Panon so Ikukurang na Espirituy Dios Natan?

SIKATOY nianak lan piley tan sikatoy inagew-agew ya akayurong ed abay na wangalan na templo a natatawag na Marakep ta pian mipayabol ed saramay onloob ed templo. Balet agawan sayan lupoy a mipapayabol so aregaloan na mabalor ni nen say pigaran angkekelag a sinsilyo, ta sikatoy atambal!​—Gawa 3:2-8.

Anggaman sikara di apostol Pedro tan Juan so ‘angipaalagey ed sikato’ tan ‘binmiskeg iray sali to,’ agda inala so galang ed impakatambal to. Akin ya andi? Oniay insalaysay a mismo nen Pedro: “Lalakin taga Israel, akin et nikelawan kayo ed sayan too? Odino, akin et ilimgis yo so mata yo ed sikami, a singa lapu ed pakayari odino kasantosan mi, pinaakar mi so sayan too?” On, namparan amta di Pedro tan Juan ya agawa itan, aliwan lapud biskeg da, noagta diad panamegley na masanton espiritu na Dios.​—Gawa 3:7-16; 4:29-31.

Diad saman a panaon, agawa iratan a “pakayari” ta pian nipanengneng a susuportaan na Dios so balo nin Kristianon kongregasyon. (Hebreos 2:4) Balet, inkuan nen apostol Pablo a no agawa lay aka-gagalaan na saratan et “mangangga ira.” * (1 Corinto 13:8) Kanian, anggapo lay naimatonan tayo natan ed loob na tuan Kristianon kongregasyon ya inyuksoy na Dios iran panagtambal, mapropetikon mensahe, odino panagpaekal na dedemonyo.

Balet labay to kasin ibaga ya agla onkukurang natan so masanton espiritu na Dios? Peteg ya andi! Konsideraen tayo pa niray arum a dalan no panon a say espiritu na Dios et aktibo ed inmunan siglo tan ontan met ni ed agew tayo.

Say “Espiritu na Katuaan”

Sakey a paraan ya onkukurang so masanton espiritu na Dios et diad kipakabat, kipaliwawa, tan kiparungtal na saray katuaan. Sakbay a tuloy na ipatey to, imbaga nen Jesus ed saray babangatan to: “Wala ni amayamay a bengatlan ibagak ed sikayo, balet agyo ni nayarian iran talosan natan. Manwarin ontan sano onsabi espiritu na katuaan, itonton to kayo ed amin a katuaan.”​—Juan 16:12, 13.

Nikalbo so “espiritu na katuaan” nen Pentecostes 33 K.P. sanen say nandaragup a 120 a babangatan ed tagey a silir ed Jerusalem so abautismoan na masanton espiritu. (Gawa 2:1-4) Sakey si apostol Pedro ed saramay wadman ed saman a tinaon a piesta. Lapud napno na masanton espiritu, si Pedro so ‘inmalagey’ ya angipalinew, odino angipaliwawa na pigaran katuaan nipaakar ed si Jesus. Alimbawa, sikato so angipanonot no panon a “si Jesus a taga Nazaret” et “nitandoro ed nikawanan na Dios.” (Gawa 2:14, 22, 33) Lapud espiritu na Dios, akapanpakpel met si Pedro a mangiyabawag ed saray Judion dumerengel to: “Amtaen a peteg sirin, na lapag ya abung na Israel, a sayan Jesus ya impasak yo ed krus, ginawa na Dios a sikato so Katawan tan Kristo.” (Gawa 2:36) Lapud sayan apuyanan na espiritun mensahe nen Pedro et ngalngali talonlibon totoo so “angawat na salita to” tan sikaray nampabautismo. Diad onian dalan et say masanton espiritu na Dios so angigiya ed sikara ed katuaan.​—Gawa 2:37-41.

Kinmana met so masanton espiritu na Dios bilang managbangat tan manangipanonot. Ta inkuan nen Jesus: “Balet say managligliwa, salanti say espiritu santo, a sikato so ibaki dia na Ama ed ngaran ko, ibanga’to ed sikayo so amin a bengabengatla, tan ipanonot to ed sikayo so amin ya imbagak ed sikayo.”​—Juan 14:26.

