Agbalot Manalo Iray Onlalaban ed Dios!

“Mibakal ira naani ed sika; balet agda ka naani taloen.”​—JEREMIAS 1:19.

1. Anto so niganggan ed si Jeremias, tan panon kabayag so kimey to?

 INGGANGGAN nen Jehova so malangwer nin Jeremias pian magmaliw a propeta ed saray nasyon. (Jeremias 1:5) Agawa itan nen manuuley ni so maong ya Arin Josias na Juda. Nantultuloy so mapropetikon ministeryo nen Jeremias legan na magulon panaon sakbay a kinobkob na Babilonia so Jerusalem tan say inkibantak na totooy Dios.​—Jeremias 1:1-3.

2. Panon so impamabiskeg nen Jehova ed si Jeremias, tan say pilaban ed satan a propeta so mankabaliksan na anto?

² Seguradon nansengegan na isusumpa iray mensahen inyabawag nen Jeremias nipaakar ed panangukom. Kanian sikatoy pinabiskeg nen Jehova ed walan nagawa’d arapen. (Jeremias 1:8-10) Singa bilang, apabiskeg so espiritu na propeta ed saray salitan: “Mibakal ira naani ed sika; balet agda ka naani taloen; ta siak wala ak ed sika, kuan nen Jehova, pian ilaban ta ka.” (Jeremias 1:19) Say pilaban ed si Jeremias et mankabaliksay pilaban ed Dios. Natan, si Jehova so walaan na singa propetan grupo na saray lingkor a mipadpara so kimey da ed si Jeremias. Singa sikato, makpel dan iyaabawag so mapropetikon salita na Dios. Tan sayan mensahe so mangaapekta ed amin a totoo tan nasyones, pankaabigan man itan odino pankaugsan, dependi ed ikiwas da unong ed satan. Singa ed panaon nen Jeremias, walaray onlalaban ed Dios a susumpaen daray lingkor to tan saray kimey ya impabtang na Dios ed sikara.

 Naaataki Iray Lingkor nen Jehova

3. Akin a naaataki iray lingkor nen Jehova?

³ Naaataki iray totoo nen Jehova nanlapula’d kagapo na koma-20 siglo. Diad dakel a daldalin et nanggunaetan na saray totoon walaay mauges a getma ya amperen, on, pian patundaen so kiproklama na maong a balita na Panarian na Dios. Sikara so susugsogan na manunan Kabusol tayo, say Diablo, a ‘liberliber a singa omoang a leon, a mananap na buagen to.’ (1 Pedro 5:8) Kayari impanampot na ‘saray agew na saray Gentil’ nen 1914, introno na Dios so Anak to bilang balon Ari ed dalin, ya ingganggan ton: “Manuley ka ed pegley na saray kakabusol mo.” (Lucas 21:24; Salmo 110:2) Diad pangaagamil to’d pakayari to, pinagit nen Kristo si Satanas manlapud tawen tan imbasileng to ed kaliberliber na dalin. Lapud amta na Diablo ya antiktikey lay panaon to, impangget to so sanok to’d saray alanaan a Kristiano tan ed saray kakaiba ra. (Apocalipsis 12:9, 17) Antoray resulta ed aminpigan inyataki na sarayan onlalaban ed Dios?

4. Antoran subsubok so inkidungetan na totoo nen Jehova legan na panaoy Guerra Mundial I, balet antoy agawa nen 1919 tan 1922?

⁴ Nidunget iray alanaan a lingkor nen Jehova ed amayamay a subsubok ed pananisia legan na Guerra Mundial I. Sikaray inelek-elekan tan pinagpauges, inusil-usilan na saray pangkat, tan pinepekpek. Unong ya impasakbay la nen Jesus, sikaray  nagmaliw a ‘kagula na amin a nasyones.’ (Mateo 24:9) Nen manasibengbeng so guerra, inusar na saray kabusol na Panarian na Dios so taktikan inusar a sumpad si Jesu-Kristo. Papalsaan da so totoo nen Jehova bilang sumpad gobierno, tan pinuntirya ra so mismon manunaan ed nanengneng ya organisasyon na Dios. Nen Mayo 1918, nipaakseb iray federal warrant pian erelen so presidenti na Watch Tower Society, si J. F. Rutherford, tan say pitora ed saray maapit a kakaiba to. Sarayan waloran lalaki so ambelat a senentensiaan na pakapriso tan nikulong ira ed federal penitentiary diad Atlanta, Georgia, E.U.A. Sikara so nibulos kayari na siam bulan. Nen Mayo 1919, denisisyonan na circuit court of appeals ya ag-asimbang so inkabista na sarayan nidemanda, kanian binalintuag da so desisyon. Imbangon lamet so kaso parad balon bista, balet inekal la na gobierno so demanda kanian sigpot lan naabsuelto si Brother Rutherford tan saray kakaiba to. Intuloy daray kimey da, tan saray kombension ya agawa diad Cedar Point, Ohio, nen 1919 tan nen 1922 so amabiskeg lamet ed panagpulong a kimey da nipaakar ed Panarian.

