Magunaet ya Iyabawag so Maong a Balita
Magunaet ya Iyabawag so Maong a Balita
“Magmaliw kayon marlang ed espiritu. Manpaaripen kayo ed si Jehova.”—ROMA 12:11, NW.
1, 2. Anton awawey so pambabanikelan na saray Kristiano a mantinien bilang manangipulong ed maong a balita?
PANLIKETAN na sakey a kalangweran a laki so balon trabaho to. Diad pilimeron agew a pantrabaho to, pitalaran toray instruksion na amo to. Pinonot to so pilimeron gawaen to tan seryoson maong ed satan. Sikato so magunaet a manggawa’d anggaay nayarian to.
2 Bilang Kristianos, nayarian tayo met ya iyaliling so inkasikatayo bilang balon trabahador. Lapud say ilalo tayo et say pambilay ya andi-anggaan, nibaga a kagapogapo tayo ni lambengat a mankikimey parad si Jehova. Segurado a dakel ni so pagawa ed sikatayo na Manamalsa tayo a mamasiansia ed sikatayon okupado ya anggad angga. Balet say pilpilimeron niganggan ed sikatayo et say pangiyabawag ed maong a balita na Panarian to. (1 Tesalonica 2:4) Antoy liknaan tayo ed sayan ipapagawa na Dios? Singa ed samay kalangweran a laki, labay tayon sumpalen itan diad anggaay nayarian tayo, tekep na seseg, gayaga, tan inkagunaet!
3. Anto so nakaukolan ta pian ontalona itayo bilang ministro na maong a balita?
3 On, sakey ya angat so panmantini ed ontan a positibon awawey. Nilikud ed ministeryo tayo, dakel niray responsabilidad tayo, ya arum ed saratan so pirmin mankaukolan na biskeg tayo ed pisikal tan emosyonal a paraan. Nagagawaan tayo met so maslak ed saratan a bengatla legan tayon pampepelengan so ministeryo tayo. Balet, satan et tuloytuloy a pibabarangkaan. (Marcos 8:34) Indanet nen Jesus a say itatalona tayo bilang Kristianos so mankaukolan na pirmin sagpot.—Lucas 13:24.
4. Panon a makaapekto so inagew-agew iran kapagaan diad espiritual a panmoria tayo?
4 Makasengeg ed dakerakel a gagawaen, magmainomay so nakesawan odino nabelatan no maminsan. ‘Saray kapagaan ed bilay’ so nayarin mangamper ed seseg tan apresasyon tayo ed saray teokratikon kimey. (Lucas 21:34, 35; Marcos 4:18, 19) Lapud agtayo inkayadyari, ompano ikaindan tayo so ‘akaunan aro tayo.’ (Apocalipsis 2:1-4) Walaray aspekto na serbisyo tayo ed si Jehova a nayarin magmaliw a singa rotina la. Panoy pangitatarya na Biblia ed nakaukolan tayon panamaseseg pian napansiansia tayoy seseg tayo ed ministeryo?
Singa “Mandarlang ya Apoy” ed Kapusoan Tayo
5, 6. Panoy impanmoria nen apostol Pablo ed pribilihyo ton manpulong?
5 Say ministeryo ya inmatalek ed sikatayo nen Jehova so mablin tuloy pian abuloyan a magmaliw lambengat a paspasaray a kimey. Impasen nen apostol Pablo so panangipulong na maong a balita bilang abalbaleg a pribilihyo, tan minoria toy inkasikato bilang agmakanan pangimatalekan ed satan. Inkuanto: “Dia ed siak, a kamelagan ak nen say kamelmelagan ed saray amin a sasantos, niiter so saya a grasya, pian ipulong ko ed saray Gentiles so saray agnatukor a kayamanan nen Kristo. Tan panggawa ed amin a totoo a makanengneng komon no anto so pananulong na misteryo a nanlapu ed amin a panaon akaamot nensaman ed Dios ya amalsa ed saray lapag a bengatla.”—Efeso 3:8, 9.
6 Say positibon awawey nen Pablo ed ministeryo to so sakey ya ekselentin alimbawa parad sikatayo. Dia ed sulat to’d saray taga-Roma, oniay inkuanto: “Wala so inkagunaet ed biang ko a mangiyabawag ed maong a balita.” Agto imbaing so maong a balita. (Roma 1:15, 16, NW) Sikato so walaan na suston awawey tan nanggunaetan ton sinumpal so ministeryo to.