Panon a kinmiwas so masanton espiritu bilang managbangat? Say espiritu na Dios so angilukas ed kanonotan na saray babangatan nipaakar ed bengabengatlan nadngel da la ed si Jesus balet ta agda ni atalosan a sigpot. Alimbawa, amta  na saray apostol a legay bista to, imbaga nen Jesus ed Romanon gobernador na Judea, a si Poncio Pilato: “Say panarian ko aliwan taga dia ed mundo.” Balet ta sanen tinmokotok si Jesus ed tawen kayari na 40 agew, siansian agni sustoy panmoria na saray apostol, ya ipasen dan satan a Panarian et niletneg dian mismo ed dalin. (Juan 18:36; Gawa 1:6) Mapatnag, ya agni atalosan a maong na apostoles so kabaliksan na saray salita nen Jesus anggad inkikalbo na masanton espiritu na Dios nen Pentecostes 33 K.P.

Say espiritu na Dios so kinmana met bilang manangipanonot ed saray nambabangil ya imbangat nen Jesus. Singa bilbilang, saray propesiya ed impatey tan kikioli nen Kristo, so walaan la na balon kabaliksan ed sikara lapud tulong na masanton espiritu. (Mateo 16:21; Juan 12:16) Lapud impakanonot ed imbabangat nen Jesus et akapanpakpel iray apostol a mangidepensa ed talindeg da diad imaton na arari, mahistrado, tan saray relihyoson pangulo.​—Marcos 13:9-11; Gawa 4:5-20.

Kaaruman ni, say masanton espiritu na Dios so angiwanwan ed inmuuna iran Kristianon onla’d mabungan teritorya ed ministeryo. (Gawa 16:6-10) Say espiritu met na Dios so amakiwas ed inmuuna iran Kristiano a mangisulat met ed Salitay Dios, say Biblia, parad kagunggunaan na amin a katooan. (2 Timoteo 3:16) Sirin, natalosan a talagan aktibo so masanton espiritu diad nambabangil a dalan nen inmunan siglo. Aglambengat nipagamor itan nisesengeg labat ed saray milagro.

 Masanton Espiritu Diad Agew Tayo

Say masanton espiritu so onkukurang met ed biang na saray tuan Kristiano ed panaon tayo. Napatnagan iya ed melag a grupo na saray estudyante na Biblia ed Allegheny, Pennsylvania, E.U.A., diad kaunoran a kabiangan na koma-19 siglo. Sarayan masimoon ya estudyante na Biblia et nampirawatan dan naamtaan so “katuaan.”​—Juan 8:32; 16:13.

Sakey a membro ed sayan grupo et si Charles Taze Russell, so angikuan nipaakar ed panaanap to na Makasulatan a katuaan: “Impikasik . . . a nasarag kon iwaklit ed pusok tan kanonotan ko so antokaman a makasbel tan nitonton ak komon na espiritu ed suston pakatalos.” Benendisionan na Dios iyan masimoon a pikakasi.

Legan na magunaet ya impansusukimat nen Russell tan saray kaiba to ed Kasulatan, walaray bengatlan alinewan. “Nalmoan mi a diad apalabas iran siglo,” insalaysay nen Russell, “impankakapiga na nanduruma iran sekta tan partido iray bangat na Biblia, a nilalaokan da na panagpalbeng na too tan lingo.” Nansumpal iya ed tatawagen ya “agsuston inkiparungtal na katuaan.” On, saray Makasulatan a katuaan so atapilan la na koleksion na paganon bangabangat a linmoob ed Kakristianoan diad inlabas na saray siglo. Balet determinado si Russell ya amtaen tan iyabawag so katuaan.

Diad panamegley na saray pahina na Zion’s Watch Tower and Herald of Christ’s Presence, si Russell tan saray kaiba to et sipapakpel dan kinondena iray palson relihyoson doktrina ya agsuston angirepresenta ed Dios. Atebek dan mikontraan ed popular a relihyoson opinyon a say kamarerwa et ompatey manaya, a diad patey et onla itayo ed lubok, tan si Jehova so alenleneg a tuan Dios ya aliwan kabiangan na sakey a Trinidad.

