Pansiansiaen so Pananisia ed Mapropetikon Salita na Dios!

“Walaan kami na mapropetikon salita ya agawan lalon segurado.”​—2 PEDRO 1:19, NW.

1, 2. Anto so inmuna-unan propesiya a nikurit ed kapiganman, tan anto so sakey ed saray tepet a pinalesa na satan?

 SI Jehova so Nanlapuan na inmuna-unan propesiya a nikurit ed kapiganman. Kayari na impankasalanan di Adan tan Eva, oniay inkuan na Dios ed uleg: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:1-7, 14, 15) Linmabas ni so dakel a siglo sakbay ya atalosan a maong iratan a mapropetikon salita.

² Satan ya inmuna-unan propesiya so anginatnat na peteg ya ilalo ed makasalanan a katooan. Diad saginonor, impabidbir na Kasulatan a si Satanas a Diablo so “daan ya uleg.” (Apocalipsis 12:9) Balet siopa imay insipan a Bini na Dios?

Panaanap ed Bini

3. Panon so impangagamil nen Abel na pananisia ed inmuna-unan propesiya?

³ Aliwan singa say ama to, inagamil nen maridios ya Abel so pananisia ed sayan inmuna-unan propesiya. Mapatnag ya amoria nen Abel a nakaukolan so pangipaagus na dala pian nasakbongan so kasalanan. Lapud pananisia sirin, sikato so apakiwas a mangibagat na ayep ya inabobonan na Dios. (Genesis 4:2-4) Ingen, say pakabidbiran ed insipan a Bini so nansiansian misteryo.

4. Anton sipan so inter na Dios ed si Abraham, tan anto so impabitar na satan nipaakar ed insipan a Bini?

⁴ Manga 2,000 taon kayari na panaon nen Abel, inter nen Jehova ed si patriarkan Abraham iyan mapropetikon sipan: “Papalaren ta ka, tan dia ed panamarakel parakelen ko so ilalak mo a singa saray bitewen ed katawenan . . . Tan dia ed ilalak mo so pakapikapalaranan na saray amin a nasyon.” (Genesis 22:17, 18) Saratan a salita so angisiglaot ed si Abraham diad kasumpalan na inmunan propesiya. Impabitar na saratan a say Bini a mangiyan ed saray kimey nen Satanas ed panganggaan so ompatnag ed linyay kapolian nen Abraham. (1 Juan 3:8) ‘[Lapud] sipan na Dios, agnanduaruwa [si Abraham] ed panamegley na agpananisia’ pati saray arum nin sakbay-Kristianon tastasi nen Jehova ya ‘agda ni naawat so sipan.’ (Roma 4:20, 21; Hebreos 11:39) Imbes, impansiansia ra so pananisia ra’d mapropetikon salita na Dios.

5. Diad siopa so inkasumpalan na sipan na Dios nipaakar ed Bini, tan akin ya ontan so ebat yo?

⁵ Imparungtal nen apostol Pablo so nipaakar ed insipan a Bini na Dios sanen insulat to: “Saray sipan ed si Abraham, tan say ilalak to. Agto kuan, Tan saray ilalak to, singa nipaakar ed dakerakel; noag ingen ed saksakey, tan say ilalak mo, a sikato si Kristo.” (Galacia 3:16) Say Bini a kabendisionan na saray nasyon so ag-angilanor ed amin ya ilalak nen Abraham. Agnausar iray kapolian na ilalak ton si Ismael tan ed saray ilalak to ed si Keturah pian nabendisionan so katooan. Say Bini a pakabendisionan so dinmalan ed panamegley na anak ton Isaac tan ed apo ton si Jacob. (Genesis  21:12; 25:23, 31-34; 27:18-29, 37; 28:14) Impanengneng nen Jacob a saray “totoo” so ontulok ed Shiloh a walad tribu na Juda, balet diad saginonor et say Bini so ompaway la ed linyay kapolian nen David. (Genesis 49:10; 2 Samuel 7:12-16) Inilaloan na saray inmunan-siglon Judio ya onsabi so sakey a too bilang say Mesias, odino Kristo. (Juan 7:41, 42) Tan asumpal so propesiya na Dios nipaakar ed Bini dia ed Anak to, si Jesu-Kristo.

Pinmatnag so Mesias!

6. (a) Panon tayon talosan so propesiya nipaakar ed 70 a simsimba? (b) Kapigan tan panon ya ‘impangangga [nen Jesus] so kasalanan’?

