Itanem Iray Bukel na Katuaan a Nipaakar ed Panarian

“Dia ed kabuasan itanem mo so binim, tan dia ed labi agmo ipiko so limam.”​—ECLESIASTES 11:6.

1. Diad anton pantalos a mangitatanem na bukel iray Kristiano natan?

 SAY panagdalus so walaan na importantin betang ed sosyedad na saray Hebreo nensaman. Satan so makasengeg no akin a si Jesus, ya inusar to so intiron bilay to bilang too diad Insipan a Dalin, et insiglaot to iray teman nipaakar ed panagdalus diad saray ilustrasyon to. Alimbawa, inyaliling to so panangipulong ed maong a balita na Panarian na Dios diad panagtanem na bukel. (Mateo 13:1-9, 18-23; Lucas 8:5-15) Diad sayan panaon, balanglan manaayam itayo ed lugar a walay panagdalus odino anggapo, say panagtanem na espiritual a bukel ed onian paraan so sankaimportantian a kimey a gawaen na saray Kristiano.

2. Panon kaimportanti so panagpulong a kimey tayo, tan anto so pigara ed saray bengatlan gagawaen natan pian nasumpal itan?

² Baleg a pribilihyo so pibiang ed panagtanem na katuaan na Biblia ed sayan panaon na anggaan. Oniay maabig ya impangibalikas na Roma 10:14, 15 ed kaimportantian na sayan kimey: “Panon sirin so panawag da ed saman so agda sinisia? Tan panon so panisia ra ed agda nadngelan? Tan  panon so pakadngel da no anggapo so mangipulong? Tan panon so pampulong da no ag-ira imbaki? Unong na nisulat; Alay karakpan na saray sali na saray mangitarok na saray magayaga a balita na saray maong a bengatla!” Anggapo lay mas importanti ni nen say pantultuloy tayon manumpal ed sayan inter na Dios a ganggan, tekep na positibon awawey. Lapud satan, okupadon tuloy iray Tastasi nen Jehova ed pamapawala tan panangibunog na saray Biblia tan saray katulongan ed panagaral na Biblia diad 340 a lenguahe. Say panangiparaan ed sarayan materyal so mankaukolan na masulok a 18,000 a boluntaryo ed saray hedkuarter tan ed saray sangan opisina ed nanduruman daldalin. Tan ngalngali anemiran milyon a Tastasi so mibibiang ed panangibunog ed sarayan literatura na Biblia diad intiron mundo.

3. Anto so nasusumpal diad panamegley na panagtanem na katuaan a nipaakar ed Panarian?

³ Anto so resulta na sayan impasyan pankikimey? Singa ed panaon na saray Kristiano nensaman, dakel so mangaawat natan ed katuaan. (Gawa 2:41, 46, 47) Balet, say mas importanti nen say dakel a bilang na saray balo niran abautismoan a manangipalapag na Panarian et say katuaan a sayan malaknab a panagtasi so mamapasantos ed ngaran nen Jehova tan kiyaalangonan to bilang alenleneg a tuan Dios. (Mateo 6:9) Niarum ni, say pikakabat ed Salitay Dios so mamapaaligwas ed kabibilay na dakel a totoo tan nayarin mansumpal itan ed kilalaban da.​—Gawa 13:47.

4. Diad anton kalaknab so impangiyansakit na saray apostol ed totoon pinulongan da?

⁴ Sigpot a mikabisado iray apostol ed manangiter-bilay a kaimportantian na maong a balita, tan iyaansakit da iramay pupulongan da. Mabitar itan ed saray salita nen apostol Pablo, sanen oniay insulat to: “Maib-ibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” (1 Tesalonica 2:8) Diad impangipatnag da ed ontan a puron panagpaga ed totoo, si Pablo tan say arum nin apostol so angalig ed si Jesus tan saray mangatatawen ya anghel, ya aktibon maong ed sayan manangiliktar-bilay a kimey. Repasoen tayo iray importantin betang na sarayan mangatatawen a lingkor na Dios diad panagtanem na katuaan a nipaakar ed Panarian, tan nengnengen tayo pa no panon itayon napaseseg ed ehemplo ra diad panumpal tayo ed betang tayo.