Balet singa isipen yo, say ontan iran panangiwalwal ed tilan bangabangat so sinanokan na klero na Kakristianoan. Lapud gunaet dan namantini iray maimpluensian posisyon da, dakel a Katoliko tan Protestantin klerigo so angorganisa na kampanya diad gagalan deralan si Russell. Balet ta sikato tan saray kaiba to so agsinmuko. Sikaray matalek ya impaigiya ed espiritu na Dios. “Say panamaseguro na Katawan ed sikami,” inkuan nen Russell, “et salanti . . . say masanton espiritu na Ama, a nibaki nisesengeg tan diad dugan panaon nen Jesus a Mananondon, Manamegley tan Uloen mi, so magmaliw a manangibangat mi.” Tan ontan so agawa! Sarayan masimoon ya estudyante na Biblia so nantultuloy ya angasol na dalisay a danum na katuaan manlapud Biblia tan inyabawag da iratan ed sankamundoan.​—Apocalipsis 22:17.

Say modernon-agew ya organisasyon na Tastasi nen Jehova so siansian paitotonton ed panangigiya na masanton espiritu na Dios ed masulok lan sakey a siglo natan. Legan a tuloytuloy a palilinewen na espiritu nen Jehova so espiritual a pakanengneng da, mabulos iray Tastasi nen Jehova ya onadapta ed apasimbalon pakatalos.​—Uliran 4:18.

“Sikayo so Tasik”

Impakabat ni nen Jesus so sakey nin panangipatnag na masanton espiritu na Dios sanen imbaga to ed saray babangatan to: “Mangawat kayo na pakayari, no onsabi ed sikayo so espiritu santo: et  sikayo so tasik . . . angga ed kasampotan na dalin.” (Gawa 1:8) Say sipan nen Jesus ya ikdan toray babangatan to na “pakayari” tan “masanton espiritu” ta pian nasumpal day impabtang na Dios a kimey so siansian onaaplika ni anggad natan.

Bilang sakey a grupo, saray Tastasi nen Jehova so bantog lapud panagpulong a kimey da. (Nengnengen so kahon.) On, nipapasabi na Tastasi nen Jehova so mensahe na katuaan ed masulok lan 230 daldalin tan saray grupo na isla. Diad silong na amin a posiblin naisip a kipapasen, pati say kiiyan ed kaatapan na bilay da lapud saray lugar a natatabek na bakal, sipapakpel dan inkelyaw iray bosis da bilang pananuporta ed Panarian na Dios. Say seseg da ed Kristianon ministeryo so mangiter na mabiskeg a paneknek a say masanton espiritu so onkukurang natan. Tan mapatnag a bebendisionan nen Jehova a Dios iray sagpot da.

Alimbawa, nen katantaon et masulok a sakey bilyon ya oras so nausar ed inkipulong na maong a balita na Panarian na Dios. Antoy resulta ey? Walay 323,439 a totoo ya angisimbolo na dedikasyon da diad impanpabautismo ra ed danum. Niarum ni, walay 4,433,884 a sinimban panangiyaral na Biblia a nikondukta ed saray balo nin interesado. Nibaga lan amin, a walay 24,607,741 a libro, 631,162,309 a magasin, tan 63,495,728 a brosyur tan bokleta so nipalima. Agaylan mabiskeg a paneknek ya onkikiwas so espiritu na Dios!

Say Espiritu na Dios tan Sika

Sano say sakey ya indibidual et onkiwas a paborabli ed maong a balita, iyuksoy toy bilay to unong ed saray estandarte na Dios, tan ipatnag toy pananisia to ed probisyon a dondon, say dalan so nilukas parad malinis a talindeg ed Dios. Diad sikara so angikuanan nen apostol Pablo: “Say Dios . . . so mangiter na espiritu santo to ed sikayo.”​—1 Tesalonica 4:7, 8; 1 Corinto 6:9-11.