7. Diad saray sulat to ed saray taga-Roma, anto so impasakbay nen Pablo?
7 Binidbir nen apostol Pablo a kaukolan a mantinien so maseseg a punto de bista, kanian binilin toray Kristiano ed Roma: “Agkayo manpalpalteng ed kimey yo. Magmaliw kayon marlang ed espiritu. Manpaaripen kayo ed si Jehova.” (Roma 12:11, NW) Say Griegon salita a nipatalos a ‘palpalteng’ so walaan na kabaliksan na pagmaliw a “buntog, mailar.” Anggaman aliwa itayon palpalteng ed ministeryo tayo, nakaukolan ya alerto itayon amin ed antokaman a napapatnagan lan sintomas na espiritual ya inkabuntog, tan manggawa itayo na manepeg iran pananguman ed awawey tayo no nalilikas tayo la’ratan a sintomas ed sikatayo.—Uliran 22:3.
8. (a) Anto so nagmaliw a singa “mandarlang ya apoy” ed puso nen Jeremias, tan akin? (b) Anton leksion so naaralan tayo manlapud eksperiensia nen Jeremias?
8 Makatulong met ed sikatayo so espiritu na Dios sano nadidismaya itayo. Singa bilang, diad aminsan ya inkagawa et aliknan mismo nen propeta Jeremias so inkadismaya, tan ninonot to lay ontunda ed pampropropesiya to. Onia ni ingen so imbaga to nipaakar ed si Jehova: “Say ngaran to agko naani uliten, agak met mansalita la naani dia ed ngaran to.” Kasin pakapatnagan la iya na pirmin inkapuy nen Jeremias ed espiritual? Andi. Diad tua, say mabiskeg ya espiritualidad nen Jeremias, say aro to ed si Jehova, tan say seseg to ed katuaan so amabiskeg ed sikato pian mantultuloy a manpropesiya. Oniay insalaysay to: “Dia ed pusok [say salita nen Jehova] so singa mandarlang ya apoy ya akapotan ed saray pukel ko et nakesawan ak a mantepel et agko nitepel.” (Jeremias 20:9) Natural lambengat a nalikna na saray matoor a lingkor na Dios so sagpaminsan a pakadismaya. Balet sano manpikasi ira ed si Jehova parad tulong, nabasa to so kapusoan da tan mabulbulos ton inabang ed sikara so masanton espiritu to no walad kapusoan da so salita to, a singa met ed si Jeremias.—Lucas 11:9-13; Gawa 15:8.
“Agyo Eerepen so Apoy na Espiritu”
9. Anto so makaamper ed ikurang na masanton espiritu ed biang tayo?
9 Oniay imbilin nen apostol Pablo ed saray taga-Tesalonica: “Agyo eerepen so apoy na espiritu.” (1 Tesalonica 5:19, NW) On, saray gawa tan awawey a misumlangan ed maridios a prinsipyo so mangamper ed ikurang na masanton espiritu ed biang tayo. (Efeso 4:30) Saray Kristiano natan so walaan na kimey a mangipulong ed maong a balita. Aralem so respeto tayo ed sayan pribilihyo. Agla pankelawan no akin a saramay agmikabat ed Dios so mamubusol ed panagpulong a kimey tayo. Balet sano gagalaen na sakey a Kristiano ya ibaliwala so ministeryo to, nayarin manresulta itan ed kaerep na apoy na manamakiwas ya espiritu na Dios.
10. (a) Panon itayon naapektoan ed panmoria tayo ed kapara tayon too? (b) Anton atagey a panmoria ed ministeryo tayo so nibalikas ed 2 Corinto 2:17?
10 Moriaen na arum a walad paway na Kristianon kongregasyon a say ministeryo tayo et panagbunog lambengat na literatura. Nayarin nabaloan ni na arum a mankakabkaabungan itayo lapud labay tayo lambengat so makaawat na donasyon. No abuloyan tayo iratan a negatibon panmoria a mangimpluensia ed awawey tayo, nayarin pakapuyen na saya so inkaepektibo tayo ed ministeryo. Imbes ya abuloyan tayo so ontan a panag-isip a mangapekta ed sikatayo, pansiansiaen tayo komon so panmoria a singa panmoria nen Jehova tan si Jesus ed ministeryo tayo. Imbalikas nen apostol Pablo so ontan ya atagey a panmoria sanen inyabawag to: “Aliwa kamin singa saray dakel a manderal [“managlako,” NW] na salitay Dios; noag ingen dia ed katuaan, singa salitay Dios, ed arap na Dios mansalita kami dia ed biang nen Kristo.”—2 Corinto 2:17.
