Akin a Talonaan so Perpeksionismo?

Kasin lawas mon pambabanikelan a gawaen so sankaabigan mo? Mapatnag, say panggawam na ontan so nayarin mangungguna ed sika tan ed saramay walad kaliberliber mo diad dakel a paraan. Diad biek a dapag, arum so alablabas a nanggawa ed saray bengatla tan nagmaliw iran perfectionist. Antoy labay ya ibaga na satan?

BUENO, say sakey a kabaliksan na salitan “perpeksionismo” et “sakey a disposisyon ya agnaawat so antokaman ya agnaspot.” Nayarin akaabet ka la na totoon ontan so disposisyon da. Natalosan mon say alablabas iran kakaukolanen da ed arum so panlapuan na dakel a problema, a mamalesa na agpakapenek tan pakadismayaan. Momoriaen na maslak a balansin totoo a talagan agkalkaliktan so perpeksionismo diad pantalos ya alablabas tan agmakatunongan iran kakaukolanen ed amin a pamaakaran na bilay. Satan so bengatlan kaukolan a talonaan. Balet, say problema et no nipaakar la itan ed mismon mentalidad odino disposisyon tayo, nayarin mairap a nibiig so tendensia nipaakar ed ontan a perpeksionismo, kanian sakey ya angat so panalona ed satan.

Walaan si Nelson na baleg a responsabilidad tan dakel a probleman solbaren. Regular ton aanalisaen iray estadistika, tan ipapasen ton sankaimportantian a bengatla so produksion. Say perpeksionismo so mabetbet a napatnagan bilang kakkaukolan parad italona ed kompetensiaan ed lawak na trabaho. Anggaman nayarin apresiaen na arum so inkaseet nen Nelson, say pagmaliw ton perpeksionista so sengegan na saray problema to ed pisikal, a singa say sakit na ulo tan stress. Kasin singa ka met si Nelson?

Apektado met na perpeksionismo iray kalangweran. Bilang sakey ya ugaw et labalabay nen Rita, a taga Rio de Janeiro, so maneskuela. Nanggunaetan toy ag-ompatnag a maambisyon, ingen sikatoy apektadon maong no agmakala na sankatagyan iran grado. Inkuan nen Rita: “Manlapud impanugaw ko, inkomparak so inkasiak ed arum a dakel so panaon da, bangta lawas ak a nadedesdes tan manapuran manggawa ed saray bengatla. Agkon balot aliknan walay panaon kon manpainawa lapud naynay a walaray kaukolan kon gawaen.”

 Bilang melag ya ugaw a bii, si Maria so mantarampas no agto makapandrowing na singa ed drowing na arum. Sakey ni, diad panamarakep ton maong ed musika, sikatoy mabetbet a na-stress tan naaburido imbes a panggayagaan toy panagtogtog tan panagkansion to. Sananey nin taga-Brazil a bii, si Tânia, a nanggunaetan toy magmaliw a makabat tan paliisan so kompetisyon et inaksobi ton sikato ni mangileletneg na atagtagey iran estandarte parad inkasikato, namparan diad eskuelaan tan diad abung. Liknaen ton sikatoy agtanto labalabay na totoo, no agnaspot so kimey to. Sakey ni, no maminsan et alablabas so iilaloan nen Tânia ed arum, a sengeg na inkadismaya tan impanermen to.

Anggaman importanti so abilidad, kuli, tan dilin liknaan a pakapenek, saray negatibon liknaan, a singa say takot ya onsaew, so nayarin manresulta ed pangiletneg na agnadampot iran kalat. Saray atateng odino arum so nayarin mangiletneg na estandarte na inkanaspot ed kimey diad eskuelaan odino diad saray isport a panirapan na saray kalangweran a dampoten. Alimbawa, atagey iray iilaloan na ina nen Ricardo ed sikato, a labay ton sikatoy magmaliw a doktor, makatogtog na piano, tan makapansalita na pigaran lenguahe. Kasin natebek mo a sayan paraan, no alablabas et pansengegan na saray problema tan pakadismaya?

Akin a Paliisan so Perpeksionismo?

Kakkaukolan so trabahon atagey so kualidad, makakakapet ed atagey iran estandarte na inka-eksakto tan inka-ekselenti. Kanian saray totoo so nepeg a mikompetensiaan diad lawak na trabaho. Say sakey nin sengegan a lalon pambubunekan na dakel et say takot ompan naandi so anapan a panlelegpet na sakey. Arum a trabahador et nagmaliw a singa gumagalaw a pirmin mansasakripisyo pian makapanggawa na balon rekord. Insan, no nipaarap ed pirmin kompetisyon, sikatoy napaskar a man-insayon maong, anganko et mangusar na saray steroid pian onaligwas tan ilaloan toy manalo. Imbes a walaan na manepeg a pangegemtan ed inka-ekselenti, say perpeksionismo so mamapaskar ed totoo a “napakiwas lapud takot ya onsaew” odino “napaskar pian magmaliw a manunaan.”​—The Feeling Good Handbook.

Tua, liknaen na arum a nayarin lawas napaaligwas so antokaman a nagawaan da ed arts odino ed saray isport. Ingen, unong ed si Dr. Robert S. Eliot, say “perpeksionismo et paniilalon agbalot nagawaan.” Inyarum to: “Tugyopen itan na liknaan a pakakakonsiensia, panangikatunongan, tan takot a naludlurey.” Kanian, agaylan tua iray salita na makabat ya Arin Solomon: “Anengneng ko so amin a kimey tan balang mabmabig a gawa, a nipaakar ed saya say too sibletan na kaabay to. Saya met sikato so kaapaan tan panguusil ed dagem.”​—Eclesiastes 4:4.

Antoy nayarin gawaen mo no onkiling kan magmaliw a perfectionist? Kasin tua a diad lalon pambubunek mo, lalon dakel so pakadismayaan mo? Kasin labay moy ag-alabas a mankaukolan tan lalon relaks? Antoy kabaliksan na pagmaliw a naspot? Agta pampirawatan mon gawaen so anggaay nayarian mo bangta papaliisan so perpeksionismo? No saray ag-ayadyarin totoo so makapangusar ed inter na Dios iran abilidad da pian diskobrien iray bengatlan pakagunggunaan na arum, isipen pa no antoy nagawaan na katooan ed silong na ayadyari iran kipapasen tan diad panangiwanwan na Dios!

[Litrato ed pahina 4]

Nayarin kaukolanen na atateng odino arum so inkanaspot, ya agnagawaan na saray kalangweran