Pansiansiaen Yon Masnag so ‘Ilalo Yo ed Kilalaban’!

“Isulong . . . bilang sakey a pamulaw so ilalo ed kilalaban.”​—1 TESALONICA 5:8, NW.

1. Panon a makatulong so “ilalo ed kilalaban” diad panagsungdo?

 SAY panilalo parad kisalba so ontulong ed sakey a too a mantultuloy anggano diad makapasinagem iran kipapasen. Lalon niyan-anos na sakey a biktimay nakneb a bapor legan a sikatoy akapeket ed balsa no amta ton asingger lan onsabi so tulong. Mipadpara, diad loob na nilibo lan taon, say ilalo ed ‘say panangilaban nen Jehova’ so amabiskeg ed lalaki tan bibii na pananisia diad saray panaon na gonigon, tan sayan ilalo so agbalot nansumpal ed inkadismaya. (Exodo 14:13; Salmo 3:8; Roma 5:5; 9:33) Inyaliling nen apostol Pablo so “ilalo ed kilalaban” ed sakey a “pamulaw” a kabiangan na espiritual a kinlong na sakey a Kristiano. (1 Tesalonica 5:8; Efeso 6:17) On, say pagmaliw tayon matalek ed pangiliktar ed sikatayo na Dios so manalimbeng ed pakayari na panag-isip tayo, a napansiansia tayo so panaglikas tayo anggaman ed kairapan, isusumpa, tan tukso.

2. Diad antoran paraan a say “ilalo ed kilalaban” so manunan kabiangan na tuan panagdayew?

² Inkuan na The International Standard Bible Encyclopedia, a say “ilalo nipaakar ed arapen so agnapatnagan ed paganon mundo,” salanti, say mundon akapaliber ed inmunan-siglo iran Kristiano. (Efeso 2:12; 1 Tesalonica 4:13) Ingen, “say ilalo ed kilalaban” so manunan kabiangan na tuan panagdayew.  Panon ya ontan? Unona, say kilalaban na saray lingkor nen Jehova so nisiglaot ed mismon ngaran to. Oniay impikasi nen salmista ya Asaf: “Tulongan mo kami, O Dios na kilalaban mi, ya inonot mo a kigalangan na ngaran mo: tan iliktar mo kami.” (Salmo 79:9; Ezequiel 20:9) Niarum ni, say panmatalek ed insipan nen Jehova iran bendision so makana ed pakawalaan tayoy maong a relasyon ed sikato. Oniay impangibalikas nen Pablo: “No anggapo so pananisia [sikato so] agnayarin paliketen: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) Niarum ni, impaliwawa nen Pablo a say kilalaban na saray magbabawi so manunan rason no akin a linma diad dalin si Jesus. Inyabawag to: “Matoor so saya a salita, tan manepeg ya awaten na ami-amin, a si Kristo Jesus linma dia ed mundo pian ilaban to so saray managkasalanan.” (1 Timoteo 1:15) Tan tinukoy nen apostol Pedro so kilalaban bilang ‘say bunga [odino, pansumpalan] na pananisia tayo.’ (1 Pedro 1:9) Mabitar, manepeg so panilalo ed kilalaban. Balet anton talaga so kilalaban? Tan anto so nakaukolan pian nagamoran itan?

Anto so Kilalaban?

3. Anton klase na kilalaban so naeksperiensia na saray lingkor nen Jehova nensaman?

³ Diad Hebreon Kasulatan, say “kilalaban” so kaslakan a mankabaliksan na kisalba odino kiliktar manlapud kapapairap  odino manlapud maramsak tan ag-ilaloan ya ipapatey. Singa bilang, diad impanawag to’d si Jehova a “Manangilegyas,” oniay inkuan nen David: “Say Dios, a dampay ko, . . . apireng ko; Manangilaban ko, ilaban moak ed pasoot. Ontawag ak ed Jehova, a Sikato so manepeg ya igalang: dia ed ontan nilaban ak ed saray kabusol ko.” (2 Samuel 22:2-4) Amta nen David ya ontalineng si Jehova sano onkerew na tulong iray matoor a lingkor To.​—Salmo 31:22, 23; 145:19.