5. Panon so inkasesga na saray Tastasi nen Jehova diad Nazi Alemanya?

⁵ Linmesa iray diktador ya uley nen dekaday 1930, tan nanmumuyong so Alemanya, Italya, tan Hapon pian natugyop so Axis powers. Kagapo na satan a dekada, agawa lay inaayep a panamasegsegang ed totoo na Dios, a kabkabat ni so agawa diad Nazi Alemanya. Nipaakseb iray pananebel. Niririkisa iray kaabungan, tan ineerel iray manaayam ed saratan. Nilibo so impisok ed saray panangipangawan a kampo lapud agda italirak so pananisia ra. Say pilalaban ed Dios tan ed say totoo to so ginetma pian palaniten iray Tastasi nen Jehova ed satan a nasasakopay diktador ya uley. * Sanen linma ed saray korte iray Tastasi nen Jehova diad Alemanya pian idepensa iray kanepegan da, imparaan na Reich’s Ministry of Justice so andukey ya opinyon da pian naseguro so agda panalo. Oniay inkuan na satan: “Agnepeg a patalo iray korte lapu lambengat ed ompasen a legal iran pormalidad; balet nepeg dan panggunaetan tan anapen iray paraan anggaman walaray pormal iran babeng, pian gawaen iray atagey iran obligasyon da.” Kabaliksan na satan ya agniwala so hustisya. Impaawet na saray Nazi a saray kimey na Tastasi nen Jehova et mapeligro, odino sumpa, tan ‘anigensigen ed inkasangal na National Socialist.’

6. Antoran sagpot so ginawa pian napatunda so kimey tayo legan na Guerra Mundial II tan kayari na satan?

⁶ Legan na Guerra Mundial II, nipaakseb iray pananebel tan panameget ed totoo na Dios diad Australia, Canada, tan arum nin daldalin a kabkabat a kabiangan na British Commonwealth​—diad Aprika, Asia, tan saray isla ed Caribbean tan ed Pasipiko. Diad Estados Unidos, saray maimpluensian kakabusol tan totoon akaawat na lingon balita so ‘nanggulo diad masilib ya impangusar da ed ley.’ (Salmo 94:20, NW) Inlaban ed korte iray isyun nipaakar ed panagsaludoy bandira tan saray ordinansa na komunidad a sebel so panagkabkaabungan, tan niletneg so mabiskeg a suporta ed kawayangan na panagdayew lapud paborabli iran desisyon na korte diad Estados Unidos. Diad tulong nen Jehova, agbalot tinmalona iray sagpot na kabusol. Sanen nansampot lay bakal ed Europa, nakal iray pananebel. Nibulos iray nilibon Tastasi ya akakulong ed saray panangipangawan a kampo, balet agni asumpal so laban. Kayarin tuloy na Guerra Mundial II, ginmapo so Cold War. Saray totoo nen Jehova so lalon dinetdetan na saray bansan walad mamabukig a Europa. Kinmiwas so autoridad pian sebelan tan patundaen so panagpulong iran kimey tayo, a pinugeran da so pamapawala ed literatura na Biblia, tan pinugeran da iray mapublikon asamblea. Amayamay so nipriso odino nipisok ed saray labor camp.

Mantultuloy ed Panagpulong a Kimey!

7. Anto so naeksperiensia na saray Tastasi nen Jehova diad Poland, Russia, tan arum nin daldalin nen apalabas laran taon?

