No Panon a Nawalaan so Bilay mo na Babaleg a Kabaliksan

ONIA so ibabaga na kadaanan a proverbio: “Agka nakolkolan ya onyaman; ontunda ka a manlapu ed dili a kakabatan mo. Inengneng mo ta so saray matam ed anggapo? Ta saray kayamanan petepeteg a manggawa ra ed sikara na payapayak, singa say agila ya ontekkiab ya arap ed tawen.” (Uliran 23:4, 5) Diad arum a salita, aliwan makabat so pambunek tayo pian onyaman, ta say kayamanan et ontekkiab a singa ed payapayak na agila.

Singa ipapanengneng na Biblia, masiglat a naandipat so materyal a kayamanan. Nayarin naandi itan ed sanlabi lapud natural a desyang, ikapuy na ekonomya, odino arum ya ag-iilaloan iran nagawa. Sakey ni, anggan saraman so matalona ed materyal et mabetbet a naproproblema. Konsideraen pay kipapasen nen John, a say trabaho to et say panligliwa ed saray politiko, sikat ed isport, tan ed maarin pamilya.

Onia so inkuan nen John: “Intalagak so inkasiak ed trabahok. Inmaligwas ak ed pinansyal, nanayam ak ed sikat iran hotel, tan no maminsan et onla ak a mantrabaho panamegley na pribadon eroplano. Diad inmuna et panliketan ko itan, balet ta kalkalnan sinmawa ak. Saray totoon nanggunaetan kon paliketen so ompatnag ya akinpaway labat. Anggapoy kabaliksan na bilay ko.”

Unong a nalmoan nen John, agmakapenek so bilay ya andian na espiritual iran kablian. Diad bantog a Sermon to ed Palandey, impanengneng nen Jesu-Kristo no panon a naeksperiensia so magnayon a liket. Inkuanto: “Mapalar iray duruka ed espiritu; ta sikaray makankien na panariay tawen.” (Mateo 5:3) Malinew sirin a makabat so pangiyuna ed saray espiritual a bengatla ed bilay. Balet, say arum a sengegan so makapangiter met na babaleg a kabaliksan ed bilay.

Talagan Importanti so Pamilyam tan Kakaarom

Kasin panggayagaan mo so bilay no anggapoy pitatalosan mo ed pamilyam tan anggapoy maapit a kakaarom? Talagan andi. Ginawa itayo na Manamalsa tayo a walaay pankaukolan a mangaro tan aroen. Saya so sakey a rason no akin ya impabitar nen Jesus so kaimportantian na ‘pangaro ed kaparan too a singa ed sikatayon dili.’ (Mateo 22:39) Say pamilya so regalo na Dios a  mangitatarya na ekselentin kipapasen parad panangipanengneng na andi-siblet ya aro.​—Efeso 3:14, 15.

Panon a say pamilya tayo et makapangiter na babaleg a kabaliksan ed bilay tayo? Bueno, say nankakasakey a pamilya so nayarin niyaliling ed sakey a marakdakep a hardin a pakarepreskoan manlapud desdes na inagew-agew a kabibilay. Mipadpara, diad loob na pamilya et makaromog itayo na makarepreskon panuulop tan inkaligsa a mangekal ed liknaan ya inkabegtebegtew. Siempre, aliwan automatikon mangitarya so sakey a pamilya na ontan a kipapasen. Balet, legan tayon paeeleten so bedber na pamilya, lalon onapit itayo ed sakey tan sakey, tan say bilay so lalon alay abig. Singa bilang, say panaon tan imano ya iiter tayo ed pangipanengneng na panangaro tan respeto parad kapareha tayo et inagew-agew a tipon a diad kaunoran et ondakerakel.​—Efeso 5:33.

No walaan itayo na ananak, nepeg tayon pambanikelan so pangitarya na dugan kaliberliber a pamabalegan ed sikara. Say pangipanaon a kaiba ira, pamasiansian lukas so linya na komunikasyon, tan pangiter ed sikara na espiritual ya instruksion et nayarin masakripisyo. Balet satan a panaon tan sagpot so mangiter ed sikatayo na baleg a kapenek. Ipapasen na matalonan atateng iray ananak bilang bendision, bilang tawir a nanlapud Dios a nepeg ya asikasoen a maong.​—Salmo 127:3.

Saray maong a kakaaro so makatulong met ed makapenek tan makabaliksan a bilay. (Uliran 27:9) Nawalaan itayo na dakel a kakaaro diad pangipanengneng na pililikna. (1 Pedro 3:8) Saray peteg a kakaaro so mamaalagey ed sikatayo sano nagapol itayo. (Eclesiastes 4:9, 10) Tan “say tuan kaaro . . . et sakey ya agi a nianak sano walay gonigon.”​—Uliran 17:17, NW.

