‘Sanaagi Kayon Amin’

“Agkayo komon patatawag na Rabbi; ta sakey so managbangat ed sikayo, et sikayo ya amin sanaagi kayo.”​—MATEO 23:8.

1. Anton pamaakaran so makanakanan konsideraen tayo?

 “SIOPA so mas makanepegan na galang, misionaryo odino Bethelite?” so inosentin intepet na sakey a Kristianon bii a taga-Bukig diad sakey a misionaryon taga-Australia. Labay ton naamtaan no siopay kaukolan a respetoen a maong, say misionaryon nanlapud arum a bansa odino sakey a lokal a ministro a manlilingkor ed sangan opisina na Watch Tower Society. Abigla so misionaryo ed satan ya inosentin tepet a mangipapatnag ed kulturan mangidadanet ed rangko odino posisyon. Anggaman ontan, say tepet a no siopay magmaong et makasengeg ed pilalek a naamtaan no iner so talindegan na totoo ed saray rangko na pakayari tan impluensia.

2. Panon so nepeg a panmoria tayo ed saray kapara tayon managdayew?

² Aliwa lan balo iyan pamaakaran. Anggan saray babangatan nen Jesus et tuloytuloy a nansasangsangan no siopa so sankatalonggaringan. (Mateo 20:20-24; Marcos 9:33-37; Lucas 22:24-27) Nanlapu met ira ed kulturan mangidadanet ed saray rangko tan posisyon, salanti say inmunan-siglon Judaismo. Lapud sinononot si Jesus ed satan a klase na sosyedad, oniay insimbawa to ed saray babangatan to: “Agkayo komon patatawag na Rabbi; ta sakey so managbangat ed sikayo, et sikayo ya amin sanaagi kayo.” (Mateo 23:8) Say relihyoson titulo a singa say “Rabbi,” a mankabaliksan na “Managbangat,” “so ginetman mamawala na kinon tan liknaan a pagmaliw a superyor diad saramay makagamor ed satan, tan imon tan liknaan ya inki-abeba ed saramay andian na satan; tan say intiron awawey tan tendensian makasengeg ed satan so misumlangan ed ‘inkasimpli a walad si Kristo,’” so inkuan na iskolar na Biblia a si Albert Barnes. On, papaliisan na saray Kristiano so panawag ed saray manangasikaso bilang “Elder a Polano,” ya uusaren so “elder” bilang makapadinayew a titulo. (Job 32:21, 22) Diad biek a dapag, saray mamatatken a mitutunosan ed prinsipyo na simbawa nen Jesus so mangigagalang ed arum a membro na kongregasyon, a singa pamapagalang nen Jehova ed saray matoor a managdayew ed sikato, ontan met ed pamapagalang nen Kristo ed saray matoor a papatumbok to.

Say Alimbawa nen Jehova tan si Jesus

3. Panon so impamagalang nen Jehova ed saray espiritun pinalsa to?

³ Anggaman si Jehova so “Sankatageyan,” manlapu la’d gapoy-gapo et pinagalangan toray pinalsa to ya impibali to ira ed saray kimey to. (Salmo 83:18) Sanen pinalsa to so inmunan too, inlaktip nen Jehova so bogbogtong ya Anak to ed saray kimey To bilang sakey ya “uloen a komikimey.” (Uliran 8:27-30; Genesis 1:26) Inimbitaan ni ingen nen Jehova iray anghel to ed tawen pian ibalikas day inkasikara no panon so paneral ed marelmeng ya Arin Ahab lapud denesidi To lan deralen so ari.​—1 Arari 22:19-23.

4, 5. Panon so impamagalang nen Jehova ed saray pinalsa ton totoo?

⁴ Manuuley si Jehova bilang Supremon Soberano ed uniberso. (Deuteronomio 3:24) Agto kaukolan so ontupleg ni ed totoo. Ingen, sikatoy inmusdong, a singa panangibaga, pian imanoen tora. Inkanta na salmista: “Siopa so mipadpara ed Jehova a Dios tayo, sikato a manaayam ed tagey? Sikato a mampaabeba ya onnengneng ed saray bengabengatla ed tawen, tan dia ed dalin. Sikato ipaalagey to so duka ya agwaten ed dabok.”​—Salmo 113:5-8.

⁵ Sakbay ton deralen so Sodoma tan Gomorra, tinalineng nen Jehova iray tepet nen Abraham tan impagamor to so kekerewen nen Abraham ya inkahustisya. (Genesis 18:23-33) Anggaman amta la nen Jehova so pansumpalan na kerew nen Abraham, sikatoy maanos a tinmalineng ed si Abraham tan inawat To so panagkatunongan nen Abraham.