⁷ Diad inlabas na saray dekada, alukasan so kimey a panangipulong ed Panarian. Anggaman wala ni’d pakauley na Komunista so Poland, naabuloyan diman iray sakey-agew a kombension nen 1982. Insan agawa met diman so internasyonal iran kombension nen 1985. Tinmumbok so angkakabaleg iran internasyonal a kombension nen 1989, ya inatendian na nilibo a nanlalapud Russia tan Ukraine. Diad saman met a taon, say  Hungary tan Poland so angipagamor na legal a pakabidbiran ed saray Tastasi nen Jehova. Diad otonyo na 1989, nagba so Berlin Wall. Kayari na pigaran bulan, naikdan itayo na legal a pakabidbiran diad Bukig ya Alemanya, tan kayarin tuloy na satan, agaway internasyonal a kombension ed Berlin. Tan kagapo na unor a dekada na koma-20 siglo, inggapo iray sagpot pian makapitalosan a mismo ed saray agagi diad Russia. Inasinggeran so pigara ed saray opisyal diad Moscow, tan nen 1991 et legal lan nirehistro iray Tastasi nen Jehova. Nanlapula’d saman, pirmi so imbulaslas na kimey diad Russia, tan ontan met ed saray republika a datin kabiangan na Sobyet Union.

8. Anto so agawa ed totoo nen Jehova diad loob na 45 a taon kayari na Guerra Mundial II?

⁸ Anggaman tinmunda so panamasegsegang ed pigaran lugar, linmoor balet ed arum a lugar. Diad loob na 45 a taon kayari na komaduan guerra mundial, dakel a daldalin so ag-angipagamor na legal a pakabidbiran ed saray Tastasi nen Jehova. Niarum ni, asebelan itayo odino saray kimey tayo diad 23 a daldalin ed Aprika, 9 ed Asia, 8 ed Europa, 3 ed Latin America, tan 4 ed pigaran pulpulon nasyon.

9. Anto so asagmak na saray lingkor nen Jehova diad Malawi?

⁹ Ginmapon asagmak na saray Tastasi nen Jehova ed Malawi so maruksan panamasegsegang nen 1967. Lapud neutral a talindeg da bilang tuan Kristianos, saray agagi tayo ed satan a dalin so agmanasaliw na saray kard parad partido politika. (Juan 17:16) Kayari miting na Malawi Congress Party nen 1972, naulit so impamairap. Saray agagi so pinapataynan ed kaabungan da tan agda ra inawat ed trabaho. Nilibo so tinmaynan ed bansa pian ag-ira napatey. Balet kasin tinmalona iray onlalaban ed Dios tan ed totoo to? Andin balot! Nen kayari nauman iray sirkumstansia, walay pantok na 43,767 a manangipalapag na Panarian a nanreport diad Malawi nen 1999, tan masulok a 120,000 so inmatendi ed saray distriton kombension diman. Nipaalagey met so sakey a balon sangan opisina diad kabiseran syudad.

Nananap Ira na Pangidaleman

10. Singa ed kaso nen Daniel, anto so ginawa na saray kaplesan ya onsusumpa ed totoo na Dios ?

¹⁰ Agnitepel na saray apostata, klero, tan arum nin totoo so mensahe tayo a manlalapud Salitay Dios. Lapud dedesdesen ira na pigaran relihyoson kabiangan na Kakristianoan, saray onsusumpa so nananap na paraan ya ikuan dan legal a paraan pian nikatunongan da so pilalaban da ed sikatayo. Antoran taktika so nauusar no maminsan? Bueno, anto kasi so ginawa na saray nankokomplot pian naataki si Daniel? Oniay nabasa tayo ed Daniel 6:4, 5: “Saman la saray pangulo tan saray manunaan nananap ira na pangidaleman a sumpa ed Daniel nipaakar ed panarian; balet ag-ira akaromog na sengeg na pangidaleman odino pamakasalanan, lapu ed sikato so mananumpal nensaman, anggapo so anggan anto a lingo odino pankulangan ya aromog ed sikato. Saman la inkuan na saraya a lalaki, Ag-itayo makaromog na bengatla a kibana a sumpa ed Daniel, nilikud a naromog tayo a sumpa ed sikato so nipaakar ed tunong na Dios to.” Natan, saray onsusumpa so manaanap met na pangidaleman. Ibebelyaw da so nipaakar ed “mapeligro iran kulto” tan ontan so panatawag da ed saray Tastasi nen Jehova. Aatakien da so panagdayew tayo tan say itutumbok tayo ed maridios iran prinsipyo diad panamegley na panagpauges, panagparengel, tan katilaan.

