Mapekder ya Itandoro so Maridios a Bangat

“Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”​—ULIRAN 3:5, 6.

1. Panon so kipapaarap tayo ed pikakabat na too ya agni agawa nensaman?

 DIAD kaplesan, walay ngalngali 9,000 ya inagew-agew a peryodiko a nibubunog ed sankamundoan. Kada taon et walay onliligada’d 200,000 a balon libro a nipapalapag ed Estados Unidos lambengat. Unong ed sakey a kalkulasyon, wala so ngalngali 275 milyon a Web pages dia ed Internet nen Marso 1998. Nibagan onaatagey ni iyan bilang diad peles a 20 milyon a pahina kada bulan. Aliwan singa nensaman, saray totoo so mainomay la natan a makala na impormasyon nipaakar ed amin lawarin tema. Anggaman walaray positibon aspekto na saya, nansengegan na saray problema so ontan ya agaylan karakel na impormasyon.

2. Antoran problema so nayarin panresultaan na pakapanusisa ed agaylan karakel ya impormasyon?

² Walaray totoon abiti-bitil ed saray impormasyon, a naynay dan pepeneken so agnakontenton pilalek dan nawalaay balon impormasyon bangta napapaulyan da laray mas importantin bengatla. Wala met iramay mangaalay daiset ya impormasyon nipaakar ed komplikado iran aspekto na pikakabat insan da la ipasen so inkasikara ya eksperto. Nayarin makapuy so pansumpalan da odino na arum ed gawaen dan ambelat iran desisyon lapud ta nibase lambengat iratan ed limitadon pakatalos. Tan lawas a wadtan so kapeligroan ed kipaarap ed palso odino agsuston impormasyon. Mabetbet et anggapo so napanmatalkan a paraan pian napaneknekan a susto tan asimbang so amayamay ya impormasyon.

3. Antoran pasakbay nipaakar ed panaggegemtan na kakabatan na too so naromog ed Biblia?

³ Say inkaupapet et abayag lan walna na too. Naamtaan la nensaman ed panaon nen Arin Solomon iray kapeligroan ed sobran panagdarak na panaon diad panaggegemtan na andi-kakanaan odino makaderal ni ingen ya impormasyon. Inkuanto: “Nasimbawaan ka, komon: Say panggawa ed dakerakel a libro anggapo so anggaan; et say dakel ya aral sikato so sakey a belat na laman.” (Eclesiastes 12:12) Kayari na pigaran siglo et oniay insulat nen apostol Pablo ed si Timoteo: “Imatonan mo so nimatalek ed sika, ya onarawi ka ed saray tongtong ya ag-onnepeg ed Dios tan saray siblangan na ningaranan a ‘kakabatan’ balet aliwa a tua. A sikato nen tinumbok na saray arum, abalang ira nipaakar ed pananisia.” (1 Timoteo 6:20, 21) On, nakaukolan a paliisan na saray Kristiano natan so agmanepeg a kipaarap ed makaderal iran ideya.

4. Anto so sakey a paraan a nipatnag tayo so panagmatalek ed si Jehova tan ed saray bangat to?

⁴ Maabig a talinengen met na totoo nen Jehova iray salita ed Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Laktipen na panagmatalek ed si Jehova so pangipulisay ed antokaman ya ideyan misumlangan ed Salitay Dios, balanglan nanlapu itan ed mismon panagkatunongan tayo odino nanlapud kapara tayon too. Pian nasalimbengan so espiritualidad tayo, makana so pangipasal tayo’d pakayari tayon manebek ta pian nibiig so makaderal iran impormasyon tan nipulisay itan. (Hebreos 5:14) Singbaten tayo pa so pigara ed saray panlalapuan na saratan ya impormasyon.

Sakey a Mundon Babanlongan nen Satanas

5. Anto so sakey a lapuan na makaderal iran ideya, tan siopa so walad benegan na satan?

⁵ Say mundo so panlalapuan na dakerakel a makaderal  iran ideya. (1 Corinto 3:19) Oniay impikasi nen Jesu-Kristo ed Dios nipaakar ed babangatan to: “Kerewen ko ed sika, ya agmo ra eekalen ed mundo, noagta bantayan mo ira lapu ed marelmeng a sakey.” (Juan 17:15, NW) Say kerew nen Jesus a nasalimbengan iray babangatan to manlapud “marelmeng a sakey” so mangipapabitar ed impluensia nen Satanas diad mundo. Say impagmaliw tayon Kristiano so ag-automatikon manalimbeng ed sikatayo manlapud mauges iran impluensia na sayan mundo. Insulat nen Juan: “Amta tayo a sikatayo so manlalapud Dios, balet ta say sankamundoan so walad pakayari na marelmeng a sakey.” (1 Juan 5:19, NW) Nailaloan a tabeken nen Satanas tan saray demonyo to so mundo tekep na makaderal iran impormasyon, nagkalalo la ed sayan kaunoran a parti na kaunoran iran agew.

