Say Ilalo ed Kioli so Walaan na Pakayari
Say Ilalo ed Kioli so Walaan na Pakayari
“Ibilang ko ra so ami’ bengatla ya onlereg . . . pian makapikabat ak ed [si Jesu-Kristo], tan nakabatan ko so pakayari na inkioli to.”—FILIPOS 3:8-10.
1, 2. (a) Pigaran taon lay linmabas, panon so impaneskribe na sakey a klerigo ed kioli? (b) Panon a nagawa so kioli?
KASAKBAYAN na dekaday 1890, imbalita na media so nikadkaduman sermon na sakey a klero diad Brooklyn, New York, U.S.A. Inkuanton say kioli et laktipen na katipon-lamet tan ibilay-lamet na amin a pukel tan laman a kabiangay kabalgan na too, apoolan man itan odino naaksidenti, kinan na ayep odino nagmaliw ya abono. Panisiaan na satan a managkalar a walay agew a 24-oras, ya ombilunget so liwang lapud saray lima, taklay, sali, gamegamet, puke-pukel, ula-ulat, tan baog na binilyon ya inaatey a totoo. Anapen na sarayan kabiangan so arum a parti na samay datin laman. Insan saramay kamarerwan manlapud tawen tan impierno so ompawil ed sarayan apaolin laman.
2 Agmakatunongan so kioli panamegley na pakatibukel lamet na saray orihinal ya atomo, tan saray totoo so andian na imortal a kamarerwa. (Eclesiastes 9:5, 10; Ezequiel 18:4) Agla nakaukolan a tugyopen lamet nen Jehova, say Dios na kioli, iray atomo na sakey a bengatla a datin manitibukel ed sakey a laman na too. Sarag to so mamawalay balo iran laman parad saramay napaoli. Inikdan nen Jehova na pakayari so Anak to, si Jesu-Kristo, pian paolien iray inaatey, tekep na ilalon manbilay ya andi-anggaan. (Juan 5:26) Kanian inkuan nen Jesus a: “Siak so kiolian, tan say bilay. Say manisia ed siak, anggan inatey la, nabilay ni.” (Juan 11:25, 26) Agaylan makapaligsay-puson sipan! Satan so mamabiskeg ed sikatayo pian makapansungdo itayo ed saray subok tan mangarap ni ingen ed ipapatey bilang matoor a Tastasi nen Jehova.
3. Akin a nakaukolan ya idepensa nen Pablo so nipaakar ed kioli?
3 Agmitunosan so kioli ed bangat a saray totoo et walaay imortal a kamarerwa—sakey a panmoria ya inagamil na Griegon pilosopo a si Plato. Kanian, antoy agawa sanen pinulongan nen apostol Pablo iray prominentin Griego diad Areopago ed Atenas, a sinaglawi to si Jesus, a pinaoli na Dios? Oniay kuan na salaysay: “Et kadngel da na nipaakar ed kioli ed bilay na saray inatey, saray arum sikatoy inelekan da.” (Gawa 17:29-34) Mabilay ni’d saman so dakel ya akanengneng ed apaolin Jesu-Kristo tan, anggaman inelek-elekan da ra, pinaneknekan da a sikatoy inmoli manlapud saray inatey. Balet ta imburi na saray palson managbangat a mililimog ed kongregasyon na Corinto so kikioli. Kanian mapuersan indepensa nen Pablo iyan Kristianon bangat diad 1 Corinto kapitulo 15. No aralen tayon maong iray argumento to, napekderan so inkasegurado tan pakayari na ilalo ed kioli.
