Say Balon Mundo​—Wadman Kayo Kasi?

“Anggapo so bengatla a magmaong nipaakar ed sikara, nen say panliket, tan panggawa na maong ed leleg na pambilay da. Et ontan met a balang too mangan tan oninum, tan manliket a maong ed kimey to, sikato so pamalangkap na Dios.”​—ECLESIASTES 3:12, 13.

1. Akin a nayarian tayoy manilalo ed arapen?

 IISIPEN na dakel a totoo a say Makapanyarin-amin a Dios et mapeget tan maruksa. Ingen, say teksto ed tagey so katuaan a naromog yo ed apuyanan a Salita to. Mitukoyan itan ed pagmamaliw ton ‘maliket a Dios’ tan ed impangiyan to’d inmunan atateng tayo diad mangaraldalin a paraiso. (1 Timoteo 1:11; Genesis 2:7-9) Sano anapen tayo so aralem a pakatalos nipaakar ed arapen ya insipan na Dios ed saray totoo to, agtayo nepeg a nikelawan no naaralan tayo iray kipapasen a mangitarok ed sikatayo na magnayon a panggayaga.

2. Anto so pigaran bengatla a pitamitam yo?

² Diad inmunan artikulo, inusisa tayo so talora ed apatiran pakabasaan a ditan impasakbay na Biblia so nipaakar ed “saray balo a tawen tan balo a dalin.” (Isaias 65:17) Sakey ed saramay napanmatalkan a pasakbay et nikurit ed Apocalipsis 21:1. Saray ontumbok a bersikulo so manasaglawi ed panaon sano sigpot lan umanen na Makapanyarin-amin a Dios iray kipapasen diad dalin a pagmaliwen ton alay abig. Punasen toray lua lapud ermen. Agla ompatey so totoo lapud itatakken, sakisakit, odino pakaduknalan. Naandi lay pannangis, pandageyem, tan ot-ot. Agaylan makapalikliket  ya ilalo! Balet makapanseguro tayo kasi ya onsabi itan, tan anto so epekto na satan ya ilalo ed sikatayo natan?

Saray Rason ed Panmatalek

3. Akin a napanmatalkan tayo iray sipan na Biblia nipaakar ed arapen?

³ Imanoen pa no panon so impangituloy na Apocalipsis 21:5. Inaon na satan so inyabawag na Dios ya akayurong ed mangatatawen a trono to: “Nia, siak gawaen ko a balo so saray amin a bengatla.” Satan a sipan na Dios so magmaong nen say dinanman a deklarasyon na kawayangay dinanman a nasyon, dinanman a kaplesan a bill of rights, odino dinanman a panpirpirawatan na too ed arapen. Satan so sakey a sigpot a napanmatalkan a deklarasyon na samay Sakey a tinukoy na Biblia ya ‘agbalot mantila.’ (Tito 1:2) Tua, nayarin isipen yo a sarag tayo lay ontunda dia insan panliketan labat la iyan alay abig ya iilaloan tan manmatalek la ed Dios. Balet agtayo ni nepeg so ontunda. Dakel ni so naaralan tayo nipaakar ed arapen tayo.

4, 5. Antoran propesiya ed Biblia ya akonsidera la so mamabiskeg ed kompiyansa tayo nipaakar ed arapen?

⁴ Molimolien no anto so inletneg na akadkaunan artikulo nipaakar ed saray sipan na Biblia a balon katawenan tan sakey a balon dalin. Impasakbay nen Isaias itan a balon sistema, tan say propesiya to so walaan lay kasumpalan sanen pinmawil iray Judio ed binalegan dan dalin tan inletneg da lamet so tuan panagdayew. (Esdras 1:1-3; 2:1, 2; 3:12, 13) Ingen, kasin satan labat so tutukoyen na propesiya nen Isaias? Andin balot! Saray impasakbay to so nasumpal met ed babaleg a paraan dia ni’d arapen. Akin ya ontan so nikuan tayo? Lapud walan abasa tayo diad 2 Pedro 3:13 tan Apocalipsis 21:1-5. Saratan a bersikulo so manutukoy ed balon katawenan tan balon dalin a mangungguna ed saray Kristiano diad sankagloboan.

⁵ Singa say inmuna lan asaglawi, amipat ya inusar na Biblia so salitan “saray balo a tawen tan balo a dalin.” Kinonsidera tayo la so talora ed saratan tan awalaan itayoy makapaseseg a konklusyon. Mabitabitar ya impasakbay na Biblia a sigpot lan ekalen na Dios so karelmengan tan arum a sengegay paniirap tan nagkalalo to nin bendisionan so katooan diad insipan ton balon sistema.

