Maabig Iran Ehemplo​—Kasin Nagugunggunaan Ka Manlapud Saratan?

“AGMALIW kayon pangaligan na amin a mananisia a walara ed Macedonia tan dia ed Acaya.” Insulat nen apostol Pablo irayan salita ed saray matoor a Kristianon manaayam ed Tesalonica. Talagan nakomendaan so ehemplon impanengneng da parad saray kapananisiaan da. Sakey ni, saray taga-Tesalonica a mismo so kinmiwas unong ed ehemplon impanengneng nen Pablo tan saray kaiba to. Inkuan nen Pablo: “Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder; unong na singa pikakabat yo no anto so inkatoo mi ya imparungtal mi a dili ed sikayo a nisengeg ed sikayo. Tan nagmaliw kayon manag-alig ed sikami.”​—1 Tesalonica 1:5-7.

On, si Pablo so aglambengat angipulong ed saray sermon. Say mismon bilay to so makaimpluensia​—ehemplo ed pananisia, panagsungdo, tan dilin-panagsakripisyo. Lapud saya, si Pablo tan saray kaiba to so nagmaliw a mabiskeg ya impluensia ed kabibilay na saray taga-Tesalonica, ya amakiwas ed sikaran mangawat ed katuaan “diad baleg a karelmengan [“pirmin kairapan,” NW].” Balet, aliwa lambengat a di Pablo tan saray kakimeyan to so walaay positibon impluensia ed saraman a mananisia. Makapaseseg met so ehemplo na arum a nansungdo ed kairapan. Onia so insulat nen Pablo ed saray taga-Tesalonica: “Sikayo, agagi, nagmaliw kayo a manag-alig ed saray iglesia’y Dios ed Kristo Jesus a wala’ra ed Judea: ta sikayo met intepel yo bengabengatla ya intepel da met na kabaleyan yon dili unong ed ginawa ra ed saray Judio.”​—1 Tesalonica 2:14.

Si Kristo Jesus​—Say Manunaan ya Ehemplo

Anggaman si Pablo a mismo so angipanengneng na ehemplon manepeg ya aligen, agto nilingwanan ya impabitar si Jesu-Kristo bilang manunan ehemplo a nepeg a tumboken na saray Kristiano. (1 Tesalonica 1:6) Si Kristo so manunaan ya Ehemplo tayo. Insulat nen apostol Pedro: “Ta saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.”​—1 Pedro 2:21.

Balet, sinumpal nen Jesus so bilay to bilang too ngalngalin 2,000 taon lay linmabas. Natan et sikatoy ‘manaayam ed sakey a liwawa ya agnaasinggeran’ bilang sakey ya imortal ya espiritun pinalsa. Bilang ontan, sikatoy “agnanengneng na anggan siopa ed saray totoo.” (1 Timoteo 6:16) Panon, sirin, a sikatoy naalig tayo? Say sakey a paraan et diad panaral ed apatiran salaysay na Biblia nipaakar ed bilay nen Jesus. Itatarya na saray Ebanghelyo so aralem a pakatalos ed personalidad, kurang na bilay, tan “kalakal,” to. (Filipos 2:5-8) Nagamoran so kaaruman ya aralem a pakatalos diad maalwar a pan­aral ed libron The Greatest Man Who Ever Lived, a manisingbat ed saray agawa ed bilay nen Jesus a detalyadon tuloy tan unong ed alasir na kronolohiya. *

Say dilin-panagsakripisyon ehemplo nen Jesus so walaan na mabiskeg ya epekto ed si apostol Pablo. Inkuanto ed saray Kristiano ed Corinto: “Tan siak sankabalgan a liket so pangiupot ko tan kaupot ko lapud saray kamarerwa yo.” (2 Corinto 12:15) Agaylan singa-Kriston awawey! Legan tayon momolimolien so ayadyarin ehemplo nen Kristo, napakiwas itayo met a mangalig ed sikato diad dilin kurang na bilay tayo.