Si Jesus​—Say Managtanem na Katuaan a Nipaakar ed Panarian

5. Anton kimey so manunan inka-okupadoan nen Jesus sanen sikatoy wadiad dalin?

⁵ Si Jesus, ya ayadyarin too, so awalaan na pakayarin mangitarya na dakel a maabig iran materyal a bengatla ed saray totoo nen panaon to. Alimbawa, sarag to komon a solbaren so dakel a lingon ideya nipaakar ed panagtambal nen panaon to, odino nayari komon a paaligwasen to so pakatalos na too ed arum a lawak na siensia. Ingen, impabitar to la kasakbayan na ministeryo to a say inkibakian to et say pangipulong ed maong a balita. (Lucas 4:17-21) Tan diad pansampot lay ministeryo to, oniay impaliwawa to: “Nisengeg ed saya nianak ak tan nisengeg ed saya linma ak dia ed mundo, pian tasian ko so katuaan.” (Juan 18:37) Kanian sikatoy okupadon maong ed panagtanem na saray bukel na katuaan nipaakar ed Panarian. Mas importanti ni so kibangat na totoon nambilay ed panaon to nipaakar ed Dios tan ed saray gagala To nen say antokaman ya edukasyon a niiter ed sikara nen Jesus.​—Roma 11:33-36.

6, 7. (a) Anto so makatantandan impipaknaan nen Jesus sakbay na intokotok to’d tawen, tan panon to itan a susumpalen? (b) Panon kayon naapektoan a mismo ed awawey nen Jesus ed panagpulong a kimey?

⁶ Tinukoy nen Jesus so inkasikato bilang Managtanem na katuaan a nipaakar ed Panarian. (Juan 4:35-38) Inkayat toray bukel na maong a balita ed amin a pankanawnawa. Anggano nen sikatoy manpapanabos la diad angipasakan ed sikato, inyabawag to so maong a balita nipaakar ed arapen a paraiso diad dalin. (Lucas 23:43) Niarum ni, say pirmin panagpaga to a kaukolan a nipulong so maong a balita so ag-angangga ed impatey to’d panamairapan a kiew. Sakbay na intokotok to’d tawen, ingganggan toray apostol to a mantultuloy a mangitanem na saray bukel na katuaan a nipaakar ed Panarian tan manggawa ira na babangatan. Insan walay makatantandan insipan nen Jesus. Inkuanto: “Nia! Wala ak ed sikatayo diad amin ya agew angga ed kasampotan na sistema na bengabengatla.”​—Mateo 28:19, 20, NW.

⁷  Panamegley na sarayan salita, akipaknaan si Jesus a suportaan to, iwanwan to, tan salimbengan to so kimey na panangipulong ed maong a balita diad “amin ya agew angga ed kasampotan na sistema na bengabengatla.” Angga ed mismon panaon tayo, interesado nin siansia si Jesus ed panag-ebanghelyon kimey. Sikato so Lider tayo, a mangiimaton ed panagtanem na katuaan a nipaakar ed Panarian. (Mateo 23:10) Bilang Ulo na Kristianon kongregasyon, sikato so walaan na eebatan ed si Jehova nipaakar ed sayan sankamundoan a kimey.​—Efeso 1:22, 23; Colosas 1:18.

Iyaabawag na Saray Anghel so Makapaliket a Balita

8, 9. (a) Panon so impangipatnag na saray anghel ed puron interes da ed kimey na totoo? (b) Diad anton pantalos a nayarin nibaga ya iimatonan itayo na saray anghel?

⁸ Sanen pinalsa nen Jehova so dalin, saray anghel so “nankanta a bansag, tan . . . inmeyag ira lapu ed liket.” (Job 38:4-7) Manlapu la’d saman, sarayan pinalsa ed tawen so angipatnag na pirmin interes ed saray kimey na totoo. Sikara so inusar nen Jehova a mangipasabi’d madibinon anunsio ed saray totoo. (Salmo 103:20) Nagkalalo lan tua iya  no nipaakar ed panangikayat na maong a balita ed panaon tayo. Diad puyan a niiter ed sikato, anengneng nen apostol Juan so “anghel a mantektekkiab dia ed pegley na tawen” a walaan na “andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley; et kuanto ed baleg a bosis: Takotan yo so Dios, tan iter yo ed sikato so gloria: ta say oras na pangukom to sinmabi la.”​—Apocalipsis 14:6, 7.