Mabiskeg a Prueba Nipaakar ed Inkioli nen Jesus
4. Anton prueba so inter nen Pablo ya apamintuan to so inkioli nen Jesus?
4 Imanoen pa no panon so impangigapo nen Pablo ed panangidepensa to. (1 Corinto 15:1-11) Bembenan a malet na saray taga-Corinto so maong a balita na kilalaban, nilikud labat no anggapoy gagala na impagmaliw dan mananisia. Inatey si Kristo nisesengeg ed saray kasalanan tayo, niponpon, tan inmoli’d bilay. Diad tua, pinmayawar so apaolin Jesus ed si Cefas (Pedro), “insan dia ed saray labindua.” (Juan 20:19-23) Sikato so anengneng na manga 500, a nayari pa lagi nen ingganggan ton: ‘Onla kayo, manggawa kayo na saray babangatan.’ (Mateo 28:19, 20) Sikato so anengneng nen Santiago, a singa met ed amin a matoor ya apostoles. (Gawa 1:6-11) Nen asingger lay Saulo ed Damasco, pinmayawar si Jesus ed sikato a “singa sakey a lukon a nakal”—a singano si Saulo et apaoli la’d maespiritun bilay. (Gawa 9:1-9) Nagmaliw a mananisia iray taga-Corinto lapud pinulongan ira nen Pablo, tan inawat da so maong a balita.
5. Anto so impankatunongan nen Pablo unong a nirekord ed 1 Corinto 15:12-19?
5 Imanoen so panagkatunongan nen Pablo. (1 Corinto 15:12-19) Lapud impulong na saray akanengneng ya apaoli si Kristo, panon a nibagan anggapo so kioli? No ag-inmoli si Jesus manlapud saray inaatey, kaapaan so panagpulong tan pananisia tayo, tan magmaliw itayon matilan tasi ed Dios diad pangibabagan pinaoli to si Kristo. No ag-onoli iray inaatey, ‘wala tayo ni ed saray kasalanan tayo,’ tan natawtaw iramay inaatey ya akikasakey ed si Kristo. Niarum ni, “no dia ed sayan bilay wala so ilalo tayo ed Kristo lambengat, sikatayo lay sankaugsan na palar ed ami’ too.”
6. (a) Anto so imbaga nen Pablo bilang paneknek ed inkioli nen Jesus? (b) Anto so “kaunoran a kabusol,” tan panon itan a mangangga?
6 Pinekderan nen Pablo so inkioli nen Jesus. (1 Corinto 15:20-28) No panon a si Kristo so “inmunan bunga” ed saramay naugip ed patey, napaoli met so arum. Lapud nansumpal ed ipapatey so intunganga na toon si Adan, say kioli et diad panamegley na sakey a too—si Jesus. Saramay nakaiba to so napaoli leleg na kiwawala to. Si Kristo et ‘ekalen to so amin a panag-ari, tan amin a pananguley tan pakayari’ a sumpad inkasoberano na Dios tan manuley bilang Ari angga ed pangiyan la nen Jehova ed amin a kakabusol diad silong na sali to. Anggan say “kaunoran a kabusol”—say patey ya atawir ed si Adan—so mangangga panamegley na merito na bagat nen Jesus. Insan iyawat la nen Kristo so Panarian ed Dios tan Ama to, a manpasakop ed Samay “anguley ed ami ganagana, pian say Dios wala ed amin ed ami ganagana.”
Abautismoan Parad Saray Inaatey?
7. Siopa iramay ‘abautismoan lapud gagalan magmaliw ya inaatey,’ tan anto so kabaliksan na saratan ed sikara?
7 Oniay nitepet ed saray onsusuppiat ed kikioli: “Anto so gawaen na saramay nabautismoan lapud gagalan magmaliw ya inaatey?” (1 Corinto 15:29, NW) Aglabay ya ibaga nen Pablo a nabautismoan iray mabilay nisesengeg ed saray inaatey, lapud ta saray babangatan nen Jesus so nepeg a manaral, manisia, tan manpabautismo. (Mateo 28:19, 20; Gawa 2:41) Saray alanaan a Kristiano so ‘abautismoan lapud gagalan magmaliw ya inaatey’ diad pagmaliw dan okupado ed sakey a kurso na bilay a mansumpal ed ipapatey tan kioli. Onggapo iyan klase na bautismo sano ibalap ed sikara na espiritu na Dios a walaan iray mangatatawen ya ilalo tan mansampot itan sano onoli ira manlapud patey angga ed imortal ya espiritun bilay diad tawen.—Roma 6:3-5; 8:16, 17; 1 Corinto 6:14.
