Report na Saray Manangiyabawag na Panarian

“Dakerakel so Amta Yo Nipaakar ed Biblia”

SANEN makpel a nansalita so 12 años a Jesus ed saray lider na relihyon diad Jerusalem, “amin ya akadngel ed sikato [so] nankelkelaw ira ed pakatalos to tan ed saray eba’to.” (Lucas 2:47) Mipadpara met natan, dakel ya ugugaw niran lingkor nen Jehova so makakapanpakpel a mangitongtong ed saray maestro o maestra ra tan ed kaeskuelaan da nipaakar ed Dios tan ed Biblia, tan mabetbet da met a naeeksperiensia so makapaliket iran resulta.

Si Tiffany, a mantaon na 14, so walad loob na klase sanen asingbat so propesiya na Biblia nipaakar ed 70 simba na taon, a nabasa ed Daniel 9:24:27. Antikey a kinomentoan na maestro to iray bersikulo tan sinampotan to lan tampol so subject.

Diad pilimero et talawan si Tiffany a mangitagey na lima to. “Balet lapud pigaran rason,” inkuanto, “talagan naaburido ak ta agnipaliwawan maong iray bersikulo. Kabekta et akatagey lay limak.” Nikelawan so maestro lapud wala manayay sakey a makapankomento nipaakar siningbat to, ta mairap itan a talosan na saray estudyante.

Lapud naikdan na pankanawnawan isalaysay so propesiya, inmalagey si Tiffany tan biglaan a nansalita. Legan ton isusumpal, talagan marendeen so klase. Mannerbiyos na daiset si Tiffany. Insan inmungol so klase lapud abayag ya impantipak.

“Makapadinayew itan, Tiffany, talagan makapadinayew,” so paulit-ulit ya inkuan na maestro. Inaksobi na maestro ya amta ton dakel ni so nikomento ed saraman a bersikulo, balet si Tiffany so sankaunaan ya akapangisalaysay a malinew ed sikato. Kasumpal na klase, tinepetan toy Tiffany no panon ton naamtaan so dakerakel nipaakar ed Biblia.

“Say rason et sakey ak ed saray Tastasi nen Jehova,” so inyebat to. “Aminpigapigan impaliwawa na atateng ko ed siak itan a propesiya anggad atalosan ko.”

Mankelaw met iray kaklase to ed pikakabat to’d Biblia. Onia so inkuan na sakey ya estudyante ed si Tiffany: “Natan amtak la no akin a mankakabkaabungan kayoran Tastasi nen Jehova; say rason et dakerakel so amta yo nipaakar ed Biblia.” Arum so angisipan a sikatoy agda lan balot lureyen nipaakar ed saray sisiaen to.

Sanen imbaga nen Tiffany ed atateng to so eksperiensia to, insuheri ran opresian toy maestro to na libron Pikakabat a Mangitonton ed Andi-Anggaan a Bilay. Sanen ginawa to iman tan impanengneng to ed maestro to so kabiangan a mangipapaliwawa ed propesiya nen Daniel, tampol ya inawat na maestro so libro tan akisalamatan toy Tiffany.

Talagan no makpel ya itongtong na saray Kristianon tobonbalo so imbangat na atateng da ed sikara nipaakar ed Dios tan ed Biblia, nidadayew tan nigagalang day Jehova tan pakabendisionan da met itan.​—Mateo 21:15, 16.