⁹ Tinukoy na Biblia iray anghel bilang “espiritu ya amin, a nibaki a manlingkor a pinabangan na saray manawir naani na kilalaban.” (Hebreos 1:14) Diad magunaet a panusumpal na saray anghel ed nipabtang iran kimey da, walaan iray pankanawnawa a manimano ed sikatayo tan ed say kimey tayo. Singano wala itayo’d sankanengneng a plataporma na teatro, a susumpalen tayo so kimey tayo diad imaton na saramay walad tawen. (1 Corinto 4:9) Agaylan makabat tan makapasagyat a naamtaan ya aliwan sikatayo lambengat so mankikimey bilang managtanem na katuaan a nipaakar ed Panarian!

Magunaet Tayon Sumpalen so Betang Tayo

10. Panon ya onaplika so praktikal a bilin na Eclesiastes 11:6 ed panag-ebanghelyon kimey tayo?

¹⁰ Akin ya interesadon maong si Jesus tan saray anghel ed kimey tayo? Inter nen Jesus so sakey a rason sanen inkuanton: “Kuan ko ed sikayo, wala so liket ed arap na saray anghel na Dios nisengeg ed sakey a managkasalanan a magbabawi.” (Lucas 15:10) Ontan met so puron pangiyaansakit tayo ed totoo. Kanian, gagawaen tayo so anggaay nayarian tayo pian ikayat iray bukel na katuaan a nipaakar ed Panarian diad inerman a pasen. Onaplika iray salita ed Eclesiastes 11:6 ed kimey tayo. Oniay insimbawa na Biblia ed sikatayo: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi manpadpara naani a maong.” Tua, diad balang too a mangawat na mensahe tayo et nayarin wala met so nilasus odino nilibo ni ingen ya agmangawat ed satan. Balet singa saray anghel, manliket itayo sano walay “sakey a nankasalanan” ya angawat na mensahe na kilalaban.

11. Panon kaepektibo so kauusar na saray publikasyon a nibase’d Biblia?

¹¹ Dakel ni so nasasaglawi ed panagpulong na maong a balita. Say sakey lan importantin katulongan ed sayan kimey et say nibase’d-Biblia ya inimprinta iran materyal ya uusaren na Tastasi nen Jehova. Diad arum a pamaakaran, sarayan publikasyon et singa met bukebukel a nikakayat ed nanduruman pasen. Agtayo amta no iner iratan ontubo. No maminsan, nayarin napanpapasaan ni so sakey a publikasyon antis a nabasa itan na sakey a too. Nayari ni ingen ya iwanwan nen Jesus tan saray anghel so pigaran ebento pian nagawa itan diad kagunggunaan na saray maptek-impanpuson totoo. Konsideraen pa so pigaran eksperiensia a mangiyilustra ed no panon ya imaneobra nen Jehova iray ag-inilaloan tan makapakelaw a resulta diad inkausar na literaturan nipalima ed totoo.