8. Anto so pakaseguroan na saray Kristiano anggano sikara so pateyen nen Satanas tan saray lingkor to?
8 Unong ya ipapabitar na saray salita nen Pablo, say ilalo ed kioli so mamabiskeg ed saray Kristiano a mangarap ed naynay a kapeligroan tan ipapatey lapud panusumpal da ed kimey na panangipulong na Panarian. (1 Corinto 15:30, 31) Anggano abuloyan nen Jehova a pateyen ira nen Satanas tan saray aripen to, amta ran sikaray paolien To. Si Jehova lambengat so makatigway ed kamarerwa ra, odino bilay da, diad Gehenna, a mangisisimbolo ed andi-anggaan a kadederal.—Lucas 12:5.
Say Pankaukolan a Manalerto
9. Ta pian walaan na manamabiskeg a pakayari so ilalo ed kioli diad bilay tayo, anto so nepeg tayon paliisan?
9 Si Pablo so apabiskeg na ilalo ed kioli. Legan a walad Efeso, nayarin sikatoy imbuntok ed teatron walad pataktak pian milaban ed saray masesebeg ya ayep. (1 Corinto 15:32) No agawa itan, sikato so aliktar, a singa si Daniel et alegyas manlapud saray leon. (Daniel 6:16-22; Hebreos 11:32, 33) Lapud sikatoy nanilalo ed kioli, say awawey nen Pablo et aliwan singa saray apostata ed Juda diad panaon nen Isaias. Inkuan da: “Mangan tan oninum itayo, ta nabuas et ompatey itayo.” (Isaias 22:13, Septuagint) No say ilalo ed kioli so walaan na manamabiskeg a pakayari ed bilay tayo a singa si Pablo, nepeg a paliisan tayo so ontan a makapuy ya awawey. “Agkayo patitilaan,” so pasakbay nen Pablo. “Saray mauges a kaulop deralen da so saray maong ya ugugali.” (1 Corinto 15:33) Siempre, onaplika iyan prinsipyo ed nanduruman aspekto na bilay.
10. Panon a mansiansian mabilay so ilalo tayo ed kioli?
10 Oniay inkuan nen Pablo ed saramay manduaruwa ed kioli: “Bangon kayo unong ed katunongan, tan agkayo mankakasalanan; lapu ed saray arum agda kabat so Dios: salitaen ko ya a pamabaing ko ed sikayo.” (1 Corinto 15:34) Diad sayan “panaon na anggaan,” nakaukolan ya onkiwas itayo unong ed suston pikakabat ed Dios tan ed si Kristo. (Daniel 12:4, NW; Juan 17:3) Saya so mamasiansian mabilay ed ilalo tayo ed kioli.
Napaoli ed Anton Laman?
11. Panon so impangiyilustra nen Pablo ed kioli na saray alanaan a Kristiano?
11 Ontumbok ya inebatan nen Pablo so pigaran tepet. (1 Corinto 15:35-41) Nayarin diad sagpot a mamawalay panduaruwa ed kioli, oniay nayarin itepet na sakey a manuusisa: “Panon so iyoli’ra ed bilay so saray inaatey? Tan dinan kasi a nengneng na laman so awiten da?” Unong ya impanengneng nen Pablo, say bukel a nitanem ed dalin so ompatey ta pian ontubo tan magmaliw a palakay. Mipadpara, nepeg nin ompatey so sakey a nailalak ed espiritu. Singa say intubo na sakey a tanaman manlapud sakey a bukel bilang balo lan kabalgan, ontan met so apaolin laman na alanaan a Kristiano, a miduma ed laman na too. Anggano pareho nin siansia so padron na panag-isip to a singa nen sakbay ya ompatey, sikato so onoli bilang balon pinalsa a walaan na espiritun laman a makapambilay ed tawen. Ontan met, saramay onoli ed dalin so ombilay a walaan na saray laman na too.