11. Anto so akatulong ed saray inmunan Kristiano pian mansiansia iran maseseg anggano napapasegsegang ira, tan panon itayon naapektoan ed ehemplo ra?
11 Kayarin tuloy na impatey nen Jesus, saray babangatan to diad Jerusalem so nidunget ed panaon na panamasegsegang. Sikaray inggagaem tan niganggan ya ontunda lan manpulong. Ingen ta, ibabaga na Biblia a ‘napno ran amin na masanton espiritu, et sinalita ra so salita na Dios a makmakpel.’ (Gawa 4:17, 21, 31) Kayari na pigaran taon, nipatnag ed saray salita nen Pablo ed si Timoteo so positibon awawey a kaukolan a pansiansiaen na saray Kristiano. Inkuan nen Pablo: “Ag-itayo inikdan na Dios na espiritu na katakotan; noag say pakayari tan say aro tan say maong a linawa. Agmo sirin ibaing so pamatua na Katawan tayo, tan say siak a pinangaw to: noag ingen midamay ka ed saray irap lapu’d ebanghelyo, unong ed pakapanyari na Dios.”—2 Timoteo 1:7, 8.
Anto so Obligasyon Tayo ed Kapara Tayon Too?
12. Anto so manunan rason no akin ya ipupulong tayo so maong a balita?
12 Ta pian nawalaan itayoy suston awawey ed ministeryo tayo, nepeg a nawalaan itayo na dugan motibo. Akin a manpupulong itayo? Napatnagan diad saray salita na salmista so manunan rason: “Saray pinasantos mo dakmomoan da ka [Jehova]. Salambiten da so gloria na panarian mo, tan tongtongen da so pakauley mo; ya ipakabat ed saray anak na totoo so makapanyari a gawagawa to, tan say magloria a kabintaan na panarian to.” (Salmo 145:10-12) On, manpupulong itayo ta pian nidayew tayo si Jehova ed publiko tan pian napasantos so ngaran to ed imaton na amin a katooan. Anggano dagdaiset so ondengel ed sikatayo, say matoor a pangiyabawag tayo ed mensahe na kilalaban so makapangidayew ed si Jehova.
13. Anto so mamapakiwas ed sikatayo pian ibaga tayo ed arum so ilalo nipaakar ed kilalaban?
13 Manpupulong tayo met lapud aro ed totoo tan pian napaliisan so pankasalanan ed dala. (Ezequiel 33:8; Marcos 6:34) Misiglaotan ed saya iray salita nen Pablo sanen sinaglawi toray walad paway na Kristianon kongregasyon: “Maotang ak ed saray Griegos tan Barbaros, makabat tan agmakabat.” (Roma 1:14) Inisip nen Pablo ya otang to ed totoo so pangiyabawag ed sikara na maong a balita, lapud linawa na Dios ya “amin a totoo nilaban ira komon.” (1 Timoteo 2:4) Natan, ontan met so nalilikna tayo ya aro tan obligasyon ed kapara tayon too. Lapud aro nen Jehova ed katooan, imbaki to so Anak to ed dalin pian ompatey nisesengeg ed sikara. (Juan 3:16) Baleg itan ya impansakripisyo. Aaligen tayo so panangaro nen Jehova sano mangusar tayo na panaon tan mansagpot itayo pian ibaga ed arum so nipaakar ed maong a balita na kilalaban a nibase’d bagat nen Jesus.
14. Panon so impaneskribe na Biblia ed mundon walad paway na Kristianon kongregasyon?
14 Momoriaen na Tastasi nen Jehova so kapara ran totoo bilang posiblin magmaliw a kabiangan na Kristianon impanaagi. Nepeg a makpel itayon manpulong, ingen agto kabaliksan ya agresibo itayon misangsangan. Bilang paneknek, uusaren na Biblia iray mapuersan termino sano tutukoyen to so mundo ed inkalapagan. Say mismon salita a “mundo” so inusar nen Pablo diad negatibon pantalos sanen sinaglawi to so “karunongan na sayan mundo,” tan “minumundon pilpilalek.” (1 Corinto 3:19; Tito 2:12, NW) Pinanonotan met nen Pablo iray Kristianon taga-Efeso a sanen nankurang ira “unong ed kaugalian na sayan mundo” sikara so “inatey” ed espiritual a paraan. (Efeso 2:1-3) Sarayan balikas tan arum niran mipadpara’d saratan so mitunosan ed saray salita nen apostol Juan: “Say sankamundoan mandukdukol ed kaugsan.”—1 Juan 5:19.
