Sikami Iray Klasen Walaan na Pananisia

Pananginabang ed Kristianon Ilalo diad Senegal

SAY sira so manunan nakakaukolan a tagano nanlapu la’d nensaman a panaon. Diad loob na nilibo lan taon, mansisigay iray totoo diad saray dayat, kulos, tan ilog. Arum ed saray apostol nen Jesu-Kristo so sumisigay diad Dayat na Galilea. Balet, imparungtal nen Jesus ed sikara so sananey a nengneng na panagsigay. Say espiritual a panagsigay a mangungguna ed saray sumisigay ontan met ed sira.

Nipaakar ed saya, onia so inkuan nen Jesus ed sumisigay a si Pedro: “Manlapud natan mansigay ka na saray totoo.” (Lucas 5:10) Sayan nengneng na panagsigay so nagagawa la natan ed masulok lan 230 a daldalin, pati diad Senegal. (Mateo 24:14) Saray modernon-agew a ‘sumisigay na totoo’ ditan so makpel a manginanabang ed arum nipaakar ed Kristianon ilalo ra.​—Mateo 4:19.

Say Senegal so naromog ed sankasampotan a sagur na Aprika. Onnatnat itan manlapud desierto iran lugar ya onketeg ed Sahara diad amianen anggad malinaew a katakelan ed rehyon na Casamance diad abalaten. Say Senegal et sakey a bansan nadadalan na ampetang iran dagem ed desierto ontan met ed ambetel tan makarepresko iran siplog na dagem na Atlantiko. Manaayam dia so masulok a siameran milyon a totoo. Balitado iray manaayam ed Senegal lapud inkamaparawes da. Maslak et agmankuan a Kristianos. Dakel iray pomapastol, bangta say arum so managkomponi na saray baka, kamelyo, tan kanding. Walaray dumaralos met, a mantatanem na saray mani, kapes, tan pagey. On, walaray sumisigay, a mangisasakbit na saray iket a napnoy sira a nanlalapud Atlantic Ocean tan pigaran angkabaleg iran ilog ya onnatnat ed intiron bansa. Baleg so nitutulong na panaglakoy sira ed ekonomiya na Senegal. Diad tua, say bantog a putahe ed bansa et ceebu jën, mananam a tagano a walay niluto, sira, tan pisipising.

“Sumisigay na Totoo”

Walay 863 a maseseg iran managpulong na Panariay Dios diad Senegal. Ginmapo so espiritual a panagsigay dia nen kagapoy dekada na 1950. Alukasan nen 1965 so sangan opisina na Watch Tower Society diad Dakar, say kabisera. Sinmasabi iray misionaryon “sumisigay” nanlapud dakel ya ararawin bansa. Ginmapoy “panagsigay,” tan nantultuloy ya inmabanti so pananginabang ed Kristianon ilalo diad Senegal. Diad saginonor, nipaalagey iray balon pasilidad na sanga diad Almadies, diad ketegan na Dakar, tan nidedika iratan ed si Jehova nen Hunyo 1999. Agaylan panaon na panggayaga!

Say Angat ed Pangawat na Katuaan

Maparanay a nasasabi iray totoo ed nanduruman tuloy ya abenegan, tan walaray paborablin kinmiwas la ed mensahe na ilalo a naromog ed Salita na Dios. Anggaman dakel so andiay pikakabat ed Biblia, sikaray maliket a makaamta a magano lan nasumpal iray sipan nen Jehova a Dios ya imbaga to ed saray matoor a propeta nensaman.

Mabetbet a mankaukolan na tepel so italindeg a malet parad Kristiano iran prinsipyo, nagkalalo la no nalalanor iray tradisyon tan kustombre nipaakar ed pamilya. Alimbawa, say poligamya so malaknab ya aagamilen ed Senegal. Konsideraen pay kaso na sakey a lakin duaray asawa to sanen ginmapon nanaral na Biblia. Kasin sikatoy walaan na tepel a mangawat ed Kristianon katuaan tan ontulok ed kakaukolanen na Kasulatan a sakey labat so nepeg ya akulaw to? (1 Timoteo 3:2) Tan kasin say pansiansiaen ton iyamong et samay asawa to nen kaksilan to ni, say biin inmunan inasawa to? Ontan so ginawa to, tan natan et sikatoy manlilingkor bilang maseseg a matatken ed sakey ed sankabalegan iran kongregasyon ed lugar na Dakar. Inawat met na inmunan akulaw to so katuaan pati amin a 12 ilalak to, 10 ed inmunan akulaw to tan 2 ed datin komaduan akulaw to.

