Sikami Iray Klasen Walaan na Pananisia

Pangipaalagey na Pananisia Diad Panagaral na Biblia ed India

MANLAPUD atagtagey, asakbongan na yelon Kapalandeyan na Himalaya ed amianen anggad ampetang iran gilig na dayat na Indian Ocean ed abalaten, say India et sakey a bansan walay panduruma, unong ed heograpiya tan relihyon. Diad populasyon ton masulok a sakey bilyon, ngalngalin 83 porsiento so Hindu, 11 porsiento so Muslim, tan saray nakekeraan et tugyopen na mankuan a Kristiano, Sikh, Buddhista, tan Jain. Panggagayagaan na amin so kawayangan ed panagdayew. “Say relihyon so walaan na importantin betang ed kabibilay na India,” so inkuan na The World Book Encyclopedia.

Balitadon maong iray Tastasi nen Jehova lapud pambibilay da unong ed Kristianon pananisia ra, a say bilang da et masulok a 21,200 diad India. Singa saray kaagian da ed arum a parti na mundo, ipapasen na saray Tastasi diad India a sakey a pribilihyo so panulong ed saray kapara ran totoo pian mangipaalagey na mabiskeg a pananisia ed Salita na Dios, say Masanton Biblia. (2 Timoteo 3:16, 17) Konsideraen no panon ya akapikabat ed katuaan na Biblia so sakey a pamilya ed Chennai diad abalaten na India.

Sakbay na impakapitongtong da ed saray Tastasi nen Jehova, sayan pamilya so aktibon kabiangan ed saray aktibidad na Katolikon karismatiko, a mangibabagan makakanengneng na saray pasingawey, makapansasalita na nanduruma, tan makapanpapaabig ed saray mansasakit. Sikaray prominenti ed simbaan tan ed komunidad, say tawag ni ingen na totoo ed arum a membro na pamilya et “swami,” a mankabaliksan na “katawan.” Insan aminsan ya agew, sakey a Tasi so binmisita ed pamilya tan impanengneng to ed sikara ed Biblia a si Jesus et Anak na Dios, aliwan Makapanyarin-amin a Dios, unong a kaslakan a sisiaen. Impanengneng met na Tasi ed sikara a say ngaran na Dios et Jehova tan say gagala nen Jehova ed dalin et pagmaliwen itan a marakdakep a paraiso.​—Salmo 83:18; Lucas 23:43; Juan 3:16.

Lapud rerespetoen day Salita na Dios tan agustoan day nadngel da, saray membro na sayan pamilya so impaiyaralan na Biblia ed saray Tastasi nen Jehova. Saya so sengegan na impamalaw-balaw na saray kabkabat da ed simbaan. Anggaman kuan, nansiansian determinado so pamilya ya itultuloy so panagaral day Biblia. Legan ya ondaraak so pikakabat da tan say pananisia ra so ombibiskeg, intunda ray palson relihyoson agagamil da. Natan, taloran membro na sayan pamilya so maseseg, bautismadon Tastasi, tan say ina so manlilingkor bilang auxiliary payunir kapiganman a posibli.

Pananisian Manaeg ed Saray Deperensia’d Laman

Si Sunder Lal, sakey a balolaki a manaayam ed baryo na Punjab, so nankaukolan na baleg a pananisia tan tepel ta pian inabang ed arum so maong a balita na Panariay Dios. (Mateo 24:14) Say sakey a rason et inkaindan toy polytheistic iran sisiaen na pamilya tan kabandaan to pian mandayew ed tuan Dios, si Jehova. Say sakey nin rason et pukol iray ulpo nen Sunder Lal.

Anggad sanen 1992, say bilay nen Sunder Lal et rotina. Sikatoy nantrabaho bilang katulongan na doktor tan akibiang ed mismon pamilya to ed panagdayew ed nanduruman dirios ed silong na panangigiya na pinili ran guru. Insan sakey a labi, sikatoy atumba legan ya ombabaliw ed riles na tren. Dirediretso so tren tan aputot so nantupag ya ulpo to. Anggaman sikatoy abilay, say mundo to so nansian.  Natalosan, agonigon a maong si Sunder Lal tan ninonot to ni ingen so manbikkel. Sikatoy sinuportaan na pamilya to, balet singa anggapo lay ilalo to ed arapen to.

Insan sakey ed saray Tastasi nen Jehova so dinmalaw ed si Sunder Lal tan impanengneng ed sikato ed Biblia ya insipan na Dios a pagmaliwen To so dalin a marakdakep a paraiso tan ipagamor Toy ayadyarin bunigas ed amin a mangaro tan ontakot ed sikato. Impaiyaralan na Biblia si Sunder Lal, tan diad loob na sakey taon et sikatoy maseet a nanaral. Sikatoy inimbitaan ya onatendi ed saray Kristianon miting tan diad kaunoran et sikatoy akila ya inlason ed bisiklita na sakey a kaaro. Anggaman nairapan ed inlason to, baleg so gungguna. Say naaralan to ed personal a panaaral toy Biblia so apekderan sanen akabat toray arum a talagan manisia ed saray sipan na Salitay Dios tan manbibilay a mitunosan ed saray bangat na Biblia.

Innabang nen Sunder Lal so maong a balita ed kakaabay to, tan nen 1995 sikatoy abautismoan. Diad inmuna, sikatoy ilus-ilus ya akibiang ed panagkabkaabungan a ministeryo diad baryo da, a saman so normal a paraan ya ililiber to. Balet natan et sikatoy niregaloan na saray kaagian to​—sakey a bisiklitan taloray dalig impasadyan “pidalan” na lima. Diad tulong na sayan bisiklita, sikato la natan so mabetbet a makapansulo tan sarag to lan mismo a biahien so 12 kilometro pian onatendi ed saray miting ed kongregasyon. No maminsan sikatoy manbisiklitan bukor anggaman bigla-bigla iray uran; no maminsan met say temperatura et masulok a 110 degrees Fahrenheit.

Niarum ed iyaatendi ed saray miting, dakel so iyaaralan nen Sunder Lal na Biblia a manpilalek met a patulongan a mangipaalagey na mabiskeg a pananisia ed tuan Dios, si Jehova. Diad tua, pitora ed saray datin iyaaralan to na Biblia et bautismado la, likud ed taloran akatongtong to balet ta saray kaparan Tastasi so angiyaral na Biblia ed sikara.

Unong ed Biblia, say “pananisia et aliwan kayarian na amin a totoo.” (2 Tesalonica 3:2, NW) Balet parad saraman so “suston nikiling ed andi-anggaan a bilay,” say regular a panagaral na Salitay Dios so makapangipaalagey na mabiskeg a pananisia. (Gawa 13:38, NW) Satan a panagaral et pagmaliwen to met iray mata a masnag nipaakar ed ilalon marakdakep ya arapen​—bengatlan pangaagamilan na pananisia na ondarakel a bilang na totoo diad India.

[Mapa ed pahina 30]

(Parad aktual a format, nengnengen so publikasyon)

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.