Singa bilang, imbangat itayo nen Jesus a nepeg tayoy mandependi ed sipan na Dios a mangitarya ed materyal a paraan. Balet nagkalalo ni so ginawa  to nen say satan. Impanengneng to so ontan a pananisia tan kompiyansa ed si Jehova diad inagew-agew a paraan. Inkuanto: “Saray kuyangen walay balaong da, tan saray manok ed tawen walaan iray ubong; balet say Anak na too anggapoy pangisaralan to na ulo to.” (Mateo 6:25; 8:20) Kasin saray materyal a kapagaan so manodomina ed panagnonot tan saray kiwas mo? Odino kasin say bilay mo so mamaneknek ya iyuunam ya anapen so Panarian? Tan komusta met so awawey mo nipaakar ed serbisyo ed si Jehova? Kasin singa met ed Ehemplo tayo, si Jesus? Ipapanengneng na Biblia ya aglabat basta impulong nen Jesus so nipaakar ed inkaseseg noagta impanengneng to met so pirmin seseg to diad dakel ya inkagawa. (Juan 2:14-17) Sakey ni, agaylan maabig ya ehemplo so impanengneng nen Jesus no nipaakar ed panangaro! Agayla, imbagat toy dilin bilay to parad saray babangatan to! (Juan 15:13) Kasin aaligen mo si Jesus diad pangaarom ed Kristianon agagim? Odino kasin aabuloyan moy ag-inkayadyari na arum a mangamper ed panangarom ed sikara?

Diad panggugunaet tayon tumboken so ehemplo nen Kristo, mabetbet itayon onsaew. Balet maseguron napapaliket si Jehova ed panggugunaet tayon ‘ikawes so Katawan tayo a Jesu-Kristo.’​—Roma 13:14.

Saray ‘Pinagkauliran na Pulok’

Wala ta iray indibidual diad kongregasyon natan ya onkanan ehemplo parad sikatayo? Peteg a wala’ra! Saray agagin apabtangan na responsabilidad so nepeg a nagkalalo lan mangipanengneng na ehemplo. Binilin nen Pablo si Tito, a nanlingkor ed saray kongregasyon diad Creta tan anuro na saray manangasikaso, a balang aturon matatken so nepeg ya “anggapo so kabalawan to.” (Tito 1:5, 6) Ontan met so imbilin nen apostol Pedro ed ‘saray mamasiken’ a magmaliw a ‘pinagkauliran na pulok.’ (1 Pedro 5:1-3) Tan komusta met iramay manlilingkor bilang ministeryal a lingkor? Nepeg da met so magmaliw a “lalaki a manlilingkor ed maabig a paraan.”​—1 Timoteo 3:13, NW.

Siempre, aliwan realistikon ilaloan a balang matatken odino ministeryal a lingkor so matalonggaring ed dunong diad amin a pamaakaran na Kristianon ministeryo. Onia so inkuan nen Pablo ed saray Kristiano diad Roma: “Kanian dia ed kiwawala na nanduruma a langkap ed sikatayo, unong na gra­sya a niiter ed sikatayo.” (Roma 12:6) Saray nanduruman agagi so ontalona diad nanduruman pamaakaran. Aliwan makatunongan so panilalo a saray mamatatken et naspot so amin a gawaen tan ibaga ra. “Dia ed akamayamay a nengneng nagapol itayo ya amin,” so ibabaga na Biblia diad Santiago 3:2. “No say siopaman a too et agnagapol ed salita, sayan too ayadyari, tan ayarian to met a pegetan so amin a laman.” Balet, anggaman ed agda inkayadyari et siansian nayarian na mamatatken, a singa si Timoteo, “so [magmaliw ya] uliran ed saray manisia, dia ed salita, dia ed panagbilay, dia ed aro, dia ed pananisia, dia ed kasimpitan.” (1 Timoteo 4:12) No ontan so gawaen na saray mamatatken, saramay walad pulok so mabulos a mangiyaplika’d simbawa na Hebreos 13:7: “Nonot yo so saray manuley ed sikayo, . . . tan motektek yo no anto so asumpalan na impanbilay da, alig yo so pananisia’ra.”

