Say Biskeg na Pikakasi

Say agew so onseselek la diad syudad na Nacor ed Pegley Bukig sanen akasabi so sakey a Siryanon laki a manngaran na Eliezer pati say samploran nantatalontonan a kamelyo diad sakey a bobon ed paway na syudad. Anggaman naknaksawan tan napgaan, say mas sankanonot nen Eliezer et saray pankaukolan na arum. Sikatoy nanlapud sananey a bansa pian mananap na ipaasawa ed ilalak na katawan to. Sakey ni, nepeg ton anapen iyan bii ed limog na kakanayon na katawan to. Panon ton sumpalen iyan mairap a kimey?

PANISIAAN nen Eliezer so biskeg na pikakasi. Tekep na makatantandan pananisia, a walaan na kualidades a singa ugaw, onia so mapaabeban inkerew to: “O Jehova, Dios nen katawan ko ya Abraham, pikasik ed sika a pawitan moak na maong a kapalaran ed saya ya agew, tan mangiparungtal ka na abig na linawa ed katawan ko ya Abraham. Nengneng mo, manal-alagey ak dia ed abay na subol na danum; tan saray bibii ya anak na totoo ed syudad ompapaway ira a manasol: Et gawam komon a say marikit a pangibagaan ko naani onia, Yepas mo so buyog mo, pikasik ed sika, ta pian makapiinum ak; et ibaga to pa naani, Inum ka tan painumen ko so saray kamelyos mo met: sikato’tan pa so bii a tinurom a nipaakar ed aripen mo ya Isaac; tan ditan ko napatnagan so pangipanengneng mo na abig na linawa ed katawan ko.”​—Genesis 24:12-14.

Say kompiyansa nen Eliezer ed biskeg na pikakasi so atumangan. Agayla, samay sankaunaan a biin inmasol ed bobon et apo manaya na agi nen Abraham! Say ngaran to et Rebeca, tan sikatoy sakey a marikit, masimpit ed moral, tan maganggana. Makatantanda, agto labat la inikdan si Eliezer na inumen noagta mapangasi met ya inyopresi ton painumen ya amin iray napgaan a kamelyo to. Saginonor, kayari impantongtong na pamilya, mabulbulos ya akila si Rebeca ed si Eliezer ya ompawil ed arawin dalin pian magmaliw ya asawa na ilalak nen Abraham a si Isaac. Agaylan makapasagyat tan mapatnag ya ebat ed pikakasi nen Eliezer nensaman sanen tunggal paminsan a mamilagron onsalet so Dios ed saray nagagawa ed saman!

Dakel so naaralan tayo manlapud pikakasi nen Eliezer. Impanengneng na satan so matalonggaring a pananisia, inkamapaabeba, tan andi-siblet a panagpaga to parad saray pankaukolan na arum. Impatnag met na pikakasi nen Eliezer so panagpasakop to ed paraan na pidedeneng nen Jehova ed katooan. Andi-duaruwan kabat toy nikabkabiig a siglaotan na Dios ed si Abraham ontan met ed sipan To ya onsabi iray bendision ed arapen parad amin a katooan panamegley nen Abraham. (Genesis 12:3) Kanian, onia iray balikas ed gapo na pikakasi nen Eliezer: “O Jehova, Dios nen katawan ko ya Abraham.”

Si Jesu-Kristo so kapolian nen Abraham a diad panamegley to et nabendisionan so amin a matulok a katooan. (Genesis 22:18) No labay tayon naebatan iray pikakasi tayo natan, kaukolan tayon ipatnag so mapaabeban panamidbir ed paraan na pidedeneng na Dios ed katooan diad panamegley  na Anak to. Inkuan nen Jesu-Kristo: “No mansiansia kayo ed siak, tan saray salitak mansiansia ra ed sikayo, kerew kayo na antokaman a laba’yo, et nagawa ed sikayo.”​—Juan 15:7.

Say sakey a patumbok nen Kristo ya akaeksperiensia ed katuaan na sarayan salita nen Jesus et si apostol Pablo. Talagan atumangan so pananisia to ed biskeg na pikakasi. Pinaseseg to iray kaparan Kristiano ya ipikasi ed Dios so amin a kapagaan da tan pinekderan to: “Nayarian ko a gawaen so ganagana ed saman so mamabiskeg ed siak.” (Filipos 4:6, 7, 13) Kasin kabaliksan na saya a naebatan ya amin so impikasi nen Pablo ed Dios? Imanoen tayo.

