No Panon so Pangiwawanwan nen Jehova ed Sikatayo
No Panon so Pangiwawanwan nen Jehova ed Sikatayo
“Itabin moak ed mapatar a basbas.”—SALMO 27:11.
1, 2. (a) Panon so pangiwawanwan nen Jehova ed totoo to natan? (b) Anto so lalanoren na panganamot a maong ed saray miting?
SI Jehova so Lapuan na liwawa tan katuaan, unong a naaralan tayo la ed akaunan artikulo. Wawandagan na Salita to so dalan tayo legan tayon aakaren so basbas na kaptekan. Iwawanwan itayo nen Jehova diad pangibabangat to’d sikatayo ed saray dalan to. (Salmo 119:105) Singa say salmista nensaman, malikeliket itayon paiwanwan ed Dios tan manpikasi ya: “Ibangat mo ed siak so dalan mo, O Jehova; tan itabin moak ed mapatar a basbas [“basbas na kaptekan,” NW].”—Salmo 27:11.
2 Say sakey a paraan na pangibabangat nen Jehova ed sikatayo natan et diad panamegley na saray Kristianon miting. Kasin aanamoten tayon maong iyan maaron probisyon diad panamegley na (1) regular ya iyaatendi, (2) idengel a maong ed programa, (3) mabulos a pibibiang ed saray parti a nakaukolan so pibiang na saray dumerengel? Niarum ni, kasin malikeliket itayon onkiwas sano makaawat itayo na saray suhestion a makatulong ed sikatayon mansiansia ed “basbas na kaptekan”?
Komusta so Piaaral Yo?
3. Panon ya abayuboan na sakey a sigpot-panaon a lingkor so maabig ya ugali na regular a piaaral?
3 Say arum a manangipalapag so regular lan onaatendi’d saray miting nanlapula’d inkaugaw da. Oniay nanonotan ni na sakey a sigpot-panaon a ministro na Tastasi nen Jehova: “Diad ibabaleg min sanaagi a bibii nen dekaday 1930, agmi la tetepeten ed atateng mi no kasin miaral kami. Amta mi a kaukolan mi so onla likud labat no mansasakit kami. Agbalot akaliwat so pamilya mi ed piaaral.” Singa si propetesan Ana, sayan agin bii so “agbalot onsasaew” ed pasen a pandadayewan ed si Jehova.—Lucas 2:36, 37.
4-6. (a) Akin a makakaliwat so arum a manangipalapag na Panarian ed saray miting? (b) Akin a lalon makanakana natan so iyatendi ed saray miting?
4 Sakey kayo kasi ed saramay regular ya onaatendi ed saray Kristianon miting, odino tubat-tubat lay piaaral yo? Sineguro itan na arum a Kristiano a manisip a maabig lay nagagawaan da. Diad loob na pigaran simba, inlista ra so kada miting ya inatendian da. Sanen nirepaso ra so nilista ra kayari na indesigna ran panaon, nikelawan ira ta walaray miting ya aliwatan da.
5 ‘Agla itan pankelawan,’ so nayarin ikuan na sakey. ‘Pirmi so pakadedetdetan na totoo natan kanian nairapan laran magmaliw a regular ed saray miting.’ Tua a manbibilay itayo ed makapagonigon a panaon. Nagkalalo la ta maseguron ondenden niray pakadetdetan. (2 Timoteo 3:13) Balet, agta lalon importanti natan so regular ya iyaatendi ed saray miting? No aliwan tuloytuloy so kasusustuni tayo ed makapabunigas ya espiritual a tagano, agtayo nailaloan a makatalindeg tayo ed pananesdes na sayan sistema. Agayla, nayarin natukso itayon onkasipa ed “basbas na matunong” no aliwan regular so pililimog tayo! (Uliran 4:18) Tua, sano onsabi itayo ed abung kayari na makapabanal a sanagew, nayarin no maminsan et nangingirasan tayo lan miaral. Balet no miaral tayo, anggano naknaksawan itayo, sikatayo so nagunggunaan tan napaseseg tayoray kaparan Kristiano a walad Kingdom Hall.
