Segurado so Ilalo ed Kioli!
Segurado so Ilalo ed Kioli!
“Wala so ilalok ed Dios, . . . a wala naani kioli.”—GAWA 24:15.
1. Akin a makapanilalo itayo ed kioli?
INTARYA la nen Jehova ed sikatayo so makatunongan iran rason parad ilalo ed kioli’d bilay. Insipan to ed sikatayo ya onoli iray inaatey, ya onaalagey lamet ira pian manbilay. Tan seguradon nasumpal so gagala to nipaakar ed saramay naugip ed patey. (Isaias 55:11; Lucas 18:27) Diad tua, impanengneng la na Dios so pakayari ton mamaoli na inaatey.
2. Panon itayon nagunggunaan na ilalo ed kioli?
2 Say pananisia ed probisyon na Dios a paolien To iray inaatey panamegley na Anak to, si Jesu-Kristo, so manustuni ed sikatayo diad panaon na gonigon. Say inkasegurado na ilalo ed kioli so ontulong met ed sikatayo pian mansiansia itayon matoor ed mangatatawen ya Ama tayo anggano nidunget itayo’d ipapatey. Seguradon ombiskeg so ilalo tayo ed kioli leleg tayon kokonsideraen iray walan impamaoli’d bilay a nikurit ed Biblia. Agawa irayan amin a milagro panamegley na pakayari na Soberanon Katawan a Jehova.
Inabet Da Iray Inatey Da Diad Inkioli
3. Anto so niiter a pakayari ed si Elias sanen inatey so ilalak na sakey a balon bii diad Sarepta?
3 Diad makapasagyat ya impanrepaso nen apostol Pablo ed pananisian impatnag na saray sakbay-Kristianon tastasi nen Jehova, oniay insulat to: “Saray bibii [et] inawat da so saray inaatey da lapu ed inkioli ed bilay.” (Hebreos 11:35; 12:1) Say sakey la’d saratan a bibii et say pobrin balon bii a taga-baley na Fenicia diad Sarepta. Lapud ta pinarawes to so propeta na Dios a si Elias, mamilagron dinmakel so arina tan larak to kaleganay eras a nayarin manigway la’d bilay dan san-ina. Sanen inatey so anak ton laki ed saginonor, sikatoy imparukol nen Elias ed katri, nampikasi, tan amitlon dinmakmomo ed tapew na ugaw a laki, tan akikasi: “O Jehova a Dios ko, pikasik ed sika, yabuloy mo a say kamarerwa na sayan ugaw ompawil komon ed sikato.” Impawil na Dios so kamarerwa, odino bilay, ed ugaw a laki. (1 Arari 17:8-24) Isipen pa labat so panlikliket na balon bii sanen atumangan so pananisia to panamegley na inkioli na inad-aro ton anak—say pilpilimeron nikurit ya inkioli!
4. Anton milagro so ginawa nen Eliseo diad Shunem?
4 Say sakey nin bii ya angabet ed inatey to diad inkioli so manaayam ed baley na Shunem. Bilang asawan bii na sakey lan masiken, impanengneng to so kamaongan ed si propeta Eliseo tan ed katambayan to. Sikatoy atumangan na sakey ya anak a laki. Kayari na pigaran taon balet, impatawag to so propeta, ya asabian ton inatey so anak to diad abung. Kayarin nampikasi si Eliseo tan nanggawa na pigaran bengatla, “say laman na ugaw pinmetang.” Samay ugaw et “binmasis ed aminpito a danay, tan say ugaw inmurikat to so saray mata to.” Sayan inkioli so angitarok na baleg a gayaga ed sikaran san-ina. (2 Arari 4:8-37; 8:1-6) Balet agaylan liket da ni sano onoli ra’d bilay ed dalin diad ‘magmaong a kioli’—say ilalon manatalaran ed sikara a posiblin agla ran balot ompatey! Agaylan pisalsalamatan tayo so maaron Dios na kioli, si Jehova!—Hebreos 11:35.