6. Anto so impasakbay na mikapat a propesiyan analambit ed “saray balo a tawen tan say balo a dalin”?

⁶ Usisaen tayo pa natan so unor a pakabasaan na balikas a “saray balo a tawen tan say balo a dalin,” diad Isaias 66:22-24: “Ta singa saray balo a tawen tan say balo a dalin, a gawaen ko naani, mansiansia ra naani ed arapan ko, kuan nen Jehova, ontan naani so pansiansia na saray bini yo tan ngaran yo. Et nagawa naani, a manlapu ed sakey a lesek [“balon bulan,” NW] anggan ed sananey, tan manlapu ed sakey ya agew a pampainawa [“sabaton,” NW] angga ed sananey, amin a laman onla naani a manpikasi ed arapan ko, kuan nen Jehova. Et sikara ompaway ira naani, tan onnengneng ira naani ed saray bangkay ya inatey na saray totoo a linmukso nensaman sumpa ed siak; ta say bigis da agnaani ompatey, anggan say apoy da agnaani naerep; et sikara naani sakey a makapagula ed saray amin a laman.”

7. Akin a nibaga tayon walay kasumpalan na Isaias 66:22-24 ed onsabi niran panaon?

⁷ Sayan propesiya so walaan na kiyaplikaan ed limog na saray Judio a nanayam lamet ed dalin da, balet wala ni so sananey a kasumpalan. Satan so nagawa ni ed ilabas na panaon kayari na inkisulat na komaduan sulat nen Pedro tan say libron Apocalipsis, lapud tutukoyen na saratan so arapen a ‘balon tawen tan dalin.’ Makapanilalo itayo ed baleg tan sigpot a kasumpalan na satan diad balon sistema. Konsideraen pa so pigara ed saray kipapasen a napanggayagaan tayo ed arapen.

8, 9. (a) Diad anton pantalos a “mansiansia” so totoo na Dios? (b) Anto so kabaliksan na propesiya a mandayew iray lingkor nen Jehova ‘manlapud balon bulan anggad balon bulan tan manlapud sabaton anggad sabaton’?

⁸ Impabitar na Apocalipsis 21:4 a naandi lay ipapatey. Mitunosan ed satan so teksto ed Isaias kapitulo 66. Natalosan tayo ed bersikulo 22 a kabat nen Jehova a say balon katawenan tan say balon dalin et permanenti tan mantultuloy. Niarum ni, mansiansia so totoo to; sikaray ‘mansiansian akatalindeg’ ed arapan to. Say ginawa la na Dios ed pinilin totoo to so mangiter ed sikatayo na rason a manmatalek. Nipapaarap iray tuan Kristiano ed maramsak a panamasegsegang, a pirmi ni ingen iran sagpot pian sikaray  palaniten. (Juan 16:2; Gawa 8:1) Balet, anggan saray mabibiskeg a kakabusol na totoo na Dios, a singa di Romanon Emperador Nero tan Adolf Hitler et agda apalanit iray matoor na Dios, a mangaakbibit ed ngaran to. Inliktar nen Jehova so kongregasyon na saray totoo to, tan makaseguro itayon pagnayonen to itan ya akatalindeg.

⁹ Mipadpara, saramay matoor ed Dios bilang kabiangan na balon dalin, say sosyedad na saray tuan managdayew diad balon mundo, so mansiansian akatalindeg bilang indibidual, lapud ta mangisaklang ira na puron panagdayew ed Manamalsa na amin a bengatla. Satan a panagdayew so aliwan tubat-tubat odino paspasaray. Say Ganggan na Dios, ya intarya parad Israel diad panamegley nen Moises, so mankaukolan na pigaran paraan na panagdayew kada bulan, unong a tinandaan ed balon bulan, tan kada simba, unong a tinandaan ed agew na Sabaton. (Levitico 24:5-9; Numeros 10:10; 28:9,10; 2 Awaran 2:4) Kanian tutukoyen na Isaias 66:23 so regular tan tuloytuloy a panagdayew ed tuan Dios, a sinimba-simba tan binulan-bulan. Anggapo la naani so ateismo tan pansimpisimpitay relihyon. ‘Amin a laman so onlan ondakmomo ed arapan’ nen Jehova.

