Magayaga Iran Bansal a Mamagalang ed si Jehova

Nankasal si Welsh tan Elthea diad Soweto, abalaten ya Aprika, nen 1985. Lanang dan nenengnengen so album ed impanbansal da a kaibay anak dan biin si Zinzi, tan pinonot da itan a magayagan agew. Labalabay a bitlaen nen Zinzi iray imbitado tan nagkalalo la et panlikliketan toray litrato na balibalin kawes nen ina to.

GINMAPO so bansal a walay paliwawa nipaakar ed panangasawa diad sakey a hall na komunidad ed Soweto. Insan say koro na saray Kristianon tobonbalo so angansion na saray kantan panangidayew ed Dios ed nankapat a harmoniya. Insan, nanliketan na saray bisita so putahi leleg a makalnan nipapatogtog so tape a Kingdom melodies. Anggapoy alak a niparungo, tan anggapoy maksil a musika odino pansasayaw. Imbes, panliliketan na saray bisita so panlilimog insan pinasamanoan da so sanasawa. Asumpal ed loob na taloy oras labat so okasyon. “Satan a bansal so lawas a maliket kon nodnonoten,” so anonotan nen Raymond, sakey a Kristianon matatken.

Diad panaon na bansal da, si Welsh tan Elthea so boluntaryon komikimey ed sanga na Abalaten ya Aprika na Watch Tower Bible and Tract Society. Simpli labat a bansal so nayarian da. Pinili na arum a Kristiano a taynan so sigpot-panaon a ministeryo tan mantrabaho pian walay gastosen da ed engranden bansal da. Balet, agnambabawian nen Welsh tan Elthea so pinili ran simplin bansal lapud akapantultuloy iran nanserbi ed Dios bilang sigpot-panaon a ministros anggad inkianak nen Zinzi.

Balet, panon to no labay na nansipanan a walay minumundon musika tan pansasayaw ed bansal da? Panon to no labay day mangiparungo na alak odino arum nin de-alkohol ya iinumen? Panon to nayarian day engranden bansal? Panon dan naseguron magmaliw itan a maliket ya okasyon ya onnepeg ed saray managdayew ed Dios? Saratan a tepet so kaukolan a maalwar a konsideraen, ta igaganggan na Biblia: “Anggan mangan kayo sirin, odino oninum, odino antokaman a gawaen yo, gawa yo ya amin ed gloria na Dios.”​—1 Corinto 10:31.

Paliisay Maingal a Panliliket

Mairap ya isipen a walay aliwan maliket a bansal. Balet walay lalon kapeligroan ed pagmaliw ya alablabas tan aglan balot nakontrol a panliliket. Diad saray bansal na aliwan-Tasi, walaray nagagawan agmamagalang ed Dios. Alimbawa, kaslakan la a no walay alak et walaray nabuek. Makapaermen ta nagagawa met iya ed saray bansal na Kristiano.

Amasakbay so Biblia a “say mabayani ya inumen magulo.” (Uliran 20:1) Say Hebreon salitan nipatalos a “magulo” et mankabaliksay “paningal.” No maingal lay too lapud alak, isipen pa no anto kasi nagawa ed dakel a toon manuulop a dakel lay nainum da! Mapatnag a saratan ya okasyon so mainomay a mamawalay “panagbuanges, panduroypo [“maingal a panliliket,” NW], tan saray miulibay ed saraya,” a saratan so nisulat ed Biblia bilang “saray gawa na laman.” Lapud saratan ya agamil et agnatawir na siopaman ya agmagbabawi so andi-anggaan a bilay diad silong na uley na Panarian na Dios.​—Galacia 5:19-21.

Say Griegon salita parad “maingal a panliliket” so nausar pian deskribien so maingal a libot ed karsada na akainom laran tobonbalo a  mankakansion, mansasayaw, tan manpapatogtog na musika. No dakel so iinumen ya alak diad bansal, tan no walay maknol a musika tan mabanday a pansasayaw, talagan walay kapeligroan a satan ya okasyon so magmaliw a maingal lan panliliket. Diad ontan a kipapasen, saray makapuy ed moral tan espiritual so mainomay a natukso tan makagawa na arum a gawa na laman a singa say ‘pilalawanan, karutakan, kaalakan na laman, [odino onsuko ed] sanok.’ Antoy nagawaan pian napaliisan iratan a gawa na laman ya agmamaliket ed bansal na Kristiano? Pian naebatan itan a tepet, konsideraen tayo pa no antoy ibabaga na Biblia nipaakar ed sakey a bansal.