15. Nipaakar ed totoon walad paway na Kristianon kongregasyon, anto so agtayo gagawaen, tan akin ya andi?
15 Balet, tandaan a saratan a balikas et manutukoy ed mundo ed inkalapagan a nisian ed Dios, aliwan ed saray indibidual. Agsasamelen na saray Kristiano so panhusga lan unona no panon so ikiwas na siopaman a too ed panagpulong a kimey. Anggapoy basiyan da pian deskribien so siopaman a too bilang kanding. Aliwan sikatayo so mangibaga no anto so pansumpalan da sano onsabi si Jesus a mangibiig ed ‘saray karnero’ manlapud ‘saray kanding.’ (Mateo 25:31-46) Si Jesus so aturon ukom; aliwan sikatayo. Niarum ni, ipapabitar na eksperiensia a walaray pirmin nigalet ed mauge-uges a kondukta ya angawat ed mensahe na Biblia, anguman, tan nagmaliw iran Kristiano a walaay malinis a kabibilay. Sirin, anggaman agtayo pililimogan so arum iran indibidual, labalabay tayon itongtong ed sikara so ilalo ed Panarian no walay pankanawnawa. Tinukoy na Kasulatan so nipaakar ed pigaran totoo ya, anggano agni ra mananisia et “wala a tinandaan ed bilay ya andi-angga.” Sikara so nagmaliw a mananisia ed saginonor. (Gawa 13:48) Agtayon balot naamtaan no siopa sirin iramay maptek impanwalna anggad sano napulongan tayo ira—a nayarin maminpiga-piga ni ingen. Sinononot ed saya, tratoen tayo iramay agni angawat ed mensahe na kilalaban tekep na ‘inka-tayadno’ tan ‘aralem a panagrespeto,’ ya ilaloan tayo ya arum ed sikara so nayarin onkiwas ed mensahe nipaakar ed bilay.—2 Timoteo 2:25; 1 Pedro 3:15.
16. Anto so sakey a rason no akin a labay tayon bayuboan so “dunong ed panagbangat”?
16 Say pamaaligwas tayo’d dunong tayo bilang managbangat so mamabulaslas ed inkagunaet tayon mangiyabawag na maong a balita. Diad pangiyilustra: Say makapaliket a galaw odino isport so agmakapainteres ed sakey a toon agmakaamta no panoy panggalaw ed satan. Balet ta makapaliket itan ed samay mikabisado ed satan a maong. Mipadpara, saray Kristiano ya akabayubo ed “dunong ed panagbangat” so lalon manggayaga ed ministeryo. (2 Timoteo 4:2; Tito 1:9) Oniay imbilin nen Pablo ed si Timoteo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) Panon tayon nabayuboan iray dunong ed panagbangat tayo?
17. Panon itayon ‘nawalaan na pampilalek’ ed pikakabat ed Biblia, tan panon a makagungguna itan a pikakabat nipaakar ed ministeryo tayo?
17 Say sakey lan paraan et say igamor na kaaruman a suston pikakabat. Papasesegen itayo nen apostol Pedro: “Pampilalekan yo komon, a singa saray kapangiyanak ya ugugaw, so gatas a maespiritu ya andian na saol to a mamabaleg ed sikayo ed kilalaban.” (1 Pedro 2:2) Say mabunigas a kapangiyanak so kasiporan lan mananap na gatas. Balet, say sakey a Kristiano so mankaukolan a ‘nawalaan na pampilalek’ ed pikakabat ed Biblia. Nagawaan iya diad pamayubo na maabig ya ugali ed panagaral tan panagbasa. (Uliran 2:1-6) Nakaukolan so sagpot tan dilin-disiplina no labay tayoy magmaliw a marundunong a managbangat ed Salitay Dios, balet saratan a sagpot so mangiter na saray tumang. Makasengeg ed liket a nalikna tayo lapud panangusisa ed Salita na Dios, magmaliw itayon marlang ed espiritu na Dios, a magunaet ya inabang ed arum so bengatlan naaaralan tayo.
