Paligliwa ed Biskeg nen Jehova

“Dia ed kinaraklan na saray kanonotan ko ed loob ko saray ligliwam pinaliket da so kamarerwak.”​—SALMO 94:19.

 PARAD amin na saramay manpipirawat na tambayo, say Biblia so walaan na saray balikas na ligliwa. Agpankelawan sirin ya ibabaga na The World Book Encyclopedia ya “ontutupleg so agnabilang a totoo ed Biblia parad ligliwa, ilalo, tan panangiwanwan diad panaoy gonigon tan panduaruwa.” Akin?

Lapud say Biblia so pinuyanan na maaron Manamalsa, “[say] Dios na ami’ ligliwa,” say Sakey “[a] manligliwa ed sikatayo ed amin a panermenan tayo.” (2 Corinto 1:3, 4) Sikato so ‘Dios na ligliwa.’ (Roma 15:5) Impanengneng nen Jehova so ehemplo ed impangitaryay pakainawaan tayon amin. Imbaki toy bogbogtong ya Anak to, si Kristo Jesus, ed dalin pian ikdan itayo na ilalo tan tambayo. Imbangat nen Jesus: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Dedeskribien na Biblia si Jehova bilang sakey ‘ya inagew-agew a manlilibit ed awit tayo, say [tuan] Dios na kilalaban tayo.’ (Salmo 68:19) Saray totoon ontatakot ed Dios so matalek a makapangibaga: “Impasen ko a naynay si Jehova ed unaan ko: lapu ed sikato et wala ed nikawanan ko, agak natenyeg.”​—Salmo 16:8.

Saratan a bersikulo na Biblia so mangipatnag ed aralem a panangaro nen Jehova a Dios ed sikatayon totoo. Nipalinew a sikatoy walaan na impapuson pilalek​—ontan met ed abilidad​—a mangitarya na daakan a ligliwa tan pian pakepaen so ot-ot tayo ed panaon na gonigon. “Sikato mangiter na pakayari ed makapuy; et saman so andian na pakapanyari sikato so parakelan to na biskeg.” (Isaias 40:29) Panon itayo sirin a naligliwa ed biskeg nen Jehova?

Say Makatambayon Epekto na Panangiyansakit nen Jehova

Insulat na salmista: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” (Salmo 55:22) On, interesado si Jehova a Dios ed sankatooan. Pinaseguroan nen apostol Pedro iray inmunan-siglon Kristiano: “Sikato [say Dios] asikasoen to kayo.” (1 Pedro 5:7) Indanet nen Jesu-Kristo so panamabli na Dios ed totoo diad impangibaga ton: “Agta nalako so limaran anuyaw ed duara a kuarta? Et anggan sakey ed sikara agnalingwanan dia ed arap na Dios. Anggan saray buek na ulo yo, abilang iran amin, Agkayo antakot; mamabli kayo nen saray dakel ya anuyaw.” (Lucas 12:6, 7) Ontanlay kablian tayo ed Dios kanian iimanoen to so anggan sankamelagan a detalyi nipaakar ed sikatayo. Amta toray bengatla ya agtayo mismo amta lapud sikatoy interesadon maong ed balang sakey ed sikatayo.

Diad impakatebek to ed sayan personal ya interes nen Jehova, aligliwan maong si Svetlana, say kalangweran a paabang ya asalambit ed inmunan artikulo. Sikatoy ngalngali la manbikkel, sanen sikatoy akatongtong na saray Tastasi nen Jehova. Insan inawat to so panagaral na Biblia, a tinmulong ed sikaton nakabat a maong si Jehova bilang peteg a persona ya interesado ed pankaabigan to. Saya so anenyeg ed puso to, ya amakiwas ed sikaton umanen so paraan na kabibilay to tan indedika toy inkasikato ed Dios. Angiter met itan ed si Svetlana na respeto ed inkasikato a kaukolan to pian mantultuloy anggaman ed saray problema to tan pian nawalaan na positibon panmoria ed bilay. “Kombinsido ak,” inkuanto, “ya agak balot paulyan nen Jehova. Nalmoan kon tua so nisulat ed 1 Pedro 5:7. Onia so nabasa ditan: ‘Imatalek yo ya amin ed [si Jehova] so kapagaan yo; ta sikato asikasoen to kayo.’”