Say Akibansalan nen Jesus

Inimbitaan si Jesus tan saray babangatan to ya onatendi ed sakey a bansal diad Cana na Galilea. Inawat day imbitasyon, tan akatulong ni ingen si Jesus ed gayaga na okasyon. Nen kinmulang so alak, sikatoy mamilagron amawala na kaaruman ya alak ed sankaabigan a klase. Kayari na bansal, andi-duaruwan say akera so nausar ni na maliket a nobyo tan say pamilya to.​—Juan 2:3-11.

Walaray pigaran leksion a naaralan tayo manlapud bansal ya inatendian nen Jesus. Unona, aglabat la basta linma si Jesus tan saray babangatan to ed ponsia na kasal. Mabitar ya inkuan na Biblia a sikaray inimbitaan. (Juan 2:1, 2) Ontan met, diad duaran ilustrasyon nipaakar ed ponsia na kasal, aminpigan binitla nen Jesus a saray sankaili so wadman lapud ta sikaray inimbitaan.​—Mateo 22:2-4, 8, 9; Lucas 14:8-10.

Diad arum a daldalin et kaugalian la parad amin diad komunidad a naabuloyan a miponsia balanglan inimbitaan odino andi. Balet ta panirapan iya ed pinansyal. Nayarin makaotang so nansipanan ya aliwan mayaman pian naseguro ran walay magenap a kakanen tan iinumen parad dakel a too. Sirin, no denesidi la na Kristianon nansipanan a wala labat lay simplin ponsia tan ageteran so bilang na sankaili, nepeg a saya so talosan tan respetoen na saray kaparan Kristiano ya agnaimbitaan. Anonotan na lakin angasawa a taga-Cape Town, Abalaten ya Aprika, a sikatoy angimbita na 200 a sankaili ed bansal to. Balet ta 600 so akibansal, tan tampol a naupot so kakanen. Kaiba ed saray ag-inimbitaan ed bansal et sakey bus a napnoy bisita a nibanan manpasyar ed Cape Town ed saman a sampot simba. Say konduktor na sayan bus so arawi lan kanayon na nobya et inisip ton kanepegan ton itagar so intiron grupo ya agto la anggan nampasantabi ed nobya odino ed nobyo!

No ag-imbaga ya amin et nayarin onla ed ponsia, say tuan patumbok nen Jesus so agmibabansal no ag-inimbitaan tan agmibiang ed kakanen tan iinumen a niparaan parad inimbitaan iran sankaili. Nepeg ya oniay molimolien na saramay labay day onla balet ta ag-inimbitaan, ‘Kasin no mibansal ak et mangipanengneng na kakulangay aro ed saray balon kasal? Kasin siak so sengeg na kasisikigan tan kagirogiroay liket na okasyon?’ Imbes a nasakitan lapud ag-inimbitaan, say makatalos a Kristiano so simamaaron mangipawit na mensahe pian komendaan so sanasawa tan ipasabi ed sikara a bendisionan ira komon nen Jehova. Nonoten to ni ingey ontulong ed saramay mankasal diad pangipawit na regalo pian makaarum na liket ed agew na bansal da.​—Eclesiastes 7:9; Efeso 4:28.

Siopa so Responsabli?

Diad pigaran parti ed Aprika, kaugalian la parad maedad lan kakanayon a mangiyareglo ed bansal. Nayarin pisalamatan iya na nansipanan, lapud ta nabawasan lay gastos da. Nayarin liknaen da met a nalemewan ira ed responsabilidad ed antokaman a nayarin nagawa. Balet, sakbay ya awaten so antokaman a tulong manlapud kakanayon a walaay maong a getma, nepeg a seguroen na nansipanan a saray personal a kaliktan da so narespeto.

Anggaman si Jesus et Anak na Dios a “linmasor a nanlapud tawen,” anggapoy pakapatnagan a sikato lay akauley tan angiwanwan ed saray pamaakaran diad bansal ed Cana. (Juan 6:41) Imbes, ibabaga ed sikatayo na salaysay na Biblia a walay sakey ya aturo ya onakto bilang “mananguksoy ed bansal.” (Juan 2:8) Lapud satan, sayan too so walaay eebatan ed say balon ulo na pamilya, salanti say nobyo.​—Juan 2:9, 10.