 Say Kimey na Tuan Dios

12. Panon a kinmana so sakey a daan lan magasin pian natulongan so sakey a pamilya a makapikabat ed si Jehova?

¹² Nen 1953, si Robert, Lila, tan saray ananak da so inmalis a nanlapud sakey a baleg a syudad diad sakey ya abokbok tan dagdaan lan abung diad nikaumaan a lugar na Pennsylvania, E.U.A. Nen akaalis la ra, denesidi nen Robert so manggaway kasilyas ed silong na asikop a takayan. Nen nilukwab toray pigaran malapar a tabla, aromog to ed beneg na dingding iray apigpignis lan papel, ubak na walnut, tan arum niran bengatla ya inuulor na saray utot. Akaseksek ed saratan so sakey a kopya na magasin a The Golden Age. Si Robert so nagkalautlan nan-interes ed sakey ya artikulon nipaakar ed panagpabaleg ed ananak. Sikatoy asagyat a maong ed malinew, tan nibase’d-Biblian panangidirehi a lugan na magasin kanian inkuan to’d si Lila ya onloob ira ed “relihyon na The Golden Age.” Diad loob na pigara lambengat a simba, walay tinmoktok a Tastasi nen Jehova, balet ta inkuan nen Robert ya interesado lambengat iran sankapamilyaan ed “relihyon na The Golden Age.” Impaliwawa na Tastasi a wala lay balon paulo na The Golden Age, salanti say Awake! Si Robert tan Lila so regular ya impaiyaralan na Biblia ed saray Tastasi, tan abautismoan ira ed saginonor. Insan intanem da met so bukel na katuaan ed ananak da tan daakan so inani ra. Natan, masulok a 20 membro na sayan pamilya, pati amin ya ananak di Robert tan Lila, so bautismado lan lingkor nen Jehova a Dios.

13. Anto so makasengeg ed impan-interes ed Biblia na sakey a sanasawan taga-Puerto Rico?

¹³ Manga 40 taon lay apalabas, si William tan Ada, a sanasawan taga-Puerto Rico so ag-interesado ed panag-aral na Biblia. No ontoktok iray Tastasi nen Jehova, mankuankuanan so sanasawa ya anggapo ra’d abung. Sakey ya agew et pinegdat nen William so sakey a talyer pian manaliw na nakaukolan to diad pan-apiger to ed abung to. Nen sikatoy onalis la, naimano to so sakey a libron kolor-birdi a walad baleg a basuraan. Satan imay libron Religion, ya impalapag na Tastasi nen Jehova nen 1940. Insempet itan nen William tan nanliketan ton binasa so nipaakar ed pandumaan na palso tan tuan relihyon. Nen wala lamet so tinmoktok a Tastasi nen Jehova, malikeliket a dinmengel si William tan Ada ed mensahe tan impaiyaralan ira na Biblia. Kayari na pigaran bulan et sikara so abautismoan diad Divine Will International Assembly nen 1958. Manlapu la’d saman, wala lay masulok a 50 a totoon atulongan dan nagmaliw a Kristianon agagi.

14. Unong ed sayan eksperiensia, anton posibilidad so nagawaan na sakey a nibase’d-Biblian literatura?

¹⁴ Si Karl et 11-años lambengat tan medyo paweg. Singa walan naynay so kasebeg to. Say ama to, a sakey ed managkaral na German Methodist, so angibangat ed sikato ya onla’d impierno iray mauges a totoo sano ompatey ira. Kanian antakot a maong nen Karl so nipaakar ed impierno. Sakey ya agew nen 1917, apasikmatan nen Karl ed karsada so sakey a pirason papel a walay akasulat, insan to dinokdok itan. Nen babasaen to itan, anengneng ton tampol so tepet ya: “Anto so impierno?” Satan  a papel et sakey ya imbitasyon ed sakey a publikon paliwawa nipaakar ed impierno, ya inyuksoy na saray Estudyante na Biblia, a kabat la natan bilang Tastasi nen Jehova. Kayari na ngalngali sakey taon, abautismoan si Karl nen asumpal to so pigaran sesyon ed panagaral na Biblia, tan sikatoy nagmaliw a sakey ed saray Estudyante na Biblia. Nen 1925 et sikatoy naimbitaan a manserbi ed sankamundoan ya hedkuarter na Tastasi nen Jehova​—a panseserbian to ni anggad natan. Sakey a Kristianon karera ya asabi toy masulok a waloran dekada lapud sakey a piraso lambengat na papel diad karsada.

15. Anto so gawaen nen Jehova, no nanengneng ton matukoy so panggawa’d satan?

¹⁵ On, agbalot nadetermina na too no panon tan diad anton laknab so direktan pibibiang na saray anghel ed sarayan eksperiensia. Balet, kaukolan ya agtayon balot manduaruwa a si Jesus tan saray anghel so walaan na aktibon betang ed panagpulong a kimey tan imamaneobra nen Jehova iray bengatla no nanengneng ton matukoy iratan. Iyilustra na saraya tan dakel niran eksperiensia so pankaabigan a nagawaan na literatura tayo no nipalima tayo iratan.

