‘O Dios Ko, Ipaway Mo so Liwawam’
‘O Dios Ko, Ipaway Mo so Liwawam’
“Ipaway mo so liwawam tan say katuaan mo; ta sikara ibasbas da ak.”—SALMO 43:3.
1. Panon so pangipaparungtal nen Jehova ed saray gagala to?
SI Jehova so makonsideran maong ed pangipaparungtal to’d saray gagala to ed saray lingkor to. Imbes a maminpinsan to lan iparungtal so katuaan diad makalaram a sinag na liwawa, sikatayo so liliwawaan to diad progresibon paraan. Say panaakar tayo ed basbas na bilay so niyaliling ed panaakar na sakey a hiker ed andukerukey a basbas. Sikato so ombuat ed palbangon kanian medyo ambilunget ni. Diad kalkalnan ibubutay na agew, naaninag lambengat na hiker so pigaran bengatla ed kaliberliber to. Agto ni nanengneng a maong so arum a walad kaliberliber to. Balet diad ipepelnak lay agew, lalon manlinew so nababantag to. Ontan met ed espiritual a liwawa ya itatarya na Dios. Iin-inoten ton ipapatebek ed sikatayo so pigaran bengatla. Ontan met so impangitarya na Anak na Dios, si Jesu-Kristo, ed espiritual a pakaliwawaan. Konsideraen tayo no panon a niliwawaan nen Jehova so totoo to nensaman tan no panon ton gagawaen itan natan.
2. Panon so impangitarya nen Jehova ed pakaliwawaan sakbay na panaoy Kristianos?
2 Nayarin say anibukel ed koma-43 a Salmo et ananak nen Kora. Bilang Levitas, apribilihyoan iran mangibangat na Ganggan na Dios ed saray totoo. (Malaquias 2:7) Siempre, si Jehova so Baleg a Managbangat, tan sikato so paniilaloan da bilang Lapuan na amin a kakabatan. (Isaias 30:20) Oniay impikasi na salmista: “O Dios, . . . ipaway mo so liwawam tan say katuaan mo; ta sikara ibasbas da ak.” (Salmo 43:1, 3) Nen nanmatoor iray Israelita ed sikato, imbangat ed sikara nen Jehova so daladalan to. Kayari na pigaran siglo, sikara so pinalaboan nen Jehova na liwawa tan katuaan diad makatantandan tuloy a paraan. Ginawa itan na Dios sanen imbaki to’d dalin so Anak to.
3. Diad anton paraan ya asubok iray Judio ed bangat nen Jesus?
3 Bilang too a Jesu-Kristo, say Anak na Dios so “silew na mundo.” (Juan 8:12) Imbangat to ed totoo so “amayamay a bengabengatla ed panamegley na saray alimbawa [“ilustrasyon,” NW]”―saray balon bengatla. (Marcos 4:2) Oniay kuanto’d si Poncio Pilato: “Say panarian ko aliwan taga dia ed mundo.” (Juan 18:36) Balon ideya itan parad sakey a Romano tan nagkalalo la’d saray nasyonalistikon Judio, lapud ta inisip dan igeba na Mesias so Empiryo na Roma tan ipawil to so Israel ed datin karakpan na satan. Insindag nen Jesus so liwawan nanlapud si Jehova, balet ta inmunganget iray Judion manuley ed saray salita to, lapud ta ‘inaro ra so dayew na totoo a nagkalalo nen say dayew na Dios.’ (Juan 12:42, 43) Nilabay na dakel a totoo so mandependi ed tradisyon na too nen say pangawat ed espiritual a liwawa tan katuaan a manlalapud Dios.—Salmo 43:3; Mateo 13:15.
4. Panon tayon naseguro a mantultuloy nin ombulaslas ed pakatalos iray babangatan nen Jesus?
4 Balet, walaray matuan-impanpuson totoo a malikeliket ya angabrasa ed katuaan ya imbangat nen Jesus. Tuloytuloy so imbulaslas da ed pakatalos da’d saray gagala na Dios. Balet, diad panasingger lay kasampotan na mangaraldalin a bilay na Managbangat da, dakel nin siansia so kaukolan dan aralen. Inkuan nen Jesus ed sikara: “Wala ni amayamay a bengatlan ibagak ed sikayo, balet agyo ni nayarian iran talosan natan.” (Juan 16:12) On, mantultuloy nin ombulaslas iray babangatan diad pakatalos da’d katuaan na Dios.