Nepeg a respetoen na Kristianon kakanayon so tinuro na Dios ya ulo na balon pamilya. (Colosas  3:18-20) Sikato imay nepeg a mangako ed responsabilidad ed no antoy nagawa ed bansal to. Natural labat a say nobyo so nepeg a makatunongan tan, no nayadyari et ikonsidera toray kaliktan na nobya to, saray atateng to, tan saray pikatulanganan to. Ingen, no ipasoot na kakanayon ya iyareglo iray pamaakaran a duma ed saray panlabayan na nansipanan, diad satan et nayarin ag-awaten na nansipanan so mabunlok a tulong da tan sikara lay manggastos ed simplin kasal da. Unong ed saya et anggapoy bengatlan nagawan makapaermen a nodnonoten na saray mankasal. Alimbawa, diad sakey a bansal na Kristiano ed Aprika, sakey ya agmananisian kanayon ya inmakton emcee so angigalang ed inaatey lan inmuunan atateng!

Arum a nankasal so onla lan man-honeymoon sakbay a nasumpal so ponsia na kasal. Diad satan a kaso, nepeg ya iyareglo na nobyo a walaray responsabli a maneguron saray estandarte na Biblia so napansiansia tan mansumpal ed kabkaabigan ya oras so selebrasyon.

Maalwar a Panagplano tan Panimbang

Mapatnag a walay amayamay a mananam a kakanen diad akibansalan nen Jesus, ta deneskribe itan na Biblia bilang ponsia na kasal. Singa naimano la et walay dakel met ya alak. Andi-duaruwan walay matukoy a sonata tan mapagalang a pansasayaw lapud ta saya so kaslakan a gagawaen ed panduruypo na Judio. Impatnag iya nen Jesus ed say bantog ya ilustrasyon to nipaakar ed managdarak ya anak. Alay liket na mayaman ya ama ed satan ya istorya lapud impawil na magbabawin anak to kanian inkuan to: “Mangan itayo, tan manliket itayo.” Unong ed si Jesus, laktipen na selebrasyon so “togtog tan sayaw.”​—Lucas 15:23, 25.

Balet, imanoen ya ag-espisipikon atukoy so musika tan pansasayaw diad bansal ed Cana. Diad tua, ag-atukoy so pansasayaw ed dinanman a salaysay na Biblia nipaakar ed bansal. Ompatnag a diad limog na saray matoor a lingkor na Dios ed panaon na Biblia, say pansasayaw so basta labat la ombana ya aliwan manunan kabiangan ed saray bansal da. Kasin walay naaralan tayo manlapud saya?

Diad arum a bansal na Kristiano ed Aprika et nauusar iray maksil a sound system. Say togtog so makmaksil kanian agla makapantongtong na marakep iray sankaili. No maminsan et ompatnag a daiset so kakanen balet ta pirmi so pansasayaw. Imbes a ponsia na kasal, saratan ya okasyon so pangibaraanan la parad pambabaili. Niarum ni, say maksil a togtog so managyat ed saray managgulo tan estranghero a basta labat la onla anggan ag-inimbitaan.

Lapud ag-idadanet na rekord ed Biblia nipaakar ed bansal so togtog tan pansasayaw, agta saya so mangigiya ed nansipanan a manplaplanon manbansal pian napagalangan si Jehova? Ingen, bilang preparasyon ed pigaran agano nin bansal ya agawa’d bandad abalaten ya Aprika, saray Kristianon tobonbalo ya apilin walay betang ed programay bansal so makakausar na dakel ya oras ed panpasal ed mairap iran sayaw. Diad loob na pigaran bulan et dakerakel so nausar da lan panaon ed onian paraan. Balet kaukolan a ‘saliwen [na saray Kristiano] so panaon’ parad “say lalon mapetepet iran bengatla,” singa say panagpulong, personal a panagaral, tan iyatendi ed saray Kristianon miting.​—Efeso 5:16; Filipos 1:10, NW.

