Dengelen so Ibabaga na Espiritu

“Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.”​—ISAIAS 30:21.

1, 2. Panon so impitalosan nen Jehova ed saray totoo diad intiron awaran?

 WALAD isla na Puerto Rico so sankabalegan tan sankasensitiboan a single-dish radio telescope ed mundo. Dekadekada lan uusaren na saray sientista iyan abalbaleg ya instrumento lapud mailalo iran makaawat na saray mensahen manlapud paway na planetan dalin. Balet anggan kapigan et anggapo ni so ontan iran mensahen naawat. Ingen diad kasunian, walaray malinew a mensahen nanlapud paway na planetan dalin a nayarin awaten na anggan siopa ed sikatayo diad antokaman ya oras​—ya agla uusaran na sopistikadon kagawaan. Saya so manlalapud Lapuan a mas atagtagey nen say antokaman ya iisipen a walad paway na planetan dalin. Siopa so Lapuan na saratan ya impormasyon, tan sioparay makakaawat ed saratan? Anto so ipapasabi na saratan a mensahe?

² Walad rekord na Biblia so pigaran salaysay na saray inkagawa sanen aktual nin narengel na totoo iray mensahen manlalapud Dios. No maminsan, sarayan mensahe so ipapasabi na saray espiritun pinalsa a manseserbi bilang ibabaki na Dios. (Genesis 22:11, 15; Zacarias 4:4, 5; Lucas 1:26-28) Diad amitlon inkagawa et nadngel so mismon bosis nen Jehova. (Mateo 3:17; 17:5; Juan 12:28, 29) Nansalita met so Dios panamegley na saray totoon propeta, a dakel ed sikara so angisulat ed impuyan ton ibaga ra. Natan et wala la’d sikatayo so Biblia, a mangilalaktip ed nisulat a kuritan na dakel ed sarayan mensahe, ontan met ed saray bangat nen Jesus tan  saray babangatan to. (Hebreos 1:1, 2) Talagan nipapasabi nen Jehova so impormasyon ed saray pinalsa ton totoo.

3. Anto so gagala na saray mensahe na Dios, tan anto so iilaloan ed sikatayo?

³ Amin na sarayan apuyanan a mensahen nanlapud Dios so agtanton mangipaparungtal nipaakar ed literal ya uniberso. Iyaapasakey na saratan so mas importanti iran bengatla, a walaan na epekto ed bilay tayo natan tan ed arapen. (Salmo 19:7-11; 1 Timoteo 4:8) Saratan so uusaren nen Jehova pian ipasabi so linawa to tan mangiter ed sikatayo na panangigiya to. Sakey itan a paraan a pakasumpalan na saray salita nen propeta Isaias: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.” (Isaias 30:21) Ag-itayo papaskaren nen Jehova ya ontalineng ed “salita” to. Makauley itayo no unoren tayo so panangidirehi na Dios tan mankurang itayo ed dalan to. Lapud satan a rason, sisimbawaen itayo na Kasulatan a talinengen iray mensahen ipapasabi nen Jehova. Diad libro na Apocalipsis, aminpiton pinmatnag so panamaseseg a ‘dengelen so kuan na espiritu.”​—Apocalipsis 2:7, 11, 17, 29; 3:6, 13, 22.

4. Kasin makatunongan ed panaon tayo so panilalo ed direktan pitalosan na Dios manlapud tawen?

⁴ Natan et aliwa lan direkta so pitotongtong nen Jehova ed sikatayo manlapud tawen. Anggan diad panaon na Biblia, mataltalag a nagawa so ontan iran makapakelkelaw a pitatalosan, a no maminsan et napalabas ni so dakel a siglo. Diad intiron awaran, aliwan direktaan so mabetbet a pitatalosan nen Jehova ed totoo to. Ontan so kipapasen tayo natan. Konsideraen tayo so taloran dalan na pitatalosan nen Jehova ed sikatayo natan.