Tuloytuloy ya Onsinag so Liwawa
5. Anton isyu so linmesa nen inmunan-siglo, tan siopa so walaay responsabilidad a manolbar ed satan?
5 Kayari na impatey tan inkioli nen Jesus, lalon sinminag so liwawan manlalapud Dios. Diad sakey a pasingawey ed si Pedro, imparungtal nen Jehova a manlapu la’d saman, nayari lan magmaliw a patumbok nen Kristo iray ag-agalsiman a Gentil. (Gawa 10:9-17) Sakey iman a panangiparungtal! Anggaman kuan, linmesa’d saginonor so sakey ya isyu: Kinaukolan kasi nen Jehova a nagalsiman niray Gentil kayari ran magmaliw a Kristiano? Satan a tepet so agnaebatan ed pasingawey, tan pirmin nansasangsangan itan ed limog na saray Kristiano. Kaukolan itan a solbaren, ta no andi et nabuyak so alay abig a pankakasakey da. Kanian, diad Jerusalem et “nantitipon so saray apostoles tan saray mamasiken pian motekteken da so sayan bengatla.”—Gawa 15:1, 2, 6.
6. Anton paraan so tinumbok na saray apostol tan mamasiken sanen kinonsidera ra so isyu nipaakar ed panaggalsim?
6 Panon a nadetermina na saramay wadman a nantitipon no anto so linaway Dios parad saray mananisian Gentil? Si Jehova so ag-angibaki na anghel pian mangimaton ed pantotongtong da, nisay inikdan to iramay wadman na sakey a pasingawey. Balet ta akagamor nin siansia iray apostol tan mamasiken na panangidirehi. Kinonsidera ra so testimonya na pigaran Judion Kristiano ya akanengneng ed impideneng na Dios ed totoo na saray nasyon, ya inkalbo toy masanton espiritu to ed saray ag-agalsiman a Gentil. Inusisa ra met so Kasulatan pian nigiya ira. Bilang resulta, walay inrekomenda nen babangatan a Santiago a base ed sakey a tekston pakaliwawaan. Diad impanmolimoli ra ed ebidensia, linminew ed sikara so linawa na Dios. Agla nakaukolan a manpagalsim iray totoo ed nasyones ta pian nagamoran day panangabobon nen Jehova. Tampol ya impaisulat na saray apostol tan mamasiken so desisyon ta pian satan so kigiyaan na saray kapara ran Kristiano.—Gawa 15:12-29; 16:4.
7. Diad anton dalan a binmulaslas iray inmunan-siglon Kristiano?
7 Aliwan singa saray relihyoson lider a Judio, a mandedependi ed saray tradisyon na saray inmunan atateng da, nanliket so dakel a Judion Kristiano sanen naawat da iyan makatantandan balon impakatalos ed gagala na Dios nipaakar ed saray totoo na nasyones, anggaman say pangawat ed satan et mankaukolan na panguman ed walan panmoria’d saray Gentil diad inkalapagan. Benendisionan nen Jehova so mapaabeban awawey da, tan “saray iglesia apaletan ira ed pananisia, et dinmakel so bilang da [ya] inagew-agew.”—Gawa 15:31; 16:5.
8. (a) Panon tayon naseguro a dakel nin liwawa so nailaloan kayari panampot na inmunan-siglo? (b) Antoran matukoy a tepet so konsideraen tayo?
8 Nantultuloy a sinminag so espiritual a liwawa diad intiron inmunan siglo. Balet ag-imparungtal nen Jehova so kada aspekto na saray gagala to ed akadkauna iran Kristiano. Oniay imbaga nen apostol Pablo ed saray kapananisiaan to nen inmunan-siglo: “Diad kaplesan et nanenengneng tayo so burarog ya uhas diad panamegley na espihon metal.” (1 Corinto 13:12, NW) Agtanton malinew so nanengneng ed ontan a klase na espiho. Kanian, diad pilimero et limitado ni so pakatalos ed espiritual a liwawa. Kayari impatey na saray apostol, kinmuyep ya agano so liwawa, balet diad agano niran panaon et dinmaak so Makasulatan a pikakabat. (Daniel 12:4) Panon a liliwawaan nen Jehova iray totoo to natan? Tan panon itayon onkiwas sano palaknaben to so pakatalos tayo ed Kasulatan?