Arum a Modernon-Agew Iran Ehemplo

Diad apalabas a pigaran dekada, dakerakel ni so angipanengneng a maabig iran ehemplo. Komusta met iray nilibon misionaryo a walaan na dilin-panagsakripisyo a “tinaynan daray kaabungan, ono agagi a lalaki, ono bibii, ono ama, ono ina, ono saray anak, ono daldalin” pian sumpalen so Kristianon kimey diad arum a daldalin? (Mateo 19:29) Nonoten met iray managbiahen manangasikaso tan kaasawaan da, saray lalaki tan bibii a manlilingkor bilang boluntaryo diad saray opisina na Watch Tower Society, tan saray payunir a manlilingkor diad saray kongregasyon. Kasin saratan ya ehemplo so mamakiwas ed arum? Nanonotan na sakey a Kristianon ebanghelisador diad Asia so sakey a misionaryon nangraduar ed koma-walon klase na Watchtower Bible School of Gilead. Inkuanto a sayan matoor ya agi so “mabulos a mangarap ed pinasyan ageyet tan pirmin salimuot. . . . Say nagkalalo nin pandinayewan et say abilidad ton mansalita ed Intsik tan Malay iran lenguahe anggaman sikatoy nanlapud Inglatera.” Antoy epekto na sayan maabig ya  ehemplo? Inkuan na agi: “Say inkaulimek tan kompiyansa to so anagyat ed siak a mankaliktan a magmaliw met a misionaryo sano ombaleg ak.” Agpankelawan, ta sayan agi so talagan nagmaliw a misionaryo.

Lugan na Watch Tower Publications Index so listaan na dakel ya istorya ed bilay a pinmaway ed Panag-Bantayan tan Awake! iran magasin. Sarayan istorya so mangisasalaysay ed saray indibidual ya angikaindan ed saray minumundon karera tan kalat da, analona ed saray kakapuyan, nanggawa na baleg iran panamasimbalo ed personalidad, nanmantini ed positibon awawey anggaman ed kairapan, tan angipatnag na inkakuli, panagsungdo, katooran, inkamapaabeba, tan dilin-panagsakripisyon espiritu. Onia so insulat na sakey a managbasa ed sarayan salaysay: “Atulongan da ak a magmaliw a lalon mapaabeba tan misalsalamat a Kristiano legan kon babasaen iray dinalan da, tan atulongan da ak ya agko tanton nonoten so inkasiak odino magmaliw a masiblet.”

Niarum ni, aglilingwanan so maabig iran ehemplo diad mismon kongregasyon yo: saray ulo na pamilya ya ag-onsasaew a mangasikaso ed materyal tan espiritual a pankaukolan na saray pamilya ra; saray agagin bibii​—pati saray mansusulon kainaan​—a mangaasikaso ed saray desdes ed panamabaleg ed anak legan ya aktibo iran mibibiang ed ministeryo; saray maedad la tan agla makayari a mantutultuloy a matoor anggaman sikaray onkakapuy tan maletey lay bunigas da. Agkayo ta napakiwas ed ontan iran ehemplo?

Tua, say mundo so napno na mauges iran ehemplo. (2 Timoteo 3:13) Anggaman ontan, konsideraen so bilin nen Pablo ed saray Kristianon manaayam diad Judea. Kayari ton insalaysay iray napanuliranan a walna na dakel a lalaki tan bibii a walaay pananisia nensaman, pinaseseg ira nen Pablo: “Kanian sikatayo met, bangta wala ed liberliber tayo so sakey a sankabalgan a lurem na saray tasi, . . . batiken tayo [met] a siaanos komon so babatiken a niyan ed arap tayo, a nengnengnengen tayo si Jesus a nanggawa tan manamayadyari na pananisia tayo.” (Hebreos 12:1, 2) Saray Kristiano natan so apaliberan na ‘baleg ya ulop’ na maabig iran ehemplo​—namparan nensaman tan ed modernon panaon. Talaga ta’n nagugunggunaan ka manlapud saratan? Nagunggunaan ka no determinado kan ‘agmangalig ed mauges, noagta say maong.’​—3 Juan 11.

[Paimano ed Leksab]

[Blurb ed pahina 20]

Aliwan realistikon ilaloan a balang matatken odino ministeryal a lingkor so matalonggaring ed dunong diad amin a pamaakaran na Kristianon ministeryo

[Saray litrato ed pahina 21]

Saray mamatatken so kaukolan a magmaliw a ‘pinagkauliran na pulok’