Lapud dakel ya alak so ginawa nen Jesus, ompatnag ya engrande tan bastante so kakanen ed bansal diad Cana. Balet, makaseguro itayo a say okasyon et aliwan magulo tan saray sankaili et kabkaabigan so ininum dan alak a singa ed kipapasen na pigaran bansal na Judio. (Juan 2:10) Panon tayon makaseguro ed saya? Lapud ta si Katawan a Jesu-Kristo so akibansal. Diad amin a totoo, si Jesus so sankaalwaran ya ontulok ed ganggan na Dios nipaakar ed mauges a kaulop: “Agka miulop ed saray mainum na alak.”​—Uliran 23:20.

 Sirin, no labayen na nansipanan a walay iparungon alak odino arum nin de-alkohol ya iinumen diad bansal da, nepeg dan iyareglo iya a naasikason maong na responsabli iran indibidual. Tan no labay dan walay musika, nepeg dan pilien so matukoy iran kansion tan kaukolan a walay responsablin too a mangasikaso ed kakasil. Agnepeg ya abuloyan iray sankaili a mangasikaso tan mangisalet na kuestionablin musika odino agmakatunongan a mangikasil ed togtog. No walay pansasayaw, ipakabat itan ed paraan a mapagalang tan kabkaabigan. No mabanday tan makaayat lay kakasayaw na agmananisia iran kanayon odino aliwa nin matakken ed espiritual iran Kristiano, nayarin salatan na nobyo so klase na musika odino mataktika ton kerewen ya itunda so pansasayaw. Ta no andi et mansumpal so bansal ed magulon okasyon tan sengeg na pakatiroran.​—Roma 14:21.

Lapud saray kapeligroan ed pigaran nengneng na modernon pansasayaw, maksil a musika, tan say alablabas ya alak et denesidi la na pigaran Kristianon nobyo ya agla iratan gawaen ed bansal da. Pigara so abalaw lapud saya, imbes komon a sikaray kinomendaan lapud pilalek dan napaliisay antokaman a nayarin mangitarok ed kabalawan ed masanton ngaran na Dios. Diad biek a dapag, inyareglo na pigaran nobyo so matukoy a musika, panaon parad pansasayaw, tan pangiparungo na kabkaabigan ya alak. Diad dinanman a kaso say nobyo so responsabli ed no antoy nagawa ed bansal to.

Diad Aprika, arum ya aliwan matakken ed espiritual a totoo so nanleglemew ed mapagalang iran bansal na Kristiano tan ikuan dan singa ra aki-lamay. Balet, aliwa itan a balansin panmoria. Saray makasalanan a gawa na laman so nayarin mangitarok na temporaryon liket, balet ta naguloy konsiensia na saray Kristiano tan mangitarok na kabalawan ed ngaran na Dios. (Roma 2:24) Diad biek a dapag, mamapawala na puron gayaga so masanton espiritu na Dios. (Galacia 5:22) Dakel a Kristianon sanasawa so maliket a mannodnonot ed agew na bansal da, ya amta ran satan so maliket ya okasyon tan aliwan “bengatlan kagapolan.”​—2 Corinto 6:3.

Nanonotan nin siansia nen Welsh tan Elthea so dakel a marakep a komento na agmananisian kakanayon da ya akibansal ed sikara. Inkuan na sakey: “Nakekesawan kami ed nagagawan maingal iran bansal natan. Agaylan abig manaya so iyatendi ed desentin bansal.”

Sankaimportantian, saray magayaga tan desentin bansal na Kristiano so mamagalang ed say Manangigapo na panangasawa, si Jehova a Dios.

[Kahon/Litrato ed pahina 22]

LISTAAN PARAD PONSIA NA BANSAL

• No mangimbita kayo na agmananisian kanayon a mansalita, kasin sineguro yo la a sikatoy agmanaglawi na pigaran ag-Makristianon tradisyon?

• No walay ipatogtog a musika, kasin amili kayo la na matukoy labat iran kansion?

• Kasin kabkaabigan so kakasil na ipatogtog a musika?

• No walay pansasayaw, kasin nagawa itan ed mapagalang a paraan?

• Kasin kabkaabigan labat so iparungo ya alak?

• Kasin nakontrol na saray responsabli so kibunog na satan?

• Kasin angigeter kayo na kabkaabigan ya oras na kasumpal na ponsia na bansal?

• Kasin walaray responsablin onatendi pian naseguroy deen anggad kasumpal?