Progresibon Onsisinag so Liwawa
9. Anton nikaduma tan epektibon metodo ed panagaral na Biblia so inusar na akadkauna iran Estudyante na Biblia?
9 Diad modernon panaon et say inmuna-unan peteg ya inkidyam na liwawa so ginmapo ed banda’d unor laran taon na koma-19 a siglo sanen masimoon ya inaral na sakey a grupo na Kristianon lalaki tan bibii so Kasulatan. Akapawala ira na praktikal a metodo ed panagaral na Biblia. Walay mamalesa na tepet; insan usisaen na grupo so amin a misiglaotan a teksto ed Kasulatan. No ompatnag a mankontraan so duaran bersikulo na Biblia, panggunaetan na sarayan masimoon a Kristiano a pantunosen iratan a bersikulo. Aliwan singa saray lider na saray relihyon natan, determinado iray Estudyante na Biblia (bilang tawag ed saray Tastasi nen Jehova nensaman) a paigiya ed Masanton Kasulatan, ya aliwan unong ed tradisyon odino bangat a ginawa lambengat na too. Kayari ran nakonsidera so amin a walan Makasulatan ya ebidensia, isulat da iray konklusyon da. Diad ontan a paraan et linminew so pakatalos da ed dakel a manuna iran doktrina na Biblia.
10. Antoran makagunggunan katulongan ed panagaral na Biblia so insulat nen Charles Taze Russell?
10 Matalonggaring si Charles Taze Russell ed limog na saray Estudyante na Biblia. Insulat to so serye na anemiran makagunggunan katulongan ed panagaral na Biblia ya apauloan na Studies in the Scriptures. Ginetma nen Brother Russell ya isulat so komapiton tomo, a mangipaliwawa ed saray libro na Biblia ya Ezequiel tan Apocalipsis. Oniay inkuanto: “Kapiganman a naromog ko so tombok, isulat ko so Komapiton Tomo.” Balet ta inyarum to: “No iter na Katawan so tombok ed siopaman, sarag ton isulat itan.”
11. Anto so pisiglaotan na panaon tan pakatalos tayo ed saray gagala na Dios?
11 Satan a balikas nen C. T. Russell so mangiyilustra ed sakey ya importantin bengatla nipaakar ed pakasarag tayon mantalos ed pigaran teksto na Biblia—dugan panaon. Amta nen Brother Russell ya agto nayarian a paskaren so liwawa ya onsinag ed libroy Apocalipsis, no panon ya agnapabutay na sakey a mapagpagan hiker so agew sakbay na aktual ya ibutay na satan.
Niparungtal—Balet Diad Dugan Panaon na Dios
12. (a) Kapigan so sankaabigan a pakatalos ed propesiya na Biblia? (b) Anton alimbawa so mangipanengneng a say pakasarag tayon makatalos ed propesiya na Biblia so akadependi ed panag-orasan na Dios? (Nengnengen so paimano’d leksab.)
12 No panon a say impakatalos la na saray apostol ed dakel a propesiya nipaakar ed Mesias et kayari lambengat na impatey tan inkioli nen Jesus, natatalosan met na saray Kristiano natan so propesiya na Biblia diad sankaabigan a detalyi kayari lay inkasumpal na satan. (Lucas 24:15, 27; Gawa 1:15-21; 4:26, 27) Say Apocalipsis et sakey a mapropetikon libro, kanian nailaloan tayo a satan so lalo tayon natalosan a malinew legan a nasusumpal iray ebenton dedeskribien na satan. Alimbawa, aliwan sustoy impakatalos nen C.T. Russell ed kabaliksan na simbolikon ambalbalangan atap ya ayep ya asalambit ed Apocalipsis 17:9-11, lapud ta anggapo niray organisasyon ya irerepresenta na satan ya ayep, salanti, say Liga na Nasyones tan say Nasyones Unidas, angga ed kayari na impatey to la. *
13. Anto no maminsan so nagawa sano walay liwawa ed sakey a tema na Biblia?
13 Sanen naamtaan na akadkauna iran Kristiano a nayarin magmaliw lan kapananisiaan da iray ag-agalsiman a Gentiles, satan a pananguman so amawala na balon isyu no kasin kaukolan a nagalsiman iray totoo na nasyones. Lapud satan, inusisa lamet na saray apostol tan mamasiken so intiron isyu a nipaakar ed panaggalsim. Ontan met so gagawaen natan. Say masnag a sinag na liwawa nipaakar ed sakey a tema na Biblia so mangitonton no maminsan ed saray alanaan a lingkor na Dios, “say matoor tan makabat ya aripen,” a mangusisa lamet ed saray misiglaotan a tema, unong ya iyilustra na onggendan iran agano nin alimbawa.—Mateo 24:45.