6. Anto so resulta na impangipanengneng nen Jehova na galang sanen nantepet si Habacuc?

⁶ Tinalineng met nen Jehova si Habacuc, ya angitepet: “Jehova, panon kabayag so itawag ko, et agmoak naani talinengen?” Kasin impasen nen Jehova so tepet to bilang angat ed pakauley to? Andi, minoria to iray tepet nen Habacuc bilang makatunongan, insan to imparungtal so gagala to a patalindegen toray Caldeo pian mangipakat ed panangukom to. Impaseguro to ed propeta a ‘sayan impasakbay a panangukom so petepeteg ya onsabi.’ (Habacuc 1:1, 2, 5, 6, 13, 14; 2:2, 3) Pinagalangan nen Jehova  so propeta diad impangimano ton maong ed saray pampapagaan nen Habacuc tan diad impangebat To’d sikato. Bilang resulta, linmigsa so agonigon a propeta tan nagmaliw a maliket, tekep na sigpot a panagmatalek ed Dios na kilalaban to. Saya so nipatnag ed apuyanan a libro nen Habacuc a mamapabiskeg ed panagmatalek tayo ed si Jehova natan.​—Habacuc 3:18, 19.

7. Akin ya importanti so betang nen Pedro nen Pentecostes 33 K.P.?

⁷ Si Jesu-Kristo so sakey nin maabig ya alimbawa nipaakar ed panangipanengneng na respeto ed arum. Inkuan nen Jesus ed saray babangatan to a “balang sakey balet a mangiburi naani ed siak ed arap na saray totoo sikato met so iburik naani ed arap nen Amak.” (Mateo 10:32, 33) Balet, diad samay labin inkitapat to, sikatoy inkaindan na amin a babangatan to, tan sikatoy amitlon imburi nen apostol Pedro. (Mateo 26:34, 35, 69-75) Agninengneng nen Jesus so akinpaway ya itsura noagta inimano to so akindalem iran liknaan nen Pedro, say pirmin impagbabawi to. (Lucas 22:61, 62) Kayari lambengat na 51 ya agew, pinagalangan nen Kristo so nagbabawin apostol to diad impangiyabuloy to ed sayan apostol a mangirepresenta ed 120 a babangatan nen Jesus diad agew na Pentecostes tan mangusar ed pilimero ed “saray tombok na panarian.” (Mateo 16:19; Gawa 2:14-40) Naikdan si Pedro na pankanawnawa ya ‘ompawil tan mamabiskeg ed saray agagi to.’​—Lucas 22:31-33.

Panangiter na Galang ed Saray Kapamilyaan

8, 9. Diad pangiter na galang ed asawan bii, panon a naalig na sakey ya asawan laki si Jehova tan si Jesus?

⁸ Saray asawan lalaki tan atateng so maabig a mangalig ed si Jehova tan si Jesu-Kristo no agamilen da so inter na Dios ya autoridad. Oniay insimbawa nen Pedro: “Sikayo lalaki ya asawa, miamong kayo ed [kaasawaan yon bibii] unong na igaganggan na kakabatan; igalang yo so bii, alwaran yo a singa mayumis a baso.” (1 Pedro 3:7) Isipen yo pan sankaegnaan yo so sakey a mipipisit a porselanan baseha, a mas lupok nen say kiew. Agta lalon al-alwaran yo itan? Nagawaan itan na asawan laki diad pangalig ed si Jehova, a talinengen toray opinyon na asawa to sano sikatoy mandesisyon nipaakar ed pamilya. Nodnonoten ya abayag ya akikatunongan si Jehova ed si Abraham. Lapud ag-ayadyari, nayarin agnanengneng na asawan laki so intiron lalanoren na sakey a pamaakaran. Agta makabat sirin parad sikato so pangigalang ed asawan bibii diad masimoon a pangonsidera ed opinyon na akulaw to?