10. Akin a makapanmatalek kayo ya anggapo laray marelmeng a manigensigen ed balon mundo?

¹⁰ Papaseguroan itayo na Isaias 66:24 ya agbalot nasigensigen so deen tan inkatunong ed balon dalin. Agla deralen itan na marelmeng a totoo. Nonoten pa so imbaga na 2 Pedro 3:7 a diad arapen tayo et say “agew na panangukom, tan dia ed kaderal na mangaruksan [“agmaridios a,” NW] totoo.” Saramay agmaridios so mangangga. Anggapoy duknal ya ondapo ed saray inosenti, a singa mabetbet a nagagawa ed saray bakal na totoo, a mas dakel so ompapatey a sibilyan nen saramay sundalo. Gagarantiyaan itayo na Baleg ya Ukom a say agew to so magmaliw a kadederal na saray agmaridios.

11. Anto so impanengneng nen Isaias a pansumpalan na siopaman ya onsumpa ed Dios tan ed panagdayew ed sikato?

¹¹ Nanengneng na saray makaliktar a matunong a tudtua so mapropetikon salita na Dios. Impasakbay na bersikulo 24 a ‘saray bangkay na saray totoo a linmukso nensaman sumpa” ed si Jehova so paneknek ed panangukom to. Ompasen a makapakigtot so malinlinew a salitan inusar nen Isaias. Ingen, mitukoyan itan ed maawaran a katuaan. Walad paway na saray bakor na kadaanan a Jerusalem iray bantakay basura tan, sagpaminsan, saray bangkay na pinatey iran kriminal ya ahusgaan ya agmakanepegan ed masinop a panangiponpon. * Diman et tampol ya upoten na saray bigis tan mandanuldol ya apoy so basura tan saramay bangkay. Mapatnag, iyiilustra na piguratibon salita  nen Isaias so pansumpalan na panangukom nen Jehova ed saramay mananumlang.

No Anto so Insipan To

12. Anto ni so kaaruman iran pakapatnagan ya inter nen Isaias nipaakar ed bilay diad balon mundo?

¹² Sinaglawi ed sikatayo na Apocalipsis 21:4 so pigaran bengatla ya agla niwala ed onsabin balon sistema. Balet, anto so niwala naani? Antoy nengneng na bilay naani? Makala tayo kasi na napanmatalkan iran pakapatnagan? On. Mapropetikon deneskribe na Isaias kapitulo 65 iray kipapasen a panggayagaan tayo no abobonan itayo nen Jehova a manbilay sano palsaen to, diad ultimon kabaliksan, so balon katawenan tan balon dalin. Saramay abendisionan na magnayon a pasen diad balon dalin so agla ontakken tan agla ompatey. Papaseguroan itayo na Isaias 65:20: “Anggapo la so sakey ya ugaw na saray agew, anggan masiken a too ya agnapno ed saray agew to; ta say ugaw ompatey naani ed sanlasus a taon, et say managkasalanan anggan mantaon na sanlasus naayew naani.”

13. Panon itayon papaseguroan na Isaias 65:20 a panggayagaan na totoo na Dios so inkaligen?

¹³ Sanen pilimeron asumpal iya ed totoo ed panaon nen Isaias, mankabaliksan itan a saray kapangiyanak ed dalin so maligeligen. Anggapo iray onsabin kakabusol, a singa ginawan aminsan na saray taga-Babilonia, pian samsamen da iray mansususo odino pateyen daray lalakin walad kabisbiskegan da. (2 Awaran 36:17, 20) Diad onsabin balon mundo, maligeligen la so totoo, a napanggayagaan day bilay da. No manrebeldi ed Dios so sakey a too, sikatoy agnaabuloyan a mantultuloy a manbilay. Sikatoy pagiten na Dios. Panon to no sanlasus so taon la na sakey a rebelyoson managkasalanan? Sikatoy ompatey ‘a singa ugaw’ no ipareng ed panggayaga’d agmanganggan bilay.​—1 Timoteo 1:19, 20; 2 Timoteo 2:16-19.

14, 15. Unong ed Isaias 65:21, 22, antoran makapatumang a kimey so nailaloan yo?

¹⁴ Imbes ya iyapasakey so nipaakar ed kapagit na sigagagalan managkasalanan, deneskribe nen Isaias iray kipapasey bilay ya ontalona ed balon mundo. Isipen yo pa a wadman kayo. Nayarin say pilimeron onsulming ed nonot yo et saray bengatlan nipaakar ed abung. Ontan so indalatdat nen Isaias ed bersikulo 21 tan 22: “Ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan; ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra.”