12. Anto so kabaliksan na saray balikas a saray “laman a mangatatawen” tan saray “laman a mangaraldalin”?
12 Singa ed inkuan la nen Pablo, midumaan so laman na too ed ayayep. Anggan say laman na ayep so nandurumaan met. (Genesis 1:20-25) Saray “laman a mangatatawen” na espiritun pinalsa so miduma ed gloria na saray “laman a mangaraldalin.” Wala met so pandumaan na gloria na agew, bulan, tan bibitewen. Balet saray apaolin alanaan so walaan na babaleg a gloria.
13. Unong ed 1 Corinto 15:42-44, anto so nitanem tan anto so ombilay?
13 Kayari ton sinalambit iray pandurumaan, oniay inyarum nen Pablo: “Ontan met so kioli ed bilay na saray inatey.” (1 Corinto 15:42-44) Inkuanto: “Nitanem [itan] ed kaderal tan onoli ya ombilay ya agnaderal.” Say tutukoyen nen Pablo dia et saray alanaan bilang grupo. Intanem ed kabubulok dia ed patey, ombilay itan ya agnabulok, ya andian lay kasalanan. Anggaman pinabpabanday na mundo, onoli itan ed mangatatawen a bilay tan ompatnag a kaiba nen Kristo diad gloria. (Gawa 5:41; Colosas 3:4) Diad patey et nitanem itan ed “laman na inkatoo” tan ombilay ed “maespiritun laman.” Lapud posibli iya ed biang na saray Kristianon nailalak ed espiritu, makaseguro itayo a say arum a katooan so onoli’d bilay diad dalin.
14. Panon ya impandumaan nen Pablo si Kristo tan si Adan?
14 Insan impandumaan nen Pablo si Kristo tan si Adan. (1 Corinto 15:45-49) Si Adan, say pilimeron too, so “nagmaliw a mabilay a kamarerwa.” (Genesis 2:7, NW) “Say unor ya Adan”—si Jesus—so “nagmaliw a sakey ya espiritu a manamilay.” Inter toy bilay to bilang dondon bagat, a diad unona et diad biang na saray alanaan a patumbok to. (Marcos 10:45) Bilang totoo, sikara ‘so mipadpara ed samay nanlapu ed dalin,’ balet sano onoli ra et magmaliw ira a singa say unor ya Adan. Seguradon, say bagat nen Jesus so mangungguna ed amin a matulok a katooan, pati saramay onoli diad dalin.—1 Juan 2:1, 2.
15. Akin ya ag-onolin silalaman iray alanaan a Kristiano, tan panon so iyoli ra legan na kiwawala na Jesus?
15 Sano ompatey iray alanaan a Kristiano, ag-ira onoli a silalaman. (1 Corinto 15:50-53) Say nabulok a laman tan dala so agmakatawir ed agkabubulok tan say mangatatawen a Panarian. Agla naeksperiensia na arum ya alanaan so andukey ya iyugip ed patey. Kasumpal da’d mangaraldalin a kurso ra ya atekepay katooran legan na kiwawala nen Jesus, sikara so ‘nauman dia ed kabekta, dia ed sankakirem.’ Sikaran tampol so onoli ed espiritun bilay diad agkabubulok tan gloria. Diad kaunoran, say mangatatawen a “nobya” nen Kristo so natibukel ed bilang a 144,000.—Apocalipsis 14:1; 19:7-9; 21:9; 1 Tesalonica 4:15-17.
Atalonaan la so Patey!