‘Amin a Kasulatan et Impuyan’

5. Anto so manunan uusaren nen Jehova diad pitatalosan to natan, tan panon itayon nagunggunaan ed satan?

⁵ Say manunan uusaren na Dios diad pitatalosan to’d totoo et say Biblia. Pinuyanan itan na Dios, tan makagungguna ed sikatayo so amin a bengatlan wadtan. (2 Timoteo 3:16) Daakan ya alimbawa so lugan na Biblia nipaakar ed peteg a totoo ya angagamil ed bulos a linawa ra diad impandesidi no kasin talinengen da so bosis nen Jehova odino andi. Saratan ya alimbawa so mangipanonot ed sikatayo no akin ya importanti so italineng ed ibabaga na Dios. (1 Corinto 10:11) Lugan met na Biblia so praktikal a kakabatan, a mangiter ed sikatayo na konseho sano nipaarap itayo ed saray dedesisyonan ed bilay. Singano mansasalitan walad beneg tayo so Dios, ya iyeesaes toray salitan: “Saya so dalan, ondalan kayo ed sikato.”

6. Akin a mas matalonggaring so Biblia nen say arum niran sulsulat?

⁶ Ta pian narengel tayo so ibabaga na espiritu panamegley na saray pahina na Biblia, satan so nepeg tayon basaen a regular. Say Biblia et aliwa lambengat a bantog a libron maabig so inkisulat to, a sakey ed saray dakerakel a walan libro natan. Say Biblia et pinuyanan na espiritu tan lugan na satan iray kanonotan na Dios. Ibabaga na Hebreos 4:12: “Say salita na Dios sikatoy mabilay tan mabiskeg, tan makdem nen say anggan dinan a kampilan a duara’y tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” Legan tayon babasaen so Biblia, saray lugan na satan so ontalos ed akindalem iran kanonotan tan motibasyon tayo a singa kampilan, a mangipaparungtal ed laknab na pangitutunos tayo’d kabibilay tayo diad linawa na Dios.

7. Akin ya importanti so panagbasa ed Biblia, tan panon kabetbet so kapapaseseg tayon manggawa’d satan?

⁷ Manguman “iray nonot tan saray getma na puso” leleg ya onlalabas so panaon tan no naaapektoan itayo ed saray eksperiensia tayo’d bilay​—maabig man itan odino andi. No agtayo naynay  ya aralen so Salita na Dios, agla makapitunosan iray kanonotan, awawey, tan liknaan tayo ed maridios iran prinsipyo. Kanian, sisimbawaen itayo na Biblia: “Mantultuloy yon salien no kasin wala kayo ed pananisia, mantultuloy yon paneknekan no anto kayo.” (2 Corinto 13:5, NW) Ta pian tuloytuloy tayon narengel so ibabaga na espiritu, nepeg tayon talinengen so simbawa a basaen ya inagew-agew so Salitay Dios.​—Salmo 1:2.

8. Antoran salita nen apostol Pablo so ontulong ed sikatayo pian nausisa tayoy inkasikatayon dili nipaakar ed panagbasa na Biblia?

⁸ Nia so importantin panonot ed saray mambabasa ed Biblia: Ipanaon a maong so panmorekdek ed babasaen yo! Diad panggugunaet tayon mangunor ed simbawan basaen so Biblia ed inagew-agew, agtayo komon parparlasan lambengat so pigaran kapitulo ya agnatatalosan so walan punto na babasaen tayo. Bangta makanakana so regular a pambasa na Biblia, aliwa komon a say motibasyon tayo et say panumbok lambengat ed sakey ya eskedyul; nepeg a nawalaan tayoy puron pilalek a makaaral nipaakar ed si Jehova tan ed saray gagala to. Nipaakar ed saya, maabig ya usaren tayo iray salita nen apostol Pablo pian nausisa tayo so inkasikatayon dili. Oniay inkuanto sanen sinulat toray kapara ton Kristiano: “Lapu ed saya italimukor ko’ray pueg ko ed arap na Ama na Katawan tayo a Jesu-Kristo. Ya ‘yabuloy to ed sikayo, . . . pian manayam komon si Kristo ed saray kapusoan yo ed panamegley na pananisia; pian sano sikayo dia ed kaunoran, onlamot kayo tan ompasen kayo ed aro, ombiskeg kayo komon a manalos a maong a pati saray lapag a sasantos no panon so kaawang tan karukey tan kaatagey tan kaaralem, say pangamta na aro nen Kristo a manalonggaring ed kakabatan, pian napano kayon angga ed amin ya inkapno na Dios.”​—Efeso 3:14, 16-19.