6 Isusuheri na Hebreos 10:25 so sakey nin importantin rason no akin a nakaukolan tayo so magmaliw a regular diad iyaatendi ed miting. Ipapaseseg nen apostol Pablo ed saray kaparan Kristiano a mandaragup ira ta ‘nagkalalo la, nanenengneng da lan manasingger so agew.’ On, agtayo nepeg a lingwanan so katuaan a manasingger la so “agew nen Jehova.” (2 Pedro 3:12) No isipen tayon mabayag ni so anggaan na sayan sistema, nayarin kalkalna tayo lan unaen iray personal a bengatla nen saray makanan espiritual ya aktibidad, a singa say iyaatendi ed saray miting. Insan, unong ya impasakbay la nen Jesus, ‘bigbigla ya onsabi itan ya agew ed sikatayo.’—Lucas 21:34, NW.
Magmaliw a Maong a Dumerengel
7. Akin ya importanti ed ugugaw so panimanon maong diad saray miting?
7 Aglambengat magenap so iyatendi ed saray miting. Nepeg itayon ontalineng a maong, a manimanon maong no anto so nipapaliwawa. (Uliran 7:24) Nalalanor ed satan iray ananak tayo. Sano maneskuela so sakey ya ugaw, sikato so ilaloan na managbangat a manimanon maong, anggano agmakapainteres ed sikato odino agto natalosan so sakey a leksion. Amta na managbangat ya anggan panon et nagunggunaan so ugaw ed leksion no sikato so manimanon maong. Agta makatunongan sirin, parad saray maneeskuela niran ananak a manimanon maong ed panangibangat a nitatarya diad saray miting ed kongregasyon, imbes ya abuloyan iran naugip kagapo na aral? Tua a diad saray mablin katuaan a naromog ed Kasulatan et “arum ed saraya [so] mairap a talosan.” (2 Pedro 3:16) Balet agtayo leleglemewen so abilidad na sakey ya ugaw a makaaral. Ag-ira leleglemewen na Dios. Diad panaon na Biblia, ingganggan toray kalangweran a lingkor to a ‘dengelen da tan tumboken da tan ontakot ira ed si Jehova tan sumpalen dan gawaen iray amin a salsalita na ganggan,’ ya arum ed saratan et maseguron agnatalosan na ugugaw. (Deuteronomio 31:12; ikompara so Levitico 18:1-30.) Wala kasi so pidumaan ed iilaloan nen Jehova ed saray ugugaw natan?
8. Antoran kundang so gagawaen na arum ya atateng pian natulongan iray ananak da a magmaliw ya atentibo diad saray miting?
8 Momoriaen na saray Kristianon atateng a nasusustuni met ed arum a paraan so espiritual a pankaukolan na ananak da unong ed naaaralan da ed saray miting. Kanian papaugipen a magano na arum ya atateng so ananak da sakbay na aral ta pian onsabi ira ed Kingdom Hall ya agmantemeg tan akaparaan a manaral. Walaray atateng a mapeget dan lilimitaan odino agda ni ingen panbabantayen na TV iray ananak da ed labin sakbay na aral. (Efeso 5:15, 16) Tan babawasan na saratan ya atateng iray bengatlan makasbel ed imano na ananak da, a papasesegen daran ondengel tan manaral, unong ed edad tan nayarian da.—Uliran 8:32.
9. Anto so ontulong ed sikatayo pian napaaligwas so abilidad tayon ontalineng?
9 Kakatongtongen nen Jesus iray wala la’d edad sanen inkuanton: “Manlikas kayo sirin unong na narengel yo.” (Lucas 8:18) Diad sarayan panaon, mainomay itan ya ibaga nen say gawaen. On, kaukolan a pambunekan so aktibon italineng, balet ta napaaligwas ni so abilidad ya ontalineng. Leleg yon derengelen so paliwawa ed Biblia odino sakey a parti ed miting, salien yon ibiig iray manunan punto. Talaranan so ontumbok ya ibaga na espiker. Imanoen iray punto a nayari yon usaren ed ministeryo odino niyaplika yo ed bilay yo. Repasoen ed kanonotan iray punton kokonsideraen. Mannota na antikey.
10, 11. Panon ya atulongan na arum ya atateng so ananak dan magmaliw a maong a dumerengel, tan antoran metodo so aromogan dan makatulong?