5. Panon ya alanor si Eliseo ed sakey a milagro anggano sikatoy inatey la?
5 Anggan sanen inatey tan niponpon la si Eliseo, pinagmaliw na Dios a makapanyari iray pukel to panamegley na masanton espiritu. Oniay nabasa tayo: “Sanen ipoponpon [na pigaran Israelita] so sakey a too, a, nia, asiiman da so sakey a [Moabitan] pulok; et imbantak da so too ed lubok nen Eliseo; et nen kadiwit na [inatey a] too ed saray pukel nen Eliseo, binmilay, tan inmalagey ed saray sali to.” (2 Arari 13:20, 21) Agaylay inkabigla tan liket na saman a too! Isipen pa so gayagan naeksperiensia sano napaoli la iray inad-aro’d bilay unong ed ag-onsaew a gagala nen Jehova a Dios!
Saray Inatey so Binilay na Anak na Dios
6. Anton milagro so ginawa nen Jesus diman ed asingger na syudad na Nain, tan panon itayon naapektoan ed sayan agawa?
6 Say Anak na Dios, a Jesu-Kristo, so angiter na makatunongan iran rason pian manisia itayo ya onoli iray inaatey, tekep na ilalo ya andi-anggaan a bilay. Ontulong ed sikatayo so agawa diman’d asingger ed syudad na Nain pian namoria tayo a posibli itan a milagro panamegley na inter na Dios a pakayari. Diad sakey ya inkagawa, nabet nen Jesus iray mangiponpon ed bangkay na sakey a balolaki ed paway na syudad. Sikatoy saksakey ya anak na balon bii. Oniay inkuan nen Jesus ed bii: “Agka mannangis.” Insan diniwit to so angikargaan ed bangkay tan inkuanto: “Balolaki, kuan ko ed sika, Bangon ka.” Diad saman et sikatoy binmalikwat tan nansalita. (Lucas 7:11-15) Sayan milagro so maseguron mamabiskeg ed kombiksion tayo a segurado so ilalo ed kioli.
7. Anto so walan agawa nipaakar ed anak a bii nen Jairo?
7 Nonoten met so sakey ya ebenton manasaglawi ed si Jairo, sakey a manangimaton ed sinagoga diad Capernaum. Impatawag to si Jesus ta pian tulongan so inad-aro ton 12-años a bii, a ngalngali la ompatey. Agnambayag et nibalita ya inatey la imay ugaw a bii. Diad impamaseseg to’d naermenan a Jairo a mangagamil na pananisia, akila si Jesus ed sikato diad abung to, a wadman iray man-ugaog a totoo. Akalek ira sanen inkuan nen Jesus ed sikara a: “Say ugaw ag-inatey, balet naugip.” Petepeteg a sikatoy inatey, balet ta impanengneng nen Jesus ya ombilay iray inaatey a totoo a singa say ibangon manlapud maitlep ya ugip. Binembenan to so lima na ugaw a bii, tan kuanto: “Marikit, kuan ko ed sika, Onalagey ka.” Binmangon a tampol so ugaw a bii, tan “saray atateng to nikelawan ira” tekep na pirmin liket. (Marcos 5:35-43; Lucas 8:49-56) Maseguro, ‘mankelkelaw’ iray membro na pamilya sano onoli ed bilay iray inaatey ya inad-aro ra’d bilay diad paraison dalin.