4. Anton ilalo ed bilay diad arapen so walad kanonotan na saray sakbay-Kristianon lingkor nen Jehova?

⁴ Sinononot met iray sakbay-Kristianon lingkor nen Jehova ed ilalo parad bilay diad arapen. (Job 14:13-15; Isaias 25:8; Daniel 12:13) Diad tua, dakel ed saray sipan a panangiliktar a naromog ed Hebreon Kasulatan so mangipapasakbay ed sakey a babaleg a kilalaban​—sakey a mangitonton ed andi-anggaan a bilay. (Isaias 49:6, 8; Gawa 13:47; 2 Corinto 6:2) Diad panaon nen Jesus, nanilalo iray dakel a Judio ed andi-anggaan a bilay, balet agda inawat si Jesus bilang say tombok ed pakasumpal na iilaloan da. Oniay inkuan nen Jesus ed saray pangulo na relihyon ed panaon to: “Usisaen yo so saray sulsulat, ta nonoten yo a diad sikara wala so bila’yon maando; et saraya so mantasi ed siak.”​—Juan 5:39.

5. Anto so manunan kabaliksan na kilalaban?

⁵ Diad panamegley nen Jesus, imparungtal na Dios so kompleton detalyi na kabaliksan na kilalaban. Laktipen na satan so kibulos manlapud panangaripen na kasalanan, manlapud panangemgem na palson relihyon, manlapud mundon babanlongan nen Satanas, manlapud takot ed too, tan manlapu ni ingen ed takot ed ipapatey. (Juan 17:16; Roma 8:2; Colosas 1:13; Apocalipsis 18:2, 4) Diad kaunoran, parad saray matoor a lingkor na Dios, say panangilaban na Dios so aglambengat mankabaliksan na kiliktar manlapud panagpairap tan gonigon noagta pankanawnawa itan a pakawalaay bilay ya andi-anggaan. (Juan 6:40; 17:3) Imbangat nen Jesus a parad say “melag a pulok,” say kilalaban da so mankabaliksan na kioli ra ed mangatatawen a bilay pian miuley ira ed si Kristo dia ed Panarian. (Lucas 12:32) Parad saray arum a katooan, say kilalaban so mankabaliksan na kipawil da ed ayadyarin bilay tan pisisiglaotan ed Dios a nanggayagaan nensaman nen Adan tan Eva diad harden na Eden sakbay iran nankasalanan. (Gawa 3:21: Efeso 1:10) Say andi-anggaan a bilay ed ontan iran paraison kipapasen so orihinal a gagala na Dios ed katooan. (Genesis 1:28; Marcos 10:30) Balet, panon a magmaliw a posibli so kipawil ed ontan iran kipapasen?

Say Basiyan na Kilalaban​—Say Dondon

6, 7. Anto so betang nen Jesus ed kilalaban tayo?

⁶ Posibli so andi-anggaan a kilalaban diad panamegley lambengat na dondon bagat nen Kristo. Akin? Impaliwawa na Biblia a sanen nankasalanan si Adan, ‘inlako’ to so inkasikato tan amin ya ilalaken to, pati sikatayo, ed kasalanan​—kanian nakaukolan so dondon ta pian nawalaan na putel ya ilalo so katooan. (Roma 5:14, 15, 7:14) Say pangitarya na Dios ed dondon parad amin a katooan so inlitrato na saray bagat ya ayayep ed silong na Mosaikon Ganggan. (Hebreos 10:1-10; 1 Juan 2:2) Say impangibagat nen Jesus ed inkasikato so anumpal ed saratan a mapropetikon panangilitrato. Oniay inyabawag na anghel nen Jehova sakbay a nianak si Jesus: “Ilaban to naani so baley to ed saray kasalanan da.”​—Mateo 1:21; Hebreos 2:10.

⁷ Mamilagron nianak si Jesus ed si birhen Maria, tan bilang say Anak na Dios, agto atawir ed si Adan so ipapatey. Sayan katuaan katekep lay naspot ya impanmatoor to so angiter ed bilay to na balor a nakaukolan pian narondon so katooan manlapud kasalanan tan patey. (Juan 8:36; 1 Corinto 15:22) Aliwan singa say arum a totoo, ag-akondena si Jesus ed ipapatey lapud kasalanan. Ginetma toy linma diad dalin pian “iter toy bilay to a panondon ed amayamay.” (Mateo 20:28) Diad impanggawa to’d satan, say apaoli tan nitrono lan Jesus so wala la’d kipapasen a mangiter na kilalaban ed amin a makakapet ed saray kakaukolanen na Dios.​—Apocalipsis 12:10.

