No Akin a Nakaukolan na Katooan so Mananulong

‘SAKEY ak a manamasegsegang,’ so inaksobi na datin matangsit tan marawal too. Sikatoy datin manag-ayew ya andiay panangasin anigensigen tan amairap ed matakot ed Dios a papatumbok nen Jesu-Kristo. “Balet,” inkuanto a tekep na pisasalamat, “agamoran ko so panangasi.” Singa agnapanisiaan, nagmaliw a matoor a Kristianon apostol Pablo iyan masebeg a manamasegsegang.​—1 Timoteo 1:12-16; Gawa 9:1-19.

Aliwan amin et akapanggawa na saray bengatlan singa ginawa nen Pablo. Ingen, amin tayo so agmakakapet ed saray estandarte na Dios. Akin? Lapud “amin nankasalanan, tan makulang ira ed gloria na Dios.” (Roma 3:23) Sakey ni, magmainomay itayon natalonaay kaandiay-ilalo, anganko et liknaen tayon mauge-uges tayo lan maong pian kasian ni na Dios. Legan a momolimolien nen Pablo so makasalanan iran inklinasyon to, onia so inkelyaw ton mismo: “Alay kasegsegang ko a too! Siopa so mangilaban ed siak ed laman na sayan patey?” Diad impangebat to’d dili ton tepet, onia so insulat to: “Misalamat’ak ed Dios lapud Jesu-Kristo a Katawan tayo.”​—Roma 7:24, 25.

Panon a napidenengan na matunong a Manamalsa iray managkasalanan? (Salmo 5:4) Imanoen ya inkuan nen Pablo: “Misalamat’ak ed Dios lapud Jesu-Kristo a Katawan tayo.” Onia met so insalaysay na sakey nin akagamor na panangasi na Dios: “No wala so toon mankasalanan, wala so apireng [“mananulong,” NW] tayo ya onarap ed Ama, si Jesu-Kristo a matunong; Tan sikato so manamaandi kasalanan tayo, tan aliwa lambengat ed saray kasalanan tayo, noag met kasalanan na lapag a mundo.”​—1 Juan 2:1, 2.

Akin a tinawag si Jesu-Kristo a ‘mananulong ed Ama’? Tan panon a si Jesus so “manamaandi [a bagat]” parad saray kasalanan?

No Akin a Nakaukolan so Mananulong

Linma si Jesus diad dalin pian “iter toy bilay to a panondon ed amayamay.” (Mateo 20:28) Say dondon et say kantidad ya ibayar parad kibulos na sakey a too odino kipawil na sakey a bengatla.  Say porma na verb ed Hebreon salita a nipatalos a “dondon” so mangipapasabi ed ideyan pansakob, odino panakbong ed saray kasalanan. (Salmo 78:38) Say Griegon salita, a singa samay naromog diad Mateo 20:28, so nagkalautlan inusar pian tukoyen so kantidad ya imbayar pian dondonen iray priso ed bakal odino pian ibulos iray aripen. Pian nakapet so kakaukolanen na hustisya, kaukolan a walay bengatlan isalat ed sananey a misimbangan ed balor.

Say katooan so naaripen lapud impanrebeldi na inmunan too ed Dios. Singa naimano diad Genesis kapitulo 3, sinmunggay itan ya ayadyarin too​—si Adan​—ed si Jehova a Dios. Diad insunggay to, inlako toy inkasikato tan saray agni nianak a kapolian to diad panangaripen na kasalanan tan ipapatey. Kanian pinerdi nen Adan so regalon ayadyarin bilay bilang too parad inkasikato tan ed amin a ilalak to.​—Roma 5:12, 18, 19; 7:14.

Diad kadaanan ya Israel, inyareglo na Dios so pangibagat ed ayayep pian nasakbongan, odino nasakoban, iray kasalanan na totoo. (Levitico 1:4; 4:20, 35) Bilang resulta, say bilay na ibagat ya ayep so kasandi bilay na samay nankasalanan. (Levitico 17:11) Lapud satan, say “agew a pananakbong” so natawag met ya “agew na pananondon.”​—Levitico 23:26-28.

Balet, lapud abebbeba iray ayayep ed too, “agnayari a say dala na saray baka tan saray kanding ekalen to [a nagnap] so saray kasalanan.” (Hebreos 10:1-4) Pian nawalaan na magenap a balor so sakey a bagat parad permanentin panakbong, odino pangekal, ed saray kasalanan, kaukolan a misimbangan itan ed balor a pinerdi nen Adan. Kakaukolanen na hustisya so ayadyarin too (si Jesu-Kristo) pian misimbangan ed abalang na sananey ya ayadyarin too (si Adan). Say ayadyarin bilay na too labat so makabayar ed kantidad na dondon pian narondon iray ilalak nen Adan manlapud inkaaripen ya angilakoan ed sikara na inmunan ama ra. Say ‘bilay parad bilay’ so mangapet ed saray kakaukolanen na tuan hustisya.​—Exodo 21:23-25.

Sanen nankasalanan si Adan tan asentensiaan na ipapatey, saray agni nianak ya ilalak to so wala ni ed banel to sirin et sikaray ompatey a kaiba to. Say ayadyarin toon si Jesus, “say unor ya Adan,” so mabulos ya agnanpamilya. (1 Corinto 15:45) Wala ni ed banel to so agni nianak ya ilalak to sanen sikatoy inatey bilang ayadyarin bagat bilang too. Sirin, nayarin nibagan say posiblin rasa na too a wala ni ed banel to et inatey a kaiba to. Inako nen Jesus a singa pamilya ton dili so makasalanan tan ompapatey lan pamilya nen Adan. Insuko toy kanepegan ton nawalaay dilin pamilya. Diad impangibagat to’d ayadyarin bilay to bilang too, sinaliw nen Jesus so amin a katooan a kailalakan nen Adan ta pian sikaray magmaliw a pamilya To tan Sikatoy magmaliw ya “Andi-anggaan ya Ama” ra.​—Isaias 9:6, 7.

Say dondon bagat nen Jesus so angilukas na dalan parad matulok a katooan pian nagamoran so panangasi na Dios tan nawalaan na andi-anggaan a bilay. Lapud satan, onia so insulat nen apostol Pablo: “Say bayar na kasalanan say patey; bangbalet say langkap ya andi bayar na Dios say bilay ya andi-angga ed Kristo Jesus a Katawan tayo.” (Roma 6:23) Napakiwas itayon mangidayew ed si Jehova lapud panangaro tan panangabagey a misiglaotan ed dondon, a nitarya diad abalbaleg a sakripisyo ed biang to tan ed pinabpabli ton Anak. (Juan 3:16) Tan talagan pinaneknekan nen Jesus a sikatoy ‘mananulong ed Ama’ sanen sikatoy apaoli ed mangatatawen a bilay tan impresenta toy balor na dondon bagat to ed Dios diad katawenan. * (Hebreos 9:11, 12, 24; 1 Pedro 3:18) Balet panon a napapaneknekan natan nen Jesu-Kristo a sikatoy mananulong tayo anta walad tawen?

[Paimano ed leksab]

[Litrato ed pahina 4]

Say ayadyarin bilay nen Jesus bilang too so imbayar pian narondon iray ilalak nen Adan