6. Panon a pansengegay moral ya agpakalikna so mundo na panligliwaan?

⁶ Nailaloan met ya arum ed sarayan makaderal ya impormasyon et nayarin ag-ompatnag a mauges. (2 Corinto 11:14) Alimbawa, konsideraen pa so mundo na panligliwaan kalaktip laray palabas ed TV, sine, musika, tan babasaen. Dakel a totoo so onabobon a diad ondarakel a kaso et walaray klase na panligliwaan a mangiyaalibansay mabanday ya ag-agamil, a singa say imoralidad, karawalan, tan lingon panag-usar na druga. Nayarin natalagnaw iray makakaimaton ed pilimeron pakanengneng da ed sakey a klase na panligliwaan a mabanbanday ed moral. Balet ta magmaliw lan agmakalikna so sakey a too no maminpiga to lan naimatonan itan. Agtayon balot komon momoriaen iray panligliwaan a mangiyaalibansa na makaderal iran ideya bilang naabobonan odino agmakaapekta.​—Salmo 119:37.

7. Anton klase na kakabatan na too so mamakapuy ed kompiyansa tayo ed Biblia?

⁷ Konsideraen pa ni so sananey a lapuan na impormasyon a posiblin makapuy so resulta to​—say dakerakel ya ideyan ipapalapag na pigaran sientista tan iskolar a mangaangat ed inka-autentiko na Biblia. (Ikompara so Santiago 3:15.) Mabetbet ya ompapaway iratan a materyal diad manunaan iran magasin tan bantog iran libro, tan onkapuy so kompiyansa ed Biblia lapud satan. Ikikinon na arum a totoo so pamapakapuy da’d autoridad na Salitay Dios panamegley na agmanundan panagpalbeng. Niwala met la so ontan a kapeligroan ed panaon na saray apostol, a singa nipabitar ed saray salita nen apostol Pablo: “Manasikaso kayo ta ompan wala so manggawa na deral ed sikayo lapu ed pilosopiya to tan andi kakanaan a panamalingo, unong na daan ya ugali na totoo, unong ed saray dinaralin a bangat na mundo, tan aliwan unong ed Kristo.”​—Colosas 2:8.

Kakabusol na Katuaan

8, 9. Panon so mismon kipapatnag na apostasya natan?

⁸ Wala ni so sananey a panesesga na saray apostata ed espiritualidad tayo. Impasakbay nen apostol Pablo ya onlesa so apostasya ed limog na mankuan a Kristiano. (Gawa 20:29, 30; 2 Tesalonica 2:3) Bilang kasumpalan na saray salita to et atibukel so Kakristianoan lapud baleg ya apostasya, kayari na impatey na saray apostol. Natan, anggapo so baleg ya apostasya ed limog na totoo na Dios. Balet walaray pigaran inmeekal ed limog tayo, tan arum ed sikara so determinadon maneral ed saray Tastasi nen Jehova diad pangikakayat day katilaan tan panagpauges. Pigara so akinonong ed arum a grupo pian napankakasakeyan dan sumpaen so puron panagdayew. Diad panggagawa ra’d satan, sikaray ondadapag ed sankaunaanan ya apostata, si Satanas.

⁹ Ompapalalo so panguusar na arum ya  apostata ed nanduruman nengneng na mass communication, laktip lay Internet, pian ikayat so palson impormasyon nipaakar ed Tastasi nen Jehova. Bilang resulta, no manusisa iray masimoon a totoo nipaakar ed saray sisiaen tayo, nasagapolan da la ingen iray apostatan propaganda. Wala ni ingen iray Tastasin nipapaarap ed satan a makaderal a materyal ya agda naam-amtaan. Niarum ni, sagpaminsan a mibibiang iray apostata diad saray programa na telebisyon odino radyo. Anto so makabat a gawaen nisesengeg ed saya?