⁶ Inkurit nen propeta Daniel so sakey ya importantin propesiya nipaakar ed Mesias. Diad pilimeron taon nen Dario a Medo, amoria ton say 70-taon a pankibalatar na Jerusalem so asingsingger lan nasumpal. (Jeremias 29:10; Daniel 9:1-4) Leleg a manpipikasi si Daniel, pinmayawar si anghel Gabriel tan imparungtal ton say ‘pitomplo a simba so nigeter lan panganggaan na kasalanan.’ Ompatey so Mesias diad kapegleyan na koma-70 a simba. Ginmapo so “pitomplo a simsimba na taotaon” nen 455 K.K.P. sanen ‘impaway nen [Arin Artaxerxes I na Persia] so ganggan ya ipaalagey so Jerusalem.’ (Daniel 9:20-27, Moffatt; Nehemias 2:1-8) Onsabi so Mesias kayari na 7 simba tan 62 a simsimba. Sayan 483 a taon so ginmapo nen 455 K.K.P. ya anggad 29 K.P., sanen abautismoan si Jesus tan nilanaan na Dios bilang Mesias, odino Kristo. (Lucas 3:21, 22) ‘Impangangga [nen Jesus] so kasalanan’ diad impangiter toy bilay to bilang dondon nen 33 K.P. (Marcos 10:45) Agaylan abig iran rason diad pakawalaay pananisia ed mapropetikon salita na Dios! *

7. Diad pangusar ed Kasulatan, ipabitar yo pa no panon so impanumpal nen Jesus ed propesiya a nipaakar ed Mesias?

⁷ Lapud pananisia ed mapropetikon salita na Dios, abidbiran tayo so nipaakar ed Mesias. Diad dakel iran propesiya nipaakar ed Mesias a nikurit ed Hebreon Kasulatan, walaray direktan inyaplika ed si Jesus na saray managsulat na Kristianon Griegon Kasulatan. Diad pangiyilustra: Si Jesus so inyanak na sakey a birhen diad Betlehem. (Isaias 7:14; Miqueas 5:2; Mateo 1:18-23; Lucas 2:4-11) Sikato so tinawag ed Ehipto, tan pinapatey iray kapangiyanak kayari na inkianak to. (Jeremias 31:15; Oseas 11:1; Mateo 2:13-18) Inawit nen Jesus iray sakisakit tayo. (Isaias 53:4; Mateo 8:16, 17) Unong a nipasakbay, sikato so linmoob ed Jerusalem panamegley na sakey a kilaw ya asno. (Zacarias 9:9; Juan 12:12-15) Asumpal iray salita na salmista sanen nipasak si Jesus sanen nan-aapagan na saray sundalo so kawes to tan nanpapalaranan da so akindalem a kawes to. (Salmo 22:18; Juan 19:23, 24) Say katuaan ya ag-aputer iray pukel nen Jesus tan say inkaduyok to so kasumpalan met na propesiya. (Salmo 34:20; Zacarias 12:10; Juan 19:33-37) Pigara lambengat iratan ya alimbawa na saray propesiya nipaakar ed Mesias ya inyaplika ed si Jesus na saray managsulat na Biblia a pinuyanan na Dios. *

Itandoro so Mesianikon Ari!

8. Siopa so Masiken na saray Ag-agew, tan panon ya asumpal so propesiyan nikurit ed Daniel 7:9-14?

⁸ Diad pilimeron taon na Ari na Babilonia a si Belsasar, walay impakugip nen Jehova ed si propeta Daniel tan sikatoy naikdan met na makatantanda iran pasingawey. Anengneng ya unona na propeta so apatiran angkakabaleg ya ayep. Saratan so impabidbir na anghel na Dios bilang “apatira ya arari,” a mangipapabitar sirin ya insimbolo ra so nantutumbokan a pakayari ed mundo. (Daniel 7:1-8, 17) Insan anengneng nen Daniel si Jehova, ‘say Masiken na saray Ag-agew,’ a maglorian akatrono. Diad pirmin impangukom ed saray ayep, inekal to so pananguley ed sikara tan dineral to so komapat ya ayep. Say magnayon a pananguley ed “say baley, saray nasyon, tan pansasalita” so niiter ed saman ed “singa sakey ya anak na too.” (Daniel 7:9-14) Agaylan abig a propesiya a misiglaotan ed inkitrono na “Anak na too,” si Jesu-Kristo, diad katawenan nen taon 1914!​—Mateo 16:13.

9, 10. (a) Anto so tutukoyen na saray nanduruman parti na akugip ya imahen? (b) Panon yon ipaliwawa so kasumpalan na Daniel 2:44?