9. Panon tayon nabayuboan tan napaaralem so pilalek tayo a makaaral ed si Jehova?

⁹ Tua, arum ed sikatayo so sipor ya agmahilig a manbasa, bangta say arum et mabasbasa. Anggaman ontan, antokaman so awawey na balang sakey ed sikatayo, nayarian tayon bayuboan tan paaralemen so pilalek a makaaral ed si Jehova. Insalaysay nen apostol Pedro a nepeg itayon nawalaay pampirawat ed pikakabat a walad Biblia, tan binidbir ton say ontan a pilalek so nayarin nabayuboan. Insulat to: “Pampilalekan yo komon, a singa saray kapangyanak ya ugugaw, so gatas a maespiritu ya andian na saol to a mamabaleg ed sikayo ed kilalaban.” (1 Pedro 2:2) Makana so dilin-disiplina no labay tayon nabayuboan so ‘pampilalek’ ed panagaral na Biblia. No panon a nabayuboan so panlabay ed balon tagano kayari na aminpigan impakataway ed satan, say awawey tayo nipaakar ed panagbasa tan panagaral so onaligwas no disiplinaen tayoy inkasikatayo ya ontumbok ed sakey a regular a rotina.

“Tagano ed Panaon a Kinepeg to”

10. Siopa so tugyopen na “matoor tan makabat ya aripen,” tan panon so panguusar nen Jehova ed sikara natan?

¹⁰ Say sananey nin paraan ya uusaren nen Jehova pian mitongtong ed sikatayo natan et say walan tinukoy nen Jesus ed Mateo 24:45-47. Sinaglawi to ditan so nipaakar ed alanaay-espiritun Kristianon kongregasyon​—“say matoor tan makabat ya aripen” ya aturon mangitarya na espiritual a “tagano ed panaon a kinepeg to.” Bilang indibidual, saray membro ed sayan grupo et tugyopen na ‘sankaabungan’ nen Jesus. Saraya, kaiba so “baleg ya ulop” na “arum a karnero,” so makakaawat na panamaseseg tan panangigiya. (Apocalipsis 7:9; Juan 10:16) Maslak ed sayan tagano ed dugan panaon so naaawat ed nengneng na niprintan publikasyon, a singa Say Panag-Bantayan, say Awake!, tan  arum nin publikasyon. Niyuutob met so kaaruman ya espiritual a tagano diad nengneng na saray paliwawa tan demostrasyon ed saray kombension, asamblea, tan saray miting ed kongregasyon.

11. Panon tayon napaneknekan a mainomay itayon onkiwas ed walan ibabaga na espiritu panamegley na “matoor tan makabat ya aripen”?

¹¹ Say impormasyon ya itatarya na “matoor tan makabat ya aripen” so niganan mamabiskeg ed pananisia tayo tan mangipasal ed pakayari tayon manebek. (Hebreos 5:14) Malaknab a paraan so kipapasabi na satan a simbawa ta pian personal a niyaplika itan na kada sakey a too. Panapanaon et naaawat tayo met so simbawan manasaglawi ed espisipiko iran aspekto na kondukta tayo. Anton awawey so nepeg a niwala’d sikatayo pian natalineng tayon maong so ibabaga na espiritu panamegley na aripen a klase? Oniay ebat nen apostol Pablo: “Ontulo’kayo ed saray wala a manuley ed sikayo, tan pauleyan kayo.” (Hebreos 13:17) Tua, say amin a nalalanor ed sayan areglo et ag-ayadyarin lalaki. Siansia, panliliketan nen Jehova so panguusar to ed saray lingkor ton totoo, anggano ag-ira ayadyari pian niwanwan tayo ed sayan panaon na anggaan.

Say Panangigiya na Konsiensia Tayo

12, 13. (a) Anto so arum nin lapuan na panangigiya ya inter nen Jehova ed sikatayo? (b) Anto so walan positibon impluensia na konsiensia anggan ed totoon andiay suston pikakabat ed Salitay Dios?

¹² Angiter si Jehova na sananey nin lapuan na panangigiya​—say konsiensia tayo. Pinalsa to so too tekep na akindalem a pakalikna ed no anto so duga tan aliwa. Kabiangan itan na inkatoo tayo. Diad sulat to’d saray taga-Roma, oniay insalaysay nen Pablo: “Ta (no saray Gentiles ya anggapo so ganggan da gawaen da ed ugali ra a niyanakan so saray onnepeg ed ganggan, saraya sirin anggan anggapo so ganggan, sikara so ganggan ed sikaran dili; dia ed pangipatnag da na gawa na ganggan a nisulat ed kapusoan da, say konsiensia ra so mangiter na pantasi, tan mandadaleman a mantetepelan so kanonotan da).”​—Roma 2:14, 15.