Makaligliwa so Nibase’d Biblia ya Ilalo

Say partikular a paraan a pangitataryaan na Dios na ligliwa et diad panamegley na nisulat a Salita to, a lugan na satan so makapakelkelaw ya ilalo ed arapen. Insulat nen apostol Pablo: “Saray bengatla a nisulsulat nensaman, nisulat ira ya onkana ed kibangat tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Impalinew nen Pablo so siglaotan na tuan ilalo tan ligliwa sanen insulat to: “Say Dios [komon] ya angaro ed sikatayo tan angiter ed sikatayo na ligliwa ya andi angga tan maong ya ilalo lapu ed panamegley na grasya, ligliwaen da komon so kapusoan yo tan paletnegen da ed amin a maabig a gawa tan salita.” (2 Tesalonica 2:16, 17) Sayan “maong ya ilalo” et laktipen toy ilalon ayadyari, maliket, tan magnayon a bilay diad paraison dalin.​—2 Pedro 3:13.

 Satan a maseguro tan masnag ya ilalo so akapasesegan nen Laimonis, say alkoholikon paralitiko ya asalambit ed inmunan artikulo. Diad impakabasa to ed nibase’d Biblia a literatura na saray Tastasi nen Jehova, sikatoy aliketan ed impakaamta to’d balon mundo ed silong na Panarian na Dios, a say bunigas to et nagnap lan nipawil. Diad Biblia, abasa toy onggendan a masnag a sipan nipaakar ed mamilagron iyabig: “Satan la nilukas so saray mata na bulag, tan layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani.” (Isaias 35:5, 6) Ta pian onkualipika parad bilay ed satan a Paraiso, baleg a pananguman so ginawa nen Laimonis. Tinmunda la ed panag-inum toy alak tan naimano na kakaabay tan kabkabat to so impamasimbalo to. Sikato la natan so mangikokondukta na pigaran panangiyaral na Biblia, ya inanabang to ed arum so ligliwa ya iyoopresi na nibase’d Biblian ilalo.

Say Betang na Pikakasi

No naeermenan itayon maong lapud pigaran rason, makagamor itayo na ligliwa diad pampikasi ed si Jehova. Satan so mangekal ed pakabebelatan tayo. Legan na saray pikakasi tayo, naligliwa itayo diad pakanonot ed saray bengatlan nibaga ed Salita na Dios. Say sankarukeyan a salmo ed Biblia et singa marakdakep a pikakasi. Onia so inkanta na anibukel ed satan: “Ninodnonot ko so panangisisip mo nen una, O Jehova, tan tinaliwak so inkasiak.” (Salmo 119:52) Diad pirmin mairap iran situasyon, nagkalalo la’d saray problema ed bunigas, mabetbet ya anggapoy saksakey, pinsanan ya ebat. Diad dilin biskeg tayo, nayarin agtayo amtan eksakto no iner so tuplegan. Nalmoan na dakel a sano ginawa lan amin so polaing a posibli ed too, say iyasingger ed Dios diad pikakasi et mansumpal ed baleg a ligliwa tan, no maminsan, diad ag-inilaloan iran solusyon.​—1 Corinto 10:13.

Si Pat, ya imbatik ed emergency room na ospital, so akaeksperiensia ed sayan makaligliwan epekto na pikakasi. Kayari inyabig to, inkuanto: “Nampikasi ak ed si Jehova tan talagan naaralan ko a kaukolan kon ipia so bilay ko ed sikato, ya inmatalek ko’d sikaton gawaen toy antokaman unong ed linawa to. Legan na sarayan amin a panaon et kalmado so liknaan ko; naeeksperiensiak so kareenan na Dios ya asalambit diad Filipos 4:6, 7.” Agaylan makaligliwa irayan bersikulo parad sikatayon amin! Ditan et bibilinen itayo nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”

Say Masanton Espiritu Bilang Managligliwa

Diad samay labi antis na ipatey to, impalinew nen Jesus ed saray apostol to a magano to laran taynanan. Saya so amaaburido tan amaermen ed sikara. (Juan 13:33, 36; 14:27-31) Diad impakamorian nakakaukolan day pakaligliwa, insipan nen Jesus: “Ikerew ko ed Ama ya ikdan to kayo na sananey a katulongan [odino, managligliwa] pian walad sikayo ed ando lan ando.” (Juan 14:16; NW, paimano’d leksab) Dia et tutukoyen nen Jesus so masanton espiritu na Dios. Arum ed saray bengatla, niligliwa na espiritu na Dios iray apostol legan na saray subsubok da tan pinabiskeg tora a mantultuloy a manggawa ed linaway Dios.​—Gawa 4:31.

