Tepetepet Manlapud Saray Managbasa

Talora ed saray Ebanghelyo so angisalaysay ed reklamo’d inkapuyokan nen Jesus na mabmablin larak. Kasin dakel ya apostol so nanreklamo, odino kasin si Judas labat?

Naromog tayon nisalaysay iya ed saray Ebanghelyo di Mateo, Marcos, tan Juan. Ompatnag a si Judas so angidaulo ed impanreklamo, insan akiabobon met la’d sikato so arum ya apostol. Iyiilustra na sayan inkagawa a talagan pisalamatan tayo ta walaan itayo na apatiran salaysay na Ebanghelyo. Balang insulat na managsulat so susto, balet ta aliwan parepareho iray detalyi ra. No pankokomparaen tayoray manpaparan salaysay, nagamoran tayoy malalaknab tan lalon detalyadon impormasyon na dakel ya ebento.

Iiter na salaysay ed Mateo 26:6-13 so lugar diad abung nen Simon ya akating, diman ed Betania​—balet agto sasalambiten so ngaran na samay biin angikalbo na pabalingit a larak ed ulo nen Jesus. Inkuan nen Mateo: “Nen sikatoy anengneng na saray babangatan apasnokan ira” tan nanreklamo ira ya inlako la komon so larak ta pian walay niiter ed saray duruka.

Amin lawari ed saratan a detalyi et naromog ed salaysay nen Marcos. Balet ta inyarum to ya inabrian na bii so kargaan. Mankarga itan na pabalingit a larak a “sankablian a nardo,” anganko ta nanlapu ni’d India. Nipaakar ed reklamo et sasaglawien na Marcos a “walaray pigaran asanokan,” tan “nguronguro ra sumpa ed sikato.” (Marcos 14:3-9) Kanian ipapanengneng na duaran salaysay ya aliwan saksakey labat ya apostol so nanreklamo. Balet panon a ginmapo itan?

Si Juan, a mismon akaimaton so angiyarum na matukoy iran detalyi. Binitla toy ngaran na bii a Maria, ya agi di Marta tan Lazaro. Inyarum met nen Juan iyan detalyi, a namoria tayo bilang kaaruman imbes a misumlangan: “Pinuyokan to so saray sali nen Jesus, tan pinunasan to so saray sali to ed buek to.” No pantetekepen iray salaysay, naimano tayon si Maria so talagan angiyan na larak ed ulo tan salisali nen Jesus, a pinekderan nen Juan a satan et “sankablian a nardo.” Si Jesus so kaaron maong nen Juan tan pansyodotan toy antokaman a panleglemew ed Sikato. Nabasa tayo: “Si Judas Iscariote, sakey ed saray babangatan to, a mangyawat [“mangitapat la,” NW] ed sikato, inkuan to, Akin et ag-inlako so sayan unguento ed talonlasus a denarios, tan inter ed saray duruka?”​—Juan 12:2-8.

Siempre, si Judas so “sakey ed saray babangatan to,” balet napatnagan yoy pansyodot nen Juan a walay babangatan a mamaplanon mangitapat ed si Jesus. Oniay inkuan na managpatalos a si Dr. C. Howard Matheny nipaakar ed Juan 12:4: “Say present participle a ‘mangitapat’ [odino, “ngalngali la”] tan say present infinitive ‘a mangitapat’ [odino, “mangitapat la”] so namparan pakapatnagan na dirediretso odino tuloytuloy ya aksion. Ipapanengneng na saya a say impangitapat nen Judas ed si Jesus et aliwan lapud basta-basta agawa itan, ta satan so ninonot tan niplano la ed loob na dakel ya agew.” Niarum ni nen Juan so rason a nanreklamoan nen Judas, salanti, “aliwan lapud panagpaga to ed duruka; noagta lapud sikatoy matakew tan lapud wala ed sikato so kahon na kuarta tan inala to impepelag ditan.”

Ompatnag sirin a makatunongan a say angigapo’d reklamo et say matakew a Judas lapud ta dakel so natakew to no say nanlakoan ed mabmablin larak et nipelag ed kahon na kuartan aawiten to. Lapud sayan impanreklamo nen Judas, arum ed saray apostol so nayarin nannguronguro diad impiabobon ed singa makatunongan a punto to. Balet, si Judas so angigaulo na panreklamo.