⁹ Diad saray daldalin a nipurek a maong so autoridad na laki, nepeg a sinononot so asawan laki a nakaukolan a talonaan na akulaw to so mairap a babeng a mangibalikas ed akindalem iran liknaan to. Aligen so paraan na impideneng nen Jesu-Kristo ed saray babangatan to, a magmaliw a kabiangan na nobyan klase, nen sikatoy wadia ni’d dalin. Pinabpabli tora, ya inkonsidera to so pisikal tan espiritual iran limitasyon da anggano sakbay da nin ibaga iray pankaukolan da. (Marcos 6:31; Juan 16:12, 13; Efeso 5:28-30) Niarum ni, ipanaon so panimano ed gagawaen na kaasawaan yon bibii parad sikayo tan ed pamilya yo, tan ibalikas yoy apresasyon yo diad salita tan gawa. Si Jehova tan si Jesus et angapresia, angomenda, tan amendision ed saray makanepegan. (1 Arari 3:10-14; Job 42:12-15; Marcos 12:41-44; Juan 12:3-8) Sanen nagmaliw lan sakey ed saray Tastasi nen Jehova so masiken to, oniay inkuan na sakey ya asawan bii a taga-Bukig: “Dati et naynay ya uno-unan manakar so masiken ko, a pabibitbit to’d siak so amin a bengatla. Natan et sikato la so mangaawit ed saray bag tan ibabalikas to so apresasyon to ed gagawaen ko ed abung!” Say balikas na apresasyon so makatulong a maong ed asawa yon bii pian nalikna to a sikatoy papablien.​—Uliran 31:28.

10, 11. Anto so naaralan na atateng ed maabig ya alimbawa nen Jehova diad impideneng to ed rebelyoson nasyon na Israel?

¹⁰ Diad pideneng ed ananak da, nagkalalo la no nakaukolan so panamaat, nepeg ya aligen na atateng so alimbawa na Dios. “Nantultuloy a pinasakbayan nen Jehova so Israel tan Juda,” pian benegan da laray mauges a dalan da, balet ta “pinaawet da so tenger da.” (2 Arari 17:13-15, NW) Sinali ni ingen na saray Israelita a “manwarin ontan so impaspasirayew da na sangi ra, et sikato so tinitilaan da balet na diladila ra.” Ipapasen na dakel ya atateng ya ontan so kakikiwas no maminsan na ananak da. Saray Israelita so ‘anukso ed Dios’ tan sikatoy pinaot-ot da, a sikatoy pinasakitan da. Ingen ta si Jehova so “napno na sibeg, pinerdona to so kasulitan da, et agto ra ginaygay.”​—Salmo 78:36-41.

¹¹ Akikasi ni ingen si Jehova ed saray Israelita: “Dago kayo natan, tan mankakatunongan itayo . . . anggan saray kasalanan yo sikara so singa eskarlata, napaputi ra a singa say niebe.” (Isaias 1:18) Anggaman aliwan si Jehova so makankasalanan, pinaasingger to so rebelyoson nasyon pian nipetek iray pamaakaran. Agaylan abig ya awawey ya aligen na atateng diad pideneng da ed saray ananak da! Sano nakaukolan na kipapasen, pagalangan ira diad italineng ed mismon liknaan da ed sakey a pamaakaran, tan mikatunongan ed sikara no akin a nakaukolan iran manguman.

12. (a) Akin a paliisan tayo so nagkalalon pangigalang ed ananak tayo nen say si Jehova? (b) Anto so nakaukolan pian narespeto tayo so dignidad na ananak tayo sano babaaten tayo ra?

¹² Siempre, nakaukolan no maminsan na ananak so mapuersan simbawa. Aglabay na atateng so magmaliw a singa si Eli, ya ‘inggalang to iray anak to nen say si Jehova.’ (1 Samuel 2:29) Balet, nakaukolan a natebek na  ananak so maaron motibo no akin ya ipepetek ira. Kaukolan a natalosan da ya inaro ira na atateng da. Oniay insimbawa nen Pablo ed saray kaamaan: “Agyo ilagyat a pasanoken so saray anak yo: noag ingen bangatan yo’ra ed kadudusa tan panamilin na Katawan.” (Efeso 6:4) Anggaman aakoen na ama so autoridad bilang ateng, say punton nipapabitar et nakaukolan ton konsideraen so dignidad na ananak ya agtora papaingongoten lapud pirmin inkapeget to. On, say pangikonsidera ed dignidad na ananak so mankaukolan na panaon tan sagpot ed biang na atateng, balet say resulta ed panggawa’d satan so makagungguna anggaman ed amin ya insakripisyo.

13. Anto so panmoria na Biblia ed maedad lan membro na pamilya?

¹³ Say pangipanengneng na galang ed saray kapamilyaan so aliwa lambengat a pamagalang ed asawan bii tan ananak. “Sano matakken kayo la, unor yoy ananak yo,” so kuan na proverbio na Hapones. Say punto na satan a proverbio et nepeg a paliisan na saray matakken lan atateng so alablabas lan pangamil da’d autoridad da bilang ateng tan nepeg ya imanoen da no anto so ibabaga na ananak dan susto la’d edad. Anggaman Makasulatan so pamagalang na atateng ed ananak da diad italineng ed sikara, nepeg ya ipatnag na ananak so marespeton awawey ed saray matakken lan membro na pamilya. “Agmo mudmoraen so inam sano akulaw [la],” so kuan na Uliran 23:22. Nambilay si Arin Solomon unong ed sayan uliran tan pinagalangan toy ina to sanen akikasi ed sikato. Impaipuesto nen Solomon so sakey a trono ed loob mismo na sankaabungan to tan tinalineng to no anto so labay ya ibaga’d sikato na akulaw lan ina ton si Bat-seba.​—1 Arari 2:19, 20.