Say pakawalaan na espiritu na Dios et mansumpal ed dakel a bendision. Antora kasin nengneng na bendision? Say sakey et ibabaga na apuyanan a Salita na Dios: “Say bunga na espiritu sikato so aro, liket, deen, kasungdoan, kauyamoan, kaabigan, sisia, tayadno, [tan] dangka.” (Galacia 5:22, 23) Kanian say masanton espiritu na Dios so mabiskeg a puersa ed panmaongan, ya ontulong ed sakey pian nipanengneng so maridios a kualidades.

Niarum ni, no basaen mo so Biblia tan iyaplikam so naaralan mo, natulongan ka na espiritu na Dios ya ombulaslas ed kakabatan, pikakabat, aralem a pakatalos, panagdesisyon, tan panag-isip. Naawat nen Arin Solomon so “kakabatan tan pakatalos a mapalalo ed karakel tan malawig a puso” lapud ta inanap toy pamaliket ed Dios imbes a saray totoo. (1 Arari 4:29) Lapud inikdan nen Jehova si Solomon na masanton espiritu, maseguron agto ikibot so masanton espiritu ed saramay mamapaliket ed sikato natan.

Ontutulong met so masanton espiritu na Dios ed saray Kristiano pian sumpaen si Satanas tan saray demonyo, sayan marelmeng a sistema na bengabengatla, tan say makasalanan iran tendensia na makabos a laman da. Panon iyan posibli? Oniay ebat nen apostol Pablo: “Nayarian ko a gawaen so ganagana ed saman so mamabiskeg ed siak.” (Filipos 4:13) Nayarin ag-ekalen na masanton espiritu iray subok tan tukso; balet sarag to itayon tulongan ta pian nasungdoan iratan. Diad panmatalek ed espiritu na Dios, naawat tayo so “sankatageyan ya inkabaleg na pakayari” pian pidenengan so antokaman a gonigon odino pakadetdetan.​—2 Corinto 4:7; 1 Corinto 10:13.

Sano konsideraen mon amin iyan ebidensia, anggapoy panduaruwa a say masanton espiritu na Dios et onkukurang natan. Papabiskegen na espiritu nen Jehova iray lingkor to a mangipulong nipaakar ed engrande iran gagala to. Tuloytuloy itan a mangiparungtal ed saray espiritual a liwawa, tan mamapabiskeg itan ed pananisia tayo, ya ontulong ed sikatayon mansiansian matoor ed Manamalsa tayo. Agaylay pisalamat tayo ta tuloytuloy so Dios a manotoor ed sipan to diad pangiiter toy masanton espiritu ed saray matoor a lingkor to natan!

[Paimano ed leksab]

[Kahon ed pahina 10]

No Antoy Ibabaga na Arum Nipaakar ed Tastasi nen Jehova

“Bangta saray arum a relihyon so manusueldo na saray pankonsultaan pian ayaten so totoo ya onyurong ed simbaan odino pian mibarangkaan ira ed saray isyu ed modernon agew a singa say homoseksualidad tan aborsion, agmikokompromiso iray Tastasi ed sayan manguuman a mundo. Siansian sistematiko so panagpulong da ed Sankadalinan.”​—The Orange County Register na Orange County, California, E.U.A.

“Sano nipaakar ed panangikayat na pananisia, pigpigaray denominasyon a maseseg . . . a singa saray Tastasi nen Jehova.”​—The Republic na Columbus, Indiana, E.U.A.

“Sikara lambengat so mankakabkaabungan tekep na ‘maong a balita,’ ya iyaaplika da iray prinsipyo na Biblia.”​—Życie Literackie, Poland.

“Diad sankabalegan a kampanyan panagpulong ya akabatan ed kapiganman, saray Tastasi nen Jehova so angipasabi la ed mensahe nen Jehova ed intiron mundo.”​—News-Observer, Tamaqua, Pennsylvania, E.U.A.

[Saray litrato ed pahina 9]

Say masanton espiritu na Dios so pakakaliwawaan tayo ed espiritual,

. . . mangiyaalibansa ed saray maabig a Kristianon kualidad,

. . . tan manusuporta ed sikatayo ed kimey a sankamundoan a panagpulong