10 Sankaabigan lan naaralan ya iyugali so maong ya idengel manlapu ed inkaugaw. Sakbay ni ingen a makabasa tan makapansulat so arum ya ugugaw, sikara so sasagyaten na atateng da a “mannota” leleg na saray miting. Markaan da ed sakey a piraso na papel iray salitan lanang ya uusaren a singa say “Jehova,” “Jesus,” odino “Panarian.” Diad onian paraan, makaaral iray ananak a manimanon maong ed walan nibabaga diad plataporma.
11 Anggan saray katayatdang no maminsan so mankaukolay panamaseseg a manimanon maong. Lapud naimano na sakey ya ulo na pamilya so onse-años ya anak ton laki a manteteyengteyeng so kanonotan to leleg na kombension na Kristiano, inderew to so Biblia ed anak to tan impanbukay toy teksto no isitas iratan na saray espiker. Legan a mannonota so ama, iimanoen to met so ilalak to a manbubukay na Biblia. Kayari na satan, mas linmigsa so ugaw a laki ed pandedengel to’d programa na kombension.
Iparengel Yoy Bosis Yo
12, 13. Akin ya importanti so pibiang ed panagkanta diad kongregasyon?
12 Oniay inkanta nen Arin David: “Liberen ko so altar mo, O Jehova. Pian nipadngel ko so bosis na pisasalamat.” (Salmo 26:6, 7) Saray miting na Tastasi nen Jehova so mangitatarya ed sikatayo na ekselentin pankanawnawa pian nibalikas tayon maksil so pananisia tayo. Sakey lan paraan pian nagawaan tayo iya et diad panamegley na pibibiang ed panagkanta diad kongregasyon. Importanti iyan aspekto na panagdayew tayo, balet magmainomay itan a nibaliwala.
13 Ipapatlep na arum ya ugugaw ya agni makabasa iray liriko na saray kanta ed Panarian ya usaren ed saray miting kada simba. Makakaliket iran mangansion kaiba iray wala la’d edad. Balet, legan ya ombabaleg iray ugugaw, nayarin masuyat laran mibiang ed panangansion na saray kanta ed Panarian. Mabaing met so arum a wala la’d edad a mangansion leleg na saray miting. Ingen, say panagkanta so kabiangay panagdayew tayo, a singa say lawak na ministeryo et kabiangan met na panagdayew tayo. (Efeso 5:19) Gagawaen tayoy anggaay nayarian tayo pian idayew si Jehova diad lawak na ministeryo. Agtayo met kasi nigloria so Dios diad pangikasil tayoy kabosisan tayo—marakep man itan odino andi—diad impapuso iran kanta na panangidayew?—Hebreos 13:15.
14. Akin a makanepegan na maalwar tan masakbay a panagparaan so materyal ya aaralen tayo diad saray miting ed kongregasyon?
14 Nidayew tayo met so Dios sano mankomento itayo na makapabiskeg leleg na saray programa na miting tayo a mankaukolay pibiang na dumerengel. Kaukolan so panagparaan ed saya. Mankaukolan itan na panaon pian namorekdek iray araldalem ya aspekto na Salitay Dios. Amoria itan nen apostol Pablo, bilang magunaet ya estudyante na Kasulatan. Oniay insulat to: “O say kaaralman na kayamanan na kakabatan tan pakaamta na Dios!” (Roma 11:33) Sikayoran ulo na pamilya, importanti so panulong yo ed kada membro na pamilya yo a manusisa ed kakabatan na Dios, unong a niparungtal ed Kasulatan. Mangiganay panaon leleg na panaaral yo na Biblia bilang sankapamilyaan pian salaysayen iray mairap a punto tan tulongan yo so pamilya yon manparaan parad saray miting.
15. Antoran suhestion so makatulong ed sakey pian makapankomento ed saray miting?
15 No labay yo so mas mabetbet a makapankomento ed saray miting, akin ta no iparaan lan masakbay so labay yon komentoan? Agla nakaukolan so malabor a komento. Naapresia so mabilabilay a pambasa ed matukoy a teksto na Biblia odino daiset tan pinilin maong iran salita ya imbesngaw a manlapud puso. Ipapareserba na arum a manangipalapag ed manangikondukta so pilimeron komento ed sakey ya espisipikon parapo, ta pian agda nasaew so pankanawnawan mangibalikas na pananisia ra.
