No Antoy Kaukolan Mon Naamtaan Nipaakar ed Panananem

MAIRAP a deskribien so panananem ed modernon panaon. Lapud nanduruman tuloy iraman so mangaagamil na satan. Anggapo so bibidbiren dan manunan autoridad odino doktrina odino masanton libro pian makapankakasakey ira ed sisiaen. Nandurumaan met ira ed tradisyon, organisasyon, ritual, tan opinyon nipaakar ed no anton dirios so galangen. Onia so inkuan na sakey a managsulat: “Say okulton mundo so mangiiter ed indibidual na ‘libren tindaan’ na saray ideya.” Inkuan ni na sakey: “Maslak a Neo-Pagan so agmantutunosan ed amin lawarin bengatla.”

Parad dakel, aliwan problema so pansusumlangan. Onia so inkuan na sakey a giyan-libro parad saramay manpilalek a magmaliw a manananem: “No naaangat ka ed ompatnag a mansumlangan ya impormasyon, usisaen itan ya impormasyon tan mandesisyon no dinan so tumboken. Tumbok moy labay mo. Diad arum a salita, bulos labat a mampili ed saray nipalapag a ritual tan uusaren iran libro nipaakar ed ritual pian desidien no dinan so liknaen a duga.”

Parad saraman so mamibidbir ed nengneng na katuaan, problema iratan a pansusumlangan. Tua so katuaan, a satan so peteg. Aliwan lapud ta liknaen na sakey a too odino iilaloan to odino sisiaen toray bengatla et tua la iratan. Alimbawa, walay panaon ya anisia iray doktor a nayarian dan tambalen so pneumonia diad pamaldua ed mabilay a manok tan igaton iratan ed pagew na pasienti. Seguradon dakel a pasienti so masimoon ya anisian sayan panagtambal et mamaabig ed sikara. Balet, saray sisiaen tan iilaloan da so agmitunosan ed katuaan​—satan a paraan et agmakatambal ed pneumonia. Ag-iimbentoen na totoo so katuaan; panggugunaetan dan talosan itan.

Ibabaga na Biblia a lugan toy katuaan nipaakar ed espiritual iran pamaakaran. Sanen wadiad dalin si Jesu-Kristo, onia so inkuanto ed si Ama to diad pikakasi: “Say salitam sikato so katuaan.” (Juan 17:17) Insulat nen apostol Pablo: “Amin a sulat [so] impuyan na Dios.” (2 Timoteo 3:16) Ag-onabobon so dakel a mangaagamil na panananem. Imbes, maniilalo ira ed panangipuyan tan panangigiya na saray tongtong labat, kadaanan iran relihyon, tan anggan say gawagawa labat na siensia. Balet, agta makatunongan ya anggan panon et konsideraen so ibabaga na Biblia? Likud ni, satan so inkalapagan a bibidbiren bilang masanton libro. Sakey met itan ed sankadaanan iran libro ed relihyon a wala ni anggad natan. Say Biblia so nisulat ed loob na masulok a 1,600 a taon, ingen ta mantutunosan itan ed saray bangat to. Ikompara tayo pa iray bangat na Biblia ed pigaran  maslak a sisiaen ya ibabalikas natan na saraman so mangiyaalibansa na panananem.

Sioparay Manaayam ed Espiritun Ayaman?

Say manunan tepet ed panaanap na espiritual a pakatalos et saya, Sioparay manaayam ed espiritun ayaman? Anggaman ontutumbok so maslak a modernon manananem ed sisiaen ya ibabase’d palsa, tan manisia ra’d dakel a dirios, arum so mandadayew ed baleg ya inan-diosa, ya ipapasen dan walaan na nankatlon betang bilang birhen, ina, tan akulaw, a mangirerepresenta ed manuna iran kipapasen na bilay. Say nobyo to et sakey a dios a nansaklor. Arum a manananem so mandadayew ed sakey a dios tan diosa. Inkuan na sakey a managsulat: “Say Diosa tan Dios so mangirerepresenta ed puersan bii tan laki na palsa. Balang sakey so [walaan] na nikaduma iran walna a no pantekepen et manresulta ed mauksoy ya inkapalsay bilay.” Onia met so insulat na sakey nin autor: “Sakey ed saray sankaimportantian a pili ed Panananem et say pilien moran dios (Dirios/Diosas) a pitalosan mo. . . . Say Panananem so mangiiter ed sika na kawayangan a mamili insan igalang so dilin paraan mo nipaakar ed Dibino.”