Aliwan Amin a Kerew et Nipagamor

Anggaman ed andi-siblet a ministeryo nen Pablo, sikatoy anagmak na deneskribe ton “sabit ed laman.” (2 Corinto 12:7) Nayarin saya et pirmin gonigon ed mental tan emosyon makasengeg ed saray sumusumpa tan “saray pakalala ya agagi.” (2 Corinto 11:26; Galacia 2:4) Odino nayarin satan et problema’d pisikal lapud makapuy lan pakanengneng. (Galacia 4:15) Antokaman itan, sayan “sabit ed laman” et walay makapakapuy ya epekto ed si Pablo. “Nipaakar ed saya akikasi ak ed Katawan ya amitlo, pian naekal komon ed siak,” insulat to. Balet, agnipagamor so kerew nen Pablo. Nipaliwawa ed si Pablo a magenap la iray espiritual a gunggunan naawat to manlapud Dios, a singa say pakayarin nasungdoan iray subok. Kaaruman ni, oniay inkuan na Dios: “Say pakayarik agawan ayadyari ed kakapuyan.”​—2 Corinto 12:8, 9.

Anto so naaralan tayo manlapud saray ehemplo di Eliezer tan Pablo? Talagan ondedengel si Jehova a Dios ed saray pikakasi na saramay mapaabeban manggugunaet a manlingkor ed sikato. Balet agkabaliksan na saya a lawas ton ipapagamor iray kerew da lapud malaknab so panmoria na Dios ed saray pamaakaran. Magmaong a tuloy so pikakabat to parad pankaabigan tayo nen say sikatayon mismo. Nagkalalon importanti, sikato so lawas onkikiwas a mitunosan ed nibaga to lan gagala to a singa nirekord ed Biblia.

Panaon Parad Espiritual a Panamaabig

Isisipan na Dios a paabigen to so katooan ed amin a pisikal, mental, tan emosyonal iran kaleteyan da legan na Sanlibon Taon ya Uley na Anak to ed dalin. (Apocalipsis 20:1-3; 21:3-5) Magunaet ya aalagaren na saray masimoon a Kristiano iyan insipan ya arapen, a walaan na sigpot a pananisia ed pakapanyari na Dios a manumpal ed satan. Anggaman ag-ira maniilalo ed mamilagron panagtambal natan, ipipikasi ra ed Dios so panagligliwa tan panamabiskeg to pian natalonaan daray subok. (Salmo 55:22) Sano mansakit ira, nayarin kerewen da met so panangiwanwan na Dios ed pakagamor na sankaabigan a pakatambal unong ed kipapasen da’d ekonomya.

Papasesegen na arum a relihyon so mansasakit a manpikasi ira pian onabig la natan, ya ipapabitar da so mamilagron panamaabig a ginawa nen Jesus tan saray apostol to. Balet ginawa iratan a milagro parad nikabiig a gagala. Kinmana iratan pian paneknekan a si Jesu-Kristo so tuan Mesias tan pian ipanengneng a niyalis lay pabor na Dios ed agano nin Kristianon kongregasyon manlapud Judion nasyon. Nensaman, kinaukolan iray mamilagron langkap pian pabiskegen so pananisia na balo nin niletneg a Kristianon kongregasyon. Sanen niletneg lan maong tan binmiskeg lay kongregasyon, ‘angangga laray’ mamilagron langkap.​—1 Corinto 13:8, 11.

Diad sayan importantin panaon, ididirehi nen Jehova a Dios iray managdayew to ed mas importantin kimey na espiritual a panamaabig. Legan a wala ni panaon da, kaukolan a maganat ya onkiwas iray totoo ed sayan iyaapelo: “Anapen yo si Jehova natan ta naromog yo ni; ontawag kayo ed sikato natan ta asingger ni: Say marelmeng paulyan to komon so dalan to, tan say too ya aliwa a maptek so saray kanonotan to; et ompawil komon ed Jehova, et sikato naani kasian to; tan ed Dios tayo, ta sikato perdonaen to naani ed daakan.”​—Isaias 55:6, 7.

Sayan espiritual a panamaabig ed saray magbabawin managkasalanan so nagagawa la diad panamegley na panangipulong ed maong a balita na Panariay Dios. (Mateo 24:14) Diad pamapabiskeg to’d saray lingkor to a manggawa ed sayan manangisalbay bilay a kimey, tutulongan nen Jehova a Dios iray minilyon a totoo manlapud amin a nasyon pian magbabawi ed saray kasalanan da tan nadampot da so naabobonan a siglaotan ed sikato antis a mangangga iyan marelmeng a sistema. Talagan naeebatan iray pikakasi na amin a masimoon a mangipipikasi ed ontan ya espiritual a panamaabig tan saramay mangipipikasi na tulong pian nagawaan da iyan panamaabig a kimey.

[Picture Credit Line ed pahina 3]

Eliezer and Rebekah/The Doré Bible Illustrations/Dover Publications