8. Anto so ginawa nen Jesus diman ed lubok nen Lazaro?
8 Si Lazaro so inatey la ed loob na apatiran agew sanen inasinggeran nen Jesus so lubok to tan impaekal to so bato ya akasara ed satan. Kayari ton nampikasi ed publiko ta pian naamtaan na saray maniimaton a sikatoy mandedependi ed pakayarin inter na Dios, oniay inkelyaw nen Jesus: “Lazaro, paway ka!” Tan sikatoy pinmaway! Saray lima tan sali to so abariberan ni na saray abel a parad ponpon, tan asakbongan ni na abel so lupa to. “Ukbaran yo tan paulyan yo,” so kuan nen Jesus. Nen anengneng da iyan milagro, say dakel a wadman a nanligliwa ed saray agagi nen Lazaro, si Maria tan Marta, so anisia ed si Jesus. (Juan 11:1-45) Agta sayan salaysay so mangiter ed sikayo na ilalo a nayarin onoli ed bilay iray inad-aro yo’d bilay diad balon mundo na Dios?
9. Akin a makapanseguro itayo a nayarian nen Jesus a paolien iray inaatey?
9 Sanen walad prisoan si Juan a Managbautismo, oniay impasabi nen Jesus a makapaseseg a mensahe: “Saray bulag awaten day pakanengneng da, . . . tan saray inaatey inmoli ra ed bilay.” (Mateo 11:4-6) Lapud pinaoli nen Jesus iray inaatey sanen sikatoy wadiad dalin, maseguron nagawaan to met itan bilang makapanyari ya espiritun pinalsa ya inikday Dios na pakayari. Si Jesus so “kiolian, tan say bilay,” tan agaylan makapaligliwa so pakaamta a diad asingger lan arapen et “amin so saray wala ed saray lubok narengel da so bosis to, et ompaway ira”!—Juan 5:28, 29; 11:25.
Ombiskeg so Ilalo Tayo Lapud Arum Niran Impamaoli’d Bilay
10. Panon yon deskribien so inmunan nikurit ya impamaoli na sakey ya apostol?
10 Sanen imbaki nen Jesus iray apostol to bilang manangipulong na Panarian, inkuanto: “Paoli yo ed bilay so saray inaatey.” (Mateo 10:5-8) Siempre, pian nagawaan da iya et nakaukolan a manmatalek ira ed pakayari na Dios. Diad Joppe nen 36 K.P., inatey so sakey a maridios a bii a si Dorcas (Tabita). Lapud maong iran ginawa to a singa say impandait na saray kawes a parad saray mankakaukolan a balo, nannangis ira ed impatey to. Imparaan na saray babangatan so kiponpon to tan impatawag da si apostol Pedro, ta pian manambayo. (Gawa 9:32-38) Pinapaway to so amin a wadman ed silir ed tagey, nampikasi, tan kuanto: “Tabita, alagey ka.” Inmurikat to so mata to, binmalikwat, binmemben ed lima nen Pedro, tan sikatoy impaalagey nen Pedro. Dakel so nagmaliw a mananisia lapud sayan inmunan nikurit ya impamaoli na apostol. (Gawa 9:39-42) Mangiter met itan ed sikatayo na kaaruman a rason pian manilalo ed kioli.
11. Anto so sankaunoran ya impamaoli a nikurit ed Biblia?
11 Say unor ya impamaoli a nikurit ed Biblia et agawa’d Troas. Sanen sinmamar diman si Pablo ed komatlon impanbaroy to bilang misionaryo, dinukeyan to so paliwawa to anggad pegley-labi. Lapud abanalan la tan nayarin makasengeg ed petang na dakel a lamparaan tan ed apusek a nandaragupan, akateglep so sakey a balolaki a manngaray Eutico tan naplag manlapud bintana na mikatlon grado. Sikatoy “inakop ya inatey,” ya aliwa lambengat a nalmay. Si Eutico so sinayakup nen Pablo, nilakap to, tan inkuanto’d saray maniimaton: “Agkayo maningal; ta say bilay to wala ed sikato.” Say labay ya ibaga nen Pablo et nabilay so balolaki. Saramay wadman so ‘aligliwan tuloy.’ (Gawa 20:7-12, NW) Natan, saray lingkor na Dios so makaromog na baleg a ligliwa diad pikabat a saray datin kaiba ra ed serbisyo ed Dios so makaeksperiensia ed kasumpalan na ilalo ed kioli.
