Anapen si Jehova Tekep na Akaparaan a Puso

SAY Israelitan saserdoten si Esdras so matalonggaring a managsukimat, iskolar, managsakal, tan managbangat na Ganggan. Parad saray Kristiano natan et sikatoy maabig ya alimbawa na intiron-kamarerwan panaglingkor. Panon ya ontan? Lapud satan et pinansiansia toy maridios a debosyon to anggaman sikatoy manaayam ed Babilonia, sakey a syudad a napno na palson dirios tan panagdayew ed demonyo.

Say maridios a debosyon nen Esdras so aglabat la niwala. Nankimeyan to itan. On, imbaga to ed sikatayo ya “imparaan to so puso to pian ontupleg ed ganggan nen Jehova tan gawaen itan.”​—Esdras 7:10, NW.

Singa si Esdras, labay na totoo nen Jehova natan a gawaen so amin a pagagawa nen Jehova ed sikara leleg a manbibilay ed mundon mamubusol ed tuan panagdayew. Kanian usisaen tayo pa iray dalan pian niparaan tayo met so puso tayo, say akindalem ya inkatoo​—laktip laray kanonotan, awawey, pilalek, tan motibasyon tayo​—pian “ontupleg ed ganggan nen Jehova tan gawaen itan.”

Iparaan so Puso Tayo

Say kabaliksan na “panparaan” et “masakbay a pangitarya ed pigaran gagala: pangikondisyon parad partikular a pangusaran, pangikanaan, odino disposisyon.” Siempre, no arapat mo la so suston pikakabat ed Salitay Dios tan indedikam lay bilay mo ed si Jehova, diad ontan say pusom so peteg a napaneknekan ya akaparaan tan nayarin nikompara ed “say maong a dalin” a sinalita nen Jesus nipaakar ed say parabolo na tomatanem.​—Mateo 13:18-23.

Anggaman kuan, kaukolan na kapusoan tayo so mantultuloy ya imano tan pamaaligwas. Akin ey? Lapud duaran rason. Unona, lapud makapasakit iran kiling, singa saray sabsabitan ed hardin, so tampol ya onlamot, nagkalalo la legan na sarayan “kaunoran ya agew” sano “say dagem” na sistema nen Satanas so lalon napno na makapasakit iran bukel na silalaman a kanonotan. (2 Timoteo 3:1-5; Efeso 2:2) Say komaduan rason et nipaakar ed mismon dalin. No agnaasikaso, say dalin so namagaan, onawet, tan agmamawala na bunga. Odino dakel a totoo so nayarin agmaalwar ya ondakat ed hardin tan naperper so dalin. Mipadpara met so piguratibon dalin na puso tayo. Magmaliw itan ya agmabunga no napaulyan odino naperper na totoo ya andiay interes ed espiritual a pankaabigan tayo.

Sirin, agaylan kaimportanti parad sikatayon amin ya iyaplika so bilin na Biblian: “Yatol mo so pusom ed amin a seet; ta manlapu ed sikato so saray agus na bilay.”​—Uliran 4:23.

Saray Sengegan a Mamabuna ed “Dalin” na Puso Tayo

Konsideraen tayo pa so pigaran sengegan, odino kualidad, a mamabuna ed “dalin” na puso tayo pian nagamoran so maabig ya ibubulaslas. Maseguron dakel iray bengatlan mamaaligwas ed puso tayo, balet konsideraen tayo labat dia so anemira: say pamidbir ed espiritual a pankaukolan, inkamapaabeba, inkamatua, maridios a takot, pananisia, tan panangaro tayo.

“Maliket iramay sinononot ed espiritual a pankaukolan da,” so inkuan nen Jesus. (Mateo 5:3, NW) Singa say eras ed pisikal so mangipanonot a kaukolan tayoy mangan, say pikabat ed espiritual a pankaukolan tayo so mamasiansia ed sikatayon lawas a narasan parad espiritual a tagano. Sipor lan walaan na pantindek so totoo ed tagano lapud mangiter itan na kabaliksan tan gagala ed bilay. Saray desdes manlapud sistema na bengabengatla nen Satanas odino say pirmin inkangiras ed panagaral  so nayarin mamakapuy ed inkamanonot tayo ed sayan pankaukolan. Anggaman ontan, inkuan nen Jesus: “Aliwa a say tinapay labat so napambilay na too noag say amin a salitan ombesngaw ed sangi’ Dios.”​—Mateo 4:4.

