataw ka manlapud maligen a pasen ed espiritual a paraan tan ompawil a sigpot ya anggapoy agawa ed sika tan anggapo ni ingen so makakaimano ed satan. Balet, satan so maseguron mamatepel ed sika tan mangitonton ed ipawil mo lamet ed mundo, a manmeneng nin magano. Agmabayag et nabayuboan moy ugalin: “Agni onsabi so anggaan natan.”

Ontan met, isipen pa so taloran drayber na taksi a naandi bilay da lapud panaalagar da ed saray reporter tan litratista sanen inmagus so imbugay bolkan. Arum natan so nayarin miluyos ed arum a makpel a pinmawil ed mundo. Antokaman so rason, malinew a say pakakasagyat ya ompawil ed mapeligron pasen et delikado.

Amin a biktima na imbetag na Mount Fugen so linmampas ed maligen a lugar tan linma ed mapeligron pasen. Anggaman inilaloan dan ombetag so bolkan, anggapoy anggan sakey a nanisip ya ombetag ed saman ya agew. Diad pangimano ed tanda na kasampotan na sistema na bengabengatla, dakel so maniilalon onsabi so agew nen Jehova balet ta mabayag ni. Isipen ni ingen na arum a say agew et aliwan “natan.” Talagan delikado so ontan ya awawey.

“Say agew nen Jehova so onsabi a singa matakew,” so impasakbay nen apostol Pedro. Kaukolan tayoy man-alerto, ya “aalagaren tan pansiansiaen lawas ed kanonotan so kiwawala na agew nen Jehova,” a gagawaen tayoy “anggaay nayarian [tayo] pian diad kaunoran et naromogan to itayon andiay matik tan andiay tilol tan walad kareenan.” (2 Pedro 3:10-14, NW) Kayari na pakaderal na peles a sistema na bengabengatla, sakey a paraison dalin ed silong na Panarian na Dios so manaalagar. Komon ta agtayon balot natukson mangipalaran ed bilay tayo diad mapeligron pasen parad antokaman a nibaraan, lapud diad agew ya ipawil tayo ed mundo et ompan onsabi so agew nen Jehova.

Pasalimbengan a kaibay totoo nen Jehova tan mansiansian kaiba ra.

[Saray litrato ed pahina 7]

Pasalimbengan a kaibay totoo nen Jehova tan mansiansian kaiba ira

[Picture Credit Line ed pahina 4]

Iwasa/Sipa Press