Onkabat Iray Andian na Eksperiensia
16, 17. Anto so insimbawa na sakey a matatken ed sakey a ministeryal a lingkor, tan akin ya epektibo itan?
16 Diad saray miting na Tastasi nen Jehova, naynay itayon napapanonotan a basaen ya inagew-agew so Salitay Dios. Makaparepresko so panggawa’d satan. Ontulong met itan ed sikatayo pian makapanggaway makabat iran desisyon, mangipetek ed saray makapuy ya aspekto na personalidad tayo, nalabanan iray tukso, tan napansiansia tayo so espiritual ya inkasimbang tayo no alingo itayo.—Salmo 19:7.
17 Alisto iray eksperiensiadon mamatatken ed kongregasyon a mangitarya na Makasulatan a simbawa a mitunosan ed saray pankaukolan tayo. Say gawaen tayo lambengat et ‘agwaten’ tayo itan diad ikerew na nibase’d Biblian simbawa ra. (Uliran 20:5) Sakey ya agew, inmasingger so sakey a maseseg tan malangwer nin ministeryal a lingkor ed sakey a matatken pian onkerew na saray suhestion no panon so pagmaliw a mas mausar ed kongregasyon. Say matatken, a mikabat a maong ed balolaki, so angilukas ed Biblia to a New World Translation diad 1 Timoteo 3:3, a mangibabagan saray aturon lalaki so nepeg a magmaliw a “makatunongan.” Tekep na kamaongan ya impabitar na matatken ed balolaki a nayarian ton ipatnag so inkamakatunongan diad pidedeneng to ed arum. Kasin naopendi so kalangweran ya agi ed prangkan insimbawa ed sikato? Andin balot! “Inusar na matatken so Biblia,” so inkuanto, “kanian minoriak a satan a simbawa et manlalapud si Jehova.” Malikeliket ya inyaplika na ministeryal a lingkor so simbawa kanian maabig so imbulaslas to.
18. (a) Anto so akatulong ed sakey a kalangweran a Kristiano pian naresistian to so tukso ed eskuelaan? (b) Antoran teksto ed Biblia so nanonotan yo no nipapaarap kayo ed tukso?
18 Makatulong met so Salitay Dios ed saray kalangweran pian ‘taynan iray ibibeg ya inuugaw.’ (2 Timoteo 2:22) Aresistian na sakey a malangwer nin Tasi nen Jehova a kapkapangraduar to ni labat ed haiskul so tukso legan na saray taon na impaneskuela to diad impandalepdep tan impangiyaplika ed pigaran teksto na Biblia. Naynay ton nonoten so simbawan nikurit ed Uliran 13:20: “Miulop ka ed saray makabat a totoo, et sika naani makabat.” Mitunosan ed satan, sikato so maalwar ya akikaaro lambengat ed saramay manrerespeton maong ed saray prinsipyo na Kasulatan. Oniay inkatunongan to: “Mipadpara ak met ed arum. No makapiulop ak ed makapuy iran kakaiba, labay kon paliketen iray kakaarok a mansumpal lambengat itan ed problema.” Akatulong met ed sikato so simbawa nen Pablo a nikurit ed 2 Timoteo 1:8. Oniay insulat na apostol: “Agmo sirin ibaing so pamatua na Katawan tayo, . . . noag ingen midamay ka ed saray irap lapu’d ebanghelyo.” Mitunosan ed satan a simbawa, makpel ton innabang ed saray kaklase to iray sisiaen to a nibase’d Biblia diad amin a matukoy a pankanawnawa. No sikato so napabtangan a mangipresenta na report ed arap na klase, pilien to so tema a mataktika ton nipulong so Panarian na Dios.
19. Akin ya ag-alabanan na sakey a kalangweran a laki iray desdes na sayan mundo, balet anto so amabiskeg ed sikato diad espiritual?