16. Unong ed si Pablo tan saray propeta nensaman, anto so nagawa naani ed patey ya atawir ed makasalanan ya Adan?
16 Matalonan inyabawag nen Pablo a say patey so magnayon lan naandi. (1 Corinto 15:54-57) Sano say nabulok tan ompatey et magmaliw lan agla nabulok tan imortal, nasumpal irayan salita: ‘Naakmon so patey ed ando lan ando.’ “O patey, iner so kawalaan na impanalom? O patey, iner so kawalaan na ot-ot mo?” (Isaias 25:8; Oseas 13:14) Say ot-ot a mamapawalay patey et say kasalanan, tan say onkokontra ed kasalanan et say Ganggan, a mangokondena ed saray makasalanan diad ipapatey. Balet lapud bagat tan inkioli nen Jesus, say patey ya atawir ed makasalanan ya Adan so aglan balot ontalona.—Roma 5:12; 6:23.
17. Panon ya onaplika natan iray salita ed 1 Corinto 15:58?
17 “Kanian inararok ira ya agagi,” so kuan nen Pablo, “mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.” (1 Corinto 15:58) Onaplika iratan a salita ed saray alanaan a nakdaan natan tan ed “arum a karnero” nen Jesus anggano ompatey ira ed sarayan kaunoran ya agew. (Juan 10:16) Aliwan maapa iray sagpot da bilang manangiproklama na Panarian, lapud walay kioli a manatalaran ed sikara. Bilang lingkor nen Jehova, sirin, komon ta mankuli itayo ed kimey na Katawan legan tayon aalagaren so panaon sano sililiket tayon ikelyaw so: “Patey, iner so kawalaan na impanalom?”
Asumpal so Ilalo ed Kioli!
18. Panon kabiskeg so ilalo nen Pablo ed kikioli?
18 Saray salita nen Pablo a nikurit ed 1 Corinto kapitulo 15 so mangipatnag a say ilalo ed kioli so walaan na pakayari ed bilay to. Sikato so seguradon tuloy a si Jesus so apaoli manlapud inaatey tan say arum so nibulos met ed kaslakan a lubok na katooan. Kasin walaan kayo na ontan a kombiksion? Impasen nen Pablo iray sinisiblet a pakagunggunaan bilang “andi-kakanaan a dutak” tan ‘imbilang to ya inkalereg so ganagana’ ta pian ‘nakabatan to si Kristo tan say pakayari na inkioli to.’ Mabulos so apostol a managmak na ipapatey a singa ed si Kristo lapu ed ilalon makaawat na ‘masasakbay a kioli.’ Atawag met itan ya ‘unonan kioli,’ a naeksperiensia na 144,000 ya alanaan a patumbok nen Jesus. On, sikara so napaoli ed espiritun bilay diad tawen, bangta “saray arum ya inatey” so onoli diad dalin.—Filipos 3:8-11; Apocalipsis 7:4; 20:5, 6.
19, 20. (a) Siopa iramay walan nikurit ed Biblia ya onoli’d bilay diad dalin? (b) Siopa so labay yon nanengneng ed kikioli?
19 Say ilalo ed kioli so nagmaliw a maglorian katuaan parad saray alanaan a nanmatoor anggad patey. (Roma 8:18; 1 Tesalonica 4:15-18; Apocalipsis 2:10) Saray makaliktar ed ‘baleg a kairapan’ so makanengneng ed pakagawa na say ilalo ed kioli diad dalin unong “a say dayat initer to so inaatey a wala ed sikato; tan say patey tan say Hades initer da so inaatey a wala ed sikara.” (Apocalipsis 7:9, 13, 14; 20:13) Kabiangan ed saramay napaoli’d bilay et si Job, a nanermen ed impatey na pitoran anak ton lalaki tan taloran mamarikit to. Isipen pay gayaga to sano manaabet ira—tan agaylay liket da ta wala ni so pitoran agagi ran lalaki tan taloran agagi ran magaganan bibii!—Job 1:1, 2, 18, 19; 42:12-15.