14-16. Lapud nauman a panmoria tayo nipaakar ed espiritual a templo, panon a naapektaan so pakatalos tayo ed Ezequiel kapitulo 40 anggad 48?
14 Nen 1971, say impangipaliwawa ed propesiya nen Ezequiel so nipalapag ed libron “The Nations Shall Know That I Am Jehovah”—How? Diad sakey a kapitulo na satan a libro, antikey a siningbat so pasingawey ed si Ezequiel nipaakar ed templo. (Ezequiel, kapitulo 40-48) Diad saman a panaon, say nipapabitar et no panon a nasumpal ed balon mundo so pasingawey ed si Ezequiel nipaakar ed templo.—2 Pedro 3:13.
15 Balet, say duaran artikulo a nipalapag diad The Watchtower na Disyembre 1, 1972, so angapekta’d pakatalos tayo ed samay pasingawey ed si Ezequiel. Siningbat na saratan so baleg ya espiritual a templo a deneskribe nen apostol Pablo diad Hebreos kapitulo 10. Insalaysay na The Watchtower a say Masanton silir tan say akindalem a saban na espiritual a templo so misiglaotan ed kipapasen na saray alanaan legan a wadia nira’d dalin. Sanen nirepaso so Ezequiel kapitulo 40 anggad 48 kayari na pigaran taon, atebek ed saman a no onkukurang la natan so espiritual a templo, onkukurang met la natan so templo ya anengneng nen Ezequiel ed pasingawey. Panon ya ontan?
16 Diad pasingawey ed si Ezequiel, anengneng iray saserdote a mankukurang dia ed saray saban na templo legan dan seserbian iray aliwan makasaserdoten tribu. Mabitar a say irerepresenta na sarayan saserdote et say “maarin inkasaserdote,” saray alanaan a lingkor nen Jehova. (1 Pedro 2:9, NW) Balet, ag-ira manserbi ed saban na templo ed dalin diad intiron Sanlibon Taon ya Uley nen Kristo. (Apocalipsis 20:4) Diad amin lawari na satan a panaon, no aliwan intiro, saray alanaan so manserbi ed Dios diad Sankasantosan na espiritual a templo, diad “tawen a dili.” (Hebreos 9:24) Lapud napatnagan a mankukurang iray saserdote ed saray saban na templon anengneng nen Ezequiel, satan a pasingawey so nasusumpal la natan, legan a wadia ni’d dalin so arum ya alanaan. Mitunosan ed satan, nipabitar ed Marso 1, 1999, a paway na sayan magasin so nauman a panmoria ed sayan tema. Kanian, sinminag so espiritual a liwawa ed propesiya nen Ezequiel anggad kasampotan na koma-20 siglo.
Mabulos Yon Iyadapta so Panmoria Yo
17. Antoran pananguman so ginawa yo la ed personal a panmoria yo nanlapula’d impakagamor yoy pikakabat ed katuaan, tan panon kayon agunggunaan ed saratan?
17 Kaukolan a say siopaman a malabay a makagamor na pikakabat ed katuaan et mabulbulos ton ‘ipadakep so amin a kanonotan [to] pian matulok itan ed Kristo.’ (2 Corinto 10:5, NW) Aliwa itan a lawas mainomay, nagkalalo la no nigalet a maong iray panmoria. Alimbawa, sakbay yon naaralan so katuaan nipaakar ed Dios, nayarin panliliketan yon sankapamilyaan so panselebray pigaran relihyoson piesta. Balet diad pakakaaral yo ed Biblia, amoria yon saratan a selebrasyon et talagan nanlapud pagano. Diad pilimero, nayarin masuyat kayon mangiyaplika ed nanaaralan yo. Balet diad kaunoran, mas ontalonggaring so panangaro ed Dios nen say liknaan nipaakar ed saratan a relihyoso iran agamil, tan intunda yo lay mibiang ed saratan a selebrasyon a kainglit na Dios. Agta benendisionan nen Jehova so desisyon yo?—Ikompara so Hebreos 11:25.