18. Panon itayon nakinlongan na saray Kristianon miting pian sustoy pangusar tayo ed salita na katuaan?
18 Importanti met so betang na saray Kristianon miting diad marundunong a pangusar tayo ed Salitay Dios. Sano babasaen iray teksto na Biblia diad saray publikon paliwawa tan arum niran Makasulatan a diskusyon, maabig so itumbok itayo panamegley na mismon Biblia tayo. Makabat so panimano tayon maong ed saray parti ed miting, pati saramay espisipikon manasaglawi ed panagpulong a kimey tayo. Agtayon balot komon leleglemewen so kaimportantian na saray demostrasyon, ya ompan abuloyan tayoy inkasikatayo a nadisturbo. Lamet, nakaukolan so dilin-disiplina tan pangiyapasakey ed kanonotan. (1 Timoteo 4:16) Saray Kristianon miting so mamabiskeg ed pananisia tayo, ontulong ed sikatayo pian nabayuboan so pampilalek ed Salitay Dios, tan mangipasal ed sikatayon magmaliw a magunaet a manangiproklama ed maong a balita.
Nailaloan Tayo so Pananulong nen Jehova
19. Akin a makana so regular a pibiang ed panagpulong a kimey?
19 Saray Kristiano a “marlang ed espiritu” tan magunaet a mangiyabawag ed maong a balita so manbabanikel a mibiang a regular ed ministeryo. (Efeso 5:15, 16) Tua, nanduruma so sirkumstansia, tan aliwan amin et manguusar na parehon bilang na oras ed sayan manangisalbay-bilay a kimey. (Galacia 6:4, 5) Ingen, say nayarin mas importanti nen say dagup na oras ya uusaren tayo ed panagpulong a kimey et say inkabetbet na pangitongtong tayo ed arum nipaakar ed ilalo tayo. (2 Timoteo 4:1, 2) No naynay itayon manpulong, lalo tayon naapresia so kaimportantian na sayan kimey. (Roma 10:14, 15) Ombulaslas itayo ed panangabagey tan pililikna ed kaparan too sano naynay itayon makapitongtong ed masimoon a totoon mansibek tan mandageyem tan andian na ilalo.—Ezequiel 9:4; Roma 8:22.
20, 21. (a) Anto nin kimey so gawaen tayo’d arapen? (b) Panon so panutulong nen Jehova ed sagpot tayo?
20 Inmatalek ed sikatayo nen Jehova so maong a balita. Saya so pilimeron ingganggan to ed sikatayo bilang ‘kaiba ton komikimey.’ (1 Corinto 3:6-9) Sikatayo so magunaet tan intiron-kamarerwan manumpal ed sayan inter na Dios a responsabilidad, diad anggaay nayarian tayo. (Marcos 12:30; Roma 12:1) Dakel niran siansia so maptek impanwalna a totoo ed sayan mundo a nanaerasan ed katuaan. Dakel ni so kimey a gawaen tayo, balet makapanilalo tayo ed panangantabay nen Jehova leleg tayon susumpalen so ministeryo tayo.—2 Timoteo 4:5.
21 Ipagamor nen Jehova ed sikatayo so espiritu to tan kinlongan to itayo tekep na “kampilan na espiritu,” say Salitay Dios. Diad tulong to et nabiswat tayo so sangi tayo a “walaan na inkamabulos a panagsalita pian nipakabat so sagradon sekreto na maong a balita.” (Efeso 6:17-20, NW) Komon ta nibaga met ed sikatayo so walan insulat nen apostol Pablo ed saray Kristiano ed Tesalonica: “Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder.” (1 Tesalonica 1:5) On, komon ta iyabawag tayo so maong a balita tekep na inkagunaet!
Antikey a Panrepaso
• Lapu ed saray kapagaan ed bilay, anto so nayarin nagawa ed seseg tayo ed ministeryo?
• Diad anton paraan a singa “mandarlang ya apoy” ed kapusoan tayo so pilalek tayon mangiyabawag ed maong a balita?
• Antoran negatibon awawey ed ministeryo so nepeg tayon paliisan?
• Diad inkalapagan, panon tayon moriaen iramay agtayo kapananisiaan?
• Panon itayon tutulongan nen Jehova pian namantini tayo so seseg tayo’d panagpulong a kimey?
[Tepetepet Parad Panagaral]
[Saray litrato ed pahina 9]
Aaligen na saray Kristiano so inkaseseg nen Pablo tan si Jeremias
[Saray litrato ed pahina 10]
Lapud aro ed Dios tan ed kaparan totoo, napakiwas itayon manggunaet ed ministeryo