10. Anto so makabat ya ikiwas ed apostatan propaganda?

¹⁰ Binilin nen apostol Juan iray Kristiano ya agda aawaten iray apostata diad kaabungan da. Insulat to: “No wala so onsabi ed sikayo, et agto tarok so sayan bangat, agyo aakoen ed abung yo tan agyo ikday pabano: Ta say mangiter ed sikato na pabano mibiang ed saray mauges a gawa to.” (2 Juan 10, 11) No paliisan tayo so amin a paraan na pakapilimog ed sarayan kakabusol, nasalimbengan itayo manlapud mauges a panag-isip da. No panon a pankaugsan so pangawat ed mismon apostata diad saray ayaman tayo, ontan met ed pangipaarap tayo’d inkasikatayo diad saray apostatan bangabangat panamegley na nankakapigan klase na modernon komunikasyon. Agtayon balot komon aabuloyan so inkaupapet a managyat ed sikatayo diad ontan a makadesyang a kurang!​—Uliran 22:3.

Diad Loob na Kongregasyon

11, 12. (a) Anto so sakey a nanlapuan na makaderal iran ideya ed inmunan-siglon kongregasyon? (b) Panon ya agnitandoro na arum a Kristiano so maridios iran bangat?

¹¹ Konsideraen so sananey nin posiblin panlapuan na makaderal iran ideya. Anggano aliwan getma na sakey a dedikadon Kristiano so pangibangat na katilaan, nayarin niyugali to so palpalaran a panagsalita. (Uliran 12:18) Nisesengeg ed agtayo inkayadyari, amin tayo no maminsan so makapankakasalanan lapud dila tayo. (Uliran 10:19; Santiago 3:8) Mapatnag a dia ed panaon nen apostol Pablo et walaray pigara ed loob na kongregasyon ya agmakakontrol ed dila ra kanian alanor ira ed pansasangsangan nipaakar ed saray salita. (1 Timoteo 2:8) Walaray arum ya ipapasen dan magmaong iray mismon opinyon da tan alodloor ni ingen so ginawa ra nen inangat da so autoridad nen Pablo. (2 Corinto 10:10-12) Satan ya awawey so nansumpal ed andiay-kakanaan iran balingaan.

¹² No maminsan et sarayan agpanpapakna so ontundas ed “maramsak a pansisiblangan nipaakar ed saray angkelag a salita,” a manggirogiro ed kareenan na kongregasyon. (1 Timoteo 6:5, NW; Galacia 5:15) Oniay insulat nen Pablo nipaakar ed saramay sengegan na saratan a sangsangan: “No wala so mangibangat na sananey a bangat, tan ag-onabuloy ed saray salita, salanti saray salita na Katawan tayon Jesu-Kristo, tan say bangat a tukoy ed kasimpitan. Sikato so mapangta, ya anggapoy amta to, noag ingen kinmalog so ulo to nisengeg ed saray pikokolkol tan pisangsangan ed saray salita, a sikato so panaglapuan na siblet, kolkol, panamabaing, saray mauges ya inap.”​—1 Timoteo 6:3, 4.

13. Anto so kondukta na maslak a Kristiano nen inmunan siglo?

 ¹³ Makapaliket ta diad panaon na saray apostol et karaklan ed saray Kristiano so nanmatoor tan nansiansian akasentro ed kimey na panangiyabawag ed maong a balita na Panarian na Dios. Okupado ira ya ontutulong ed saray “ulila tan babalo a bibii ed kaermenan da” tan pansiasiansiaen day inkasikaran ‘andi-matik ed mundo,’ ya agda dadaraken so panaon da ed andi kakanaan iran pansasangsangan nipaakar ed salita. (Santiago 1:27) Pinaliisan da iray “mauges a kaulop” anggan diad loob na Kristianon kongregasyon ta pian nasalimbengan da so espiritualidad da.​—1 Corinto 15:33; 2 Timoteo 2:20, 21.

14. No ag-itayo manalwar, panon a mankalkalnan ontundas ed makaderal iran pansasangsangan so gendat a paniiteray ideya?

¹⁴ Mipadpara, saray kipapasen ya adeskribe ed parapo 11 so agmet gendagendat a nagagawa ed saray kongregasyon na Tastasi nen Jehova natan. Balet, maabig a bidbiren tayo so posiblin kagawa na saratan ya andi-kakanaan a pansasangsangan. Siempre, natural lambengat so panongtong nipaakar ed saray salaysay na Biblia odino panumamengan iray aspekto na insipan a balon mundo ya agni niparungtal. Tan agmet makapuy so paniiteray ideya nipaakar ed personal iran bengatla, a singa say panangawes tan panag-ayos odino panligliwaan. Balet, no magmaliw itayon dogmatiko nipaakar ed saray ideya tayo tan mansenti itayo no agmipakna so arum ed sikatayo, nayarin naapag-apag so kongregasyon lapud angkekelag iran isyu. Nayarin magmaliw lan makaderal so tongtongan a diad gapo et ompasen ya ag-importantin bengatla.