Anto so Nakaukolan Pian Nagamoran so Kilalaban?

8, 9. (a) Panon ya inebatan nen Jesus so tepet na mayaman tan malangwer a manuley nipaakar ed kilalaban? (b) Panon so impangusar nen Jesus ed sayan pankanawnawa pian ibangat iray babangatan to?

⁸ Oniay intepet nensaman na sakey a mayaman tan malangwer nin Israelitan manuley: “Anto so gawaen ko, pian natawir ko so bilay ya andi-anggaan?”  (Marcos 10:17) Nayarin napatnagan ed tepet to so ontatalonan panagnonot na Judio ed panaon to​—a walara labat so pigaran maong a gawa a kakaukolanen na Dios tan say panumpal ed saratan so pakagamoran la na sakey a too ed panangilaban na Dios. Balet satan a klase na pormal a debosyon so manlapu ed sinisiblet iran motibo. Saratan a gawa so agmakapangitarya ed peteg ya ilalo ed kilalaban, lapud ta anggapo so ag-ayadyarin too a naspot a makakapet ed saray estandarte na Dios.

⁹ Bilang ebat ed tepet na sayan laki, impanonot labat nen Jesus ed sikato a nepeg ton unoren iray ganggan na Dios. Tampol ya impaseguro na sayan malangwer a manuley ed si Jesus a gagawaen to la itan nanlapu la’d kaugawan to. Alikna nen Jesus so lugor ed sayan laki makasengeg ed satan ya inyebat to. Inkuan nen Jesus ed sikato: “Sakey a bengatla so kulang ed sika: onla ka, ilakom so anggan anton wala ed sika, et iter mo ed saray duruka, et wala naani kayamanan mo ed tawen: et gala, tumbok moak.” Balet, maermen ya inmarawi so malangwer a laki, lapud ta sikatoy “walaan na baleg a kayarian.” Kayari na saman et indanet nen Jesus ed saray babangatan to a makasbel ed pakagamor na kilalaban so pirmin panamabli ed saray materyal a bengatla na sayan mundo. Inyarum to ni ya anggapo so makagamor na kilalaban panamegley na dili iran sagpot to. Balet intuloy nen Jesus ya impaseguro lamet ed sikara: “Diad saray totoo agnayari, balet aliwan ontan ed Dios: ta amin a bengabengatla nayarian ira na Dios.” (Marcos 10:18-27; Lucas 18:18-23) Panon a posibli so kilalaban?

10. Antoran kondisyon so nepeg a kapeten tayo pian nagamoran so kilalaban?

¹⁰ Say kilalaban et sakey a langkap na Dios, balet aliwa itan ya automatikon nagamoran. (Roma 6:23) Wala so pigaran manunan kondisyon a nepeg a kapeten na kada too pian onnepeg ed satan a langkap. Inkuan nen Jesus: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” Tan oniay inyarum nen apostol Juan: “Say manisia ed Anak walay bilay ton andi-anggaan; balet say agmangunor ed Anak agto nanengneng so bilay, say sanok ingen na Dios so manayam ed sikato.” (Juan 3:16, 36) Malinew, kinaukolan na Dios so pananisia tan katutulok na kada too a manpipirawat a makagamor ed andi-anggaan a kilalaban. Nepeg a mandesisyon so balang sakey a mangawat na dondon tan manumbok ed saray bakat nen Jesus.

11. Panon a nagamoran na ag-ayadyarin too so panangabobon nen Jehova?

¹¹ Lapud ag-itayo ayadyari, agnisipor ed sikatayo so inklinasyon a mangunor tan imposibli so naspot a katutulok. Satan so rason no akin ya intarya nen Jehova so dondon pian nasakbongan iray kasalanan tayo. Anggaman kuan, nepeg a mantultuloy tayon pambanikelan so manbilay unong ed saray dalan na Dios. Unong ya inkuan la nen Jesus ed mayaman tan malangwer a manuley, nepeg ya unoren tayoray ganggan na Dios. No gawaen tayo itan, aliwa lambengat a panangabobon na Dios so nagamoran tayo noagta say baleg met a gayaga, lapud “saray ganggan to [et] aliwa ran ambelat”; saratan so “pakarepreskoan.” (1 Juan 5:3; Uliran 3:1, 8, NW) Siansia, aliwan mainomay so pansiansia ed ilalo nipaakar ed kilalaban.

