Tinaon a Miting Oktubre 7, 2000

SAY TINAON A MITING na saray membro na Watch Tower Bible and Tract Society of Pennsylvania so nagawa no Oktubre 7, 2000, diad Assembly Hall na Tastasi nen Jehova, 2932 Kennedy Boulevard, Jersey City, New Jersey. Onggapo so unonan miting na saray membro lambengat ed oras na 9:15 na kabuasan, a tumbokan na lapag a tinaon a miting diad oras na 10:00 na kabuasan.

Nepeg ya ipaamta la natan na saray membro na korporasyon ed Opisina na Sekretaryo no wala so antokaman ya impansalat ed address a pangipawitay sulat ed sikara legan na apalabas a taon ta pian saray regular a sulat na abiso tan saray manangilaman (proxy) so makasabin tampol ed sikara legan na Hulyo.

Saray manangilaman, ya ipawit ed saray membro katekep so abiso na tinaon a miting, so ipawil ta pian makasabi ed Opisina na Sekretaryo na Sosyedad ya ag-onlampas ed Agosto 1. Nepeg a kompletoen tan ipawil a tampol na kada membro so manangilaman to, ya ibaga no sikatoy makaatendi a personal ed miting odino andi. Say impormasyon a niiter ed kada manangilaman so nepeg a seguroen ed sayan punto, ta satan so pangibasiyan pian naamtaan no siopa so personal a makaatendi.

Iilaloan a say intiron sesyon, pati say pormal a business meeting tan saray report, so nasumpal ed ala 1:00 na ngarem odino onlampas na daiset. Anggapo so sesyon ed ngarem. Lapud limitado so espasyo, saray walaay ticket lambengat so makaloob. Anggaporay uksoyan a nagawa ed pangikonekta na tinaon a miting ed arum ya auditoryum diad panamegley na linya na telepono.