Agaylan makapenek so tuan pankakaaro! Say iseselek na agew so lalon marakdakep, say tagano so lalon mananam, say musika so lalon makapaliket no kaibay kaaro. Siempre, say maapit a pamilya tan napanmatalkan a kakaaro et duara labat ya aspekto parad makabaliksan a bilay. Anton nin probisyon so ginawa na Dios a makapangiter na babaleg a kabaliksan ed bilay tayo?

Pamenek ed Espiritual a Pankaukolan Tayo

Singa nipaimano la ed akadkauna, insiglaot nen Jesu-Kristo so liket ed inkamapaga ed espiritual a pankaukolan tayo. Apalsa itayon walaan na espiritual tan moral a kapasidad. Kanian, tutukoyen na Biblia so “maespiritual a too” tan “say sekreton inkatoo na puso.”​—1 Corinto 2:15, NW; 1 Pedro 3:3, 4, NW.

Unong ed An Expository Dictionary of New Testament Words, nen W. E. Vine, say piguratibon puso et ontukoy ed “intiron mental tan moral ya aktibidad na too, namparan say panag-isip tan say emosyonal iran kabiangan.” Diad pangisasalaysay, inyarum nen Vine: “Diad arum a salita, say puso so nauusar ed piguratibon paraan parad akindalem ya inkatoo.” Satan met lanlamang a reperensia so mangibabaga a “say puso, unong a walad daledalem, et walaan na ‘say maamot ya inkatoo,’ . . . say peteg ya inkatoo.”

Panon tayon napenek iray pankaukolan na “maespiritual a too,” odino “say maamot ya inkatoo,” salanti, “say sekreton inkatoo na puso”? Alaen tayo so importantin kundang ed panggawa ed saya tan ed pamenek ed espiritual a pankaukolan tayo sano bidbiren tayo so punto na apuyanan a salmista ya angikanta: “Amtaen yo a si Jehova sikato so Dios: sikato so nanggawa ed sikatayo, ya aliwa a sikatayo a dili; totoo to itayo, sikatayo so karkarnero na pastolan to.” (Salmo 100:3) Say pamidbir ed saya so makatunongan a mangitonton ed sikatayon mangikuan a walay eebatan tayo ed Dios. No labay tayoy magmaliw a kabiangan na ‘totoo tan karkarnero na pastolan to,’ nepeg itayon onkiwas a mitunosan ed Salita to, say Biblia.

Kasin makapuy so pagmaliw a walay eebatan ed Dios? Andi, ta say pakaamta ya importanti ed Dios so kondukta tayo et mangarum na kabaliksan ed bilay tayo. Papasesegen itayo na satan a magmaliw a magmaong a too​—maseguron sakey a makanan kalat. “Mapalar so too ya antakot to si Jehova, a maliket a tuloy ed saray ganggan to,” kuan na Salmo 112:1. Say atekepan na galang a takot ed Dios tan impapuson katutulok ed saray ganggan to so makapangiter na babaleg a kabaliksan ed bilay tayo.

Akin a say katutulok ed Dios et makapenek ed sikatayo? Lapud walaan itayo na konsiensia, sakey a regalon impagamor na Dios ed amin a katooan. Say konsiensia et sakey a manag-usisa ed moral a mangabobon odino agmangabobon ed agawaan tayo odino nononoten tayon gawaen. Naeksperiensia tayo lan amin so ot-ot na pakakakonsiensia. (Roma 2:15) Balet say konsiensia tayo so nayari met a manumang ed sikatayo. Sano onkiwas  itayon andi-siblet nipaakar ed Dios tan ed kaparan too, nalikna tayoy inkakontento tan inkapenek. Naimano tayo a “lalo a mapalar so mangiter nen say mangawat.” (Gawa 20:35) Wala so importantin rason parad saya.

Ginawa itayo na Manamalsa tayo diad paraan a saray pilalek tan pankaukolan na kaparan totoo et mangapekta ed sikatayo. Say panulong ed arum so mamaliket ed mismon kapusoan tayo. Niarum ni, papaseguroan itayo na Biblia a sano mangiter itayo ed sakey a walad pankaukolan, ikokonsidera iya na Dios bilang pabor a ginawa parad sikato.​—Uliran 19:17.