 ⁹ Amta nen Daniel a say Dios so “mangekal tan mangipasen na saray arari.” (Daniel 2:21) Tekep na pananisia ed si Jehova, a “Mangipatnag ed saray maamot,’ imparungtal na propeta so kabaliksan na kugip nen Arin Nabucodonosor na Babilonia nipaakar ed abalbaleg ya imahen. Saray nanduruman parti na satan so manutukoy ed inyalagey tan inkagba na saratan a pakayari ed mundo a singa say Babilonia, Medo-Persia, Gresya, tan Roma. Inusar met na Dios si Daniel pian idalatdat toray ebento ed mundo angga ed panaon tayo a manpatuloy.​—Daniel 2:24-30.

¹⁰ “Dia ed saray agew naani na saratan ya ar-ari,” kuan na propesiya, “say Dios na tawen mamaalagey naani na sakey a panarian ya anggan kapigan agnaani naderal tan say panaguley to agnaani niiter ed sananey a baley: balet buybuyaken to naani tan upoten to naani so saraya ya amin a panarian, et sikato so mansiansia lawas.” (Daniel 2:44) Sanen anampot la ‘iray agew na saray Gentil’ nen 1914, inletneg na Dios so mangatatawen a Panarian ed silong nen Kristo. (Lucas 21:24; Apocalipsis 12:1-5) Diad panamegley na madibinon pakayari, atapsing ed saman so Mesianikon “bato” na Panarian manlapud “palandey” na sankatalbaan ya inkasoberano na Dios. Diad Armagedon et onkena itan a bato ed imahen tan mekmeken to itan. Bilang sakey a pinmalandey a gobierno a manguley ed “amin a dalin,” say Mesianikon Panarian so mansiansia lawas.​—Daniel 2:35, 45; Apocalipsis 16:14, 16. *

11. Anto so ipapasimar na transpigurasyon nen Jesus, tan antoy epekto na satan a pasingawey ed si Pedro?

¹¹ Lapud sinononot ed Panarian to, oniay inkuan nen Jesus ed saray babangatan to: “Walaray arum ed saray wadia, ya anggan panon agda naani natawayan so patey, anggad pakanengneng da ed Anak na too ya onsabi ed panarian to.” (Mateo 16:28) Kayari anem agew, di Pedro, Santiago, tan Juan so intagar nen Jesus diad atagey a palandey a diman da naimatonan so transpigurasyon to. Nen sinaniban na masnag a lurem iray apostol, oniay inyabawag na Dios: “Sikatoya so inarok ya Anak, a sikatoy panliketan kon maong; sikato so dengelen yo.” (Mateo 17:1-9; Marcos 9:1-9) Agaylan pasimar na gloria na Panarian nen Kristo! Agla pankelawan no akin a tinukoy nen Pedro itan a makapakelkelaw a pasingawey tan inkuanto: “Walaan kami na mapropetikon salita ya agawan lalon segurado.”​—2 Pedro 1:16-19, NW. *

12. Akin a saya la so panaon pian ipatnag so pananisia tayo ed mapropetikon salita na Dios?

¹² Ompatnag ya aglambengat lalaktipen na “mapropetikon salita” iray propesiyan walad Hebreon Kasulatan nipaakar ed Mesias noagta ontan met ed balikas nen Jesus a sikato so onsabin walaay “pakayari tan baleg a gloria.” (Mateo 24:30) Pinekderan na transpigurasyon so mapropetikon salita nipaakar ed maglorian isasabi nen Kristo ed pakayari na Panarian. Maganggano la, say ipatnag to ed gloria so mankabaliksay kadederal ed saramay andian na pananisia tan bendision ed saramay mangaagamil na pananisia. (2 Tesalonica 1:6-10) Papaneknekan na kasumpalan na propesiya na Biblia a saraya la so ‘kaunoran iran agew.’ (2 Timoteo 3:1-5, 16, 17; Mateo 24:3-14) Bilang Manunan Manangipaakseb nen Jehova, si Miguel, salanti si Jesu-Kristo, so akaparaan lan mangitarok ed panganggaan na sayan marelmeng a sistema na bengabengatla legan na ‘baleg a kairapan.’ (Mateo 24:21; Daniel 12:1) Segurado sirin, a saya la so panaon pian ipanengneng a walaan itayoy pananisia ed mapropetikon salita na Dios.

Mantinien so Pananisia ed Mapropetikon Salita na Dios

13. Anto so makatulong ed sikatayo pian namantini tayo so aro ed Dios tan napansiansia tayon mabilay so pananisia tayo ed salita to?