Nimatalek ed Sikatayo so Sakey a Kayamanan

16. Anto so naaralan tayo ed saray salitan walad 2 Corinto 4:7?

¹⁶ Sinaglawi nen apostol Pablo so sakey a ‘kayamanan a walad saray basehan pitek.’ Satan a kayamanan et say inter na Dios a ganggan a manpulong, tan saray basehan pitek et saray totoon angimatalekan nen Jehova ed sayan kayamanan. Lapud saratan a totoo et ag-ayadyari tan walaan iray limitasyon, intuloy ya inkuan nen Pablo a say epekto na inkibakian dan manggawa’d satan et “say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) On, nailaloan tayo so pangitarya nen Jehova ed nakaukolan a biskeg pian nayarian tayon sumpalen so kimey tayo natan.

17. Anto so naabet tayo no itatanem tayo iray bukel na katuaan nipaakar ed Panarian, tan akin balet a nepeg tayon mantinien so positibon awawey?

¹⁷ Mabetbet et nakaukolan a mansakripisyo itayo. Nayarin mairap odino aliwan kombinienti so pankimey ed arum a teritorya. Walaray lugar ya agmanginennenen so maslak a totoo, a masumpa ni ingen. Nayarin dakel a sagpot so gagawaen ed saratan a lugar balet ta anggapoy napatnagan ya aligwas. Balet makanakana so pansasagpot tayo. Tandaan a saray bukel ya itatanem yo so mangipagamor na liket ed totoo natan tan diad andi-anggaan a bilay ed arapen. Aminpiga lan apaneknekan a tua iray salita ed Salmo 126:6: “Say onla tan mannangis a sankatarok to so mabli a bukel, ya itatanem, andi-duaruwa ya onsempet lamet naani a magaygayaga, a sankatarok to so pinungopungo to.”

18. Panon tayon naimano lawas so ministeryo tayo, tan akin a nepeg tayon imanoen itan?

¹⁸ Anamoten tayo komon so kada matukoy a pankanawnawa a mabulos ya itanem so bukebukel na katuaan nipaakar ed Panarian. Agtayon balot komon lilingwanan ya, anggaman sikatayo so mantatanem tan mansasalog ed saray bukel, si Jehova so mamapabaleg ed saratan. (1 Corinto 3:6, 7) Ingen, unong a susumpalen nen Jesus tan saray anghel so nabebetangan da ed kimey, iilaloan nen Jehova a sigpot tayon sumpalen so ministeryo tayo. (2 Timoteo 4:5) Komon ta lawas tayon imanoen so panagbangat tayo, say awawey tayo, tan say inkagunaet tayo ed ministeryo. Akin? Oniay ebat nen Pablo: “No gawaen mo so saraya, nilaban mo so inkasika tan saray ondengel met ed sika.”​—1 Timoteo 4:16.

Anto so Naaralan Tayo?

• Diad antoran paraan a mamapawalay maabig a resulta so panagtanem a kimey tayo?

• Panon a mibibiang si Jesu-Kristo tan saray anghel ed panag-ebanghelyon kimey natan?

• Akin a nepeg itayon mabulos bilang managtanem na katuaan a nipaakar ed Panarian?

• Sano makaabet itayo na agpananginenen odino isusumpa ed ministeryo tayo, anto so nepeg a mamakiwas ed sikatayo pian mantultuloy?

[Tepetepet Parad Panagaral]

[Litrato ed pahina 15]

Singa met saray dumaralos ed Israel nensaman, mabulbulos ya ikakayat na saray Kristiano natan iray bukel na katuaan nipaakar ed Panarian

[Litrato ed pahina 16, 17]

Papawalaen tan ibubunog na saray Tastasi nen Jehova so dakerakel a publikasyon a nibase’d-Biblia diad 340 a lenguahe