Kioli—Abayag lan Iilaloan
12. Anton kombiksion so imbalikas nen Pablo ed arapan nen Romanon Gobernador a Felix?
12 Sanen nabibista si Pablo ed arap na Romanon Gobernador a si Felix, oniay inkuanto: “Sisiaen ko so amin na saray bengatla a nisulat ed Ganggan, tan nisulat ed saray Propeta; . . . a wala naani kioli ed bilay na saray matunong ta agmatunong.” (Gawa 24:14, 15) Panon a tinukoy na saray kabiangan na Salitay Dios, a singa say “Ganggan,” so kioli na saray inaatey?
13. Akin a nibagan sinaglawi la na Dios so kioli sanen inter to so pilimeron propesiya?
13 Sinaglawi na Dios so kioli sanen inter to so pilimeron propesiya ed Eden. Sanen asentensiaan so “daan ya uleg,” si Satanas a Diablo, oniay inkuan na Dios: “Mangiyan ak na gulaan ed sika ta say bii, tan gulaan ed saray ilalak to; sikato sugaten to so ulom, et sika sugaten mo so mukor to.” (Apocalipsis 12:9; Genesis 3:14, 15) Say kabaliksan na pakasugat ed mukor na bini na bii et say pamatey ed si Jesu-Kristo. No mekmeken la na Bini so ulo na uleg ed saginonor, nakaukolan ya onoli’d bilay si Kristo.
14. Panon a si Jehova et “aliwan Dios na saray inatey, noag ingen saray mabilay”?
14 Oniay inyabawag nen Jesus: “Satan so kioli ed bilay na saray inaatey, anggan si Moises impatnag to, dia ed pasen nipaakar ed zarza, nen tinawag to so Katawan a Dios nen Abraham, tan Dios nen Isaac, tan Dios nen Jacob. Ta sikato aliwan Dios na saray inatey, noag ingen saray mabilay; ta manbilay so amin a nipaakar ed sikato.” (Lucas 20:27, 37, 38; Exodo 3:6) Inaatey la ra di Abraham, Isaac, tan Jacob, balet ta say gagala na Dios a paolien ira so segseguradon nasumpal a parad si Jesus et singa lara mabilay.
15. Akin a walaan si Abraham na rason pian manisia ed kioli?
15 Si Abraham so walaan na rason pian manilalo ed kioli, lapud ta nen sikato tan say akulaw ton si Sara so matakken la, tan tinmunda la so pakasarag dan manilalak, mamilagron impawil na Dios so pakayari ran manilalak. Singa itan inmoli. (Genesis 18:9-11; 21:1-3; Hebreos 11:11, 12) Sanen ngalngali la 25 años so ilalak dan si Isaac, ingganggan na Dios si Abraham ya ibagat to so ilalak to. Balet, sanen kuan’lan pateyen nen Abraham si Isaac pian ibagat, inegnaan na anghel nen Jehova so lima to. Si Abraham et ‘minotektek to ya anggan dia ed saray inatey ni, nayarian na Dios so mamaalagey ed [si Isaac]; diman met so pinawilan to ya angawat ed aliling.’—Hebreos 11:17-19; Genesis 22:1-18.
16. Anto so aalagaren nen Abraham a naugip la natan ed patey?
16 Nanilalo si Abraham ed kioli diad silong na uley na Mesias, say insipan a Bini. Wala ni’d tawen so Anak na Dios et naimano to la so pananisia nen Abraham. Nen sikatoy nagmaliw a toon Jesu-Kristo, inkuan to’d saray Judio: “Si ama yon Abraham nanggayagan akanengneng ed agew ko.” (Juan 8:56-58; Uliran 8:30, 31) Naugip la natan si Abraham ed patey, a manaalagar ed kioli’d bilay diad dalin diad silong na Mesianikon Panarian na Dios.—Hebreos 11:8-10, 13.
