Kasin Panisiaan Mo so Agmo Nanengneng?

SANO ikuan na sakey a, ‘Panisiaan ko labat so nanengneng ko,’ agto labay ya ibagan diad literal a pantalos. Diad tua et amin tayo so manisia ed saray bengatlan agtayo nanengneng.

Alimbawa, diad eskuelaan et akapan-eksperimento kayo la pian paneknekan a walay magnetismo. Nayarin onia so kagawa to: Ikarga iray nankikilan na balatyang ed tapew na sakey a papel. Insan itapew so papel ed magnet. Sano napagalaw so papel, singano walay madyik ta mantitipon iray nankikilan na balatyang ya alaen toy porma  na magnet. No ginawam la itan, kasin aktual mon anengneng so magnetismo? Andi, balet ta mabitar so epekto to ed saray nankikilan na balatyang, prueban angombinse ed sikan walay magnetismo.

Aksobien tayon andi suppiat so arum niran bengatla ya agtayo nanengneng. Sano onnengneng tayo ed marakdakep a painting odino pandinayewan so masanting ya iskultura, agtayo panduaruwaan a walay pintor odino iskultor a nanggawa ed satan. Kanian sano onnengneng itayo ed sakey a waterfall odino ed iselek na agew, agta anggan panon et naisip tayo so posibilidad a saratan so kimey na sakey a Matalonggaring a Pintor odino Iskultor?

No Akin a Walaray Agmanisia

Kasunian to, walaray totoon agla manisia ed Dios lapud imbangat na relihyon da. Tua itan ed sakey a lakin taga-Norway a nibangat ed sikaton poolan na Dios iray marelmeng diad mangapuy-apoy ya impierno. Agbalot natalosan na laki no anton klase so Dios a pairapen toray totoo ed onman a dalan, lapud satan et sikatoy nagmaliw ya ateista.

Balet, diad saginonor, akipakna so laki a surien to so Biblia, diad tulong na sakey ed Tastasi nen Jehova. Sikatoy nikelawan ed naaralan to ya ag-ibabangat na Biblia so kapairap na saray marelmeng ed mangapuy-apoy ya impierno. Iyaaliling na Biblia so patey ed maitlep ya ugip. Diad lubok et agtayo naliknay ot-ot; anggapoy pakalikna tayon balot. (Eclesiastes 9:5, 10) Naaralan met na laki a saramay totoon ukomen na Dios bilang agmanpasimbalo a marelmeng so mansiansia ed lubok diad ando lan ando. (Mateo 12:31, 32) Say arum ed inaatey so napaoli diad nigeter a panaon na Dios, a walaan na ilalon nagamoray andi-anggaan a bilay diad silong na saray kipapasen na Paraiso. (Juan 5:28, 29; 17:3) Makatunongan iyan eksplinasyon, ta mitunosan itan ed ibabaga na Biblia a ‘say Dios et aro.’ (1 Juan 4:8) Intuloy na sayan masimoon a laki so impanaral to na Salitay Dios, insan asabin naaro to met so Dios a walad Biblia.

Agpanisiaan na arum a wala so maaron Manamalsa lapud kasmak lan paniirap tan ag-inkahustisya. Mipakna ira ed sakey a taga-Sweden a laki ya aminsan et inturo to so katawenan tan intepet: “Panon a wala so makapanyarin-amin tan sankamabunlokan a Dios ed tagey bangta walay pirmin kaugsan tan karelmengan diad dalin?” Lapud anggapo so makaebat ed tepet to, sikato met so nagmaliw ya ateista. Diad saginonor et sikatoy impaiyaralan na Biblia ed saray Tastasi nen Jehova. Naamtaan ton naromog ed Salitay Dios so makapenek ya ebat ed  abayag lan tepet ya, Akin ya iyaabuloy na Dios so karelmengan? *

Naaralan na sayan masimoon a laki ya anggaman walay karelmengan et aglabay ya ibaga na satan ya anggapo so Dios. Diad pangiyilustra: Nayarin man-desinyo so sakey a too na yoro a panaggerger na karne. Nayarin saliwen itan na sakey a suki parad pamatey ya aliwan parad panaggerger na karne. Lapud aliwa so akausaran na yoro et agto labay ya ibagan anggapoy managgawa ed satan. Mipadpara, say katuaan a say dalin et agnausar unong ed inkagagalaan na satan et agto labay ya ibagan anggapo lay Manamalsa na satan.

Ibabangat na Biblia a say kimey na Dios so naspot. Nipaakar ed Dios et “anggapo so kaugsan [to], sikato so matunong tan maptek.” (Deuteronomio 32:4) Maong iray palangkap na Dios ed too, balet ta arum ed saray palangkap to et aliway pakauusaran to, a pansesengegay pirmin irap. (Santiago 1:17) Anggaman ontan, panganggaen na Dios so kairapan. Insan “saray mauyamo tawiren da naani so dalin, . . . tan manayam diman lawas.”​—Salmo 37:11, 29.

Say taga-Sweden a lakin asalambit ed inmuna so atenyeg sanen naimano to so paniirap na kapara ton totoo. Diad tua et say matamoy a panagpaga to ed arum so paneknek ed kiwawala na Dios. Panon ya ontan?

Dakel a totoo ya agmanisia ed Dios so manisia ed ebolusyon. Say ibabangat na saray ebolusyonista et “natilak iray mabiskeg”​—mipupuligesgesan iray totoo tan ayayep ed kapareho ran klase ta pian manbilay. Say sankabiskegan so manbilay; say sankakapuyan so ompatey. Ontan so uksoy na bengabengatla, kuan da. Balet no “kasiporan la” parad saray makapuy ya ompatey ta pian makaliktar iray mabiskeg, panon tayon nipaliwawa so katuaan ed naeksperiensia na taga-Sweden a laki, a walaray mabiskeg a totoon diad impakaimano ra ed paniirap na kapara ran too et naabagey da ra?

Pakapikabat ed Dios

Agtayo nanengneng so Dios lapud sikatoy andian na porman singa sikatayon totoo. Ingen, labay na Dios a sikatoy nakabat tayo. Sakey a paraan a sikatoy nakabisado tayo et diad pangobserba ed saray ekstraordinaryon kimey to​—saray “painting” tan “iskultura” na palsa. Diad Roma 1:20, kuan na Biblia: “Saray bengatla ya agnanengneng a kien [na Dios], say andi-anggaan a pakayari to tan inkadibino to nanengneng a manlapu ed inkapalsay mundo, natalosan ira unong ed saray bengatla ya agawa.” On, no panon a say panaral ed sakey a painting odino iskultura et lalon nakabatan moy personalidad na pintor, diad pandalepdep mo met ed saray makapakelaw a kimey na Dios et lalon nakabisadom so personalidad to.

Siempre, agtayo naebatan ya amin so tepet a pakakawetwetan tayo nipaakar ed bilay diad inengneng labat ed saray palsa na Dios. Balet ta naromog tayo iray ebat ed ontan iran tepet diad pansukimat ed Salitay Dios, say Biblia. Diad panamegley na impanbasa na Biblia tekep na lukas a kanonotan et saray duaran laki ya asalambit ed akadkauna so angikuan a wala so Dios tan sikatoy interesado ed pansumpalan tayo.

[Paimano ed leksab]