Diad literal a dalan, saray maparanay, balansi, tan masustansian panangan so mamabunigas ed laman, tan paganasen lamet na saratan so laman ed ontumbok a panangan. Tua met itan ed espiritual a pantalos. Nayarin agmo ipasen so inkasikan maaral a too, balet no iyugalim so pambasa na Salitay Dios ya inagew-agew tan aralen mo so nibase’d Biblia iran publikasyon a maparanay et naimanom a lalo ka lan nagaganasan. Diad tua, pitalaran mo la so panaon mo ed panagaral na Biblia. Kanian agtampol onsusuko; makulin paaligwasen so mabunigas a ganas mo ed espiritual.

Say Inkamapaabeba so Mamalemek ed Puso

Say inkamapaabeba so makanan kabiangan ed pakawalaay akaparaan a puso lapud ta pagmaliwen itayo na satan a mainomay ya ibangat tan ontulong ed sikatayon mabulbulos a mangawat ed maaron simbawa tan panametek. Konsideraen so maabig ya alimbawa nen Arin Josias. Legan na impanuley to et aromog so dokumento a lugan na satan so Ganggan na Dios a niiter ed panamegley nen Moises. Sanen nadngel nen Josias iray balikas na Ganggan tan amoria to no panon so pirmin inkasipa na kaatengan to ed puron panagdayew, pinilat toray aysing to tan nannangis ed arap nen Jehova. Akin a say Salita na Dios so pirmin anenyeg ed puso na ari? Ibabaga na salaysay a say puso to et “anlemek,” kanian impaabeba toy inkasikato diad impakadngel ed saray salita nen Jehova. Naimano nen Jehova so mapaabeba tan maawat a puso nen Josias kanian benendisionan to unong ed satan.​—2 Arari 22:11, 18-20.

Akatulong so inkamapaabeba ed saray “andi aral tan kabanyakan” a babangatan nen Jesus pian natebek tan niyaplika iray espiritual a katuaan ya agnaimano na saramay “makabat tan makatalos” lambengat “unong ed laman.” (Gawa 4:13; Lucas 10:21; 1 Corinto 1:26) Saramay komaduan atukoy et ag-akaparaan a mangawat ed salita nen Jehova lapud say kapusoan da so pinaawet na inkakinon. Pankelawan ni kasi a kagula nen Jehova so inkakinon?​—Uliran 8:13; Daniel 5:20.

Inkamatua tan Maridios a Takot

Insulat nen propetan Jeremias a “say puso manamalingo alabas nen saray amin a bengatla, et sikato so mapalalo a mauges; siopa so makaamta ed sikato?” (Jeremias 17:9) Ompatnag a mismo iyan panamalingo ed nanduruman paraan, singa sano manbaraan itayo no alingo itayo. Ompatnag met itan sano palemewen tayoy seryoson kakapuyan ed personalidad. Balet, ontulong ed sikatayo so inkamatua pian nadaeg so manamalingon puso diad panulong ed sikatayon arapen no antoy petepeteg ed inkasikatayo ta pian onaligwas itayo. Impatnag na salmista so ontan ya inkamatua sanen nampikasi: “Sumal moak, O Jehova, tan subok moak; salim so pusok tan linawak.” Malinew ya imparaan na salmista so puso to pian awaten so panaggogol tan pananubok nen Jehova, anggaman mankabaliksan itan na pamidbir ed singa dutak iran walna pian saraya so natalonaan.​—Salmo 17:3; 26:2.

Say maridios a takot, a mangilaktip ed “panggula ed mauges,” so mabiskeg a tulong ed sayan panaggogol. (Uliran 8:13) Anggaman papablien so maaron-panangasi tan kamaongan nen Jehova, say sakey a too a talagan ontatakot ed si Jehova so lawas sikakabat a si Jehova so walaan na pakayarin mangipakat na dusa, ipapatey ni ingen, ed saramay matunganga ed sikato. Impatnag nen Jehova a saramay ontakot ed sikato so ontulok met ed sikato sanen inkuanto ed Israel: “O wala komon so onia a nengneng na puso ed loob da, a takotan da ak, tan unoren da a naynay so amin a ganggan ko pian makapaabig ed sikara, tan dia ed saray anak da a siansia lawas!”​—Deuteronomio 5:29.

Malinew, say gagala na maridios a takot et aliwan say pansiansia tayo ed kipapasen na natatakot a panagpasakop, noagta mamakiwas ed sikatayon ontulok ed maaron Ama tayo, ya amta tayon nononoten toy pankaabigan tayon tuloy. Diad tua, say ontan a maridios a takot so mangitandoro tan makapagayaga ni ingen, a satan so impatnag a maong nen Jesu-Kristo a mismo.​—Isaias 11:3; Lucas 12:5.