18. Panon so nepeg ya ikiwas tayo sano onlinew so pakatalos tayo ed katuaan na Biblia?
18 Lawas itayon nagunggunaan diad panggawa na saray bengatla unong ed dalan na Dios. (Isaias 48:17, 18) Kanian sano onlinew so pakatalos tayo ed sakey a teksto na Biblia, komon ta panliketan tayo so onaadilantan katuaan! On, say tuloytuloy a kaliliwawaan tayo so mamekder a wala itayo ed dugan basbas. Satan so “basbas na matunong,” a “singa liwawa na kabuasan, ya onsinag ya onsinag angga ed nagnap ya agew.” (Uliran 4:18) Tua, diad kaplesan et nanenengneng tayo so pigaran aspekto na gagala na Dios “diad burarog ya uhas.” Balet sano onsabi so inggeter na Dios a panaon, nanengneng tayo so katuaan diad amin a karakpan to, basta malet ya akalira iray sali tayo ed “basbas.” Kaleganan ni, komon ta panliketan tayo iray katuaan ya impalinew nen Jehova, ya aalagaren tayo so pakaliwawaan ed saramay agni malinew a natalosan.
19. Anto so sakey a paraan a nipanengneng tayo so panamabli ed katuaan?
19 Panon tayon nipanengneng so panamabli tayo ed liwawa diad praktikal a paraan? Say sakey a paraan et diad regular a pambasa ed Salitay Dios—inagew-agew no posibli. Wala kasi so tutumboken yon regular a programa na panagbasa ed Biblia? Kinlongan itayo met na saray magasin a Panag-Bantayan tan Awake! tekep na daakan a makagunggunan espiritual a tagano a napanggayagaan. Nonoten met iray libro, brosyur, tan arum niran palapagan a nipaparaan pian pakagunggunaan tayo. Tan komusta met iray makapaseseg a report nipaakar ed saray kimey diad panangipulong ed Panarian a nipapalapag diad Yearbook of Jehovah’s Witnesses?
20. Anto so walan pisiglaotan na liwawa tan katuaan a manlalapud si Jehova tan say iyaatendi tayo ed saray Kristianon miting?
20 On, diad makapakelaw a paraan et inebatan nen Jehova so pikakasi a nibalikas ed Salmo 43:3. Diad sampot na satan a bersikulo, oniay nabasa tayo: ‘Yakar mo so [liwawam tan katuaan mo] ed siak diad masanto a pukdol mo, tan dia ed saray abung-abung mo.’ Kasin pitamitam yoy pandayew ed si Jehova, a kaiba so nilaksalaksa ni? Say espiritual a panangibangat a niprepresenta ed saray miting tayo so sakey ya importantin dalan na pangitatarya nen Jehova ed pakaliwawaan natan. Anto so gawaen tayo pian napaaralem tayo so apresasyon tayo ed saray Kristianon miting? Imbitaan mi kayo a masimoon tayon konsideraen iyan tema diad ontumbok ya artikulo.
[Paimano ed leksab]
^ par. 12 Kayari na impatey nen C.T. Russell, say publikasyon a nigana bilang say komapiton tomo na Studies in the Scriptures so imparaan pian salien ya ipaliwawa iray libro na Ezequiel tan Apocalipsis. Say tomo so nibase ed kabiangan na saray komento nen Russell ed saratan a libroy Biblia. Balet agni asabi so panaon na pangiparungtal ed kabaliksan na saratan a propesiya, tan diad kaslakan et aliwa nin malinew so paliwawa a lugan na satan a tomo na Studies in the Scriptures. Diad inlabas na saray taon, lalon linminew so pakatebek na saray Kristiano ed kabaliksan na saratan a mapropetikon libro, lapud agkanepegan a panangasi nen Jehova tan ed saray nagagawa ed mundo.
Kasin Naebatan Yo?
• Akin a progresibo so pangipaparungtal nen Jehova ed saray gagala to?
• Panon so impanolbar na saray apostol tan mamasiken diad Jerusalem ed isyu nipaakar ed panaggalsim?
• Anton metodo na panagaral na Biblia so inyaplika na akadkauna iran Estudyante na Biblia, tan akin a nikadkaduma itan?
• Iyilustra no panon a nipaparungtal so espiritual a liwawa diad dugan panaon na Dios.
[Tepetepet Parad Panagaral]
[Litrato ed pahina 12]
Amta nen Charles Taze Russell a say liwawa so onsinag ed libro na Apocalipsis diad dugan panaon na Dios