14. Panon tayon napagalangan iray maedad lan membro na kongregasyon?

¹⁴ Diad apalaknab ya espiritual a pamilya tayo, wala itayo’d maong a kipapasen pian ‘mangidaulo’ ed panangipanengneng na galang ed saray matakken lan membro na kongregasyon. (Roma 12:10) Nayarin agda la tanton nasarag so gagawaen da a singa nen kabisbiskegan da ni, tan makapadismaya itan ed sikara. (Eclesiastes 12:1-7) Sakey a matakken lan alanaan a Tasi ya akarukol la ed infirmary so angibalikas ed ontan ya inkadismaya: “Labay ko lay ompatey pian nitultuloy ko la so kimey ko’d tawen.” Parad saratan a maedad la, say pangipanengneng tayo ed sikara na manepeg a panamidbir tan galang so makatulong. Oniay niganggan ed saray Israelita: “Onalagey ka naani ed arapan na ubanan ya ulo, et pagalangan mo naani lupa na masiken.” (Levitico 19:32) Ipanengneng so konsiderasyon diad pangipalikna tayo ed saray maedad la a nakaukolan tan papablien tayo ra. Say ‘iyalagey’ so nayarin mangilaktip ed iyurong insan idengel ed isasalaysay da no anto so agawaan da ed apalabas iran taon. Satan so mamagalang ed saray matakken la tan mamabulaslas ed mismon espiritual a bilay tayo.

‘Idaulo so Pangipanengneng na Galang’

15. Anto so nagawaan na mamatatken pian napagalangan daray membro na kongregasyon?

¹⁵ Ombulaslas iray membro na kongregasyon sano ipanengneng na mamatatken so maabig ya alimbawa ed sikara. (1 Pedro 5:2, 3) Anggaman ed okupadon eskedyul da, unona lan aasinggeran na manangiyansakit a mamatatken iray kalangweran, saray ulo na pamilya, saray mansusulon kainaan, saray kaasawaan a bibii, tan saray maedad la, balanglan saratan so nipapaarap ed saray problema odino andi. Talinengen na mamatatken no anto so labay ya ibaga na saray membro na kongregasyon tan komendaan da ra no anto so nagagawaan da. Say sakey a maimanon matatken a lanang a mangaapresia ed nagagawaan na sakey ya agin laki odino bii so mangaalig ed si Jehova, a mangaapresia ed saray pinalsa to diad dalin.

16. Akin a nepeg tayon moriaen iray mamatatken a makanepegan na galang kaiba so arum diad loob na kongregasyon?

¹⁶ Diad pangaalig da’d si Jehova, ipapanengneng na mamatatken so maabig ya alimbawa diad pangiyaplika ed simbawa nen Pablo: “Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian [“mangidaulo,” NW] kayo.” (Roma 12:10) Nayarin mairap iya parad mamatatken a manaayam ed saray bansan kaslakan so panangibiig-biig lapud posisyon. Alimbawa, diad sakey a bansa ed Bukig, walay duaran salita parad “agi,” say sakey ed kagalgalang tan samay sananey et ordinaryo lambengat. Aganggano ni, say uusaren na saray membro na kongregasyon no tawagen daray mamatatken tan saray maedad la et samay mapagalang a termino, balet ta uusaren da imay ordinaryon termino ed arum. Balet, sikaray  apaseseg ya usaren da so ordinaryon termino ed amin a panaon lapud, unong ya inkuan la nen Jesus ed saray papatumbok to, “amin [yo et] sanaagi kayo.” (Mateo 23:8) Anggaman agtanton mapatnag iyan panangidumaduma ed arum a bansa, nakaukolan a nibiig tayon amin so tendensia na too a mangibiig lapud posisyon.​—Santiago 2:4.

17. (a) Akin a kaukolan a mainomay ya asinggeran iray mamatatken? (b) Diad antoran dalan a naalig na mamatatken si Jehova diad pidedeneng ed saray membro na kongregasyon?