11. Antoran palson akusasyon so ibabaga na pigaran onsusumpa ed saray Tastasi nen Jehova?

¹¹ Diad pigaran daldalin, agbibidbiren na nanduruman ulopan na relihyon tan politika ya aagamilen tayo so ‘nengneng na panagdayew a malinis tan andi-tilol ed arap na Dios.’ (Santiago 1:27) Anggaman nagagawa la so kimey tayo bilang Kristiano diad 234 a daldalin, ibabaga na saray onsusumpa ya aliwa itayon “kabat a relihyon.” Sakbay na internasyonal a kombension nen 1998, inaon na sakey a peryodiko ed Athens so imbaga na sakey a klero na Greek Orthodox ya “aliwan ‘kabat a relihyon’ so [Tastasi nen Jehova],” anggaman miduma so desisyon na European Court of Human Rights. Kayari na pigaran agew, inaon ed sananey a peryodiko ed satan met a syudad so inkuan na sakey a pinagkasangiyan na iglesia: “Agnayarin magmaliw a ‘sakey a Kristianon kongregasyon’ so [Tastasi nen Jehova], lapud ta anggapoy piparaan da ed Kristianon pananisia unong ed kualidad nen Jesu-Kristo.” Talagan pankelawan iya, ta anggapo lay arum a  relihyon a lalon mangidadanet ed pangalig ed si Jesus nen say gagawaen na Tastasi nen Jehova!

12. Diad espiritual a pibabakal tayo, anto so nepeg tayon gawaen?

¹² Idedepensa tan ileletneg tayo so maong a balita diad legal a paraan. (Filipos 1:7) Ontan met, agtayo ikompromiso odino pakapuyen so mapekder a panguunor tayo ed saray estandarte na Dios nipaakar ed inkatunong. (Tito 2:10, 12) Singa si Jeremias, ‘babalkesan tayo so tapi tayo tan salitaen tayo so amin a bengatlan ingganggan na Dios ed sikatayo,’ ya ag-itayo patatalagnaw ed saray onlalaban ed Dios. (Jeremias 1:17, 18) Malinlinew ya indatak na Masanton Salita nen Jehova so dugan kundang a gawaen tayo. Agtayon balot komon onsasaral ed lupitay a “taklay a laman” odino manilalo ed “sirum na Ehipto,” salanti, sayan mundo. (2 Awaran 32:8; Isaias 30:3; 31:1-3) Diad espiritual a pibabakal tayo, nepeg a mantultuloy itayon manmatalek ed si Jehova diad intiron puso tayo, paiwanwan tayoray kurang tayo ed sikato, tan ag-onsasaral ed dilin pakatalos tayo. (Uliran 3:5-7) No anggapoy pananuporta tan proteksion nen Jehova ed sikatayo, magmaliw ya “andi kakanaan” so amin a kimey tayo.​—Salmo 127:1.

Apasegsegang Balet ta Agmikompromiso

13. Akin a nibagan agtinmalona so satanikon impangataki ed si Jesus?

¹³ Say sankamanunaan ya ehemplo diad agmikompromison debosyon ed si Jehova et si Jesu-Kristo, a pinalsaan dan sikatoy onsusumpa’d gobierno tan gigirogiroen toy akaletneg lan uksoyan. Kayarin nausisa so kaso nen Jesus, sikatoy labay ya ibulos nen Pilato. Balet ta say ulop, a susugsogan na papanguloy relihyon, so kinmelyaw ya ipasak si Jesus, anggano anggapoy kasalanan to. Bilang kasandi nen Jesus, impaibulos day Barabbas​—sakey a lakin nipriso lapud isusumpa’d gobierno tan ed panagpatey! Tinangguyor lamet nen Pilato iray agmakatunongan ya onsusumpa, balet ta inmabuloy lanlamang ed ibabando na totoo. (Lucas 23:2, 5, 14, 18-25) Anggaman inatey si Jesus diad kiew, agbalot tinmalona so makapasinagem a satanikon impangataki ed andiay kasalanan ya Anak na Dios, ta  si Jesus so pinaoli tan intandoro nen Jehova diad nikawanan a lima To. Tan nen agew na Pentecostes 33 K.P., nikalbo so masanton espiritu diad panamegley nen niglorian Jesus, ya inkiletnegan lay Kristianon kongregasyon​—say ‘balon palsa.’​—2 Corinto 5:17; Gawa 2:1-4.

