Talinengen so Pasakbay!

BOOM! Nen Hunyo 3, 1991, tekep na madalagurog ya ungol, say Mount Fugen ed Hapon so angibuga na pinasyan gas tan dapol na bolkan. Inmagus iratan ya ampetapetang a bengatla. Say imbetag so anigway na 43 a totoo. Dakel ya akaliktar kalamor so apuldakan a maong. “Danum, danum, panangasi yo,” so inkelyaw na arum. Asasyok iray bombero tan polis pian ontulong ed sikara.

MANGA duay simba la ed asasakbay et naimanon walay ompapaway a lava ed toktok na Mount Fugen, kanian pirmi so impanlikas na saray autoridad tan saray manaayam diman. Diad loob na masulok a sakey simba antis na kalamidad et nipasakbay lay pan-ibakwit. Sakey agew labat antis na imbetag, imbaga la na saray polis ed saray reporter ya agla ra oonla ed insebel a lugar. Anggaman kuan, diad saman a makatigway a ngarem et saramay 43 a nagmaliw a biktima so walad mapeligron pasen.

Akin ya ontanlan karakel so angipalaran ed bilay da ed saman a lugar odino nansiansia diman? Arum a dumaralos ya anaynan la ed kaabungan da so amawil pian nengnengen iray kayarian tan kaumaan da. Taloran volcanologist so analin onasingger ed bolkan pian nikana ray dunong da ed propesyon da. Dakel a reporter tan litratista so nampakpel a linmampas ed isesebel a lugar lapud labay day makala na ibalita ra nipaakar ed bolkan. Taloran drayber na taksi ya inarkila na media so wadman met. Saray polis tan bombero so aka-duty. Balang sakey so walaan na dili ton rason ed inyakar ed mapeligron pasen balet ta say nansumpalan et inkanguratan to.

Kasin Wala Ka’d Mapeligron Pasen?

Nayarin ag-itayo manaayam ya amin ed asingger na aktibon bolkan. Ingen, anto no nipapaarap itayo ed sankagloboan a desyang, a mangipasen ed sikatayon amin ed mapeligron pasen a nasasakopan na intiron globo? Papasakbayan itayo na sakey a libro ya apaneknekan lan napanmatalkan a lapuan na mapropetikon impormasyon nipaakar ed sankamundoan a desyang tan onia so impaneskribe na satan: “Say banwa ombilunget naani, tan say bulan agto naani iter so sinag to, tan saray bibitewen napaptak ira naani manlapu ed tawen, tan saray pakayari tawen nagalaw ira naani.  . . . Manermen naani ed satan so amin a polipoli na dalin.” (Mateo 24:29, 30) Dia et say mangatatawen ya ebento a walaay sankatalbaan a laknab so adeskriben mangaapekta ed “amin a polipoli na dalin.” Diad arum a salita, mitukoyan iyan propesiya ed sakey a desyang a mangapekta ed balang sakey ed sikatayo.

Sayan libro na napanmatalkan a propesiya et say Biblia. Makapainteres, say lugan na asalambit ed tagey a teksto so mangiiter na detalyadon deskripsion na saray bengatla a mansumpal ed sankagloboan a desyang. No panon a say ompapaway a lava tan arum niran pakapatnagan ed bolkan so makasengeg ed impangidesigna na opisyales na syudad na Shimabara ed mapeligron pasen, say Biblia so mangiiter met ed sikatayo na saray rason ed pagmaliw ya alerto tan ed panparaan tayo parad kililiktar. Makaaral itayo na sakey a leksion manlapud trahedya diad Mount Fugen tan natebek tayo so inkagrabe na walad arapen.

 [Picture Credit Line ed pahina 2]

COVER: Yomiuri/Orion Press/Sipa Press

[Picture Credit Line ed pahina 3]

Yomiuri/Orion Press/Sipa Press