Say sananey nin makasbel ed pangawat ed Kristianon ilalo et say agpakabasa tan agpakasulat. Kasin kabaliksan na saya a say toon agmakabasa tan agmakasulat et agto naawat tan niyaplika so katuaan? Andin balot. Konsideraen so alimbawa nen Marie, sakey a makulin ina na waloran ugugaw nin ananak. Tampol ton atalosan so kaimportantian na paningbat ed teksto na Biblia kaiba iray ananak to kada agew sakbay iran onsipot a maneskuela tan sakbay  ya onlan mantrabaho. Balet panon ton nagawaan iya, anta sikatoy agmakabasa? Masaksakbay ed kada kabuasan, aalaen toy bokletan Usisaen so Kasulatan ya Inagew-agew tan manalagey ed mabuer a karsada ed arap na abung to. Legan ya ondadalan iray totoo, tepetan tora no kasin makabasa ira. Sano makaromog na sakey a makabasa, iyawat toy bokleta tan masimoon ton inkuan: “Ag’ak makabasa, kanian ipangasim pan ibasa’d siak iyan seksion natan?” Talinengen ton maong so pangibasa. Insan to pisalamatan so angibasa tan onloob a tampol ed abung to pian mabilabilay dan singbaten so teksto kaibay ananak to antis iran onsipot a maneskuela!

Onkikiwas Iray Totoo ed Amin a Nengneng

Diad Senegal, naromog iray totoo ya akayurong diad saray karsada a manlalako na sira, pisipising, odino prutas diad tindaan odino akasaral ed silong na atagtagey a baobab tree ya oniilop na ataya, paitan a birdin tsa. Lapud determinadon manginabang ed maong a balita ed amin a naabet da, duaran agagin lalaki so akitongtong ed agmakayarin laki a mipapayabol diad karsada. Kayari dan imbano, inkuan da: “Dakel a totoo so mangiiter ed sika na kuarta balet ta ag-ira ontunda pian mitongtong ed sika. Inasinggeran mi ka ta walay sankaimportantian ya itongtong mi ed sika a nalalanor so arapen mo.” Abigla so mipapayabol. “Wala pay labay min itepet ed sika,” intuloy na saray agagi. “Diad padesir mo, akin a masyado lay kairapan ed mundo?” “Linawa na Dios itan,” so inyebat na mipapayabol.

Diad ontan et akikatunongan iray agagi ed sikato manlapud Kasulatan tan impaliwawa ray Apocalipsis 21:4. Asagyat a maong so mipapayabol ed sayan mensahe nipaakar ed ilalo tan ed bengatlan walay interesado ni ed sikato a mangisingbat nipaakar ed Biblia. Sikatoy akalua. Imbes ya onkerew na kuarta, ipapaala to ed agagi so amin a sinsilyo ya akakarga ed lata to! Sikatoy mapilit a maong kanian saya so angalay imano na kada ondalan. Tan nairapan iray agagi ya angombinse ed sikato ya alaen to lay kuarta. Inmabobon met lanlamang balet ta impilit to’d sikaran bisitaen da lamet.

Say baleg ya unibersidad diad Dakar so mangiyaarum met ed naala ed espiritual ya iket. Sakey ya estudyante diman a mangaalay doktor a manngaran na Jean-Louis so nanaral na Biblia. Tampol ton inawat so katuaan tan idedika toy bilay to ed si Jehova, tan abautismoan. Say pilalek to et say panlingkor ed Dios bilang sigpot-panaon a payunir, balet ta nanggayagaan to met so pangaala toy doktor. Lapud kontrata to ed binalegan ton bansa, sikatoy obligadon mangisumpal ed kurso to. Ingen, sikato so ginmapon nan-auxiliary payunir legan met na panaaral to. Ag-abayag kayari ton naawat so diploma to bilang kualipikadon doktor, sikatoy naimbitaan a manserbi diad sakey a baleg ya ayaman a Bethel diad Aprika bilang pinagka-doktor na pamilya. Sakey nin kalangweran a laki ya akatongtong diad Unibersidad na Dakar so manlilingkor met natan ed pamilya na Bethel diad binalegan ton bansa.

Talagan makatumang so espiritual a panagsigay diad Senegal. Saray literaturay Biblia na Tastasi nen Jehova so naaapresian tuloy tan natan et niimprinta la ed lokal a lenguahen Wolof. Say pakarengel ed maong a balita diad dilin pansasalita ra so akapasesegan na dakel a matuan-impanpuson totoo pian onkiwas tekep na pisasalamat. Lapud panamendision nen Jehova, seguradon dakel nin simbolikon sira so naala, legan ya itutultuloy na saray maseseg a “sumisigay na totoo” ed Senegal so pananginabang day Kristianon ilalo ra a sitotoor tan sitetepel.

[Mapa/Litrato ed pahina 31]

(Parad aktual a format, nengnengen so publikasyon)

SENEGAL

[Litrato]

Pananginabang ed Kristianon ilalo diad Senegal

[Credit Line]

Mountain High Maps® Copyright © 1997 Digital Wisdom, Inc.