Sikami Iray Klasen Walaan na Pananisia

Panangiyabawag na Maong a Balita ed Saray Tanemay Pagey ed Taiwan

SAY Taiwan so kaslakan lan manggagayaga ed pinasyan uran, a sengeg na mamidua so maong ya ani na pagey ed kada taon. Balet, tunggal paminsan ya anggapoy uran sano nepeg komon, tan ompatey iray kapantanem. Sano nagawa iya, kasin ontunda lay dumaralos? Andi. Amta ton kaukolan so pantultuloy. Sikatoy manpaserser lamet tan taneman to lamet iray daralusan. Insan, no maong so panaon, maong so ani na dumaralos. No maminsan et miulibay a tuloy so espiritual a panagtanem tan panagani.

Pantultuloy Diad Espiritual a Panagani

Diad inlabas na saray taon saray Tastasi nen Jehova diad Taiwan so pirmin nankimey pian mantanem tan manani ed saray bukel na Makasulatan a katuaan diad pigaran lugar ya ompatnag ya aliwan mabunga. Say sakey ya alimbawa et diad Miao-li County. Ngalngali anggapoy onkiwas ed panapanaon a panagpulong ed saman a lugar. Kanian nen 1973 sakey a sanasawan espisyal payunir so niasain a mankimey diman bilang sigpot-panaon a manangiyabawag na Panarian. Diad pilimero, arum so angipanengneng na interes ed maong a balita. Balet, saman ya interes so nalnes a tampol. Insan saray espisyal payunir so niasain ed sananey a lugar.

Nen 1991 et duaran nin espisyal payunir so niasain diman. Balet naimano lamet ed saray resulta a say panaon parad espiritual ya ibubulaslas so agmatukoy. Kalabas na pigaran taon, niasain lamet iray espisyal payunir diad iilaloan a mas mabunga komon a lawak. Kanian, say dalin so ag-ataneman ed loob na sakey a panat na panaon.

Nanani na Intalona so Apasimbalo Iran Sagpot

Nen Setyembre 1998 denesidin panggunaetan ya anapen so mas mabunga iran lugar diad maawang tan agni naasainan a teritorya diad Taiwan. Panon iyan nagawaan? Diad impangiasain na 40 a temporaryon espisyal payunir pian mankimey ed mas matoo a lugar ya agni naasainan iran teritorya.

Duaran manketegan a syudad diad Miao-li County so sakey ed saray teritoryan apilin pankimeyan. Apatira nin agagin mamarikit so nankimey diman ed loob na taloy bulan pian salien nin unona so teritorya. Ag-abayag kasabi ra diman, sikaray angisulat na makapalikliket iran report nipaakar ed karakel na interesadon totoo ya aromog da. Sanen asumpal day taloy bulan a panagpayunir da diman, sikaray mangikokondukta la na dakel a panangiyaral na Biblia. Sikara met so akapangiletneg na grupo na panagaral na libro diad tulong na sakey a matakken a nanlapud asingger a kongregasyon.

Talora ed sarayan agagin bibii so angipatnag a labay dan itultuloy ya asikasoen so malangwer ni “iran kapantanem” pian ombulaslas a maong. Bilang resulta, duara ed sikara so aturo bilang permanentin espisyal payunir, tan say komatlo so nantultuloy a nankimey diman bilang regular payunir. Sakey a matakken a nanlapud asingger a kongregasyon so inmalis ed saman a lugar pian ontulong ed sikara. Masulok ya 60 so inmatendi ed pilimeron publikon paliwawa ed saman a lugar. Natan et say asingger a kongregasyon so ontutulong ed sayan malangwer nin grupo diad pangikokondukta na saray miting ed Simba likud ed pigaran panagaral na libro. Agmanbayag et nayarin naporma so balon kongregasyon diman.

 Mangitatarok na Saray Bendision so Pantutultuloy Diad Arum a Parti na Taiwan

Ontan met so inkiwas na arum a lugar. Diad I-lan County ed mamaamianen a parti na isla, sakey a balon Panagaral na Libro ed Kongregasyon so niletneg diad saman a lugar a pankikimeyan na saray temporaryon espisyal payunir.

Legan a mankakabkaabungan ed sakey a labi, say temporaryon espisyal payunir so akaabet na sakey a kalangweran a laki tan impanengneng to ed sikato so sakey ya imbitasyon ya akalista iray miting ed kongregasyon. Tampol ya intepet na saman a kalangweran: “Nayari ta’n onatendi ak ed miting nabuas na labi? No ontan, antoy nepeg kon isulong?” Sayan payunir so makapangikokondukta na waloran panangiyaral na Biblia ed interesadon totoo kada simba. Pigaran iyaaralan na Biblia so ag-abayag et manplaplano lan magmaliw a manangipalapag na maong a balita, tekep na kalat a nabautismoan.

Sakey nin too diad saman met lanlamang a baley so abayag lan mimimisa balet ta agmakaromog na mangibangat ed sikato nipaakar ed Biblia. Sanen abalitaan toy uksoyan a panangiyaral na Biblia, inanamot toy pankanawnawa. Sikatoy apaseseg a mangiparaan lan masakbay ed leksion to. Sanen sinmabi so temporaryon espisyal payunir pian ikondukta so panagaral, nalmoan ton ginawa na bii so “homework” to diad impanaliw toy sakey a kuaderno ya angisulatan toy niimprinta iran tepet diad leksion to. Insan to insulat iray ebat to ed kada tepet. Kinopya to met ed kuaderno to so amin a nisitan teksto diad leksion to. Sanen sinmabi so agin bii a mangikondukta ed pilimeron panagaral, say bii so akaparaan la parad unonan taloran leksion!

Ontan met so resulta ya anengneng ed baley na Dongshih diad sentral Taiwan. Saray temporaryon espisyal payunir so akapangipalima na masulok a 2,000 a brosyur diad loob na taloy bulan ya impanpulong da diman. Diad komatlon bulan, sikaray mangikokondukta la na 16 a panangiyaral na Biblia. Aderal so baleg a kabiangan na baley lapud yegyeg ya agawa ed sentral Taiwan nen Setyembre 21, 1999, balet ta say pigaran interesado so nantultuloy ya inmaligwas ed espiritual, anggaman kaukolan dan biahien so anggad sakey oras pian onatendi ed saray miting diad sankaasinggeran a Kingdom Hall. On, nakaukolan so pantultuloy pian maong so ani, balanglan diad literal odino ed espiritual a paraan.

[Mapa ed pahina 8]

(Parad aktual a format, nengnengen so publikasyon)

TSINA

Taiwan Strait

TAIWAN

[Credit Line]

Mountain High Maps® Copyright © 1997 Digital Wisdom, Inc.