¹⁵ No anggapo ni eksperiensia yo’d panagpaalagey odino agyo ni asali so nantanem, nayarin tutukoyen na sayan propesiya a sikayoy nibangat naani nipaakar ed satan. Balet, mabulos kayo kasin paibangat ed saray makayarin managbangat, a nayarin saratan et saray maong a kakaabay yo a maliket ya ontulong ed sikayo? Ag-imbaga nen Isaias no kasin say abung yo so walaay angkabaleg iran bintana a walaay blinds, ta pian napanggayagaan yoy mapayapayan  dagem, odino de-salming iran bintana a ditan yo nadunglawan so panguman-uman na saray tiempo. Mangidesinyo kayo kasi na abung a walaay paulsong ya atep pian onagus so uran tan yelo? Odino lapud klima a kawalaan yo et mankaukolan na palatas ya atep​—singa sakey ed saramay diad Pegley Bukig​—a ditan yo tugyopen so pamilya yo parad makapaliket a panangan tan pantotongtong?​—Deuteronomio 22:8; Nehemias 8:16.

16. Akin a nailaloan yo a say balon mundo so magmaliw a permanentin makapaliket?

¹⁶ Say mas importanti nen say pangamta ed saratan a detalyi et say pakawalaan yoy panayaman. Nakayarian yo itan​—aliwan singa natan a nayarin sikayoy nairapan a nampaalagey balet ta sananey a too so minabang. Ontan met, imbaga na Isaias 65:21 a mantanem kayo tan kanen yoray bunga na saratan. Malinew, sesegeken na satan so kipapasen na amin. Napenepenek kayo ed saray nansagpotan yo, saray bunga na dilin kimey yo. Nagawaan yo itan ed maandon bilay​—“singa saray agew na saray kiew.” Segseguradon ontukoy itan ed deskripsion a​—“balo so amin a bengatla”!​—Salmo 92:12-14.

17. Anton sipan so nagkalalo lan makapaseseg ed saray atateng?

¹⁷ No sakey kayon ateng, natenyeg so puso yo ed sarayan salita: “Sikara ag-ira naani mankimey na maapa, ag-ira naani mananak a nipaakar ed kaderya: ta sikara so bini a benendisionan nen Jehova, tan say simit da a pati sikara. Et nagawa naani a, dia ed arapen na itawag da, onebat ak naani; et leleg na pansalita ra, talinengen ko naani.” (Isaias 65:23, 24) Naeksperiensia yo ta la so ot-ot ed ‘pananak nipaakar ed kaderya’? Agtayo la kaukolan a sansakeyen so karakel na saray problema ed saray ananak a pirmin kagogonigonan na atateng tan arum ni. Mitunosan ed satan, naimatonan tayo lan amin iray atateng ya okupadon maong ed mismon trabaho, kimkimey, odino panliliket da kanian agda la tanton nipapanaon so pilimog ed saray ananak da. Midumaan, papaseguroan itayo nen Jehova a dengelen to tan ipagamor to iray pankaukolan tayo, a tatalaranan to ni ingen iratan.

18. Akin a nailaloan yo so panggayaga ed saray ayayep diad balon mundo?

¹⁸ Sano iisipen yo so nipaakar ed nayarin panggayagaan ed balon mundo, ilitrato yo pa’d kanonotan yo so eksena ya indatak na mapropetikon salita na Dios: “Say lobo tan say kordero mandungo ra naani a mankabkab, et say leon mangan naani na dayami a singa say baka; et say dabok sikato naani kanen na uleg. Ag-ira naani manduksa, ag-ira met naani manderal ed amin a masanto a palandey ko, kuan nen Jehova.” (Isaias 65:25) Satan ya eksena so sinali lan impinta na saray pintor, balet ta aliwa itan ya eksenan sinmulming lambengat ed imahinasyon na sakey ya angipinta. Ontua iya. Ontalona so deen ed limog na totoo, tan niwala met lay deen ed ayayep. Usaren na dakel a biologo tan saramay labalabay day ayayep  so sankaabigan iran taon ed bilay da pian aralen so nipaakar ed pigaran klase na ayayep odino sakey labat a klase odino poli. Midumaan, isipen pay naaral yo sano agla natatakot so ayayep ed totoo. Naasinggeran yo la naani pati saray billit tan saray angkelag a pinalsa a manaayam ed katakelan odino kasupokan​—on, obserbaan, aralen, tan panggayagaan yo iratan. (Job 12:7-9) Maligeligen yo lan nagawaan iratan, ya anggapo lay kaatapan manlapud too odino ayep. Oniay inkuan nen Jehova: “Ag-ira naani manduksa, ag-ira met naani manderal ed amin a masanto a palandey ko.” Agaylan pananguman itan manlapud nanenengneng tan nasasagmak tayo natan!