Alwaran so Nimatalek ed Sikatayo

15. Diad anton laknab a saray “bangat na demonyo” so makaderal ed sikatayo diad espiritual a paraan, tan anto so insimbawa na Kasulatan?

¹⁵ Oniay impasakbay nen apostol Pablo: “Say espiritu kuan to ed maliwawa, a dia ed saray arapen a panaon saray arum onsian ira ed pananisia, a dengelen da so saray espiritu a manangilawan tan saray bangat na saray demonyo.” (1 Timoteo 4:1) On, talagan pakapeligroan iray makaderal ya ideya. Kanian oniay inkerew nen Pablo ed pinabpabli ton kaaro a Timoteo: “O Timoteo, imatonan mo so nimatalek ed sika, ya onarawi ka ed saray tongtong ya ag-onnepeg ed Dios tan saray siblangan na ningaranan a ‘kakabatan’ balet aliwa a tua. A sikato nen tinumbok na saray arum, abalang ira nipaakar ed pananisia.”​—1 Timoteo 6:20, 21.

16, 17. Anto so inmatalek la na Dios ed sikatayo, tan panon tayon alwaran itan?

¹⁶ Panon tayo natan a nagunggunaan ed sayan maaron pasakbay? Wala so nimatalek ed si Timoteo a bengatlan walay kablian a kaukolan ya alwaran tan asikasoen. Anto itan? Oniay insalaysay nen Pablo: “Tandaan mon maong so uliran na saray maabig a salita a nadngel mo ed siak, dia ed pananisia tan panangaro a wala ed Kristo Jesus. Saman so maong a bengatla a nimatalek ed sika sikato so talimaen mo dia ed panamegley na espiritu santo a manayam ed sikatayo.” (2 Timoteo 1:13, 14) On, laktipen na nimatalek ed si Timoteo iray “maabig a salita,” “say bangat a mitunosan ed maridios a debosyon.” (1 Timoteo 6:3, NW) Mitunosan ed sarayan salita, determinado iray Kristiano natan a manalimbeng ed pananisia ra tan ed intiron tugyop na katuaan a nimatalek la ed sikara.

¹⁷ Say panalwar ed satan a nimatalek so mangilaktip ed pamayubo’d saray bengatla a singa say maabig ya ugali ed panagaral na Biblia tan say pampeleng ed pikakasi, legan a pankikimeyan so “maabig ed saray amin, nagkalalo ed saray kaamong na pananisia.” (Galacia 6:10; Roma 12:11-17) Oniay kaaruman ya insimbawa nen Pablo: “Balet sika, O too na Dios, taynan mo so sarayan bengatla, tan ontumbo’ka ed kaptekan, kasantosan, pananisia, aro, anos, kauyamoan. Mibakal ka ed maabig a pibabakal na pananisia, bembenan mo so bilay ya andi angga, a sikato so atawagan mo, tan impaliwawam so maabig a panamatua ed arapan na saray dakel a tasi.” (1 Timoteo 6:11, 12) Say impangusar nen Pablo ed saray salitan singa say “mibakal ka ed maabig a pibabakal” tan ‘malet mon bembenan’ so mangipabitar a sikatayo so nepeg ya aktibo tan determinadon manresisti ed saray makaderal ed espiritualidad tayo.

Say Pankaukolan na Pakatebek

18. Panon tayon nipatnag so Kristianon inkasimbang nipaakar ed saray sekular ya impormasyon?

¹⁸ Siempre, diad pibibiang ed maabig a pibabakal na pananisia, nakaukolan so pakatebek. (Uliran 2:11; Filipos 1:9) Singa bilang, agmakatunongan  a panduaruwaan so amin lan sekular ya impormasyon. (Filipos 4:5; Santiago 3:17) Aliwan amin ya ideya na too et mikontraan ed Salitay Dios. Tinukoy nen Jesus so pankaukolan ya onkonsulta iray mansasakit ed sakey a kualipikadon doktor​—sakey a sekular a propesyon. (Lucas 5:31) Anggaman ed medyo aliwan sopistikadon paraan na panagtambal ed panaon nen Jesus, binidbir ton wala met so nagungguna ed tulong na sakey a doktor. Ipapatnag na saray Kristiano natan so inkasimbang no nipaakar ed sekular iran impormasyon, balet lalabanan da so kipaarap ed antokaman a nayarin pakaderalan na espiritualidad da.