¹³ Maseguron asagyat itayo sanen naaralan tayo nen inmuna so nipaakar ed saray kasumpalan na mapropetikon salita na Dios. Balet kasin tinmayer la so pananisia tayo tan binmetel lay aro tayo manlapu la’d saman? Agtayo komon magmaliw a singa saray Kristiano ed Efeso ya ‘inkaindan da so akauna ya aro ra.’ (Apocalipsis 2:1-4) Anggan panon lay kabayag tayon manlilingkor ed si Jehova,  ontan so nasagmak tayo no agtayo ‘unaen so panarian na Dios tan say inkatunong to’ pian makatipon tayo na saray kayamanan ed tawen. (Mateo 6:19-21, 31-33) Say makulin panagaral ed Biblia, maparanay a pibibiang ed saray Kristianon miting, tan say maseseg a panangipulong ed Panarian so ontulong ed sikatayo pian namantini tayo so aro ed si Jehova, ed Anak to, tan ed Kasulatan. (Salmo 119:105; Marcos 13:10; Hebreos 10:24, 25) Bilang kasumpalan, saya so mamasiansian mabilay ed pananisia tayo ed salitay Dios.​—Salmo 106:12.

14. Panon ya atumangan iray alanaan a Kristiano lapud pananisia ra ed mapropetikon salita nen Jehova?

¹⁴ No panon ya asumpal nensaman so mapropetikon salita na Dios, nawalaan tayo met na pananisia ed walaran ipapasakbay na satan ed arapen. Singa bilang, petepeteg la natan so kiwawala nen Kristo ed gloria na Panarian, tan naeksperiensia la na saray alanaan a Kristiano a nanmatoor anggad patey so kasumpalan na mapropetikon sipan: “Say manalo, pakanen ko ed kiew na bilay, a sikato so wala ed pegley na paraiso na Dios.” (Apocalipsis 2:7, 10; 1 Tesalonica 4:14-17) Impagamor nen Jesus ed sarayan nambiktorya so pribilihyon ‘mangan ed kiew na bilay’ diad mangatatawen a “paraiso na Dios.” Diad kioli ra tan diad panamegley nen Jesu-Kristo, minabang ira ed imortalidad tan agkabulok ya ipagamor nen Jehova, say “Ari ya andi angga, ag-ompatey, agnanengneng, say saksakey a Dios.” (1 Timoteo 1:17; 1 Corinto 15:50-54; 2 Timoteo 1:10) Agaylan engranden tumang lapud agnaumas a panangaro ra ed Dios tan agnagiing a pananisia ra ed mapropetikon salita to!

15. Diad siopa so inkiletnegan na pundasyon na ‘balon dalin,’ tan sioparay kakaiba ra?

¹⁵ Nen inmoli iray matoor ya inaatey lan alanaan dia ed mangatatawen a “paraiso na Dios,” nibulos so nakdaan na espiritual ya Israel diad dalin manlapud “Babilonia a Baleg,” say sankamundoan ya empiryo na palson relihyon. (Apocalipsis 14:8; Galacia 6:16) Diad sikara so inkiletnegan na pundasyon na ‘balon dalin.’ (Apocalipsis 21:1) Kanian nitarok so “dalin” tan niletneg itan diad espiritual a paraiso ya onnanatnat ed sankadalinan natan. (Isaias 66:8) Ditan so kakamangan na dakerakel a kinmarneron kakaiba na espiritual ya Israel natan, “dia ed saray kaunoran ya agew.”​—Isaias 2:2-4; Zacarias 8:23; Juan 10:16; Apocalipsis 7:9.

Say Arapen na Katooan a Nipasakbay ed Mapropetikon Salita na Dios

16. Antoray ilalo na saray matoor a mananuporta ed saray alanaan?

¹⁶ Antoray ilalo na matoor iran mananuporta  ed saray alanaan? Walaan met ira na pananisia ed mapropetikon salita na Dios, tan akateen so ilalo ra ed iloob ed mangaraldalin a Paraiso. (Lucas 23:39-43) Diman ira oninum ed mananustuni-bilay ya “ilog na danum na bilay” tan naeksperiensia ra so pakatambal panamegley na ‘saray bulong na saray kiew’ a nitanem ed gilig na satan. (Apocalipsis 22:1, 2) No walaan kayo na ontan ya alay abig ya ilalo, komon ta mantultuloy yon ipanengneng so aralem a panangaro ed si Jehova tan pananisia ed mapropetikon salita to. Kabiangan kayo komon ed saramay makaeksperiensia ed agnasabsabaan a liket ed andi-anggaan a bilay diad Paraison dalin.