19 No bilang ta makasuawi itayo ed “basbas na matunong,” ontulong ed sikatayo so Salitay Dios pian nipetek iray kurang tayo. (Uliran 4:18) Naaralan iyan mismo na sakey a balolakin taga-Aprika. Sanen sikatoy binisita na sakey ed Tastasi nen Jehova, sikato so impaiyaralan na Biblia. Nanggayagaan to so naaaralan to balet ta agnambayag, sikato so akapibarkada ed saray mauges a kaulop diad eskuelaan. Sinmabi panaon, nagmaliw lan imoral so kabibilay to. “Nakokonsiensia ak a lanang, kanian intundak lay miaral,” so inamin to. Saginonor, sikato so inmatendi lamet ed saray miting. Oniay inkuan to a mangipaparungtal ed sakey a bengatla: “Naamtaan ko a say manunan rason na sayan amin et naerasan ak ed espiritual. Anggapoy personal a panagaral ko. Kanian agko alabanan iray tukso. Insan inggapok so manbasa na Say Panag-Bantayan tan Awake! Kalkalna, binmiskeg ak lamet ed espiritual tan pinasimbalok lay kabibilay ko. Saya so maong a pantasi ed saramay akaimano ed impanguman ko. Abautismoan ak, tan malikeliket ak la natan.” Anto so amabiskeg ed sayan balolaki pian natalonaan toray kakapuyan na laman? Sikato so binmiskeg lamet ed espiritual diad panamegley na regular tan personal a panagaral na Biblia.
20. Panon a nalabanan na sakey a kalangweran iray panangataki nen Satanas?
20 Sikayoran tobonbalon Kristiano so napupuntirya natan! Pian nalabanan yoray panangataki nen Satanas, nepeg a regular kayon mantagano ed espiritual. Atebek iya na salmista, a mapatnag a sakey met a balolaki. Akisalamatan to si Jehova diad impangitarya toy Salita to, ta pian ‘nalinisan na sakey a kalangweran a laki so basbas to.’—Salmo 119:9, NW.
Inerman so Pangiwanwanan na Dios, Ontumbok Itayo
21, 22. Akin ya agtayo nibagan mairap a tuloy so dalan na katuaan?
21 Impaway nen Jehova so nasyon na Israel ed Ehipto tan impaarap tora’d Insipan a Dalin. Diad punto de bista na too et ompatnag a mairap so dalan a pinili na Dios. Imbes ya idalan tora’d ompatnag a mas mainomay a dalan, a mas direktan rota diad gilig na Dayat na Mediteraneo, inwanwan nen Jehova so totoo to diad mairap a rota ed desierto. Balet diad tua, saya so maabig a ginawa na Dios parad sikara. Anggaman mas asingger, say basbas ed gilig na dayat so mangipaarap ed saray Israelita ed kawalaan na saray masesebeg a Filisteo. Diad impamili nen Jehova ed sananey a rota, inlegyas toray totoo to ed masakbay a pakapilaban ed saray Filisteo.
22 Ontan met, say basbas a pangiwawanwanan nen Jehova ed sikatayo natan so ompatnag a mairap no maminsan. Kada simba et napno so eskedyul tayo na Kristianon aktibidades, kalaktip laray miting ed kongregasyon, personal a panagaral, tan ed lawak na kimeyan. Balet say arum a basbas so ompatnag a mas mainomay. Balet no tumboken tayo lambengat so panangiwanwan na Dios, makasabi itayo ed destinasyon a pambubunekan tayon sabien. Itultuloy tayo sirin ya awaten so makanan panangibangat ed sikatayo nen Jehova tan mansiansia itayo ed “basbas na kaptekan” diad ando lan ando!—Salmo 27:11.
Kasin Nipaliwawa Yo?
• Akin a nagkalalo lan nakaukolan tayo so regular ya iyatendi ed saray Kristianon miting?
• Anto so gawaen na saray atateng pian natulongan iray ananak da a manimanon maong ed saray miting?
• Anto so lalanoren na pagmaliw a maong a dumerengel?
• Anto so makatulong ed sikatayo pian makapankomento diad saray miting?
[Tepetepet Parad Panagaral]
[Litrato ed pahina 16, 17]
Ontulong ed sikatayo so iyatendi ed saray Kristianon miting pian napansiansia’d kanonotan so agew nen Jehova
[Saray litrato ed pahina 18]
Walay nanduruman paraan pian nidayew si Jehova ed saray Kristianon miting