20 Agaylan bendision itan sano si Abraham tan Sara, Isaac tan Rebeca—tan say dakerakel ni, pati say ‘amin a propeta’—so napaoli ed bilay diad dalin! (Lucas 13:28) Say sakey ed sarayan propeta et si Daniel, a nisipan ed sikato so nipaakar ed kioli diad silong na Mesianikon uley. Diad loob na manga 2,500 a taon, nampainawa si Daniel ed lubok, balet diad pakayari na kioli, sikato so ‘onalagey ed kapalaran to’ bilang sakey ed saray “prinsipe ed amin a dalin.” (Daniel 12:13; Salmo 45:16) Agaylan makapaliket ya abeten, aliwa lambengat a saray matoor nensaman, noagta say mismon ama yo, ina yo, anak yon laki, anak yon bii, odino arum nin inad-aro yo a sinamsam ed sikayo na kabusol a patey!
21. Akin ya agtayo ipapaleen so panggaway maabig iran bengatla ed arum?
21 Arum ed kakaaro tan inad-aro tayo so nayarin dekadekada lan manlilingkor ed Dios tan matakken la ra. Nayarin nairapan la ran mangarap ed saray angat ed bilay lapud inkatakken da la. Agaylan simamaaro so pangiter ed sikara na antokaman a tulong a niiter tayo la natan! Diad ontan et agtayo panermenan ya agtayo agawaan iray obligasyon tayo’d sikara no say patey so manigway ed sikara. (Eclesiastes 9:11; 12:1-7; 1 Timoteo 5:3, 8) Makapanseguro itayo ya aglingwanan nen Jehova so maong iran bengatla a ginawa tayo ed arum, antokaman so edad odino kipapasen da. “Ontan sirin, unong a wala so kiambegya,” so insulat nen Pablo, “manggawa itayo na maabig ed saray amin, nagkalalo ed saray kaamong na pananisia.”—Galacia 6:10; Hebreos 6:10.
22. Anggad kasumpal na ilalo ed kioli, anto so nepeg tayon determinadon gawaen?
22 Si Jehova so “Ama na saray panangasi tan Dios na ami’ ligliwa.” (2 Corinto 1:3, 4) Naligliwa itayo ed Salita to tan tulongan to itayon manligliwa met ed arum panamegley na mabiskeg ya ilalo ed kioli. Anggad sano nanengneng tayo la so kasumpalan na satan ya ilalo dia ed iyoli la na saray inaatey ed dalin, komon ta walaan itayoy pananisia ed kioli, a singa si Pablo. Aligen tayo komon si Jesus, a say ilalo to ed pakayari na Dios a mamaoli ed sikato so agawa la. Saramay walad pakanodnonotan a lubok so magano lan makarengel ed bosis nen Kristo tan ompaway ira. Komon ta naligliwa tan manliket itayo ed saya. Balet importanti’d amin, komon ta misalsalamat itayo ed si Jehova, pinagmaliw ton posibli so panaeg ed ipapatey panamegley nen Katawan a Jesu-Kristo!
Anto so Ebat Yo?
• Anton prueba so inter nen Pablo ya apamintuan to so inkioli nen Jesus?
• Anto so “kaunoran a kabusol,” tan panon itan a mangangga?
• Diad biang na saray alanaan a Kristiano, anto so nitanem tan anto so ombilay?
• Siopa iramay nikurit ed Biblia a labay yon nakatongtong sano onoli ra’d bilay diad dalin?
[Tepetepet Parad Panagaral]
[Litrato ed pahina 16]
Mapuersan indepensa nen apostol Pablo so nipaakar ed kikioli
[Saray litrato ed pahina 20]
Say kioli nen Job, say pamilya to, tan dakerakel nira so sengegan na agnasabsabaan a liket!