Anggapoy susuportaan na Biblia ed sarayan ideya. Inggana nen Jesu-Kristo so intiron ministeryo to diad impangibangat ed arum nipaakar ed si Jehova, “a saksakey a tuan Dios.” (Juan 17:3) Ibabaga na Biblia: “Ta baleg si Jehova, balbaleg a narayew: sikato met so takotan a manuna nen say amin a dirios. Ta amin iray dirios na saray totoo sikara so talintao.”​—1 Awaran 16:25, 26.

Anto met so nipaakar ed Diablo? Deneskribe na Webster’s Ninth New Collegiate Dictionary so panananem bilang “pitatalosan ed diablo.” Mairap so pakaromog na sakey a manananem natan ya onabobon ed sayan deskripsion, ta dakel so agmangawat ed kiwawala ni ingen nen Satanas a Diablo. Sakey ya ugaw nin bii, ya adeskribe ed The Irish Times bilang sakey ya “atagey-rangkon manananem tan lider na sakey ed sankabalegan iran ulop na manananem ed Irlandya,” so angikatunongan na onia: “Say panisia ed Diablo et kabaliksan toy panangawat ed Inkakristiano . . . [Say Diablo] so agmakapanayam ed uniberso ya anggapo so Dios.”

Pepekderan na Biblia so kiwawala na Diablo tan sikato so pangitetetelan ed dakerakel a kairapan tan pirmin kaguloan ed dalin. (Apocalipsis 12:12) Aglabat imbangat nen Jesus a wala so Diablo noagta impanengneng ton nayarin agnaliklikas a nagawaan so panlabayan na Diablo. Alimbawa, saray mantunongtunongan a panguloy relihyon nen inmunan siglo so angipilit ya ananak ira na Dios tan panisiaan dan gagawaen day linawa na Dios diad sakey a paraan. Si Jesus, a makatebek no antoy walad kapusoan da et duma so amta to. Diretsaan ya inkuanto ed sikara: “Sikayo kien kayo na ama yo a diablo, et saray kalikaliktan nen ama yo sikato so labay yo a gawaen.” (Juan 8:44) Sakey ni, ibabaga na libroy Apocalipsis a say Diablo so “mangibabalang ed intiron panaayaman a dalin.”​—Apocalipsis 12:9, NW.

Kasin Makagungguna so Arum a Mahiko?

Siempre, say mahiko so lawas lan misiglaotan ed okulto. * Dakel a totoo nensaman tan ed modernon panaon so manisian say mahikon aagamilen na saray manananem et gagawaen pian sakitan so arum. Ipapasen a walaan na pakapanyari iray manananem pian pirmin mamairap tan  mamatey ni ingen diad panamegley na mahiko. Unong ed tradisyon, itetetel ed saray manananem so ngalngalin agmanundan makapaermen a nasasagmakan, pati beblay, patey, tan kapeperdi na tanem.

Saratan ya akusasyon so pirmin ibuburi na saray manananem natan. Anggaman bibidbiren dan walay sagpaminsan a mauges a manananem a mamapasakit, maslak so manmamantini a say mahiko ra so uusaren pian mangungguna, aliwan mamasakit. Ibabangat na saray Wiccan a saray epekto na mahiko et mangiter na mamitlon gungguna ed sakey a mangaagamil na satan tan mangibagan saya so baleg a sumbra ed saray panangisamba. Saray alimbawa ed sayan tatawagen a makagunggunan mahiko et laktipen toray orasyon pian nasalimbengan so inkasika, pian gogolan so abung mo manlapud saray pakaamlingan ya atilak na saray datin nanayam, pian onggusto ed sika so sakey a too, pian ontulong ed pakatambal tan bunigas, pian mangamper ed kaandi na trabahom, tan pakawalaan na kuarta. Lapud saratan a malaknab iran pakapanyari nipaakar ed panananem, agla pankelawan a nagmaliw lan popular itan.

Balet, anggapoy ibabaga na Biblia a pandumaan na maong a mahiko tan mauges a mahiko. Unong ed Ganggan a niiter ed si Moises, impabitar na Dios so talindeg to. Inkuanto: “Agkayo mangaagamil na mahiko.” (Levitico 19:26, NW) Nabasa tayo met: “Anggapo naani naromog ed sika . . . sakey a managsuma, odino sakey a managsalamangka, odino manag-anito. Odino sakey a manangipelag, odino miaanito ed saray mankukulam.”​—Deuteronomio 18:10, 11.