Paneknek Manlapud Ganggan tan say Salmos
17. Panon a tinukoy na “saray bengatla a nisulat ed Ganggan” so inkioli nen Jesu-Kristo?
17 Mitunosan so ilalo nen Pablo ed kioli diad “saray bengatla a nisulat ed Ganggan.” Oniay kuan na Dios ed saray Israelita: “Nepeg yo so mangyakar ed satan na pungo na saray unaan a bunga na aanien yo ra ed saserdote. Et [diad Nisan 16] sikato yandawes to naani a yapay ed arapan nen Jehova, pian naako a nipaakar ed sikayo.” (Levitico 23:9-14) Lapud wala lagi ed kanonotan nen Pablo iyan ganggan, oniay insulat to: “Si Kristo pinaoli a binmilay ed saray inatey, a sikato so inmunan bunga na saray naugip.” Bilang say “inmunan bunga,” si Jesus so apaoli nen Nisan 16, 33 K.P. Diad saginonor, legan na kiwawala to, wala so kioli na ‘saray ontumbok a bunga’—saray alanaan na espiritu a papatumbok to.—1 Corinto 15:20-23; 2 Corinto 1:21; 1 Juan 2:20, 27.
18. Panon ya impanengneng nen Pedro a say kioli nen Jesus et nipasakbay la ed Salmos?
18 Itatarya met na Salmos so paneknek nipaakar ed kioli. Nen agew na Pentecostes 33 K.P., inaon nen apostol Pedro so Salmo 16:8-11, a kuanto: “Inkuan nen David nipaakar ed [Kristo], ‘Sankanengneng ko lawas so Katawan ed arap to; ta wala ed nikawanan ko, pian agak naani nagalaw: Kanian linmiket so pusok, tan ginmayaga so dilak; laut ni say laman ko manpainawa ed ilalo: Ta agmo paulyan so kamarerwak a manayam ed Hades, tan agmo met yabuloy a say santom nanengneng to so kabulok.’” Inyarum ni nen Pedro: “[Si David] nen apatnag to so saya, sinalita to so nipaakar ed kioli ed bilay nen Kristo, ya agnapaulyan ed Hades, nisay laman to met agto nanengneng so kabulok. Sayan Jesus pinaoli Dios ed bilay.”—Gawa 2:25-32.
19, 20. Kapigan so impangaon nen Pedro ed Salmo 118:22, tan panon iyan misiglaotan ed impatey tan inkioli nen Jesus?
19 Kayari na pigaran agew, inmalagey si Pedro ed arap na Sanhedrin tan inaon to lamet iray walad Salmos. Sanen sikatoy atepetan no panon so impamaabig to’d sakey a lupoy a mipapayabol, oniay inkuan na apostol: “Amtaen yo ya amin, tan lapag na baley ya Israel, a dia ed ngaran nen Jesu-Kristo a taga-Nazaret, a sikato so impasak yo ed krus [“panamairapan a kiew,” NW], et sikato so pinaoli Dios ed bilay dia ed saray inaatey, lapud sikato sayan too wadian makmaksil ed arap yo. Sikato [si Jesus] so bato ya impulisa’yo a managpaalagey na abung, et sikato so agawan ulo ed suyok. Et anggapo so arum a kilabanan: ta anggapo so arum a ngaran ed lepsag na tawen, a niiter ed saray totoo, a nayarin kilabanan yo.”—Gawa 4:10-12.