¹³ Anggan panon et naitutunos met na dakel a totoon agmikabat ed si Jehova so kanonotan tan kiwakiwas da unong ed maridios a prinsipyo nipaakar ed duga tan aliwa. Singano narerengelan da so makalnan bosis ed akindalem da a manadagdag ed sikara diad dugan direksion. No nagagawa itan ed saramay andian na suston pikakabat ed Salitay Dios, mas nagkalalo la so pansasalita na satan ya akindalem a bosis ed saray tuan Kristiano! Maseguron say Kristianon konsiensia ya agogolan na suston pikakabat ed Salitay Dios tan mitunosan ed masanton espiritu nen Jehova so makapangitarya na napanmatalkan a giya.​—Roma 9:1.

14. Panon itayon natulongan na nipasal ed Biblian konsiensia tayo pian tumboken so panangigiya na espiritu nen Jehova?

¹⁴ Say maong a konsiensia, a nipasal ed Biblia, so mangipanonot ed sikatayo nipaakar ed dalan a pangiwawanwanan ed sikatayo na espiritu. Walaray pankanawnawa sano ag-espisipikon sasaglawien na nibase’d Biblia iran publikasyon so nipaakar ed sakey a situasyon a nayarin kidungetan tayo. Siansia, say konsiensia tayo so mamasakbay ed sikatayo sumpad posiblin makaderal a kurang. Diad ontan iran kipapasen, say pangibaliwala ed ididikta na konsiensia tayo et kabaliksan to met so pangibaliwala ed walan ibabaga na espiritu nen Jehova. Diad biek a dapag, maabig so pakapandesisyon tayo anggano anggapoy espisipikon direksion ya akasulat lapud impakaaral a manmatalek ed nipasal a konsiensia tayo bilang Kristiano. Balet importanti a naynay a nodnonoten ya agmanepeg ya ipilit iray opinyon na dilin konsiensia tayo ed kaparan Kristianos nipaakar ed personal lambengat iran pamaakaran, no anggapo so indatak na Dios a prinsipyo, totontonen, odino ganggan.​—Roma 14:1-4; Galacia 6:5.

15, 16. Anto so sengegan lay pakaderal na konsiensia tayo, tan panon tayon napaliisan so kagawa na satan?

¹⁵ Say malinis tan nipasal ed Biblia a konsiensia so sakey a maong a langkap a nanlapud Dios. (Santiago 1:17) Balet nepeg tayon protektaan iyan langkap manlapud makaderal iran impluensia ta pian sustoy kausar na satan bilang uusaren a manalimbeng ed moralidad. Naderal lay konsiensia tayo tan agla itan managdag ed sikatayo diad dugan direksion no tumboken tayo iray lokal a kustombre, tradisyon, tan awawey a misumlangan ed saray estandarte na Dios. Nayarin aliwa lay panhusga tayo ed saray bengatla tan mandesisyon tayo ni ingen ya ipasen tayo lan maong so sakey a gawan mauges.​—Ikompara so Juan 16:2.

¹⁶ No itultuloy tayon ibaliwala iray panamasakbay  na konsiensia tayo, say panagdikta na satan so onletey lan onletey anggad magmaliw tayo lan agmakalikna odino ag-onkiwas ed moral a paraan. Oniay impanukoy na salmista ed ontan iran totoo sanen inkuanto: “Saray puso ra matabataba a singa sebo.” (Salmo 119:70) Aliwa lan susto so panag-isip na arum lapud ibabaliwala da la so panadagdag na konsiensia ra. Agla ra naigiya na saray maridios a prinsipyo tan ag-ira makapanggawa na suston desisyon. Pian napaliisan itan a kipapasen, kaukolan a magmaliw itayon sensitibo diad panangiwanwan na Kristianon konsiensia tayo anggano saray isyun nasasaglawi et singa angkelag iran pamaakaran.​—Lucas 16:10.

Maliket Iramay Ontalineng tan Mangunor

17. Diad italineng tayo ed ‘salitan walad benegan tayo,’ tan itumbok ed nipasal ed Biblian konsiensia tayo, panon itayon nabendisionan?