Likud ed pakawalaan na akindalem a kapenek, kasin say pangimano ed espiritual iran pankaukolan tayo so ontulong ed sikatayo diad praktikal a paraan? Bueno, panisiaan na sakey a negosyanti diad Pegley Bukig a manngaran na Raymond a makatulong itan. “Say nikabiig a kalat ko, et say pananap na kuarta,” so inkuanto. “Balet nanlapu la’d nen anisia ak a wala so Dios tan diad Biblia et ibabalikas toray pirawat to, nagmaliw ak a duman too. Say pananap na pambilay natan so onkokomadua la ed bilay ko. Diad panggugunaet a napaliket so Dios, inwaklit ko lay makaderal a liknaan a pambusol. Anggaman inatey si amak legay balingaan, agko pinirawat so ombales ed saramay walay eebatan.”

Singa nalmoan nen Raymond, say pangasikason maong ed saray pankaukolan na “maespiritual a too” so mamaabig ed aralem a sugat na emosyon. Balet, likud no natalonaan tayo iray probleman onsasabi kada agew, say bilay so aliwan sigpot a makapenek.

Nayarian Tayoy Nawalaan na ‘say Kareenan na Dios’

Diad sayan okupadon mundo, agnaliklikas ya onlabas so pigaran agew. Nagagawa iray aksidenti, aliway pansusumpalan na saray plano, tan didismayaen itayo na totoo. Sarayan babeng so nayarin mangekal na liket tayo. Balet, diad saramay manseserbi ed si Jehova a Dios, isisipan na Biblia so akindalem ya inkakontento​—‘say kareenan na Dios.’ Panon tayon nadampot iyan kareenan?

Onia so insulat nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Imbes a salien a sakbaten a bukor iray problema tayo, kaukolan tayoy manpikasin masimoon, ya ipasakbat ed Dios so inagew-agew a pakakabelatan tayo. (Salmo 55:22) Onelet so pananisia ya ebatan toy ontan a pikakasi diad panamegley na Anak to, si Jesu-Kristo, legan ya onaaligwas itayo ed espiritual tan natetebek tayo no panon itayon tutulongan na Dios.​—Juan 14:6, 14; 2 Tesalonica 1:3.

Kayari tayon napabiskeg so kompiyansa tayo ed si Jehova a Dios, say “Dumerengel na pikakasi,” mas sarag tayo lan talonaan iray subok, a singa say tuloytuloy a sakit, inkatakken, odino inkaandi’d-bilay na sakey ya ina’d-aro. (Salmo 65:2, NW) Balet, parad peteg a makabaliksan a bilay, nepeg tayo met a nonoten so arapen.

Manggayaga ed Ilalo ed Arapen

Isisipan na Biblia so “tawen a balo tan dalin a balo,” sakey a matunong tan maasikason mangatatawen a gobierno a manuley ed amin a matulok a pamilya na too. (2 Pedro 3:13) Diad satan a balon mundo ya insipan na Dios, say guerra tan  ag-inkahustisya so salatan na kareenan tan inkahustisya. Aliwa iyan sebangsebang a pampirawat, noagta sakey itan a kombiksion ya ombiskeg ed kada agew. Talagan maong a balita itan tan maseguron sakey a rason parad panggayaga.​—Roma 12:12; Tito 1:2.

Si John, ya asalambit ed gapo, et liknaen to natan a say bilay to so walaan la na babaleg a kabaliksan. “Anggaman agak balot nagmaliw a relihyoson maong, lawas kon panisiaan so Dios,” inkuanto. “Balet ta imbaliwalak labat itan a sisiaen anggad walay duaran Tastasi nen Jehova a dinmalaw ed siak. Dakerakel so intepet ko ed sikara, a singa say, ‘Akin a wadia itayo? Anto iray ilalo tayo ed arapen?’ Diad unonan pankanawnawa et aliknak a walay gagala na bilay ko lapud saray makapenek a Makasulatan ya ebat da. Gapoan lambengat iman. Abayuboan koy inkapgaan ed katuaan ya angitonton ed siak a pasimbaloen ko iray amin a prinsipyok. Anggaman aliwa ak lan mayaman ed materyal, liknaen kon milyonaryo ak ed espiritual a paraan.”

Singa si John, nayarin inabuloyan mon inaktibo so espiritual ya obligasyon mo ed loob na dakel a taon. Balet, diad pamayubo ed “sakey a puso na kakabatan,” napabilay mo lamet itan. (Salmo 90:12) Tekep na determinasyon tan sagpot, nayarian moy nawalaan na peteg a gayaga, kareenan, tan ilalo. (Roma 15:13) On, tan say bilay mo so nawalaan na babaleg a kabaliksan.

[Litrato ed pahina 6]

Say pikakasi so makapangitarok ed sikatayo na ‘kareenan na Dios’

[Saray litrato ed pahina 7]

Kasin antam no antoy lalon makapenek ed bilay na pamilya?