Say Akaparaan a Puso so Mayaman ed Pananisia

Amta na puson mabiskeg ed pananisia ya antokaman a kekerewen odino panangiwanwan nen Jehova panamegley na Salita to so lawas duga tan pankaabigan tayon maong. (Isaias 48:17, 18) Say  toon walaan na ontan a puso so makagamor na pirmin kapenek tan pankontento ed pangiyaplika ed simbawa diad Uliran 3:5, 6, a kuanto: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Balet, say puson kulang na pananisia so agla onkiling a manmatalek ed si Jehova, nagkalalo la no mankaukolan itan na pansakripisyo, singa say pamasimpli ed bilay na sakey ta pian niyapasakey toy intereses na Panarian. (Mateo 6:33) Diad maabig a rason, momoriaen nen Jehova so andiay pananisian puso bilang “mauges.”​—Hebreos 3:12.

Say pananisia tayo ed si Jehova so napatnagan ed dakel a paraan, laktip iray bengatlan gagawaen tayo ed loob na abung tayo. Alaen pan alimbawa so prinsipyo ed Galacia 6:7: “Agkayo komon nalingo; say Dios agnayarin naludlurey: ta say antokaman ya itanem na too satan met so anien to.” Say pananisia tayo ed sayan prinsipyo so naipatnag ed saray pamaakaran a singa ed saray pelikulan babantayan tayo, libron babasaen tayo, kaunongan kabetbet so panaaral tayo ed Biblia, tan ed panagpikasi tayo. On, say mabiskeg a pananisia a mamakiwas ed sikatayo pian mantanem “nipaakar ed espiritu” so sakey a manunan tombok ed pakawalaan na puso ya akaparaan pian awaten so Salita nen Jehova tan tumboken itan.​—Galacia 6:8.

Aro​—Say Sankatalonggaringan a Kualidad

Mas ni nen say arum a kualidad, talagan pagmaliwen na aro so dalin na puso tayo a matulok ed Salita nen Jehova. Kanian, sanen ikokompara itan ed pananisia tan ilalo, deneskribe nen apostol Pablo so aro bilang “kabalbalgan ed saraya” a kualidad. (1 Corinto 13:13) Say puson napno na panangaro ed Dios so makagamor na pirmin kapenek tan gayaga lapud panutulok ed sikato; seguradon ag-itan oningongot ed saray kakaukolanen na Dios. Inkuan nen apostol Juan: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Mipadpara ed sarayan balikas, inkuan nen Jesus: “No say sakey a too aroen to ak, unoren toy salitak, et sikato so aroen nen Amak.” (Juan 14:23) Imanoen a satan ya aro et makapanbalesan. On, aaroen a maong nen Jehova iramay onaapit ed sikato lapud aro.

Amta nen Jehova ya ag-itayo ayadyari tan maparanay itayon mankakasalanan ed sikato. Anggaman ontan, agto iyaarawi so inkasikato ed sikatayo. Say iimanoen nen Jehova ed saray lingkor to et say “ayadyari a puso,” a satan so mamakiwas ed sikatayo pian sikatoy mabulos tayon panlingkoran tekep na ‘maliket a kamarerwa.’ (1 Awaran 28:9) Siempre, amta nen Jehova a mankaukolay panaon tan sagpot pian nabayuboan ed kapusoan tayo iray maabig a kualidad diad ontan et napawala iray bunga na espiritu. (Galacia 5:22, 23) Kanian, sikatoy maanos ed sikatayo, “ta sikato kabat to so inkagawa tayo; sikato nanodnonotan to a sapok itayo.” (Salmo 103:13) Diad pangipatnag ed miparan awawey, agbalot pirmin binalaw nen Jesus iray babangatan to ed saray lingo ra, noagta maanos toran tinulongan tan pinaseseg. Agta say aro, panangasi, tan anos nen Jehova tan Jesus so mamakiwas ed sikan nagkalalon aroen mo ira?​—Lucas 7:47; 2 Pedro 3:9.

No maminsan et naliknam ya alay irap so pamagot ed nigalet a maong tan singa sabsabitan iran ugali odino betagen iray kargaan ya anawet tan singa langa iran walna, agbalot naermenan odino nadismaya. Imbes, mansiansian pankimeyan so iyaligwas leleg a sika so “mansiansian malet ed pikakasi,” laktip lay lanang a pikekerew ed espiritu nen Jehova. (Roma 12:12) Diad mabulos a tulong to, sikay ontalona a singa si Esdras ed pakawalaan na puson sigpot ya akaparaan ya “ontupleg ed ganggan nen Jehova tan gawaen itan.”

[Litrato ed pahina 31]

Pinansiansia nen Esdras so maridios a debosyon to anggan walad Babilonia

[Picture Credit Line ed pahina 29]

Garo Nalbandian