17. Antoran bendision so laktipen na bilay diad mangaraldalin a Paraiso?

¹⁷ Agsigpot a nideskribe na saray ag-ayadyarin totoo so bilay ed onsabin mangaraldalin a Paraiso, balet say mapropetikon salita na Dios so mangiter ed sikatayo na aralem a pakatalos ed saray bendision a nisagana parad matulok a katooan. Sano sigpot lan makapanuley so Panarian na Dios tan say linawa to so nagawa la’d dalin a singa met ed tawen, anggapo lay mauges a totoo, pati masebeg ya ayayep, a “mamaunong odino mamagbag.” (Isaias 11:9; Mateo 6:9, 10) Saray mauyamo so manayam ed dalin, tan “manliket ira a dili ed inkadaakan na kareenan.” (Salmo 37:11) Anggapo lay naerasan a totoo, lapud ta “wala so daakan ya ilik ed tapew na dalin ed tapew na toktok na saray palandey.” (Salmo 72:16) Anggapo laray onagus a lua lapud ermen. Naandi lay sakisakit, pati say ipapatey. (Isaias 33:24; Apocalipsis 21:4) Nonoten pa​— anggapo laray doktor, anggapo laray tambal, anggapo laray ospital odino mental institution, anggapo laray ponpon. Agaylan abig iratan ya ilalo!

18. (a) Anto so nipaseguro ed si Daniel? (b) Anto naani so ‘pakapalaran’ nen Daniel?

¹⁸ Anggan say kaslakan a lubok na katooan so nabakantian la lapud ta salatan la na kikioli so ipapatey. Ontan so ilalo nen matunong a Job. (Job 14:14, 15) Ontan met ed si propeta Daniel, lapud ta oniay makaligliwan impaseguro’d sikato na anghel nen Jehova: “Balet sika onla ka ed dalan mo angga ed kasumpalan; ta manpainawa ka naani, tan onalagey ka naani ed kapalaran mo, ed kasampotan na saray agew.” (Daniel 12:13) Si Daniel so matoor a nanlingkor ed Dios anggad impatey to. Natan et sikatoy manpapainawa ni’d patey, balet sikato so “onalagey” naani diad “kioli ed bilay na saray matunong” legan na Milenyon Uley nen Kristo. (Lucas 14:14) Anto so ‘pakapalaran’ nen Daniel? Bueno, diad kasumpalan na satan nipaakar ed Paraiso, nipabitar ed propesiya nen Ezequiel a walay napanayaman na amin a totoo nen Jehova, salanti say dalin ya apagen ed makatunongan tan mauksoy a paraan. (Ezequiel 47:13–48:35) Kanian walay napanayaman nen Daniel ed Paraiso, balet aliwa lambengat a dalin so pinabangan to’d man. Laktipen na satan so betang to ed gagala nen Jehova.

19. Anto so nakaukolan pian manbilay ed mangaraldalin a Paraiso?

¹⁹ Komusta kayo balet tan say pakabendisionan yo? No walaan kayoy pananisia ed Salitay Dios, say Biblia, maseguron pipirawaten yoy manbilay ed mangaraldalin a Paraiso. Nayarin ililitrato yo la’d kanonotan yo a wadman kayo, a manggagayaga ed dakel iran bendision, mangaasikaso ed dalin, tan magayagan mangaabrasa ed saray inmoli. On, say Paraiso so kien na katooan. Pinalsa na Dios so inmunan sankaparis pian manbilay ed ontan a pasen. (Genesis 2:7-9) Tan labay ton manbilay ya ando lan ando iray matulok a totoo diad Paraiso. Kasin onkiwas kayo a mitunosan ed Kasulatan ta pian napibilang kayo ed binilyon a manbilay naani ed Paraison dalin? Makapanayam kayo diman no petepeteg so panangaro yo ed mangatatawen ya Ama tayo, si Jehova, tan pansiansiaen tayo so pananisia ed mapropetikon salita na Dios.

[Saray paimano ed leksab]

Panon Yon Ebatan?

• Anto so inmuna-unan propesiya, tan siopa so insipan a Bini?

• Anto so pigara ed saray propesiya nipaakar ed Mesias ya asumpal ed si Jesus?

• Panon a nasumpal so Daniel 2:44, 45?

• Say mapropetikon salita na Dios so mangipapabitar ed anton arapen na matulok a katooan?

[Tepetepet Parad Panagaral]

[Litrato ed pahina 18]

Kasin pipirawaten yo so manbilay ed mangaraldalin a Paraiso?