Si Angie, a say masiken to et dawit-dawit ya inatey kayari na sakey a graben aksidenti, so akatalona ed amin a gonigon tan ot-ot lapud situasyon to. Antoy akatulong ed sikato? Inkuanto: “No anggapoy tulong na masanton espiritu nen Jehova, agmi komon ayarian so asagmakan mi tan nansiansian mabiskeg. Nipabitar so biskeg nen Jehova lapud saray inkaletey mi, tan pinaneknekan ton sikatoy sakey ya ilang ed panaon na gonigon mi.”

Sakey a Makaligliwan Impanaagi

Antokaman so situasyon na sakey a too ed bilay, anggan panon lay kaot-ot na saray sirkumstansian onlesa, sikatoy makaromog na ligliwa ed impanaagi diad loob na kongregasyon nen Jehova. Sayan impanaagi so mangitatarya na espiritual a suporta tan tulong parad saramay mililimog ditan. Naromog na sakey ditan so grupo na maaro, manangiyansakit, tan makaligliwan kakaaro,  ya akaparaan tan mabulos ya ontulong tan manambayo ed arum diad panaon na gonigon.​—2 Corinto 7:5-7.

Saray membro na Kristianon kongregasyon so nababangatan a ‘manggawa na maabig ed saray amin, nagkalalo ed saray kaamong [da] ed pananisia.’ (Galacia 6:10) Say nibase’d Biblia ya edukasyon a nagagamoran da so mamapakiwas ed sikaran mangipatnag na inaagin aro tan matamoy a panamabli ed sakey tan sakey. (Roma 12:10; 1 Pedro 3:8) Saray espiritual ya agagi ed kongregasyon so napapakiwas a magmaliw a mapangasi, makaligliwa, tan matamoy ed panangabagey.​—Efeso 4:32.

Si Joe tan Rebecca, a nanermen a maong ed impatey na anak da, so aka-eksperiensia na ontan a makaligliwan suporta manlapud saray membro na Kristianon kongregasyon. Inkuan da: “Tinmulong ed sikami si Jehova tan say maaron kongregasyon to ed alay irap a kipapasen mi. Nilasus a kard, sulat, tan tawag ed telepono so naawat mi. Saya so amakiwas ed sikamin mangapresia no panoy kablian na impanaagi tayo. Legan a nalilikna mi epekto na impatey na anak mi, dakel a kongregasyon ed lugar mi so tinmulong ed sikami, ya angitarya na saray nakan tan nanlilinis ed abung mi.”

Paligliwa!

Sano ombasig so kairapan, tan say pirmin gonigon so mantultuloy ya onsabi, akaparaan so Dios a mangitarya na makatambayon salimbeng. Onia so impaneskribe na sakey ed saray salmo ed sikato bilang manangitarya na makaligliwan siruman: “Sikato sakbongan to ka na saray bagobago to, et dia ed silong na saray payak to manmatalek ka.” (Salmo 91:4) Say ilustrasyon dia et nayarin sakey ya agila. Satan so deskripsion na sakey a manok a malikas ed kapeligroan insan salimbengan toray siwsiw to diad pangibuskag toy payapayak to. Diad malalaknab a pantalos, si Jehova so tuan Mananalimbeng ed amin a pasalimbengan ed sikato.​—Salmo 7:1.

No pirawat moy makaaral a nagkalalo nipaakar ed Dios, ed personalidad to, saray gagala to, tan ed abilidad ton manligliwa, imbitado kan manaral na Salita to. Maliket iray Tastasi nen Jehova ya ontulong ed sika ed satan a gunaet mo. On, sika met so naligliwa ed biskeg nen Jehova!

[Saray litrato ed pahina 7]

Say nibase ed Biblian ilalo ed arapen so makaligliwa