¹⁷ Bendisionan itayo nen Jehova panamegley na espiritu to legan tayon ileletneg so padron na itatalineng ed ‘salitan walad benegan tayo’​—unong a nitatarya panamegley na Kasulatan tan say matoor tan makabat ya aripen​—tan legan tayon tatalinengen iray panagpanonot na nipasal ed Biblian konsiensia tayo. Bilang resulta, say masanton espiritu so mamabiskeg ed pakayari tayon ondengel tan mantalos ed walan ibabaga nen Jehova ed sikatayo.

18, 19. Panon itayon nagunggunaan ed panangigiya nen Jehova diad ministeryo tan ed personal a kabibilay tayo?

¹⁸ Say espiritu nen Jehova so mamabiskeg met ed sikatayo pian arapen iray mairap a situasyon tekep na kakabatan tan inkakpel. Singa met ed kaso na saray apostol, pakiwasen na espirituy Dios so pakayari na panag-isip tayo tan lawas ya ontulong itan ed sikatayo pian onkiwas tan mansalita unong ed saray prinsipyo na Biblia. (Mateo 10:18-20; Juan 14:26; Gawa 4:5-8, 13, 31; 15:28) Lapud impantekep na espiritu nen Jehova tan say mismon personal iran sagpot tayo, ontalona itayo no walaray importanti iran dedesisyonan ed bilay, a mangiiter itan ed sikatayo na tepel pian sumpalen iratan a desisyon tayo. Alimbawa, nayarin nononoten yoy pangiyarunsa ed estilo na kabibilay yo pian lalon nipanaon iray espiritual a bengatla. Odino nayarin nipaarap kayo ed importanti tan makaapekta’d bilay iran desisyon, a singa say pampili na kapareha, panimbang ed walan iyoopresin trabaho, odino panaliw na abung. Imbes ya abuloyan so emosyon tayo a magmaliw a basiyan lambengat no walaray desisyonan tayo, kaukolan a dengelen tayo so ibabaga na espiritu na Dios tan onkiwas unong ed panangigiya to.

¹⁹ Naapresia tayon talaga so maabig a panonot tan simbawa ed sikatayo na saray kaparan Kristiano, kalaktip laray mamatatken. Balet, agnakaukolan a naynay itayon manilalo ed arum a mangipaimano ed sikatayo ed saray pamaakaran. No amta tayo so makabat a kurang a gawaen tan no antoran pananguman so nakaukolan tayon gawaen ed awawey tayo tan kondukta tayo ta pian napaliket so Dios, gawaen tayo. Inkuan nen Jesus: “No amta yo so sarayan bengatla, mapalar kayo no sikaray gawaen yo.”​—Juan 13:17.

20. Anton bendision so nagamoran na saramay ontatalineng ed ‘say salitan walad benegan da’?

²⁰ Mabitabitar, agnakaukolan a wala ni so narengel na saray Kristiano a literal a bosis manlapud tawen, nisay dalawen nira na sakey ya anghel, ta pian naamtaan da no panon so pamaliket ed Dios. Sikaray nabebendisionan diad impakawalaan day nisulat a Salitay Dios tan ed maaron panangigiya na nilanaan ton grupo diad dalin. No maalwar dan talinengen iyan ‘salitan walad benegan da’ tan tumboken so panangigiya na nipasal ed Biblian konsiensia ra, sikara so magmaliw a maaligwas ed panggagawa ray linawa na Dios. Insan seguradon naeksperiensia ra so kasumpalan na insipan nen apostol Juan: ‘Say mangunor ed linawa na Dios onsiansia lawas.’​—1 Juan 2:17.

Antikey a Panrepaso

• Akin a mitatalosan si Jehova ed saray pinalsa ton totoo?

• Panon itayon nagunggunaan manlapud programa na regular a panagbasa na Biblia?

• Panon itayon onkiwas ed panangidirehi na aripen a klase?

• Akin ya agtayo nepeg ya ibaliwala iray ididikta na nipasal ed Biblian konsiensia tayo?

[Tepetepet Parad Panagaral]

[Litrato ed pahina 13]

Agla nakaukolan na too so sopistikadon kagawaan pian narengel toray mensahe a manlalapud Dios

[Credit Line]

Courtesy Arecibo Observatory/David Parker/Science Photo Library

[Litrato ed pahina 15]

Si Jehova so mansasalita ed sikatayo panamegley na Biblia tan “matoor tan makabat ya aripen”