‘Mibakal Kayo Nisesengeg ed Pananisia’

12. Panon a napabiskeg so sakey a Kristiano diad ilalo ed kilalaban pian naresistian toray imoral a pakatuksoan?

¹² Labay nen babangatan a Judas a sulaten iray inmuunan Kristiano nipaakar ed “kilalaban [a bebembenan da].” Balet, sikato so naobligan manimbawa ed saray agagi to a ‘mibakal nisesengeg ed pananisia’ lapud ontatalona so mauges a kipapasen ed moral. On, aliwan magenap so pakawalaay pananisia, pansiansia ed tuan Kristianon pananisia, tan itulok no paborabli so kipapasen, pian nagamoran so kilalaban. Kaukolan a mabiskeg a tuloy so debosyon tayo ed si Jehova pian naresistian tayo ray tukso tan imoral iran impluensia. Ingen, pinmalalo so impluensia na saray alablabas tan sebel ya agamil ed sekso, agpanagrespeto ed autoridad, inkaapag-apag, tan saray panduaruwa, diad loob na inmunan-siglon kongregasyon. Pian makaresisti ira ed saratan a tendensia, pinaseseg nen Judas so kapara ton Kristianos pian mabitar ed kanonotan da so kalat da: “Inaro, ipaalage’yo so inkasikayo ed sankasantosan a pananisia, a manpipikasi kayo ed espiritu santo, mansiansia kayo ed panangaro na Dios, tan manalagar kayo ed panangasi na Katawan tayo a  Jesu-Kristo ya onkana ed bilay ya andi-angga.” (Judas 3, 4, 8, 19-21) Say ilalo ed pakagamor na kilalaban so mamabiskeg ed sikara ed pibabakal da pian mansiansia iran malinis ed moral.

13. Panon tayon nipanengneng ya agtayo sinaew so gagala na agkanepegan a panangasi na Dios?

¹³ Iilaloan nen Jehova a Dios a napanuliranan ed moral a kondukta iramay pangipagamoran toy kilalaban. (1 Corinto 6:9, 10) Balet, say pansiansia ed saray moral ya estandarte na Dios so agmankabaliksan a magmaliw tayo lan maukom ed arum. Aliwan sikatayo so mandesidi ed magnayon a pansumpalan na kapara tayon totoo. Imbes, say Dios so mangukom, unong ya inkuan nen Pablo ed saray Griego diad Atenas: “Tinandaan to so sakey ya agew a sikato so pangukom to naani ed mundo unong ed katunongan, ed panamegley na saman a laki a tinandaan to”​—si Jesu-Kristo. (Gawa 17:31; Juan 5:22) No manbibilay itayon walaay pananisia ed dondon bagat nen Jesus, agnakaukolan ya ontakot itayo ed onsabin agew na panangukom. (Hebreos 10:38, 39) Say importantin bengatla et agtayon balot nepeg ya awaten so “grasya na Dios [say inkipulangan tayo ed sikato panamegley na dondon] ed andi kakanaan” diad pangiyabuloy tayo’d inkasikatayon natukso lapud makapuy a panagnonot tan kondukta. (2 Corinto 6:1) Niarum ni, diad panulong ed arum a makagamor na kilalaban, nipanengneng tayo ya agtayo sinaew so gagala na panangasi na Dios. Panon tayoran natulongan?

Inabang so Ilalo ed Kilalaban

14, 15. Siopa so angipabtangan nen Jesus ed pangipalapag na maong a balita na kilalaban?

¹⁴ Diad impangaon ed si propetan Joel, insulat nen Pablo: “Siopaman ya ontawag ed ngaran na Katawan, nilaban.” Insan inyarum to: “Panon sirin so panawag da ed saman so agda sinisia? Tan panon so panisia ra ed agda nadngelan? Tan panon so pakadngel da no anggapo so mangipulong?” Kayari na pigaran bersikulo, impabitar nen Pablo ya agbengat-bengat niwala so pananisia; noagta, ‘ontumbok itan ed bengatlan nadngelan,’ salanti, say “salita nen Kristo.”​—Roma 10:13, 14, 17; Joel 2:32.