¹⁷ Tua, pinaseseg itayo nen Pablo a tratoen so mamatatken bilang makanepegan ed “mamiduan galang,” balet ta agagi tayo niran siansia. (1 Timoteo 5:17, NW) No sarag tayoy ‘onasingger a mailalo ed trono na grasya pian makagamor itayo na panangasi’ na Sankatalbaan a Soberano, agta sarag tayo met ya asinggeran so mamatatken, a mangaalig ed si Jehova? (Hebreos 4:16; Efeso 5:1) Determinaen na saray manangasikaso no kasin mainomay iran asinggeran diad pangonsidera no panon kabetbet so iyaasingger na arum ed sikara pian manpasimbawa odino onkerew na saray suhestion. Aralen so paraan nen Jehova ya ipipibali toray arum ed saray kimey to. Pinagalangan toray arum diad impangipabtang to’d sikara na saray responsabilidad. Anggano ompatnag ya aliwan praktikal so pigaran suhestion na sakey a Tasi, nepeg ya apresiaen na mamatatken so panagpaga to. Nodnonoten no panon so impantrato nen Jehova ed saray mausisan tepet nen Abraham tan say ey-ey na kagogonigon nen Habacuc.

18. Panon a naalig na mamatatken si Jehova no ipepetek da iramay mankaukolan na tulong?

¹⁸ Say arum a Kristiano et nakaukolan ya ipetek. (Galacia 6:1) Siansia, sikaray mabli ed imaton nen Jehova, a manepeg a natrato tekep na dignidad. “No tratoen ak na sakey a manisimbawa tekep na panagrespeto, mainomay ak ya onasingger ed sikato,” so kuan na sakey a Tasi. Mas onkiwas so dakel a totoo ed simbawa no natrato ira tekep na dignidad. Nayarin mankaukolan itan na dakel a panaon, balet say italineng ed saramay alingo ed saray kurang da so sengegan no akin a mainomay iran mangawat na antokaman a kaukolan a simbawa. Tandaan no panon so aminpigapigan impikatunongan nen Jehova ed saray Israelita tekep na panangabagey ed sikara. (2 Awaran 36:15; Tito 3:2) Say simbawan niiter tekep na pililikna tan simpatya so manenyeg ed kapusoan na saramay mankaukolan na tulong.​—Uliran 17:17; Filipos 2:2, 3; 1 Pedro 3:8.

19. Panon so nepeg a panmoria tayo ed totoon agni manisia ed papanisiaan na saray Kristiano?

¹⁹ Onnatnat so pangipanengneng tayo na galang ed arum diad saramay prospektibon magmaliw ya agagi tayo ed espiritual. Nayarin matantan iran mangawat na mensahe tayo natan, balet nakaukolan ya anosan tayo ira tan bidbiren so dignidad da bilang totoo. Si Jehova et “agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Agta maabig no miparay panmoria tayo ed si Jehova? No konsideraen tayo so totoo ed inkalapagan, niparaan tayo so dalan ed pangiter na pantasi no lawas tayon makaaro. Siempre, paliisan tayo so klase na pililimog a nayarin makaapekto ed espiritualidad tayo. (1 Corinto 15:33) Ingen, nipanengneng tayo so “kamaongan bilang too,” ya agtayo mumudmoraen so totoon agmananisia.​—Gawa 27:3.

20. Lapud alimbawa nen Jehova tan si Jesu-Kristo, anto so nepeg tayon gawaen?

²⁰ On, ibibilang nen Jehova tan si Jesu-Kristo so balang sakey ed sikatayo a makanepegan na respeto. Lawas tayo komon a nodnonoten no panon so inkiwas da tan idaulo tayo met so pangipanengneng na galang ed balang sakey. Tan lawas komon a tandaan tayo iray salita na Katawan tayon Jesu-Kristo: ‘Amin yo et sanaagi.’​—Mateo 23:8.

Panon Yon Ebatan?

• Panon so nepeg a panmoria yo ed saray kaparan managdayew?

• Panon kayon napakiwas a mangigalang ed arum lapud alimbawa nen Jehova tan si Jesus?

• Panon a napagalangan na kaasawaan a lalaki tan atateng so arum?

• No moriaen na mamatatken iray kapara ran Kristiano bilang agagi, onkiwas ira ed antoran paraan?

[Tepetepet Parad Panagaral]

 [Litrato ed pahina 18]

Pagalangan so asawa yon bii tekep na saray salita na apresasyon

[Litrato ed pahina 18]

Pagalangan yoy ananak yo diad italineng ed sikara

[Litrato ed pahina 18]

Tratoen yoray membro na kongregasyon tekep na dignidad