Panangisalba Diad  Isla na Robinson Crusoe

SAY Robinson Crusoe so sakey ed taloran isla ed Pacific Ocean a manugyop ed arkipelago a tatawagen a Juan Fernández, a ngalngalin 640 kilometro manlapud gilig na dayat na Chile. * Say 93 kuadrado-kilometro ya isla so inngaran ed bantog a koma-18 siglon nobela ya apauloan na Robinson Crusoe, ya insulat na Ingles ya autor a si Daniel Defoe. Say nobela so mapatnag a manunan nibase ed saray impipalaran na sakey a taga-Scotland, si Alexander Selkirk, a nambukbukor a nanayam ed isla ed loob na manga apat taon.

Onia so kabiangan a nabasa ed sakey a tablan karatula diad isla: “Diad sayan lugar, say taga-Scotland a marino a si Alexander Selkirk so inagew-agew ed loob na masulok ya apat taon a magunaet a mamabantag ed taew no walay panagsalban baloto a kibulosan to la’d pambukbukor to.” Diad kaunoran, nisalba si Selkirk tan impawil ed binalegan ton dalin, diad sakey a kaliberliber ya agla amenek ed sikato kayari impanayam to ed melag a paraison nanlapuan to. Inkuanto ed saginonor: “Oh, pinablik ya isla! Pirawat kon agta ka lan balot komon tinaynan!”

Diad inlabas na panaon, say isla so nagmaliw a penal colony (bantakan ed saray kriminal), nanayaman na pigaran akagaway “panagrebeldi” sumpad Iglesia Katolika. Agaylan duma la manlapud datin singa-paraison isla ya adiskobre nen Selkirk! Anggaman ontan, panggagayagaan na saray manaayam natan ed isla so inkamapalna ya anggapo’d dakel a parti na mundo. Say relaks ya istilo na bilay, a kaslakan ed dakel a kultura ed isla, so mamainomay ed pangigapo na tongtongan ed anggan siopa.

Say Robinson Crusoe so walaan na ngalngali 500 a residenti, balet kaslakan la ed legay taon, manga 400 labat a totoo so manaayam ed isla. Say sakey a rason et arum a kainaan kaibay ananak da so manayam ed mainland a Chile legay paneskuela tan ompawil ed isla legay bakasyon iran bulan pian makapilimog ed pamilya ra.

Anggaman ed marakdakep a singa harden a kaliberliber diad Robinson Crusoe, liknaen na arum a taga-isla a kulang ira’d espiritual tan manaanap ira na saray ebat. Liknaen na arum a kaukolan iran nasalba ed espiritual a paraan.

Espiritual a Panangisalba

Ginmapo so espiritual a panangisalba nen 1979. Sakey a biin inyaralan na Tastasi nen Jehova na Biblia diad Santiago, Chile, so inmalis ed isla tan imbangat to’d arum so nipaakar ed naaralan to. Diad saginonor, sakey a matatken ed kongregasyon a binmisita ed isla makasengeg ed trabaho to so asurprisa ed impakaromog toy melag a grupo na saray estudyante na Biblia ya onaaligwas ed espiritual diad tulong na saman a bii. Kalabas na taloy bulan sanen binisita lamet na matatken so isla, sayan niyarawin managbangat na Biblia tan duara ed saray estudyante to so akaparaan lan nabautismoan, kanian say matatken so angidaulo  ed bautismo ra. Diad saginonor, sakey ed sarayan balo nin bautismadon Kristiano so akiasawa tan, kaibay masiken to, intultuloy day nananap na arum a mankaukolan na espiritual a panangisalba. Say masiken to so angidaulo ed impangipaalagey na marakep a Kingdom Hall, a siansian uusaren ni na melag a grupo ed isla. Asabi panaon, makasengeg ed ekonomya, tinaynan day Robinson Crusoe tan inmalis ira ed kongregasyon a walad sentro na Chile, a diman et nantultuloy iran aktibon manlilingkor ed si Jehova.