¹⁵ Siopa so mangipasabi ed “salita nen Kristo” ed saray nasyon? Satan a kimey so impabtang nen Jesus ed saray babangatan to​—saramay nibangat la ed satan a “salita.” (Mateo 24:14; 28:19, 20; Juan 17:20) Sano mibibiang itayo ed kimey na panagpulong tan panaggaway babangatan, gagawaen tayo no anto so insulat nen apostol Pablo, a diad saya et inaon toy Isaias: “Alay karakpan na saray sali na saray mangitarok na saray magayaga a balita na saray maong a bengatla!” Anggaman say karaklan et agmangawat ed maong a balitan tarok tayo, siansia nin ‘alay dakep’ iray sali tayo ed imaton nen Jehova.​—Roma 10:15; Isaias 52:7.

16, 17. Anton nankaduan gagala so kanaan na panagpulong tayo?

¹⁶ Say panumpal ed sayan ganggan so walaan na duaran importantin gagala. Unona, nepeg a nipulong so maong a balita ta pian nitandoro so ngaran na Dios tan naamtaan na saramay malabay a nilaban no iner so tuplegan da. Atalosan nen Pablo iyan aspekto na ganggan. Inkuan to: “Ta ontan so ingganggan na Katawan ed sikami, a nankuan; inggaton ta ka a sakey a silew na saray Gentiles. Pian sika so onkanan kilabanan ya angga ed kasampotan na dalin.” Kanian, bilang babangatan nen Kristo, balang sakey ed sikatayo so nepeg a mibiang ed pangitarok na mensahe na kilalaban ed totoo.​—Gawa 13:47; Isaias 49:6.

¹⁷ Komadua, say panangipulong ed maong a balita so mangiletneg na pundasyon parad matunong a panangukom na Dios. Nipaakar ed satan a panangukom, inkuan nen Jesus: “Sano onsabi so Anak na too ed gloria to, tan kaulop toray amin ya angheles, saman la onyurong ed trono na gloria to. Tan natipon naani ed arap to so saray amin a  nasyon; tan panbibiiganen to ra naani sakey tan sakey, a singa say pastol ibiig to so saray kanding.” Anggaman say pangukom tan pangibiig so nagawa “sano onsabi so Anak na too ed gloria to,” say panagpulong a kimey so mangitatarya na pankanawnawa ed totoo natan pian awaten iray espiritual ya agagi nen Kristo tan suportaan ira parad magnayon a kilalaban da.​—Mateo 25:31-46.

Mantinien so “Inkapno na Andi-kaatapan ya Ilalo”

18. Panon tayon napansiansian masnag so ‘ilalo tayo ed kilalaban’?

¹⁸ Say aktibon pibibiang tayo ed panagpulong a kimey so sakey a paraan a makatulong met pian napansiansia tayon masnag so ilalo tayo. Insulat nen Pablo: “Pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan.” (Hebreos 6:11) Komon ta amin tayo sirin so mangisulong ed ‘ilalo ed kilalaban bilang sakey a pamulaw,’ a nodnonoten ya ‘impasen itayo na Dios, ya aliwa a diad sanok, noag dia ed pakagamor na kilalaban lapu ed Katawan tayo a Jesu-Kristo.’ (1 Tesalonica 5:8, 9) Komon ta ipapuso tayo met so simbawa nen Pedro: “Balkesan yo so saray banel na kanonotan yo, mandangka kayo tan manilalo kayo a nagnap ed pamalangkap a nitarok ed sikayo.” (1 Pedro 1:13) Say amin a manggawa’d satan so makaeksperiensia ed kompleton kasumpal na “ilalo [ra] ed kilalaban”!

19. Anto so konsideraen tayo ed ontumbok ya artikulo?

¹⁹ Kaleganan ni, anto so nepeg a panmoria tayo ed panaon a natitilak ed sayan sistema? Panon tayon nausar itan a panaon pian nagamoran so kilalaban tayo ontan met ed arum? Konsideraen tayo irayan tepet ed ontumbok ya artikulo.

Kasin Nipaliwawa Yo?

• Akin a nepeg tayon pansiansiaen a masnag so ‘ilalo tayo ed kilalaban’?

• Anto so laktipen na kilalaban?

• Anto so nepeg tayon gawaen pian nagamoran so langkap na kilalaban?

• Anto so susumpalen na panagpulong a kimey tayo mitunosan ed gagala na Dios?

[Tepetepet Parad Panagaral]

[Saray litrato ed pahina 10]

Wala ni so kabaliksan na kilalaban ya aliwa lambengat a kiliktar manlapud kadederal