Akin ya imbaga na Dios itan? Aliwan lapud getma ton sibletan itayo. Inter nen Jehova irayan ganggan ed totoo to lapud inaro to ra tan agto labay a naaripen ira ed takot tan panag-anito. Imbes, iimbitaan toray lingkor to ya onasingger ed sikato parad saray bengatlan nakaukolan da. Sikatoy Manangiter na “amin a maong a palangkap tan amin ya ayadyarin palangkap.” (Santiago 1:17) Pinaseguroan nen apostol Juan iray kaparan mananisia: “[Antokaman a] bengatlan kerewen tayo nagamoran tayo ed [Dios], ta sumpalen tayo so saray ganggan to, tan gawaen tayo so bengatla a makapaliket ed imaton to.”​—1 Juan 3:22.

Anto met so Nipaakar ed Mauges Iran Espiritu?

Dakel a manananem so onabobon ed Biblia ed sayan punto: Talagan walaray mauges ya espiritu. Diad sakey a komposisyon et onia so impasakbay na sakey a manangiyalibansa na panananem: “Walaray Anyani: Wala iratan, diad agnanengneng a mundo a singa met ed mundo tayo, a dakel iray mabilay a pinalsa. . . . Saray terminon ‘Demonyeto’, ‘Mauges ya Espiritu’ tan ‘Demonyo’ et dugaruga. Mabibiskeg iratan a maong. . . . Say sankasiliban a klase . . . so makaloob (no walay makatulong  a mangilukas ed pawayan da) ed mundo tayo. . . . Sikaray makaloob ed laman mo . . . , a mangontrol ni ingen ed sika. On, saya so eksakton mipadpara ed daan iran istorya nipaakar ed iseselep na Demonyo.”

Diad panaon na Biblia, apairap iray totoon aselepan na demonyo ed nanduruman dalan. Arum ed saramay naapektaan so agmakapansalita, arum so abulag, arum so singa atapis, tan arum so nagmaliw a mas mabiskeg nen say too. (Mateo 9:32; 12:22; 17:15, 18; Marcos 5:2-5; Lucas 8:29; 9:42; 11:14; Gawa 19:16) No maminsan et pirmi so panirap no dakel a demonyo so sinmelep ed sakey a too. (Lucas 8:2, 30) Sirin, maseguron wala so maabig a rason no akin a pinasakbayan nen Jehova so totoo ya onarawi ed panananem tan arum ya okulton agagamil.

Relihyon a Nibase ed Katuaan

Dakel a totoo so natatangguyor ed panananem natan lapud ompatnag ya agmakapasakit, papaboran, relihyon ya ibabase’d palsa. Diad arum a komunidad et aawaten la itan. Ag-itan tatakotan. Imbes, ibabaliwala la itan. Say panananem so bibidbiren la diad lugar a no iner et say inkamaabuloy na relihyon so mangitotonton ed dakel a mangawat ed anggan say nikadkaduma.

On, say mundo na saray relihyon so nagmaliw lan tindaan a ditan et saray totoo so bulos a mamili na sakey ya ontukoy ed saray pankaukolan da, anggano manaliw lambengat so sakey na sanparis a sapatos. Diad pidumaan, duara labat la so imbaga nen Jesus a pampilian. Inkuanto: “Onloob kayo ed mainget a pinto; ta maawang so pinto, tan malapar so dalan, a mamaarap ed kaderalan, et dakel so saray onloob diman. Ta mainget so pinto, tan makisir so dalan, a mamaarap ed bilay, et daiset so saray makaromog ed sikato.” (Mateo 7:13, 14) Sipor a bulos itayon mamili no dinan so dalanen. Balet lapud walad kapeligroan so magnayon a pankaabigan tayo, importantin maong so pampili. Pian nagamoran so espiritual a pakaliwawaan, nepeg tayon tumboken so dalan na katuaan​—say dalan a naromog labat ed Salitay Dios, say Biblia.

[Paimano ed leksab]

[Litrato ed pahina 5]

Dakel natan so mangipapasen ed panananem bilang agmakapasakit a relihyon ya ibabase’d palsa

[Litrato ed pahina 6]

Lawas a misiglaotan so mahiko ed okulto

[Litrato ed pahina 6]

Kasin agnaliklikas a nagagawaan na saray mangaagamil na panananem so panlabayan na Diablo?

[Saray litrato ed pahina 7]

Ipaparungtal na Biblia so dalan na katuaan