19, 20. Akin a nikadkaduma iray totoo na Dios ed saray maslak a totoo natan?

¹⁹ Singa say asalambit la ed akadkauna, agsuston nipasakbay na totoo so nipaakar ed arapen, anggaman ed malaklaknab a panagpaga nipaakar ed balon milenyo. Lapud satan, amayamay so adismaya, awetwet, odino aderya. Oniay insulat nen Peter Emberley, a direktor ed sakey ya unibersidad ed Canada: “Dakel [a wala la’d edad] so diad kaunoran et nipapaarap ed manunaan iran tepet nipaakar ed kiwawala. Siopa ak? Anton talaga so panpupursigian ko? Antoy nipatawir ko ed ontumbok a kailalakan? Sikaray mipupuligesgesan leleg na kapegleyay-edad da pian nagamoran day uksoy tan kabaliksan na bilay da.”

²⁰ Natalosan yo no akin ya ontan so kipapasen na dakel a totoo. Nayarin panggugunaetan dan panliketay bilay diad panamegley na saray likeliket odino makapasagyat a nengneng na panligliwaan. Balet agda amta no anto so itatarya na arapen, kanian say bilay da so andian na kaimportantian, uksoy, odino peteg a kabaliksan. Natan, pandumaan yo pa so panmoria yo tan panmoria ra nipaakar ed bilay, a base ed akonsidera tayo la. Amta yo a diad insipan nen Jehova a balon katawenan tan balon dalin, nayarian tayoy onnengneng ed kaliberliber insan ipapuson ikuan, ‘Talagan ginawa na Dios a balo so amin a bengatla!’ Agayla so panggayaga tayo la’d satan!

21. Anton manpadparan bengatla so naromog tayo diad Isaias 65:25 tan Isaias 11:9?

²¹ Aliwa met ya alablabas so panisip a manbibilay tayo la’d balon mundo na Dios. Iimbitaan to itayo, a papasesegen to itayo ni ingen, a mandayew la natan ed sikato diad katuaan ta pian onkualipika ed bilay sano ‘aglara naani manduksa nisay manderal ed amin a masanto a palandey to.’ (Isaias 65:25) Balet, kasin amta yo la a diad akadkauna et ontan lay inkuan nen Isaias tan inlaktip toy sakey a bengatla a makanakana ed peteg a panggayaga tayo diad balon mundo? Oniay inkuan na Isaias 11:9: “Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.”

22. Say impangikonsidera tayo ed apatiran propesiya na Biblia so nepeg a mamabiskeg ed determinasyon tayon manggawa na anto?

²² ‘Say pikakabat ed si Jehova.’ Sano pabaloen la na Dios so amin a bengatla, saray manaayam ed dalin so nawalaay suston pikakabat ed sikato tan ed linawa to. Wala ni so nagkalalon lalanoren na satan nen say panaral labat nipaakar ed saray ayayep a pinalsa. Nasasaglawi so apuyanan a Salita To. Alimbawa, molimolien yo pa no kaunongan karakel so atalosan tayo la diad impangusisa ed apatira lambengat a propesiya a manasalambit ed ‘balon katawenan tan say balon dalin.’ (Isaias 65:17; 66:22; 2 Pedro 3:13; Apocalipsis 21:1) Wala sirin so maabig a rason yo pian inagew-agew a basaen so Biblia. Kabiangan kasi itan ed rotina yo? No andi ni, antoran pananguman so nagawaan yo pian kada agew et nabasa yo so arum ya ibabaga ni na Dios? Naromogan yo a diad labas na paniilalo yo ed panggayaga ed balon mundo, nagamoran yo so lalon panggayaga natan, a singa met ed agamoran na salmista.​—Salmo 1:1, 2.

[Paimano ed leksab]

Panon Yon Ebatan?

• Akin a nikuan tayon say Isaias 66:22-24 et mangipapasakbay ed no anto ni so nagawa ed arapen?

• Anto so nagkalalo lan iilaloan yo ed saray bengatla ya abitla ed saray propesiyan walad Isaias 66:22-24 tan Isaias 65:20-25?

• Antoran rason so walad sikayo ed pagmaliw yon matalek ed arapen yo?

[Tepetepet Parad Panagaral]

[Saray litrato ed pahina 15]

Impasakbay di Isaias, Pedro, tan Juan iray aspekto na ‘balon katawenan tan balon dalin’