19, 20. (a) Panon ya onkiwas iray mamatatken tekep na pakatebek sano tulongan da iramay palpalaran a mansalita? (b) Panon so pideneng na kongregasyon ed saramay siansia nin mangiyaalibansa na palso iran bangat?

¹⁹ Makana met so pakatebek ed biang na saray mamatatken no sikaray kakaukolanen ya ontulong ed saramay palpalaran a mansalita. (2 Timoteo 2:7) No maminsan, nalanor iray membro na kongregasyon ed pansisiblangan nipaakar ed angkekelag a bengatla tan mapalbeng iran argumento. Pian naprotektaan so pankakasakey na kongregasyon, nakaukolan ya alisto iray mamatatken a mangasikaso ed saratan a problema. Ontan met, paliisan da so panag-inap ed saray agagi ra tan ag-ira bengatbengat a mangipasen ed saratan bilang apostata.

²⁰ Deneskribe nen Pablo so awawey diad pangiter na nakakaukolan a tulong. Inkuanto: “Agagi, no wala so nasagmakan ed anton pankasalananan, sikayo a naespirituan sikato komon so ipawil yo ed espiritu na tayadno.” (Galacia 6:1) Diad espisipikon impanaglawi nen Judas ed saray Kristianon mipupuligesgesan ed panduaruwa, oniay insulat to: “Diad saray arum walaan kayo na panangasi, a wala ra’d panduaruwa: Ilaban yo ra balet so arum, dia ed panamsam yo ed sikara ed apoy.” (Judas 22, 23) Siempre, no walay siansia nin mangiyaalibansa na palso iran bangat kayari na aminpigan impamaat ed sikato, nakaukolan a determinadon onkiwas iray mamatatken pian salimbengan so kongregasyon.​—1 Timoteo 1:20; Tito 3:10, 11.

Panoen Tayoray Kanonotan Tayo na Makapadinayew Iran Bengatla

21, 22. Nipaakar ed anto so pagmaliw tayon mapili, tan anto so nepeg tayon iyan ed kanonotan tayo?

²¹ Ipupulisay na Kristianon kongregasyon iray makaderal a salita ya “onkayat a singa gangrena.” (2 Timoteo 2:16, 17, NW; Tito 3:9) Tua iya balanglan mangipatnag iratan na makapalikdon “kakabatan” ed mundo, say propaganda na saray apostata, odino botaktak a panagsalita ed loob na kongregasyon. Anggaman makagungguna so maabig a pilalek ed pakaaral na balo iran bengatla, say agnabanlongan ya inkaupapet so mangipaarap ed sikatayo ed makaderal iran ideya. Aliwa itayon manga-manga nipaakar ed saray paraan nen Satanas. (2 Corinto 2:11) Amta tayo a pirmi so panggugunaet ton mangisuawi ed sikatayo ta pian ontayer itayo ed panaglingkor ed Dios.

²² Bilang maabig iran ministro, komon ta mapekder tayon itandoro so maridios a bangat. (1 Timoteo 4:6) Komon ta makabat tayon usaren so panaon tayo diad pagmaliw a mapili ed impormasyon ya usisaen tayo. Diad ontan, ag-itayo mainomay a nagirogiro na propaganda a pinuyanan nen Satanas. On, komon ta mantultuloy tayon nonoten iray “ganagana ‘ray bengatlan matua, ganagana ‘ray bengatlan gagalangen, ganagana ‘ray bengatlan matunong, ganagana ‘ray bengatlan malinew, ganagana ‘ray bengatlan nababalita a maong: no wala so antokaman a kasimpitan, no wala so antokaman a daydayewen.” No panoen tayoray kanonotan tan kapusoan tayo na ontan iran bengatla, say Dios na deen so mangantabay ed sikatayo.​—Filipos 4:8, 9.

Anto so Naaralan Tayo?

• Panon a nayarin pakapeligroan na espiritualidad tayo so kakabatan na mundo?

• Anto so nagawaan tayo pian nasalimbengan tayoy inkasikatayo manlapud makaderal ya impormasyon na saray apostata?

• Anton klase na panagsalita so nepeg tayon paliisan ed loob na kongregasyon?

• Panon a nipatnag so Kristianon inkasimbang sano manuusisa ed dakerakel ya impormasyon natan?

[Tepetepet Parad Panagaral]

[Litrato ed pahina 9]

Say dakerakel a bantog iran magasin tan libro so misumlangan ed saray estandarte na Kristiano

[Litrato ed pahina 10]

Nayarin maniiteran iray Kristiano na ideya ya agmagmaliw a dogmatiko