Report na Saray Manangiyabawag na Panarian

Atumangan so Pananisia Ra

SI apostol Pablo so toon walaan na matalonggaring a pananisia, tan pinaseseg to iray kapananisiaan to a bayuboan da met so pananisia ra. Inkuan to: “Say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Ipabitar na onggendan iran eksperiensia ed Mozambique no panon a tinumangan nen Jehova so mabiskeg a pananisia tan inebatan iray masimoon a pikakasi ra.

• Sakey ya abalon agin bii a taga mamaamianen a luyag na Niassa so mapaga no panon a sikato tan say anemiran ananak to so makaatendi ed “Dalan na Dios ed Bilay” a Distriton Kombension. Say alenleneg ya anapan to et manlalako ed tindaan, balet sanen asingger lay petsa na kombension, say kuarta to so magenap labat ed paonla a piliti ed tren parad sikaran sankapamilyaan. Anggaman ontan, sikatoy desididon nanmatalek ed saray probisyon nen Jehova kanian intuloy toray implano to pian makapikombension.

Sikatoy linmugan ed tren a kaibay anemiran ananak to. Leleg na biahe et inmasingger so konduktor parad say ticket to. Naimano na konduktor so lapel card to, tinepet na konduktor no anton klase na card so akapeket ed sikato. Inkuan na agin bii ed konduktor a satan so mangipabidbir ed sikato bilang sakey a delegado ed distriton kombension na Tastasi nen Jehova. “Iner so pakagawaan na sayan kombension?” so intepet na konduktor. Kayari impakaamtan say kombension et diad kaabay a luyag na Nampula, ngalngali 300 a kilometro ed kaarawi, agnailaloan a say siningil labat na konduktor ed agi et kapaldua na bili na ticket! Insan to inikdan so agin bii tan say pamilya to na parad kapapawil iran ticket a kapaldua labat lay bayar. Agaylan liket na agin bii lapud impanmatalek to ed si Jehova!​—Salmo 121:1, 2.

• Diad loob na ngalngali 25 taon, ipipikasi na relihyosan maong a bii ed Dios a nipanengneng komon ed sikato so dugan dalan na pandayew ed Sikato. Itetekep na relihyon a pimimisaan to iray relihyoson seremonya ed saray kaugalian a ritual, tan sikatoy nanduaruwa no kasin sayan nengneng na panagdayew so makapaliket ed Dios.

Insalaysay to: “Lawas kon nonodnonoten iray salita nen Jesus a nirekord ed Mateo 7:7: ‘Itultuloy yon kerewen, et naikdan kayo; mantultuloy yon anapen, et makalmo kayo; itultuloy yoy ontoktok, et nilukas ed sikayo.’ Sinononot ed sayan teksto, maparanay kon ipipikasi ed Dios ya itonton toak ed katuaan. Sakey ya agew inkuan na pastor na simbaan mi ya amin a manlalako ed tindaan so mangiter ed sikato na kantidad na kuarta ontan met la ed saray lako ra ta pian bendisionan tora. Impasen kon sayan kerew et aliwan makasulatan, kanian anggapoy inawit ko. Sanen anengneng na pastor ya anggapoy awit kon ‘iyaapay,’ ininsulto to ak ed arap na amin a membro na simbaan. Amoriak ed saman ya agew ya aliwan oniay paraan a labay na Dios a pandayew ed sikato, kanian inmekal ak ed saman a relihyon. Diad kaleganan, intultuloy ko ni nampikasi pian naromog so katuaan.

“Kaunoran et akapanpakpel ak tan nilak so kanayon ko a sakey ed saray Tastasi nen Jehova. Inikdan to ak na tract, tan diad pambabasak ed satan et tampol kon amoria ya inebatan na Dios so pikakasik. Asabi panaon, ginmapo met lan inapresia na piaamongan ko iray katuaan na Biblia, tan nampakasal kami. Anggaman ontan, diad saginonor et grabe so impansakit na asawak. Balet anggad agew na impatey to, pinaseseg toak a mantultuloy ed dalan na katuaan ta pian makapannengnengan kami lamet ed Paraiso.

“Misalsalamat ak lawas ed si Jehova ta inebatan toray pikakasik tan impanengneng to ed siak so dugan dalan na pandayew ed sikato. Naebatan met iray pikakasik lapud ta amin a waloran ananak ko et nagmaliw a dedikadon lingkor nen Jehova.”