20 Satan so inaon nen Pedro ed Salmo 118:22, ya inyaplika to so ibabaga na satan nipaakar ed ipatey tan kioli nen Jesus. Si Jesus so impulisay na saray Judio lapud sikaray sinugsogan na saray relihyoson papangulo. (Juan 19:14-18; Gawa 3:14, 15) Say impangipulisay na ‘saray managpaalagey’ ed bato so nansumpal ed impatey nen Kristo, balet ‘say impagmaliw na bato ya ulo na suyok’ so mangipapabitar ed iyoli to ed maespiritun gloria ed tawen. Unong ya impasakbay la na salmista, ‘saya so ginawa nen Jehova.’ (Salmo 118:23) Say impagmaliw na ‘bato’ ya Ulo na suyok so managlawi ed kitandoro to bilang Aturon-Ari.—Efeso 1:19, 20.
Apabiskeg Lapud Ilalo ed Kioli
21, 22. Anton ilalo so imbalikas nen Job, unong a nikurit ed Job 14:13-15, tan panon iyan makaligliwa ed saray maneermen natan?
21 Anggaman agtayo nin balot personal ya akanengneng na inmoli manlapud saray inaatey, naimano tayo la so pigaran Makasulatan a salaysay a mangipapaseguro’d sikatayo nipaakar ed kioli. Naligliwa itayo sirin ed ilalo ya imbalikas na maptek a toon si Job. Sanen sikatoy maniirap, oniay inyey-ey to: “O komon ta iyamot moak [Jehova] diad Sheol, . . . pian turoen mo ed siak so sakey a tinandaan a panaon, tan nonoten moak! No say sakey a too ompatey, ombilay ta lamet? . . . Ontawag ka, et onebat ak ed sika: manpilalek ka ed gawa na saray limam.” (Job 14:13-15) ‘Pampilalekan na Dios so gawa na saray lima to,’ a pipirawaten ton tuloy a paolien si Job. Agaylan ilalo itan ed sikatayo!
22 Nayarin mansakit so sakey a matakot ed Dios a kapamilyaan, a singa si Job, tan nayarin makasagmak ni ingen na ipapatey. Makanangis ed ermen so inateyan, a singa met si Jesus sanen inatey si Lazaro. (Juan 11:35) Balet agaylan makaligliwa so pakaamtan ontawag so Dios tan onebat iramay walad pakanodnonotan to! Singano kasemsempet da labat a manlapud sakey a biahe—ya agla mansasakit odino mabeblay, noagta mabunigas la.
23. Panon so impangibalikas na arum ed kompiyansa ra ed ilalo ed kioli?
23 Onia so insulat na saray kapananisiaan sanen inatey so sakey a matoor tan matakken lan Kristiano: “Ipangasi yon awaten so piaambegya min maong ed impatey na ina yo. Maganggano labat la et sikatoy nanengneng tayo lamet—maganggana tan makmaksil!” Onia met so inkuan na atateng ya inatey so anak dan laki: “Agaylay pampirawat mi ed panaon sano ombangon la si Jason! Sikatoy onnengneng ed kaliberliber to tan nanengneng to lan siansia so Paraison pitamitam to. . . . Agaylan makagungguna ed sikatayo a mangaaro’d sikato so kiwala met diman.” On, agaylay pisasalamat tayo ta segurado so ilalo ed kioli!
Anto so Ebat Yo?
• Panon itayon nagunggunaan ed pananisia’d probisyon na Dios nipaakar ed iyoli na saray inaatey?
• Antoran agawa a nikurit ed Kasulatan so mangiter ed sikatayo na rason pian manilalo ed kioli?
• Akin a nibagan say kioli et abayag lan ilalo?
• Anton makapabiskeg ya ilalo so pakaligliwaan tayo nipaakar ed saray inaatey?
[Tepetepet Parad Panagaral]
[Litrato ed pahina 10]
Lapud pakayarin inter nen Jehova, binilay nen Elias so ilalak na sakey a balon bii
[Litrato ed pahina 12]
Sanen binilay nen Jesus so anak a bii nen Jairo, nikelkelawan iray atateng to tekep na pirmin liket
[Litrato ed pahina 15]
Nen agew na Pentecostes 33 K.P., makpel a pinekderan nen apostol Pedro a si Jesus so binmilay manlapud saray inaatey