Kalkalnan nantultuloy a binmaleg so melag a grupo ed isla legan a nisasalba iray arum manlapud palson relihyon. Balet, lapud kaukolan ya onalis iray estudyante ed mainland parad pan-haiskul da, say grupo so dinmaiset anggad asabi toy duaran bautismadon agagin bibii tan sakey ya ugaw nin bii. Say grupo so ondakel no bakasyon sano arum ed kainaan so ompawil ed isla. Saya so mamabiskeg lamet ed taloran niyarawin Kristiano a mansiasiansia diman sanlegay taon. Bilang resulta na makulin kimey na sarayan agagin bibii, saray Tastasi nen Jehova so kabkabat diad Robinson Crusoe. Tua, arum a taga-isla so sumpad kimey da tan sasalien dan desdesen so arum a mangipulisay ed mensahe na Panarian. Anggaman ontan, say bukel na katuaan a nitanem ed masimoon a kapusoan so mantutultuloy ya ontutubo.

Panamabiskeg ed Saramay Nisalba la

Maminsan ed sakey taon et ombibisita so managbiahen manangasikaso ed isla. Antoy nengneng na ibisita ed daiset a Tastasi diad sakey a niarawin isla? Onia so impaneskribe na sakey a manangasikaso na sirkito ed inmunan imbisita to ed Robinson Crusoe:

“Alay dakep iman a biahe. Ala’siete na kabuasan so imbuat mi ed Valparaiso ya amaarap ed Cerrillos Airport na Santiago. Linmugan kami ed eroplanon parad pitoran pasahero. Kayari na impanbiahe ed loob na 2 oras tan 45 minutos, abantag mi ed arawi so sakey a toktok na palandey a nilampasan to lay lurem. Diad panasingger mi, nanenengneng mi la so isla​—singa abalbaleg a bato diad pegley na dayat. Singa manletletaw ed maawang a danum, singa barkon abalang diad dayat.

 “Kadapo mi, sakey a baloto so angawit ed sikami diad baryo. Walaray angkabaleg a bato a nanengneng diad dayat a singa angkekelag ya isla a panaayaman na saray fur seal ed Juan Fernández. Saray fur seal et proprotektaan iran klase na ayep ed dayat lapud dinmaiset lan maong iratan. Kabekta, walay tinmekkiab ed diking na baloto insan naandipat lamet ed dayat. Saman et flying fish, a saray palikpik to et singara payak. Ompatnag a singa panliketan na satan so onlukso manlapud danum pian maningkat na bigibigis. Siempre, no maminsan et say managsingkat so nasingkat met; say ilukso to so mamaasingger ed arum a managsingkat ya akaparaan a mangakmon ed sikato diad idapo to’d danum.

“Akasabi kamin siansia ed baryo na San Juan Bautista. Walaray dakel a taga-isla ya akaalagey ed daongan, balanglan manaalagar ira ed saray bisita ra odino man-usyoso no siopa kasi onsasabi. Pandinayewan mi alay santing a babantagen​—say abalbaleg tan matundiris a palandey a tinawag ya El Yunque (The Anvil), a singano naapisan na maberberdin gamusa, tan say background, et masnag tan kolor asul a tawen a walaray makapal ya amputin lurem.

“Naimano min tampol so sakey a grupo na Kristianon agagin bibii kaibay ananak da a manatalaran ed sikami. Bakasyon ed saman, kanian say grupo so babaleg nen say gendat. Kayari na maligsan banoan, inawit da kami ed balibalin alolong a panayaman mi ed loob na sakey simba.

“Saman so espisyal a simba, tan amoria min maples ya onlabas so sakey simba. Kaukolan min usaren a maong so panaon mi. Diad saman a mismon agew, kayari na impangugto, binisita mi so sakey ya iyaaralan na Biblia a magano lan magmaliw ya espiritual ya agin bii tayo tan kabiangan na espiritual a paraiso na Dios. Sikatoy manliket balet ta medyo mannerbiyos met. Say abayag to lan aalagaren a kalat ton nabaustimoan et magano la. Insingbat mi so pigaran importantin impormasyon ed sikato ta pian sikatoy onkualipika bilang sakey a manangipalapag na maong a balita. Diad tinmumbok ya agew, sikatoy akilan nampulong diad unonan pankanawnawa. Diad komatlon agew, insingbat mi iray kakaukolanen diad pamautismo ed sikato. Antis ya anampot so sakey simba, sikatoy abautismoan.