14. Anto so nansumpalan sanen sinumpa na saray Judion grupo na relihyon iray patumbok nen Jesus?

¹⁴ Kayarin tuloy na satan, pinagyaw na grupo na relihyon iray apostol, balet ta saratan a patumbok nen Kristo so agtinmundan nansalita nipaakar ed saray bengatlan anengneng tan nadngel da. Oniay impikasi na saray babangatan nen Jesus: “Katawan, nengneng mo so saray gagaem da; tan yabuloy mo ed saray aripen mo a salitaen da a makmakpel so salitam.” (Gawa 4:29) Inebatan nen Jehova so kerew da diad impangipagamor to’d sikara na masanton espiritu tan pinabiskeg toran mantultuloy ed makpel a pangiyaabawag da. Agnambayag et papatundaen da lamet iray apostol a manpulong, balet ta oniay ebat di Pedro tan arum ya apostol: “Nakaukolan ya unoren mi so Dios, nen saray totoo.” (Gawa 5:29) Saray panamagyaw, impangerel, tan impanlalatiko so agmakasbel ed pamapalaknab da’d kimey da nipaakar ed Panarian.

15. Siopa si Gamaliel, tan anto so insimbawa to ed saray relihyoson sumusumpa ed saray patumbok nen Jesus?

¹⁵ Panoy inkiwas na saray relihyoson manuley? ‘Sinmakit so linawa ra, et siningbat da a pateyen [daray apostol].’ Anggaman ontan, wadman so sakey a managbangat na Ganggan a manngaray Gamaliel, sakey a Fariseo, tan dederlengen na amin a totoo. Sanen pinapaway ya agano iray apostol manlapud loob na Sanedrin, sinimbawa to iramay relihyoson sumusumpa: “Lalaki a taga-Israel, manlikas kayo ed gawaen yo ed sarayan totoo. . . . Et natan kuanko ed sikayo: Agyo pibiangan so sarayan totoo, et paulyan yo ra lambengat; ta no sayan kanonotan odino sayan gawa nanlapu ed saray totoo, nabuyak naani: Balet no nanlapu ed Dios agyo ra nayarian a bagbagen; ompan la ingen no ompatnag kayo a misepakan ed Dios.”​—Gawa 5:33-39.

Ag-ontalona so Antokaman ya Ayura Sumpad Sikatayo

16. Diad mismon panangibaga yo, panon yon ibalikas so panamaseguro nen Jehova ed totoo to?

¹⁶ Maabig so insimbawa nen Gamaliel, tan apresiaen tayo itan sano mansalita so arum ed biang tayo. Bibidbiren tayo met a say kawayangan ed panagdayew so nitandoro la diad saray korte panamegley na saray huis ya anggapoy lalabien. Siempre, say itutumbok tayo ed Salita na Dios so agmakapaliket ed klero na Kakristianoan tan arum nin papangulo na relihyon na Babilonia a Baleg, say sankamundoan ya empiryo na palson relihyon. (Apocalipsis 18:1-3) Anggaman sikara, pati saramay naimpluensiaan da, so milalaban ed sikatayo, napaseguroan itayo ed saya: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak, kuan nen Jehova.”​—Isaias 54:17.

17. Anggaman milalaban ed sikatayo iray onsusumpa, akin a manpakpel itayo?

¹⁷ Saray kakabusol tayo so milalaban ed sikatayo anggano anggapoy sengegan, balet ta ag-itayo ontalaw. (Salmo 109:1-3) Agtayon balot patatalagnaw ed saramay ombubusol ed tarok tayon mensahe nipaakar ed Biblia pian ikompromiso so pananisia tayo. Anggaman ilaloan tayo ya ompalalo ni so espiritual a pilalaban tayo, amta tayo so pansumpalan. Singa si Jeremias, naeksperiensia tayo so kasumpalan na mapropetiko iran salitan: “Mibakal ira naani ed sika; balet agda ka naani taloen; ta siak wala ak ed sika, kuan nen Jehova, pian ilaban ta ka.” (Jeremias 1:19) On, amta tayo ya agbalot ontalona iray milalaban ed Dios!

[Paimano ed leksab]

Panon Yon Ebatan?

• Akin a naaataki iray lingkor nen Jehova?

• Diad antoran paraan so pilalaban na saray onsusumpa ed totoo nen Jehova?

• Akin a makapanseguro itayo ya agmanalo iray milalaban ed Dios?

[Tepetepet Parad Panagaral]

[Litrato ed pahina 17]

Apaseguroan si Jeremias a sikato so antabayan nen Jehova

[Litrato ed pahina 18]

Saray akaliktar ed panangipangawan a kampo

[Litrato ed pahina 18]

Karamsakan na pangkat sumpad Tastasi nen Jehova

[Litrato ed pahina 18]

Si J. F. Rutherford tan saray kaiba to

[Litrato ed pahina 21]

Diad kipapasen nen Jesus, agmanalo iray milalaban ed Dios