“Sinuportaan a maong iray miting ya agawa legan na sakey simba, a say inmatendi et asabi toy 14. Kada agew et walaray uksoyan parad lawak na serbisyo, panagpawil, panangiyaral na Biblia, tan panagpastol ya idadalaw. Agaylan makapaseseg parad saray agagin bibii ya atilak a mankikimey legay taon!”

Lalon mairap parad lalaki ed isla so onkiwas unong ed katuaan, anganko et lapud nigalet iran maong ed trabaho ra. Say manunan trabaho et say panagsiraw na saray bingalo, a mankaukolan na dakel a panaon. Saray panangidumaduma so sakey met a rason na negatibon reaksion na dakel. Anggaman kuan, iilaloan a dakel a taga-isla, lalaki tan bibii, so onkiwas ed arapen.

Anggad natan, samploran indibidual so asalba la ed isla diad impakaamta na katuaan tan ed saray gagala nen Jehova a Dios. Pigara ed sikara so anaynan ed isla lapud nanduruman rason. Balet balanglan sikaray nansiansia diman odino andi, say espiritual ya inkasalba ra so apaneknekan a nagkalalon makabaliksan nen say inkasalba nen Alexander Selkirk. Panggagayagaan da natan so espiritual a paraiso inerman so panayaman da. Saray agagin bibii a wadman ni ed isla a kaibay ananak da so manggagayaga ed singa harden a kaliberliber, balet nagkalalo nen say satan, walaan ira na ilalon manbilay sano say intiron dalin et magmaliw lan sigpot a paraiso.

Tuloytuloy ni so Panangisalban Kimey

No nipaakar ed lugar, sayan melag a grupo na Tastasi nen Jehova ed Robinson Crusoe so walad arawi manlapud saray espiritual ya agagi ra. Ingen, agda ipasen a sikaray napapaulyanan, a singa agawa ed lakin taga-Scotland a si Selkirk. Diad panamegley na tuloytuloy ya iyaagus na teokratikon literatura, saray video na saray asamblea tan kombension a nipapawit ed sikara manlapud sanga na Watch Tower Society diad Chile a mamitlo ed sakey taon, tan say tinaon ya ibibisita na manangasikaso na sirkito, sikaray mansiasiansian maapit a makakapitalosan ed organisasyon nen Jehova. Kanian mantutultuloy iran aktibon kabiangan na ‘intiron pililimog ed saray agagi ed mundo.’​—1 Pedro 5:9.

[Paimano ed leksab]

[Saray mapa/Litrato ed pahina 9]

(Parad aktual a format, nengnengen so publikasyon)

CHILE

Santiago

ISLA NA ROBINSON CRUSOE

San Juan Bautista

El Yunque

PACIFIC OCEAN

ISLA NA SANTA CLARA

[Litrato]

Legan a nababantag so isla, nanengneng na sakey so abalbaleg a bato diad pegley na dayat

[Credit Line]

Mapa na Chile: Mountain High Maps® Copyright © 1997 Digital Wisdom, Inc.

[Litrato ed pahina 8, 9]

Say abalbaleg a matundiris a palandey a tinawag ya El Yunque (The Anvil)

[Litrato ed pahina 9]

Say baryo na San Juan Bautista

[Litrato ed pahina 9]

Angkelag iran isla ya onkakanan ayaman na saray “fur seal” tan “sea lion”

[Litrato ed pahina 10]

Linmugan kami ed melag ya eroplano manlapud Santiago, Chile

[Litrato ed pahina 10]

Say mabato a gilig na dayat na Isla na Robinson Crusoe

[Litrato ed pahina 10]

Say kabkaabigan a Kingdom Hall diad isla